Предлагаем вашему вниманию новое издание Требника в 2-х частях, осуществленное Издательским отделом Киево-Печерской Лавры. В первой части собраны последования и молитвы, наиболее часто используемые священнослужителями, вторая состоит из чинов и молитв, используемых, в основном, несколько раз в году.
Богослужебные чины, представленные в Требнике, изложены таким образом, что при совершении треб нет необходимости отвлекаться на поиск не написанных полностью на ряду тех или иных молитв, псалмов, зачал апостольских и Евангельских, дабы возможно было вести благообразно, стройно священнодействие.
Это издание дополнено чинопоследованиями и молитвами, вызванными современностью. Например, чином освящения самолета, молитвой перед хиругическим действием, благословением супругов, проживших много лет без церковного благословения, и другими, не вошедшими в иные издания требников, или содержащимися в отдельных книжицах.
Надеемся, что настоящее издание будет удобопользуемым в совершении священнодействий нашей Святой Православной Церкви, во Славу Божию и на спасение овец Христовых.
Содержание
Глава́ 1. Моле́бное пе́ние на Но́вый го́д Глава́ 2. Моле́бное пе́ние в дни́ пра́здников гражда́нских Глава́ 3. Моли́тва на Рождество́ Христо́во, сыно́в духо́вных Глава́ 4. После́дование вели́каго освяще́ния во́ды святы́х богоявле́ний Глава́ 5. Чи́н благослове́ния све́щ на Сре́тение Госпо́дне. Глава́ 6. Моли́твы в нача́ле поста́ святы́я Четыредеся́тницы, Глава́ 7. Моли́тва на благослове́ние ва́ий Глава́ 8. Моли́тва во е́же благослови́ти бра́шна, мяса́, во святу́ю и вели́кую неде́лю Па́схи Глава́ 9. Моли́тва, е́же благослови́ти сыр и я́ица Глава́ 10. Моли́тва на благослове́ние а́ртоса во Святу́ю Неде́лю Па́схи Глава́ 11. Моли́тва на раздробле́ние а́ртоса в суббо́ту Све́тлыя неде́ли Глава́ 12. Моли́тва в причаще́нии гро́здия в 6-й де́нь а́вгуста Глава́ 13. Моли́тва о принося́щих нача́тки овоще́й Глава́ 14. Чи́н быва́емый, а́ще случи́тся чесому́ скве́рному или́ нечи́стому но́во впа́сти в сосу́д вина́, или́ еле́а, или́ ме́да, или́ ино́го чесого́ Глава́ 15. Моли́тва о копа́нии кла́дязя Глава́ 16. Моли́тва над кла́дязем но́вым Глава́ 17. Чи́н быва́емый, а́ще случи́тся чесому́ скве́рному якову́любо впа́сти в кла́дязь водны́й Глава́ 18. Чи́н благослове́ния но́ваго кла́дязя Глава́ 19. Моли́тва о скве́рно я́дших Глава́ 20. Моли́тва над сосу́дом оскве́рншимся Глава́ 21. Моли́тва над пшени́цею оскве́рншеюся, или́ муко́ю или́ ви́дом не́киим Глава́ 22. Моли́тва над со́лию Глава́ 23. Моли́тва моле́бная на вся́кую лити́ю Глава́ 24. Моли́тва во е́же благослови́ти ста́до Глава́ 25. Моли́тва над се́янием Глава́ 26. Моли́тва над гумно́м Глава́ 27. Моли́тва, о е́же благослови́ти мре́жи Глава́ 28. Чи́н благослове́ния пче́л Глава́ 29. Благослове́ние ро́ев пче́льных, во у́лия но́ва всажде́нных Глава́ 30. Моли́тва, е́же освяти́ти како́е-ли́бо благово́нное зе́лие Глава́ 31. После́дование моле́бнаго пе́ния, пева́емаго во вре́мя бездо́ждия Глава́ 32. После́дование моле́бнаго пе́ния ко Го́споду Бо́гу на́шему Иису́су Христу́, пева́емаго во вре́мя безве́дрия, егда́ до́ждь мно́гий безго́дно и́дет Глава́ 33. После́дование моле́бнаго пе́ния во вре́мя губи́тельнаго пове́трия и смертоно́сныя зара́зы Глава́ 34. Чи́н обхожде́ния поле́й насеянных Глава́ 35. После́дование над пе́щию Глава́ 36. Чи́н быва́емый на ни́вах, или́ виногра́де, или́ вертогра́де, а́ще случи́тся вреди́тися от гадо́в, или́ ины́х ви́дов Глава́ 37. Чи́н быва́емый при основа́нии це́ркве и водруже́нии Креста́ Глава́ 38. Чи́н моли́твенный на поставле́ние креста́ на ве́рх кро́ва новосозда́нныя це́ркве Глава́ 39. Чи́н освяще́ния хра́ма, от архиере́а твори́маго Глава́ 40. Чи́н благослове́ния и освяще́ния сосу́дов служе́бных: си́есть ди́скоса, ча́ши, звезди́цы и лжи́цы, с тремя́ и́х покро́вцы, предложе́нных вку́пе Глава́ 41. Моли́тва над еди́ным ди́скосом но́вым Глава́ 42. Моли́тва над поти́ром еди́ным, си́есть, ча́шею но́вою Глава́ 43. Моли́тва е́же осо́бне благослови́ти но́вую ди́скосную звезду́ Глава́ 44. Моли́тва, е́же благослови́ти но́выя покро́вцы, к покрове́нию Святы́х Та́ин служа́щыя Глава́ 45. Чи́н благослове́ния но́ваго киво́та, или́ сосу́да, в не́мже храни́мы бы́ти и́мут Боже́ственныя Христо́вы Та́йны Глава́ 46. Чи́н благослове́ния илито́на Глава́ 47. Чи́н благослове́ния или́ освяще́ния но́вых свяще́ннических оде́жд: си́есть стихаря́, епитрахи́ля, по́яса, по́ручей и фело́ни Глава́ 48. Чи́н благослове́ния инди́тий, или́ оде́жд и покрыва́л Боже́ственныя трапе́зы и же́ртвенника Глава́ 49. Чи́н благослове́ния и освяще́ния новосооруже́ннаго Креста́ Глава́ 50. Чи́н благослове́ния но́вых сосу́дов церко́вных, вку́пе мно́гих, или́ еди́наго, яковы́ су́ть: кади́льница, ка́ция, блю́до анафо́рное, копие́, куку́мы, си́есть водоно́сные сосу́дцы, и ины́я олта́рныя принадле́жности Глава́ 51. Чи́н благослове́ния но́ваго киво́та, или́ ина́го ко́его сосу́да, или́ ко́его ли́бо храни́лища крестообра́зно или́ и́нако к хране́нию моще́й святы́х сооруже́ннаго Глава́ 52. Чи́н благослове́ния и освяще́ния иконоста́са Глава́ 53. Чи́н благослове́ния кампа́на, си́есть ко́локола или́ зво́на Глава́ 54. Чи́н благослове́ния и освяще́ния ме́ста, иде́же погребатися бу́дут телеса́ сконча́вшихся христиа́н, си́есть гробия, кла́дбища Глава́ 55. Слу́жба о в темни́цах и в заточе́нии су́щих мно́гих, или́ о еди́ном Глава́ 56. Чи́н благослове́ния ко́лива. Глава́ 57. Чи́н благослове́ния фимиа́ма, си́есть кади́ла
Глава́ 1. Моле́бное пе́ние на Но́вый го́д
По окончании литургии глаголет диакон:
Благослови, владыко.
Иере́й: Благослове́нно Ца́рство Отца́, и Сы́на, и Свята́го Ду́ха, ны́не и при́сно, и во ве́ки веко́в.
Ли́к: Ами́нь.
И чту́тся: Прииди́те поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Приидите, поклони́мся и припаде́м Самому́ Христу́, Царе́ви и Бо́гу на́шему.
И псалом 64.
Тебе́ подоба́ет песнь, Бо́же, в Сио́не, и Тебе́ возда́стся моли́тва во Иерусали́ме. Услы́ши моли́тву мою́, к Тебе́ вся́ка плоть прии́дет. Словеса́ беззако́нник премого́ша нас, и нече́стия на́ша Ты очи́стиши. Блаже́н, eго́же избра́л еси́ и прия́л, всели́тся во дво́рех Твои́х. Испо́лнимся во благи́х до́му Твоего́, свят храм Твой, ди́вен в пра́вде. Услы́ши ны, Бо́же, Спаси́телю наш, упова́ние всех конце́й земли́, и су́щих в мо́ри дале́че, уготовля́яй го́ры кре́постию Свое́ю, препоя́сан си́лою, смуща́яй глубину́ морску́ю, шу́му волн eго́ кто постои́т? Смяту́тся язы́цы, и убоя́тся живу́щии в конца́х от зна́мений Твои́х, исхо́ды у́тра и ве́чера украси́ши. Посети́л еси́ зе́млю и упои́л еси́ ю́, умно́жил еси́ обогати́ти ю́. Река́ Бо́жия напо́лнися вод. Угото́вал еси́ пи́щу им, я́ко та́ко [есть] угото́вание. Бразды́ ея́ упо́й, умно́жи жи́та ея́, в ка́плях ея́ возвесели́тся возсия́ющи. Благослови́ши вене́ц ле́та бла́гости Твоея́, и поля́ Твоя́ испо́лнятся ту́ка, разботе́ют кра́сная пусты́ни, и ра́достию хо́лми препоя́шутся. Оде́яшася о́вни о́вчии, и удо́лия умно́жат пшени́цу, воззову́т, и́бо воспою́т.
Сла́ва, и ны́не. Аллилу́иа, трижды.
Посем диа́кон глаго́лет ектению́:
Ми́ром Го́споду помо́лимся.
О свы́шнем ми́ре и спасе́нии душ на́ших Го́споду помо́лимся.
Ли́к: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й и соедине́нии всех, Го́споду помо́лимся.
Ли́к: Го́споди, поми́луй.
О святе́м хра́ме сем, и с ве́рою, благогове́нием, и стра́хом Бо́жиим входя́щих в о́нь, Го́споду помо́лимся.
Ли́к: Го́споди, поми́луй.
О Вели́ком Господи́не и отце́ на́шем, Святе́йшем Патриа́рхе Кири́лле, и о господи́не нашем преосвяще́ннейшем митрополи́те (или́ архиепи́скопе, или́ епи́скопе) имярек, честне́м пресви́терстве, во Христе́ диа́констве и о все́м при́чте и лю́дех, Го́споду помо́лимся.
Ли́к: Го́споди, поми́луй.
О Богохрани́мей стране́ на́шей, власте́х и во́инстве ея́ Го́споду помо́лимся.
Ли́к: Го́споди, поми́луй.
О гра́де сем (а́ще в монастыре́: О святе́й оби́тели сей), вся́ком гра́де, стране́ и ве́рою живу́щих в них, Го́споду помо́лимся.
Ли́к: о́споди, поми́луй.
О е́же ми́лостивно ны́нешнее благодаре́ние и мольбу́ на́с недосто́йных рабо́в свои́х в пренебе́сный Сво́й же́ртвенник прия́тии, и благоутро́бно поми́ловати на́с, Го́споду помо́лимся.
Ли́к: Го́споди, поми́луй.
О е́же благоприя́тным бытии́ моле́ниям на́шим, и прости́ти на́м и все́м лю́дем Свои́м вся́ согреше́ния во́льная и нево́льная, в мимоше́дшем ле́те зле́ на́м соде́янная, Го́споду помо́лимся.
Ли́к: Го́споди, поми́луй.
О е́же благослови́ти нача́ток и провожде́ние ле́та сего́, благода́тию человеколю́бия Своего́: времена́ же ми́рна, благорастворе́нны возду́хи, и безгре́шен на́м в здра́вии с дово́льством живо́т дарова́ти, Го́споду помо́лимся.
Ли́к: Го́споди, поми́луй.
О е́же отврати́ти от на́с ве́сь гне́в Сво́й, пра́ведно на ны́ гре́х ра́ди на́ших дви́жимый, Го́споду помо́лимся.
Ли́к: Го́споди, поми́луй.
Ли́к: Го́споди, поми́луй.
О е́же отгна́ти от на́с вся́ душетле́нныя стра́сти и растле́нныя обы́чаи: стра́х же Сво́й боже́ственный всади́ти в сердца́ на́ша, ко исполне́нию за́поведей Его́, Го́споду помо́лимся.
Ли́к: Го́споди, поми́луй.
О е́же обнови́ти ду́х пра́вый во утро́бах на́ших, и укрепи́ти на́с в правосла́вной ве́ре, и спе́шных к де́ланию до́брых де́л, и исполне́нию все́х за́поведей Его́ сотвори́ти, Го́споду помо́лимся.
Ли́к: Го́споди, поми́луй.
О е́же низложи́ти вся́ е́реси и отсту́пства, и насади́ти всю́ду правове́рие и благоче́стие, и обрати́ти все́х отступа́ющих от пра́выя ве́ры к позна́нию Своея́ и́стины, и соедини́ти и́х святе́й Свое́й Правосла́вной Це́ркви, Го́споду помо́лимся.
Ли́к: Го́споди, поми́луй.
О же изба́вити Це́рковь святу́ю Свою́, и все́х на́с от вся́кия ско́рби, беды́, гне́ва и ну́жды, и от все́х враго́в ви́димых и неви́димых, здра́вием же, долгоде́нствием, и ми́ром, и а́нгел Свои́х ополче́нием ве́рных Свои́х всегда́ огради́ти, Го́споду помо́лимся.
Ли́к: Го́споди, поми́луй.
Заступи́, спаси́, поми́луй и сохрани́ на́с, Бо́же, Твое́ю благода́тию.
Ли́к: Го́споди, поми́луй.
Пресвяту́ю, Пречи́стую, Преблагослове́нную, Сла́вную Влады́чицу На́шу Богоро́дицу и Присноде́ву Мари́ю со все́ми святы́ми помяну́вши са́ми себя́, и дру́г дру́га, и ве́сь живо́т на́ш Христу́ Бо́гу предади́м.
Ли́к: Тебе́, Го́споди.
Свяще́нник возглаша́ет: Я́ко подоба́ет Тебе́ вся́кая сла́ва, че́сть и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Ли́к: Ами́нь.
Посе́м: Бо́г Госпо́дь, и яви́ся на́м, благослове́н Гряды́й во и́мя Госпо́дне.
Сти́х 1: Испове́дайтеся Го́сподеви, я́ко Бла́г, я́ко в ве́к ми́лость Его́.
Сти́х 2: Обыше́дше обыдо́ша мя́, и и́менем Госпо́дним противля́хся и́м.
Сти́х 3: Не умру́, но жи́в бу́ду, и пове́м дела́ Госпо́дня.
Сти́х 3: Ка́мень, его́же небрего́ша зи́ждущии, се́й бы́сть во главу́ у́гла, от Го́спода бы́сть се́й и е́сть ди́вен во очесе́х на́ших.
И тропари́ сия́, гла́с 4.
Благода́рни су́ще недосто́йнии раби́ Твои́, Го́споди, о Твои́х вели́ких благодея́ниих на на́с бы́вших сла́вяще Тя́ хва́лим, благослови́м, благодари́м, пое́м и велича́ем Твое́ благоутро́бие и ра́бски любо́вию вопие́м Ти́: благоде́телю Спа́се на́ш, сла́ва Тебе́.
Сла́ва, гла́с 3:
Твои́х благодея́ний и даро́в ту́не я́ко раби́ непотре́бнии, сподо́бльшеся Влады́ко к Тебе́ усе́рдно притека́юще благодаре́ние по си́ле прино́сим, и Тебе́ я́ко благоде́теля и Творца́ сла́вяще, вопие́м: сла́ва Тебе́ Бо́же преще́дрый.
И ны́не, гла́с 2:
Всея́ тва́ри Соде́телю времена́ и ле́та во Свое́й вла́сти положи́вый благослови́ вене́ц ле́та бла́гости Твоея́, Го́споди, сохраня́я в ми́ре на́с и гра́д Тво́й, моли́твами Богоро́дицы, и спаси́ ны́.
Диа́кон: Во́нмем.
Иере́й: Ми́р все́м.
Ли́к: И ду́хови твоему́.
Диа́кон: Прему́дрость, во́нмем.
Чте́ц: Проки́мен, гла́с 4: Воспою́ Го́сподеви, благоде́явшему мне́, и пою́ и́мени Го́спода Вы́шняго.
Сти́х: Возра́дуется се́рдце мое́ о спасе́нии Твое́м.
Посе́м чте́т Апо́стол к Тимофе́ю, зача́ло 282:
Ча́до Тимофее, молю́ у́бо пре́жде всех твори́ти моли́твы, моле́ния, проше́ния, благодаре́ния за вся челове́ки, за царя́ и за вся, и́же во вла́сти суть, да ти́хое и безмо́лвное житие́ поживе́м во вся́ком благоче́стии и чистоте́. Сие́ бо добро́ и прия́тно пред Спаси́телем на́шим Бо́гом, И́же всем челове́ком хо́щет спасти́ся и в ра́зум и́стины приити́. Еди́н бо есть Бог, и еди́н хода́тай Бо́га и челове́ков, челове́к Христо́с Иису́с, Да́вый Себе́ избавле́ние за всех: Ему́ же че́сть и сла́ва во ве́ки веко́в, ами́нь.
Иере́й: Ми́р ти.
Чтец: И ду́хови твоему́.
Диа́кон: Прему́дрость.
Чтец: Аллилу́ия, глас 4.
Таже диакон: И сподо́битися на́м слы́шанию Свята́го Ева́нгелия Го́спода Бо́га мо́лим.
Ли́к: Го́споди, поми́луй три́жды.
Диа́кон: Прему́дрость, прости́, услы́шим Свята́го Ева́нгелия.
Иере́й: Ми́р всем.
Лик: И ду́хови твоему́.
Иере́й: От Луки Святаго Евангелия чтение.
Лик: Сла́ва Тебе́, Го́споди, сла́ва Тебе́. Диа́кон: Во́нмем.
И а́бие иере́й чтет Евангелие от Луки, зачало 13:
Во вре́мя о́но, прии́де в Назаре́т, иде́же бе воспита́н. И вни́де, по обы́чаю Своему́, в день суббо́тный в со́нмище, и воста́ чести́. И да́ша Ему́ кни́гу Иса́ии проро́ка, и разгну́в кни́гу, обре́те ме́сто, иде́же бе напи́сано: Дух Госпо́день на Мне, Его́же ра́ди пома́за Мя благовести́ти ни́щим, посла́ Мя исцели́ти сокруше́нныя се́рдцем, пропове́дати плене́нным отпуще́ние и слепы́м прозре́ние, отпусти́ти сокруше́нныя во отра́ду, пропове́дати ле́то Госпо́дне прия́тно. И согну́в кни́гу, отда́в слузе́, се́де, и всем в со́нмищи о́чи бе́ху зря́ще Нань. И нача́т глаго́лати к ним, я́ко днесь сбы́стся писа́ние сие́ во у́шию ва́шею. И вси свиде́тельствоваху Ему́, и дивля́хуся о словесе́х благода́ти, исходя́щих из уст Его́
Лик: Сла́ва Тебе́, Го́споди, сла́ва Тебе́.
А́бие диа́кон глаго́лет ектению́ сию́:
Рце́м вси́ от всея́ души́, и от всего́ помышле́ния на́шего рце́м.
Ли́к: Го́споди, поми́луй.
Го́споди вседержи́телю, Бо́же оте́ц на́ших, мо́лим Ти́ ся́ услы́ши и поми́луй.
Ли́к: Го́споди, поми́луй.
Поми́луй на́с Бо́же, по вели́цей ми́лости Твое́й, мо́лим Ти ся, услы́ши и поми́луй.
Ли́к: Го́споди поми́луй, три́жды.
Еще́ мо́лимся о Вели́ком Господи́не и отце́ на́шем, Святе́йшем Патриа́рхе Кири́лле, и о господи́не нашем преосвяще́ннейшем митрополи́те (или́ архиепи́скопе, или́ епи́скопе) имярек, честне́м пресви́терстве, во Христе́ диа́констве и о все́м при́чте и лю́дех, Го́споду помо́лимся.
Лик: Го́споди поми́луй, три́жды.
Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Благодаря́ще со стра́хом и тре́петом, я́ко раби́ непотре́бнии, Твоему́ благосе́рдию, Спа́се и Влады́ко на́ш Го́споди, о Твои́х благодея́ниях, я́же изли́л на рабе́х Твои́х, и припа́даем и славосло́вие Тебе́ я́ко Бо́гу прино́сим и умиле́нно вопие́м: изба́ви от все́х бе́д рабы́ Твоя́, и всегда́ я́ко Ми́лостив испо́лни во благи́х жела́ния все́х на́с, приле́жно мо́лимся Ти́, услы́ши и поми́луй.
Ли́к: Го́споди поми́луй, три́жды.
О е́же благослови́ти вене́ц наступа́емаго ле́та бла́гостию Свое́ю, и утоли́ти в на́с вся́ вражды́, нестрое́ния и междоусо́бныя бра́ни, пода́ти же ми́р, тве́рдую и нелицеме́рную любо́вь, благочи́нное же строе́ние и доброде́тельное житие́, мо́лим Ти́ ся́, всеблаги́й Го́споди, услы́ши и поми́луй.
Ли́к: Го́споди поми́луй, три́жды.
О е́же не помяну́ти безчи́сленная беззако́ния и лука́вая на́ша дея́ния, в мимоше́дшем ле́те бы́вшая, и не возда́ти на́м по дело́м на́шим: но в ми́лости и щедро́тах помяну́ти на́с, мо́лим Ти́ ся́, милосе́рдый Го́споди, услы́ши и поми́луй.
Ли́к: Го́споди поми́луй, три́жды.
О е́же пода́ти дожди́ благовре́менны, ра́нны же и по́здны, ро́су плодоно́сну, ве́тры ме́рны и благорастворе́нны, и теплоту́ со́лнечную возсия́ти, мо́лим Ти́ ся́, всеще́дрый Го́споди, услы́ши и поми́луй.
Ли́к: Го́споди поми́луй, три́жды.
О е́же помяну́ти Це́рковь святу́ю Свою́, и укрепи́ти, утверди́ти же, разшири́ти, и умири́ти ю́, и невреди́му а́довыми враты́, и все́ми наве́ты ви́димых и неви́димых враго́в непребори́му во ве́ки соблюсти́, мо́лим Ти́ ся́, вседержа́вный Влады́ко, услы́ши и поми́луй.
Ли́к: Го́споди поми́луй, три́жды.
О е́же искорени́ти и угаси́ти все́ богоху́льное безбо́жник нече́стие, и ца́рство и́х ско́ро разруши́ти, и правове́рным преда́ти, мо́лим Ти́ ся́, всеси́льный Го́споди, услы́ши и поми́луй.
Ли́к: Го́споди поми́луй, три́жды.
О е́же изба́витися на́м в сие́ гряду́щее ле́то, и во все́ дни́ живота́ на́шего от гла́да, губи́тельства, тру́са, пото́па, гра́да, огня́, меча́, наше́ствия иноплеме́нных, и междоусо́бныя ра́ти, и вся́кия смертоно́сныя ра́ны, ско́рби же и ну́жды, мо́лим Ти́ ся́, милосе́рде Го́споди, услы́ши и поми́луй.
Ли́к: Го́споди поми́луй, три́жды.
Иере́й, возгла́с:
Услы́ши ны́, Бо́же Спаси́телю на́ш, упова́ние все́х конце́в земли́ и су́щих в мо́ре дале́че: и ми́лостив, ми́лостив бу́ди, Влады́ко, о гресе́х на́ших и поми́луй ны́. Ми́лостив бо и человеколю́бец, Бо́г еси́, и Тебе́ сла́ву возсыла́ем, Отцу́ и Сы́ну, и Свято́му Ду́ху, ны́не и при́сно и во ве́ки веко́в.
Ли́к: Ами́нь.
Диа́кон: Го́споду помо́лимся.
Ли́к: Го́споди поми́луй.
Влады́ко Го́споди Бо́же на́ш, исто́чник жи́зни и безсме́ртия, всея́ тва́ри ви́димыя и неви́димыя Соде́телю, времена́ и ле́та во Свое́й вла́сти положи́вый, и управля́яй вся́ческая прему́дрым и всеблаги́м Твои́м про́мыслом. Благодари́м о щедро́тах Твои́х, я́же удиви́л еси́ на на́с в мимоше́дшее вре́мя живота́ на́шего. Мо́лим Тя́, всеще́дрый Го́споди! Благослови́ вене́ц наступа́ющаго ле́та, Твое́ю Бла́гостию. Спаси́, Го́споди и поми́луй Вели́каго Господи́на и отца́ на́шего Кири́лла, Святе́йшаго Патриа́рха Моско́вскаго и всея́ Руси́, и господи́на на́шего преосвяще́ннейшаго митрополи́та (или́ архиепи́скопа, или́ епи́скопа) и́мярек, его́ же о́бласть. Умно́жи дни́ жития́ и́х в непоколеби́мом здра́вии, и во все́х доброде́телех преуспе́яние и́м да́руй. Пода́ждь свы́ше блага́я Твоя́ и все́м лю́дем Твои́м, здра́вие же, спасе́ние и во все́м благо́е поспеше́ние. Це́рковь Твою́ святу́ю, гра́д се́й и вся́ гра́ды и страны́ от вся́каго зла́го обстоя́ния изба́ви, ми́р и безмяте́жие те́м да́руй: Тебе́ Безнача́льному Отцу́ со Единоро́дным Твои́м Сы́ном, всесвяты́м и животворя́щим Твои́м Ду́хом во Еди́ном Существе́ сла́вимому Бо́гу, всегда́ благодаре́ние приноси́ти, и пресвято́е и́мя Твое́ воспева́ти да сподо́биши.
Возглаше́ние:
Сла́ва Тебе́, Бо́гу, Благода́телю на́шему во ве́ки веко́в.
Ли́к: Ами́нь.
И а́бие пое́т славосло́вие вели́кое, си́есть: Сла́ва в вы́шних к Бо́гу: или́ вме́сто того́, пе́снь свята́го Амвро́сия, епи́скопа Медиола́нскаго:
Тебе́ Бо́га хва́лим, Тебе́ Го́спода испове́дуем, Тебе́ преве́чнаго Отца́ вся земля́ велича́ет; Тебе́ вси А́нгели, Тебе́ Небеса́ и вся Си́лы, Тебе́ Херуви́ми и Серафи́ми непреста́нными гла́сы взыва́ют: Свят, Свят, Свят Госпо́дь Бог Савао́ф, по́лна суть Небеса́ и земля́ вели́чества сла́вы Твоея́. Тебе́ пресла́вный апо́стольский лик, Тебе́ проро́ческое хвале́бное число́, Тебе́ хва́лит пресве́тлое му́ченическое во́инство; Тебе́ по всей вселе́нней испове́дует Свята́я Це́рковь: Отца́ непостижи́маго вели́чества, покланя́емаго Твоего́ и́стиннаго и Единоро́днаго Сы́на, и Свята́го Уте́шителя Ду́ха.
Ты Царю́ сла́вы, Христе́, Ты Отца́ присносу́щный Сын еси́; Ты ко избавле́нию прие́мля челове́ка, не возгнуша́лся еси́ Деви́ческаго чре́ва; Ты одоле́в сме́рти жа́ло, отве́рзл еси́ ве́рующим Ца́рство Небе́сное; Ты одесну́ю Бо́га седи́ши во сла́ве О́тчей, Судия́ приити́ ве́ришися. Тебе́ у́бо про́сим: помози́ рабо́м Твои́м, и́хже честно́ю Кро́вию искупи́л еси́, сподо́би со святы́ми Твои́ми в ве́чной сла́ве Твое́й ца́рствовати. Спаси́ лю́ди Твоя́, Го́споди, и благослови́ достоя́ние Твое́, испра́ви я́, и вознеси́ их во ве́ки. Во вся дни благослови́м Тебе́, и восхва́лим и́мя Твое́ во век, и в век ве́ка. Сподо́би, Го́споди, в день сей без греха́ сохрани́тися нам. Поми́луй нас, Го́споди, поми́луй нас; бу́ди ми́лость Твоя́, Го́споди, на нас, я́коже упова́хом на Тя; на Тя, Го́споди, упова́хом, да не постыди́мся во ве́ки. Ами́нь.
По скончании же сего, диакон: Прему́дрость.
Иере́й: Пресвята́я Богоро́дице, спаси́ нас.
Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Иерей: Сла́ва Тебе́, Христе́ Бо́же, упова́ние на́ше сла́ва Тебе́.
Лик: Сла́ва, и ны́не. Го́споди, поми́луй, три́жды. Благослови.
Иере́й: Христо́с и́стинный Бо́г на́ш, моли́твами Пречи́стыя Своея́ Ма́тере и и все́х святы́х, поми́лует и спасе́т на́с, я́ко бла́г и Человеколю́бец.
Диа́кон же возглаша́ет:
Вели́кому Господи́ну и отцу́ на́шему Кири́ллу, Святе́йшему Патриа́рху Моско́вскому и всея́ Руси́, и господи́ну на́шему преосвяще́ннейшему митрополи́ту (или́ архиепи́скопу, или́ епи́скопу) и́мярек, его́ же о́бласть, Пода́ждь, Го́споди, благоде́нствие и ми́рное житие́, здра́вие же и спасе́ние, и во все́м благо́е поспеше́ние.
Глава́ 2. Моле́бное пе́ние в дни́ пра́здников гражда́нских
Благослови́вшу архиере́ю или́ иере́ю, пое́м:
Царю́ Небе́сный:
Та́же глаго́лет диа́кон, гла́с 2:
Посе́м: Бо́г Госпо́дь и яви́ся на́м, благослове́н Гряды́й во и́мя Госпо́дне.
Сти́х 1: Испове́дайтеся Го́сподеви, я́ко Бла́г, я́ко в ве́к ми́лость Его́.
Сти́х 2: Обыше́дше обыдо́ша мя́, и и́менем Госпо́дним противля́хся и́м.
Сти́х 3: Не умру́, но жи́в бу́ду, и пове́м дела́ Госпо́дня.
Сти́х 3: Ка́мень, его́же небрего́ша зи́ждущии, се́й бы́сть во главу́ у́гла, от Го́спода бы́сть се́й и е́сть ди́вен во очесе́х на́ших.
И тропари́ сия́, гла́с 4.
Благода́рни су́ще недосто́йнии раби́ Твои́, Го́споди, о Твои́х вели́ких благодея́ниих на на́с бы́вших сла́вяще Тя́ хва́лим, благослови́м, благодари́м, пое́м и велича́ем Твое́ благоутро́бие и ра́бски любо́вию вопие́м Ти́: благоде́телю Спа́се на́ш, сла́ва Тебе́.
Сла́ва, и ны́не, гла́с 1: Спаси́, Го́споди, лю́ди Твоя́ и благослови́ достоя́ние Твое́, побе́ды правосла́вным христиа́ном на сопроти́вныя да́руя, и Твое́ сохраня́я Кресто́м Твои́м жи́тельство.
Диа́кон: Во́нмем. Иере́й: Ми́р все́м.
Чте́ц: Проки́мен, гла́с 4: Воспою́ Го́сподеви, благоде́явшему мне́ и пою́ и́мени Го́спода Вы́шняго.
Сти́х: Возра́дуется се́рдце мое́ о спасе́нии Твое́м.
Посе́м чте́т Апо́стол к Ри́мляном, зача́ло 111:
Братие, вся́ка душа́ власте́м предержа́щим да повину́ется, несть бо власть а́ще не от Бо́га, су́щия же вла́сти от Бо́га учинены́ суть. Те́мже противля́яйся вла́сти, Бо́жию повеле́нию противля́ется, противля́ющиися же себе́ грех прие́млют. Кня́зи бо не суть боя́знь до́брым дело́м, но злым. Хо́щеши же ли не боя́тися вла́сти? Благо́е твори́, и име́ти бу́деши похвалу́ от него́. Бо́жий бо слуга́ есть, тебе́ во благо́е. А́ще ли зло́е твори́ши, бо́йся, не бо без ума́ мечь но́сит, Бо́жий бо слуга́ есть, отмсти́тель в гнев зло́е творя́щему. Те́мже потре́ба повинова́тися не то́кмо за гнев, но и за со́весть. Сего́ бо ра́ди и да́ни даете́, служи́тели бо Бо́жии суть, во и́стое сие́ пребыва́юще. Воздади́те у́бо всем до́лжная: ему́же у́бо уро́к, уро́к, а ему́же дань, дань, а ему́же страх, страх, и ему́же честь, честь.
По прочтении Апостола, Аллилу́иа, трижды.
Диа́кон: Премудрость, прости услышим Святаго Евангелия.
Иере́й: Ми́р всем.
Лик: И ду́хови твоему́.
Иере́й: От Матфе́я Свята́го Ева́нгелия чте́ние.
Лик: Сла́ва Тебе́, Го́споди, сла́ва Тебе́.
Диа́кон: Во́нмем.
И иере́й чтет Евангелие от Матфея, зачало 90:
Тогда́ ше́дше фарисе́е, совет прие́мше, я́ко да обольстя́т Его́ сло́вом. И посыла́ют к Нему́ ученики́ своя́ со иродиа́ны, глаго́люще: Учи́телю, ве́мы, я́ко и́стинен еси́, и пути́ Бо́жию вои́стинну учи́ши, и неради́ши ни о ко́мже, не зри́ши бо на лице́ челове́ком. Рцы у́бо нам, что Ти ся мнит? Досто́йно ли есть да́ти кинсо́н ке́сареви, или́ ни? Разуме́в же Иису́с лука́вство их, рече́: что Мя искуша́ете, лицеме́ри? Покажи́те Ми злати́цу кинсо́нную. Они́ же принесо́ша Ему́ пе́нязь. И глаго́ла им: чий о́браз сей и написа́ние? И глаго́лаша Ему́: ке́сарев. Тогда́ глаго́ла им: воздади́те у́бо ке́сарева ке́сареви, и Бо́жия Бо́гови. И слы́шавше диви́шася, и оста́вльше Его́ отыдо́ша.
По Ева́нгелии лик: Сла́ва Тебе́, Го́споди, сла́ва Тебе́.
Диа́кон глаго́лет ектению́:
Поми́луй на́с Бо́же, по вели́цей ми́лости Твое́й, мо́лим Ти ся, услы́ши и поми́луй.
Ли́к: Го́споди поми́луй, три́жды.
Еще́ мо́лимся о Вели́ком Господи́не и отце́ на́шем, Святе́йшем Патриа́рхе Кири́лле, и о господи́не нашем преосвяще́ннейшем митрополи́те (или́ архиепи́скопе, или́ епи́скопе) имярек, честне́м пресви́терстве, во Христе́ диа́констве и о все́м при́чте и лю́дех, Го́споду помо́лимся.
Ли́к: Го́споди поми́луй, три́жды.
Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Неисче́тный в ми́лости Бо́же на́ш, пода́ждь рабо́м Твои́м. прави́телем на́шим, благопоспе́шество Моисе́ево, му́жество Дави́дово и му́дрость Соломо́нову, к сла́ве И́мени Твоего́, мо́лим Ти́ ся́, всесвяты́й Царю́, услы́ши и поми́луй.
Ли́к: Го́споди поми́луй, три́жды.
Благодаря́ще со стра́хом и тре́петом, я́ко раби́ недосто́йнии, Твоему́ благоутро́бию, Спа́се и Влады́ко на́ш Го́споди, о Твои́х благодея́ниях, я́же излия́л еси́ изоби́льно на рабе́х Твои́х, и припа́даем, и славосло́вие Тебе́ я́ко Бо́гу прино́сим, и умиле́нно вопие́м: изба́ви от все́х бе́д рабы́ Твоя́, и всегда́ я́ко ми́лостив, испо́лни во благи́х жела́ние все́х на́с, приле́жно мо́лимся Ти́, услы́ши и поми́луй.
Еще́ мо́лимся за всю́ бра́тию, и за вся́ христиа́ны.
Ли́к: Го́споди поми́луй, три́жды.
Иере́й возгла́с: Услы́ши ны́, Бо́же Спаси́телю на́ш, упова́ние все́х конце́в земли́ и су́щих в мо́ре дале́че: и ми́лостив, ми́лостив бу́ди, Влады́ко, о гресе́х на́ших и поми́луй ны́. Ми́лостив бо и человеколю́бец, Бо́г еси́, и Тебе́ сла́ву возсыла́ем, Отцу́ и Сы́ну, и Свято́му Ду́ху, ны́не и при́сно и во ве́ки веко́в.
Ли́к: Ами́нь.
Диа́кон: Го́споду помо́лимся.
Ли́к: Го́споди, поми́луй.
Иере́й же чте́т моли́тву сию́:
Го́споди Иису́се Христе́ Бо́же на́ш, Бо́же вся́каго милосе́рдия и щедро́т, Его́же ми́лость безме́рна, и человеколю́бия неизсле́димая пучи́на! Ко Твоему́ вели́честву припа́дающе, со стра́хом и тре́петом, я́ко раби́ недосто́йнии, благодаре́ние Твоему́ благоутро́бию о Твои́х благодея́ниих на рабе́х Твои́х бы́вших, ны́не смире́нно принося́ще, я́ко Го́спода, Влады́ку и Благоде́теля сла́вим, хва́лим, пое́м и велича́ем, и припа́дающе па́ки благодари́м, Твое́ безме́рное и неизрече́нное милосе́рдие смире́нно моля́щее. Да я́коже ны́не моле́ние рабо́в Твои́х прия́ти, и ми́лостивно испо́лнити сподо́бил еси́, и во пре́дняя в Твое́й и и́скренняго любви́ и во все́х доброде́телех преспева́ющих, Твоя́ благодея́ния все́х ве́рных Твои́х получи́ти, страну́ на́шу и прави́телей ея́, от вся́каго зла́го обстоя́ния избавля́я, и ми́р и безмяте́жие е́й да́руя, Тебе́ со Безнача́льным Твои́м Отце́м, и Пресвяты́м, и Благи́м, и Единосу́щным Твои́м Ду́хом, во Еди́нем Существе́ сла́вимому Бо́гу, всегда́ благодаре́ние приноси́ти и преблага́я глаго́лати и воспе́ти сподо́биши.
И а́бие велегла́снейше возглаша́ет: Сла́ва Тебе́, Бо́гу, Благода́телю на́шему, во ве́ки веко́в.
Ли́к: Ами́нь.
И пое́т пе́снь свята́го Амвро́сия, епи́скопа Медиола́нскаго, си́есть: Тебе́ Бо́га хва́лим, Тебе́ Го́спода испове́дуем, Тебе́ преве́чнаго Отца́ вся земля́ велича́ет; Тебе́ вси А́нгели, Тебе́ Небеса́ и вся Си́лы, Тебе́ Херуви́ми и Серафи́ми непреста́нными гла́сы взыва́ют: Свят, Свят, Свят Госпо́дь Бог Савао́ф, по́лна суть Небеса́ и земля́ вели́чества сла́вы Твоея́. Тебе́ пресла́вный апо́стольский лик, Тебе́ проро́ческое хвале́бное число́, Тебе́ хва́лит пресве́тлое му́ченическое во́инство; Тебе́ по всей вселе́нней испове́дует Свята́я Це́рковь: Отца́ непостижи́маго вели́чества, покланя́емаго Твоего́ и́стиннаго и Единоро́днаго Сы́на, и Свята́го Уте́шителя Ду́ха. Ты Царю́ сла́вы, Христе́, Ты Отца́ присносу́щный Сын еси́; Ты ко избавле́нию прие́мля челове́ка, не возгнуша́лся еси́ Деви́ческаго чре́ва; Ты, одоле́в сме́рти жа́ло, отве́рзл еси́ ве́рующим Ца́рство Небе́сное; Ты одесну́ю Бо́га седи́ши во сла́ве О́тчей, Судия́ приити́ ве́ришися. Тебе́ у́бо про́сим: помози́ рабо́м Твои́м, и́хже честно́ю Кро́вию искупи́л еси́, сподо́би со святы́ми Твои́ми в ве́чной сла́ве Твое́й ца́рствовати. Спаси́ лю́ди Твоя́, Го́споди, и благослови́ достоя́ние Твое́, испра́ви я́, и вознеси́ их во ве́ки. Во вся дни благослови́м Тебе́, и восхва́лим и́мя Твое́ во век, и в век ве́ка. Сподо́би, Го́споди, в день сей без греха́ сохрани́тися нам. Поми́луй нас, Го́споди, поми́луй нас; бу́ди ми́лость Твоя́, Го́споди, на нас, я́коже упова́хом на Тя; на Тя, Го́споди, упова́хом, да не постыди́мся во ве́ки. Ами́нь.
По оконча́нии же сего́, иере́й твори́т обы́чный отпу́ст. По отпу́сте же многоле́тие.
И пое́т ли́к: Мно́гая ле́та, три́жды.
Глава́ 3. Моли́тва на Рождество́ Христо́во, сыно́в духо́вных
Влады́ко Го́споди Бо́же Вседержи́телю, егда́ роди́лся еси́ от Де́вы Мари́и в Вифлее́ме Иуде́йстем, тре́петно тва́рь просвети́ся, и в ми́р возра́довася Рождеству́ Твоему́, сотвори́вый челове́ка по о́бразу Твоему́ и по подо́бию, и да́вый ему́ креще́ние в покая́ние, введы́й рабы́ Твоя́ в пречестны́я дни́ сия́, к воздержа́нию страсте́м, к наде́жде воскресе́ния, наставля́я и́х на и́стину Твоего́ Божества́, отве́рзи и́м се́рдце и у́м, зна́ти Тя́ Сы́на Бо́жия, взе́млющаго грехи́ всего́ ми́ра. Ты́ и ны́не Влады́ко Человеколю́бче приими́ рабы́ Твоя́ и́мярек, я́коже прия́л еси́ Петра́ утопа́юща в мо́ри, и отве́ргшагося Тебе́ три́жды, и пла́кавшагося го́рько, и па́ки прия́та Тобо́ю, приими́ и ны́не Влады́ко, сле́зы и воздыха́ние и покая́ние рабо́в Твои́х, я́коже прия́т мытаре́во воздыха́ние, и блудни́цу пла́кавшуюся, и слеза́ми омочи́вшую но́зе Твои́, и власы́ свои́ми оте́ршую, ми́лости ра́ди, прие́мый разбо́йника с Собо́ю, на кресте́ вопию́ща к Тебе́, помяни́ мя Го́споди, егда́ прии́деши во Ца́рствии Твое́м, и реки́й ему́: дне́сь со Мно́ю бу́деши в раи́. Слы́шахом гла́с глаго́лющий, и волхво́м кла́няющымся с да́ры, па́стырем свиря́ющым, и а́нгелом воспева́ющым: сла́ва в вы́шних Бо́гу, и на земли́ ми́р, в челове́цех благоволе́ние, и И́род мятя́шеся, я́ко Бо́г пло́тию яви́ся на спасе́ние ро́ду челове́ческому, Тя́ ны́не Влады́ко Человеколю́бче, вся́ тва́рь воспева́ет глаго́лющи: Христо́с ражда́ется, сла́вите, Христо́с с небесе́, сря́щите, Христо́с на земли́, возноси́теся. Ны́не а́нгельстии собо́ри ра́дуются, и му́ченичестии ли́цы веселя́тся, ви́девше сла́вное и честно́е Рождество́, да вси́ досто́йно похва́лим се́рдцем и устна́ми. И ны́не, Благи́й Человеколю́бче Го́споди, приими́ рабы́ Твоя́ сия́ и́мярек, ка́ющыяся грехо́в свои́х, ве́домых и неве́домых, во́льных и нево́льных, и обы́чным человеколю́бием Твои́м, приими́ коле́нное поклоне́ние и по́ст рабо́в Твои́х и́мярек, да сконча́вше за́поведи Твоя́, и дости́гше ны́не свята́го и честна́го Рождества́ Твоего́, чи́сти и без поро́ка бу́дут прича́стницы Пречи́стаго Те́ла и Честны́я Кро́ве Твоея́, я́ко Тебе́ подоба́ет сла́ва со Отце́м и со Святы́м Ду́хом, ны́не и при́сно, и во ве́ки веко́в, ами́нь.
Глава́ 4. После́дование вели́каго освяще́ния во́ды святы́х богоявле́ний
По е́же рещи́ свяще́ннику заамво́нную моли́тву, исхо́дим вси ко крести́льнице, предидущим свещено́сцем, по них же диа́коном и свяще́нником, со Ева́нгелием и кади́лом, бра́тии пою́щым настоя́щыя тропари́. Глас 8:
Гла́с Госпо́день на вода́х вопие́т, глаго́ля: прииди́те, приими́те вси ду́ха прему́дрости, ду́ха ра́зума, ду́ха стра́ха Бо́жия, я́вльшагося Христа́, три́жды.
Дне́сь вод освяща́ется естество́, и разделя́ется Иорда́н, и свои́х вод возвраща́ет струи́, Влады́ку зря креща́ема, два́жды.
Я́ко челове́к на реку́ прише́л еси́ Христе́ Царю́, и ра́бское креще́ние прия́ти тщи́шися бла́же, от предте́чеву ру́ку, грех ра́ди на́ших, Человеколю́бче. Два́жды.
Сла́ва, и ны́не, то́йже:
Ко гла́су вопию́щаго в пусты́ни, угото́вайте пу́ть Госпо́день, прише́л еси́ Го́споди, зрак ра́бий прии́м, креще́ния прося́, не ве́дый греха́; ви́деша Тя во́ды, и убоя́шася. Тре́петен бы́сть Предте́ча, и возопи́ глаго́ля: ка́ко просвети́т свети́льник све́та; Ка́ко ру́ку положи́т раб на Влады́ку; Освяти́ мене́ и во́ды спа́се, взе́мляй ми́ра грех.
И а́бие став у крести́льницы, глаго́лет диа́кон: Прему́дрость.
И чтец: Проро́чества Иса́иина чте́ние (Ис.35:1–10):
Та́ко глаго́лет Госпо́дь: да возвесели́тся пусты́ня жа́ждущая, да возра́дуется пусты́ня, и процвете́т я́ко крин. И да прозя́бнет, и вся возвеселя́тся и возра́дуются пусты́нная иорда́нова, и сла́ва лива́нова дана́ бы́сть ей, и че́сть карми́лова; и лю́дие мои́ у́зрят сла́ву Госпо́дню, и высоту́ Бо́жию. Укрепи́теся руки́ осла́бленыя, и коле́на разсла́бленая уте́шитеся. И рцы́те малоду́шным мы́слию, укрепи́теся, и не бо́йтеся: се Бог наш суд воздае́т, Той прии́дет и спасе́т нас. Тогда́ отве́рзутся очеса́ слепы́х и ушеса́ глухи́х услы́шат. Тогда́ ско́чит хромы́й я́ко еле́нь, и я́сен бу́дет язы́к гугни́вых, я́ко прорази́ся в пусты́ни вода́, и де́брь в земли́ жа́ждущей. И бу́дет безво́дная в бла́та, и в жа́ждущей земли́ исто́чник во́ды бу́дет. Та́мо бу́дет весе́лие птиц, водворе́ние си́ринов, и тро́стий и бла́та. Та́мо бу́дет пу́ть чист, и пу́ть свят нарече́тся; и не мимои́дет та́мо нечи́ст, ниже́ бу́дет та́мо пу́ть нечи́стый, разсе́яннии же по́йдут по нему́, и не заблу́дят. И не бу́дет та́мо льва́, ниже́ звере́й лю́тых взы́дет на́нь, ниже́ обря́щется та́мо; но по́йдут по нему́ изба́вленнии, и со́браннии от Го́спода. И обратя́тся, и прии́дут в Сио́н с весе́лием и ра́достию, и весе́лие ве́чное над главо́ю их, хвала́ и ра́дование и весе́лие пости́гнет их, отбеже́ боле́знь, печа́ль и воздыха́ние.
Проро́чества Иса́иина чте́ние (Ис.55:1–13):
Та́ко глаго́лет Госпо́дь: жа́ждущии на во́ду иди́те, и ели́цы не и́мате сребра́, ше́дше купи́те, и яди́те и пи́йте, без сребра́ и цены́, вино́ и тук. Вску́ю цените́ сребро́ не в хле́бы, и труд ваш не в сы́тость; послу́шайте Мене́, и сне́сте блага́я, и наслади́тся во благи́х душа́ ва́ша. Внима́йте уши́ма ва́шима, и после́дуйте путе́м Мои́м, услы́шите Мене́, и жи́ва бу́дет во благи́х душа́ ва́ша. И завеща́ю вам заве́т ве́чен, преподо́бная Дави́дова ве́рная. Се свиде́тельство во язы́цех дах его́ кня́зя и повели́теля во язы́цех. Се язы́цы, и́же не ве́дяху Тя, призову́т Тя; и лю́дие, и́же не позна́ша Тя, к Тебе́ прибе́гнут, ра́ди Го́спода Бо́га Твоего́, и свята́го, Изра́илева я́ко просла́вих Тя. Взыщи́те Бо́га, и внегда́ вам обрести́ Его́, призови́те: егда́ же а́ще прибли́жится вам. Да оста́вит нечести́вый пути́ своя́, и муж беззако́нный сове́ты своя́, и обрати́теся ко Го́споду Бо́гу ва́шему, и поми́ловани бу́дете, я́ко по мно́гу оста́вит грехи́ ва́шя. Не су́ть бо сове́ти Мои́, я́коже сове́ти ва́ши; ниже́ я́коже путие́ ва́ши, путие́ Мои́, глаго́лет Госпо́дь. Но я́коже отстои́т Не́бо от земли́, та́ко отстои́т пу́ть Мой от путе́й ва́ших, и размышле́ния ва́ша от мы́сли Моея́. Я́коже бо а́ще сни́дет до́ждь или́ снег с Небесе́, и не возврати́тся отту́ду, до́ндеже упои́т зе́млю, и роди́т и прозя́бнет, и даст се́мя се́ющему, и хлеб в сне́дь. Та́ко бу́дет глаго́л Мой, и́же а́ще изы́дет из уст Мои́х, и не обрати́тся ко Мне тощ, до́ндеже а́ще сконча́ет вся ели́ка восхоте́х, и поспешу́ пути́ Моя́, и повеле́ния моя́. Весе́лием бо изы́дете, и ра́достию научи́теся, го́ры бо и хо́лми ско́чат, жду́ще вас в ра́дости, и вся древеса́ се́льная воспле́щут ве́твьми. И вме́сто дра́чия, взы́дет кипари́с, вме́сто же кропи́вы, взы́дет мирси́на: и бу́дет Госпо́дь во и́мя и в зна́мение ве́чное, и не оскуде́ет.
Проро́чества Иса́иина чте́ние (Ис.12:1–6):
Та́ко глаго́лет Госпо́дь: почерпи́те во́ду с весе́лием, от исто́чник спасе́ния. И рече́ши в де́нь он: испове́дайтеся Го́сподеви, и призови́те и́мя Его́, возвести́те во язы́цех сла́ву Его́; помяни́те, я́ко вознесе́ся и́мя Его́. По́йте и́мя Госпо́дне, я́ко высо́кая сотвори́: возвести́те сия́ по всей земли́. Ра́дуйтеся и весели́теся живу́щии в Сио́не, я́ко вознесе́ся Святы́й Изра́илев посреде́ его́.
Диа́кон: Прему́дрость. Чтец: Проки́мен, глас 3:
Госпо́дь просвеще́ние мое́, и спаси́тель мой, кого́ убою́ся;
Стих: Госпо́дь защи́титель живота́ моего́, от кого́ устрашу́ся;
Апостол: К Кори́нфяном посла́ния свята́го апо́стола Па́вла чте́ние, Зача́ло 143, от полу́:
Бра́тие, не хощу́ вас не ве́дети, я́ко отцы́ на́ши вси под о́блаком бы́ша, и вси сквозе́ мо́ре проидо́ша. И вси в Моисе́а крести́шася, во о́блаце и в мо́ри. И вси то́жде бра́шно духо́вное ядо́ша. И вси то́жде пи́во духо́вное пи́ша; пия́ху бо от духо́внаго после́дующаго ка́мене, ка́мень же бе Христо́с.
Аллилу́иа, глас 4. Глас Госпо́день на вода́х, Бог сла́вы возгреме́, Госпо́дь на вода́х мно́гих.
Ева́нгелие от Ма́рка, зача́ло 2:
Во вре́мя о́но, прии́де Иису́с от Назаре́та Галиле́йскаго, и крести́ся от Иоа́нна во Иорда́не. И а́бие восходя́ от воды́, ви́де разводя́щася небеса́, и Дух я́ко го́лубь сходя́щь на́нь. И глас бы́сть с Небесе́: Ты еси́ Сын мой возлю́бленный, о не́мже благоволи́х.
Диа́кон же глаго́лет ектению́:
Ми́ром Го́споду помо́лимся.
Ли́к: Го́споди, поми́луй.
О свы́шнем ми́ре и спасе́нии душ на́ших Го́споду помо́лимся.
Ли́к: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й, и соедине́нии всех, Го́споду помо́лимся.
Ли́к: Го́споди, поми́луй.
О святе́м хра́ме сем, и с ве́рою, благогове́нием, и стра́хом Бо́жиим входя́щих в о́нь, Го́споду помо́лимся.
Ли́к: Го́споди, поми́луй.
О Вели́ком Господи́не и отце́ на́шем, Святе́йшем Патриа́рхе Кири́лле, и о господи́не нашем преосвяще́ннейшем митрополи́те (или́ архиепи́скопе, или́ епи́скопе) имярек, честне́м пресви́терстве, во Христе́ диа́констве и о все́м при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́ Го́споду помо́лимся.
Ли́к: Го́споди, поми́луй.
О гра́де сем, (а́ще в монастыре́, о святе́й оби́тели сей), вся́ком гра́де, стране́ и ве́рою живу́щих в них, Го́споду помо́лимся.
Ли́к: Го́споди, поми́луй.
О благорастворе́нии возду́хов, о изоби́лии плодо́в земны́х, и временах ми́рных, Го́споду помо́лимся.
Ли́к: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных, и о спасе́нии их, Го́споду помо́лимся.
Ли́к: Го́споди, поми́луй.
О е́же освяти́тися вода́м сим, си́лою и де́йствием и наи́тием Свята́го Ду́ха, Го́споду помо́лимся.
Ли́к: Го́споди, поми́луй.
О е́же снизходи́ти на во́ды сия́ очисти́тельному пресу́щныя Тро́ицы де́йству, Го́споду помо́лимся.
Ли́к: Го́споди, поми́луй.
О е́же дарова́тися им благода́ти избавле́ния, благослове́нию Иорда́нову, си́лою и де́йством и наи́тием Свята́го Ду́ха, Го́споду помо́лимся.
Ли́к: Го́споди, поми́луй.
О е́же сокруши́тися сатане́ под нога́ма на́шима вско́ре, и разори́тися вся́кому сове́ту лука́вому дви́жимому на ны, Го́споду помо́лимся.
Ли́к: Го́споди, поми́луй.
Я́ко да Госпо́дь Бог и́змет нас от вся́каго наве́та, и искуше́ния сопроти́вника, и досто́йны соде́лает обеща́нных благ, Го́споду помо́лимся.
Ли́к: Го́споди, поми́луй.
О е́же просвети́тися нам просвеще́нием ра́зума, и благоче́стия, наи́тием Свята́го Ду́ха, Го́споду помо́лимся.
Ли́к: Го́споди, поми́луй.
О е́же низпосла́ти Го́споду Бо́гу благослове́ние Иорда́ново, и освяти́ти во́ды сия́, Го́споду помо́лимся.
Ли́к: Го́споди, поми́луй.
О е́же бы́ти воде́ сей, освяще́ния да́ру, грехо́в избавле́нию, во исцеле́ние души́ и те́ла, и на вся́кую по́льзу изря́дную, Го́споду помо́лимся.
Ли́к: Го́споди, поми́луй.
О е́же бы́ти воде́ сей скачущей в жи́знь ве́чную, Го́споду помо́лимся.
Ли́к: Го́споди, поми́луй.
О е́же яви́тися сей отгна́нию вся́каго наве́та ви́димых и неви́димых враг, Го́споду помо́лимся.
Ли́к: Го́споди, поми́луй.
О че́рплющих и е́млющих ю̀ во освяще́ние домо́в, Го́споду помо́лимся.
Ли́к: Го́споди, поми́луй.
О е́же бы́ти сей, во очище́ние душ и теле́с, всем ве́рою че́рплющым же и причаща́ющымся от нея́, Го́споду помо́лимся.
Ли́к: Го́споди, поми́луй.
О е́же сподо́битися нам испо́лнитися освяще́ния, вод сих причаще́нием, неви́димым явле́нием Свята́го Ду́ха, Го́споду помо́лимся.
Ли́к: Го́споди, поми́луй.
О е́же услы́шати Го́споду Бо́гу глас моле́ния нас гре́шных, и поми́ловати нас, Го́споду помо́лимся.
Ли́к: Го́споди, поми́луй.
О изба́витися нам от вся́кия ско́рби, гне́ва и ну́жды, Го́споду помо́лимся.
Ли́к: Го́споди, поми́луй.
Заступи́, спаси́, поми́луй и сохрани́ нас Бо́же, Твое́ю благода́тию.
Ли́к: Го́споди, поми́луй.
Пресвяту́ю, Пречи́стую, преблагослове́нную, сла́вную Влады́чицу на́шу Богоро́дицу, и Присноде́ву Мари́ю, со все́ми святы́ми помяну́вше, са́ми себе́, и другъдру́га, и ве́сь живо́т наш Христу́ Бо́гу предади́м.
Ли́к: Тебе́ Го́споди.
Возглаше́ние:
Я́ко подоба́ет Тебе́ вся́кая сла́ва, че́сть и поклоне́ние, со Отце́м и Святы́м Ду́хом, ны́не и при́сно, и во ве́ки веко́в.
Ли́к: Ами́нь.
Сим глаго́лемым, свяще́нник та́йно моли́тву сию́ глаго́лет:
Го́споди Иису́се Христе́, единоро́дный Сы́не, сый в не́дре О́тчи, и́стинный Бо́же, исто́чниче жи́зни и безсме́ртия, све́те от све́та, прише́дый в мир, е́же просвети́ти его́, озари́ на́шу мы́сль святы́м Твои́м ду́хом, и приими́ нас, вели́чество и благодаре́ние Тебе́ принося́щих, о я́же от ве́ка ди́вных Твои́х великоде́йствиих, и е́же в после́дняя ве́ки спаси́тельном Твое́м смотре́нии, в не́мже в на́ше немощно́е и ни́щее оде́явся смеше́ние, и рабо́тным ме́рам снизше́дый, И́же всех Царю́, еще́ и ра́бскою руко́ю во Иорда́не крести́тися претерпе́л еси́: да водно́е естество́ освяти́в безгре́шне, путесотвори́ши нам, е́же водо́ю и ду́хом па́ки рожде́ние, и к пе́рвому нас устро́иши свобожде́нию; его́же Боже́ственнаго та́инства воспомина́ние пра́зднующе, мо́лимся Тебе́ Влады́ко Человеколю́бче, воскропи́ и на ны недосто́йныя рабы́ Твоя́, по Боже́ственному Твоему́ обеща́нию, во́ду чи́сту, Твоего́ благоутро́бия дар, во е́же над водо́ю се́ю проше́нию нас гре́шных благоприя́тну бы́ти Твое́ю бла́гостию, и благослове́нию Твоему́ е́ю, нам же и всем ве́рным лю́дем Твои́м дарова́тися, в сла́ву свята́го и покланя́емаго Твоего́ и́мене. Я́ко подоба́ет Тебе́ вся́кая сла́ва, че́сть и поклоне́ние, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не, и при́сно, и во ве́ки веко́в.
И рек в себе́: Ами́нь.
Диа́кону же испо́лншу ектению́, начина́ет свяще́нник велегла́сно моли́тву сию́:
Ве́лий еси́ Го́споди, и чу́дна дела́ Твоя́, и ни еди́но же сло́во дово́льно бу́дет к пе́нию чуде́с Твои́х. Три́жды.
Твое́ю бо во́лею от небытия́ в бытие́ приве́л еси́ вся́ческая; Твое́ю держа́вою содержи́ши тва́рь, и Твои́м про́мыслом стро́иши мир. Ты от четы́рех стихи́й соста́вивый тва́рь, четы́рьми времены́ круг ле́та венча́л еси́. Тебе́ трепе́щут у́мныя си́лы вся; Тебе́ пое́т со́лнце; Тебе́ сла́вит луна́; Тебе́ прису́тствуют зве́зды; Тебе́ слу́шает свет; Тебе́ трепе́щут бе́здны; Тебе́ рабо́тают исто́чницы. Ты просте́рл еси́ Не́бо я́ко ко́жу; Ты утверди́л еси́ зе́млю на вода́х; Ты огради́л еси́ мо́ре песко́м; Ты к дыха́нием возду́х излия́л еси́. А́нгельския си́лы Тебе́ слу́жат; арха́нгельстии ли́цы Тебе́ кла́няются; многоочи́тии херуви́ми, и шестокрила́тии серафи́ми, о́крест стоя́ще и облета́юще, стра́хом непристу́пныя Твоея́ сла́вы покрыва́ются. Ты бо Бог сый неопи́санный, безнача́льный же и несказа́нный, прише́л еси́ на зе́млю, зрак раба́ прии́м, в подо́бии челове́честем быв; не бо терпе́л еси́ Влады́ко, благоутро́бия ра́ди ми́лости Твоея́, зре́ти от диа́вола му́чима ро́да челове́ча, но прише́л еси́, и спасл еси́ нас. Испове́дуем благода́ть, пропове́дуем ми́лость, не таи́м благодея́ния; естество́ на́шего ро́ды свободи́л еси́; деви́ческую освяти́л еси́ утро́бу рождество́м Твои́м; вся тва́рь воспева́ет Тя я́вльшагося. Ты бо Бог наш, на земли́ яви́лся еси́, и с челове́ки пожи́л еси́; Ты и Иорда́нския струи́ освяти́л еси́, с Небесе́ низпосла́вый свята́го Твоего́ Ду́ха, и главы́ та́мо гнездя́щихся сокруши́л еси́ змие́в.
И сие́ у́бо свяще́нник глаго́ля три́жды, и во́ду руко́ю благословля́ет на ки́йждо стих:
Сам у́бо Человеколю́бче Царю́, прииди́ и ны́не наи́тием Свята́го Твоего́ Ду́ха, и освяти́ во́ду сию́.
И да́ждь ей благода́ть избавле́ния, благослове́ние Иорда́ново; сотвори́ ю̀ нетле́ния исто́чник, освяще́ния дар, грехо́в разреше́ние, неду́гов исцеле́ние, бесо́м губи́тельну, сопроти́вным си́лам непристу́пну, а́нгельския кре́пости испо́лнену; да вси почерпа́ющии и причаща́ющиися име́ют ю̀ ко очище́нию душ и теле́с, ко исцеле́нию страсте́й, ко освяще́нию домо́в, и ко вся́кой по́льзе изря́дну. Ты бо еси́ Бог наш, И́же водо́ю и ду́хом обнови́вый обетша́вшее грехо́м естество́ на́ше. Ты еси́ Бог наш, водо́ю потопи́вый при Но́и грех. Ты еси́ Бог наш, И́же мо́рем свободи́вый от рабо́ты фарао́ни Моисе́ом род евре́йский. Ты бо еси́ Бог наш, разрази́вый ка́мень в пусты́ни, и потеко́ша во́ды, и пото́цы наводни́шася, и жа́ждущыя лю́ди Твоя́ насы́тивый. Ты еси́ Бог наш, И́же водо́ю и огне́м премени́вый Илие́ю Изра́иля от пре́лести ваа́ловы.
Сам и ны́не Влады́ко, освяти́ во́ду сию́ ду́хом Твои́м святы́м. Три́жды.
Да́ждь же всем прикаса́ющымся ей и причаща́ющымся, и ма́жущымся е́ю, освяще́ние, здра́вие, очище́ние и благослове́ние.
Спаси́ Вели́кого Господи́на и отца́ на́шего, Кири́лла, Святе́йшего Патриа́рха Московского и всея Руси, и преосвяще́ннейшаго митрополи́та епи́скопа имярек, его же область, и сохрани́ их под кро́вом Твои́м в ми́ре, покори́ им вся́каго врага́ и супоста́та; да́руй им вся я́же ко спасе́нию проше́ния и жи́знь ве́чную, да и стихи́ами, и челове́ки, и а́нгелы, и ви́димыми и неви́димыми сла́вится Твое́ пресвято́е и́мя, со Отце́м и Святы́м Ду́хом, ны́не и при́сно, и во ве́ки веко́в, ами́нь.
Свяще́нник: Мир всем.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди
Свяще́нник прикло́нься мо́лится:
Приклони́ Го́споди у́хо Твое́, и услы́ши ны, И́же во Иорда́не крести́тися изво́ливый, и освяти́вый во́ды, благослови́ всех нас, и́же преклоне́нием своея́ вы́и назна́менающих рабо́тное воображе́ние; и сподо́би нас испо́лнитися освяще́ния Твоего́, причаще́нием во́ды сея́, и да бу́дет нам Го́споди, во здра́вие души́ и те́ла.
Возглаше́ние: Ты бо еси́ освяще́ние на́ше, и Тебе́ сла́ву и благодаре́ние и поклоне́ние возсыла́ем, со безнача́льным Твои́м Отце́м и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.
И а́бие благословля́я во́ду крестови́дно честны́м кресто́м, погружа́ет ѝ пра́во, низводя́ в во́ду, и возводя́, держа́ его́ обе́ма рука́ма, поя́ настоя́щий тропа́рь, во глас 1:
Во Иорда́не креща́ющуся Тебе́ Го́споди, тро́ическое яви́ся поклоне́ние; роди́телев бо глас свиде́тельствоваше Тебе́, возлю́бленнаго Тя Сы́на имену́я; и Дух в ви́де голуби́не изве́ствоваше словесе́ утвержде́ние. Явле́йся Христе́ Бо́же, и мир просвеще́й, сла́ва Тебе́.
Певце́м то́же пою́щым
Па́ки второ́е, та́коже кресто́м зна́менует во́ды. И тре́тие та́кожде. И взем свяще́нник свяще́нную во́ду на блю́до, и обрати́тся на за́пад лице́м, в ле́вой ру́це держа́ крест, в пра́вой же василки́.
И прихо́дит пре́жде настоя́тель, и целу́ет честны́й крест, и зна́менует его́ свяще́нник по лицу́ василко́м со свяще́нною водо́ю.
Та́же свяще́нницы прихо́дят по чи́ну своему́. По тому́же чи́ну и вся бра́тия.
Пое́тся же тогда́ тропа́рь: Во Иорда́не креща́ющуся Тебе́ Го́споди: Мно́гащи, до́ндеже освятя́тся вся бра́тия водны́м кропле́нием.
И а́бие вхо́дим во храм, пою́ще самогла́сен, глас 6:
Воспои́м ве́рнии, е́же о нас Бо́жия благодея́ния вели́чество; о на́шем бо прегреше́нии быв челове́к, на́шим очище́нием очища́ется во Иорда́не, еди́н чи́стый и нетле́нный, освяща́яй мене́ и во́ды, и главы́ змие́в сокруша́яй в воде́. Почерпе́м у́бо во́ду с весе́лием, бра́тие; благода́ть бо Ду́ха ве́рно почерпа́ющым неви́димо подава́ется от Христа́ Бо́га, и Спа́са душ на́ших.
Та́же, Бу́ди и́мя Госпо́дне от ны́не и до ве́ка. Три́жды.
И псало́м 33:
Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю и вознесе́м и́мя Его́ вку́пе. Взыска́х Го́спода и услы́ша мя, и от всех скорбе́й мои́х изба́ви мя. Приступи́те к Нему́ и просвети́теся, и ли́ца ва́ша не постыдя́тся. Сей ни́щий воззва́, и Госпо́дь услы́ша и́, и от всех скорбе́й eго́ спасе́ и́. Ополчи́тся А́нгел Госпо́день о́крест боя́щихся Его́, и изба́вит их. Вкуси́те и ви́дите, я́ко благ Госпо́дь; блаже́н муж, и́же упова́ет Нань. Бо́йтеся Го́спода, вси святи́и Его́, я́ко несть лише́ния боя́щымся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ вас. Кто́ есть челове́к хотя́й живо́т, любя́й дни ви́дети бла́ги? Удержи́ язы́к твой от зла, и устне́ твои́, е́же не глаго́лати льсти. Уклони́ся от зла и сотвори́ бла́го. Взыщи́ ми́ра, и пожени́ и́. О́чи Госпо́дни на пра́ведныя, и у́ши Его́ в моли́тву их. Лице́ же Госпо́дне на творя́щыя зла́я, е́же потреби́ти от земли́ па́мять их. Воззва́ша пра́веднии, и Госпо́дь услы́ша их, и от всех скорбе́й их изба́ви их. Близ Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от всех их изба́вит я́ Госпо́дь. Храни́т Госпо́дь вся ко́сти их, ни еди́на от них сокруши́тся. Смерть гре́шников люта́, и ненави́дящии пра́веднаго прегреша́т. Изба́вит Госпо́дь ду́шы раб Свои́х, и не прегреша́т вси, упова́ющии на Него́.
И пре́жде пи́вше освяще́нную во́ду, взе́млем от свяще́нника анти́дор.
И быва́ет соверше́нный отпу́ст.
И́же во Иорда́не крести́тися изво́ливый от Иоа́нна, на́шего ра́ди спасе́ния, Христо́с и́стинный Бог наш, моли́твами Пречи́стыя Своея́ ма́тере, и всех святы́х, поми́лует и спасе́т нас, я́ко Благ и Человеколю́бец.
Глава́ 5. Чи́н благослове́ния све́щ на Сре́тение Госпо́дне.
По часе́х, пре́жде нача́тия свяще́нныя литурги́и, иере́й изше́д пред церко́вная врата́, ста́в на ме́сте, иде́же свещи́ положе́нная су́ть до благослове́ния, начина́ет:
Сла́ва Святе́й и Единосу́щней, и Животворя́щей, и Неразде́льней Тро́ице всегда́, ны́не и при́сно, и во ве́ки веко́в.
Ли́к: Ами́нь.
Царю́ Небе́сный: Трисвято́е: О́тче на́ш: Я́ко Твое́ е́сть Ца́рство:
Та́же тропа́рь и конда́к пра́зднику.
Ра́дуйся, Благода́тная Богоро́дице Де́во, из Тебе́ бо возсия́ Со́лнце Пра́вды Христо́с, Бо́г на́ш, просвеща́яй су́щия во тьме́. Весели́ся и ты́, ста́рче пра́ведный, прие́мый во объя́тия Свободи́теля ду́ш на́ших, да́рующаго на́м воскресе́ние.
Конда́к, гла́с 1:
Утро́бу Деви́чу освяти́вый Рождество́м Твои́м, и ру́це Симео́не благослови́вый, я́коже подоба́ше, предвари́в, и ны́не спа́сл еси́ на́с, Христе́ Бо́же, но умири́ во бране́х жи́тельство и укрепи́ лю́ди, и́хже возлюби́л еси́, Еди́не Человеколю́бче.
Го́споду помо́лимся.
Влады́ко Святы́й, О́тче Всемогу́щий, Преве́чный Бо́же, от небытия́ сотвори́вый, и повеле́нием Твои́м. Де́лы пще́лными сию́ тва́рь, ко соверше́нию све́щ приведы́й, и ны́нешняго дня́ моле́ние пра́веднаго Симео́на, да сия́ свещи́ в тре́бование лю́дям, во здра́вие ду́ш и теле́с, предугото́ванныя на земли́ или́ на вода́х, призва́нием Святе́йшаго И́мени Твоего́, и моле́нием Благослове́нныя Мари́и Присноде́вы, Ея́ же ны́не пра́здник благогове́йно пра́зднуется, моли́твами же все́х святы́х Твои́х благослови́ти и освяти́ти изво́лиши: и си́х люде́й Твои́х, жела́ющих я́ всече́стно носи́ти, и Тебе́ пою́ще славосло́вити, и слы́ша гла́сы с небесе́ свята́го Твоего́, и от Престо́ла Вели́чествия Твоего́, бу́ди ми́лостив все́м к Тебе́ восклица́ющим, и́хже искупи́л еси́ многоце́нною Кро́вию Сы́на Твоего́, с ни́м же благослове́н еси́, с Пресвяты́м, Благи́м и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Го́споду помо́лимся.
Всемогу́щий Преве́чный Бо́же, ны́нешняго дне́ Единоро́днаго Сы́на на ра́мех свята́го Симео́на в святе́й це́ркви Твое́й низложи́вый, Твое́ Благоутро́бие призыва́ем: да сия́ свещи́, я́же мы́ раби́ Твои́ к вели́чию И́мени Твоего́ восприима́ем и носи́ти жела́ем, благослови́ти и освяти́ти, и све́том Небе́снаго Благослове́ния воспали́ти изво́лиши, от е́же на́м. Тебе́ Го́споду Бо́гу на́шему принося́щим, досто́йно святы́м огне́м, Любве́ Твоея́ сладча́йшия разжже́нным, и в Це́ркви Святе́й Сла́вы Твоея́ предста́ти сподо́бленным бытии́. Я́ко Ты́ еси́ Бо́г на́ш, и тебе́ сла́ву возсыла́ем: Отцу́, и Сы́ну и Свято́му Ду́ху, ны́не, и при́сно, и во ве́ки веко́в, ами́нь.
Го́споду помо́лимся.
Го́споди Иису́се Христé, Свéте и́стинный, просвеща́яй и освящáяй вся́каго челове́ка, гряду́щаго в ми́р, изли́й благослове́ние Твое́ на свещы́ сия́, и освяти́ я́ све́том Благода́ти Твоея́. Изво́ли же ми́лостивее, да я́ко сия́ свети́ла огне́м ви́димым возжже́нна, нощны́я тмы́ прогоня́ют, та́ко сердца́ на́ша неви́димым огне́м, си́ е́сть: све́тлостию Свята́го Ду́ха просвеще́нна, слепоты́ вся́ческих грехо́в избежа́т, да очище́нием души́ о́ком, сия́ ви́дети возмо́жем, я́же Тебе́ су́ть благоуго́дна, и на́шему спасе́нию благопотре́бна, о е́же на́м победи́вшим сего́ ми́ра те́мныя беды́, сподо́битися к Све́ту Непреста́нному дости́гнути. Я́ко Ты́ еси́ Спа́с на́ш, и тебе́ сла́ву возсыла́ем со Безнача́льным Твои́м Отце́м, и Пресвяты́м и Благи́м и животворя́щим Святы́м Ду́хом, ны́не, и при́сно, и во ве́ки веко́в, ами́нь.
Го́споду помо́лимся.
Всемогу́щий Преве́чный Бо́же, Моисе́ови рабу́ Твоему́ чисте́йшее созда́ние еле́а в свети́ла пред лице́м Твои́м угото́вити повеле́вый, благогове́ния Твоего́ Благода́ть моли́твенно на сия́ свещи́ изле́й. Да та́ко изнесу́т све́тлость в лю́дех внеу́ду, я́ко Твои́м Дарова́нием све́тлость Свята́го Ду́ха обита́ет вну́трь в мы́слех на́ших: Го́сподем на́шим Иису́сом Христо́м, ему́же подоба́ет вся́кая сла́ва, че́сть и поклоне́ние, с Тобо́ю Отце́м Безнача́льным, и Святы́м Ду́хом, во ве́ки веко́в, ами́нь.
Ми́р все́м.
Главы́ ва́шя Го́сподеви приклони́те.
Го́споди Иису́се Христé, и́же ны́нешняго дне́ в существе́ пло́ти на́шея между́ людьми́ явле́йся, от роди́телей в це́ркви явле́нный, его́ же Симео́н благогове́йный ста́рец, просвеще́н све́том Ду́ха Твоего́ позна́, прия́т и благослови́: пода́ждь, Ми́лостиве, да того́жде Свята́го ду́ха Благода́тию просвеще́нии и поуче́нии. Тебе́ и́стинно позна́ем и ве́рно возлю́бим. Ему́же подоба́ет вся́кая сла́ва, че́сть и поклоне́ние со Безнача́льным Отце́м и Святы́м Ду́хом, во ве́ки веко́в, ами́нь.
Та́же кади́т три́жды свещы́ и кропи́т водо́ю свяще́нною, глаго́ля:
Благословля́ются и освяща́ются свещи́ сия́ окропле́нием во́ды сея́ свяще́нныя, во и́мя Отца́ и Сы́на и Свята́го Ду́ха.
Отпу́ст пра́зднику.
Посе́м иере́й раздае́т свещы́, певцы́ же пою́т или́ глаго́лют: Ны́не отпущáеши рабá Твоегó, Влады́ко, по глагóлу Твоему́, с ми́ром: я́ко ви́деста óчи мóи спасéние Твóе, éже еси́ уготóвал пред лицéм всех людéй, свет во откровéние язы́ков, и слáву людéй Твои́х Изрáиля.
Стихи́ра, глас 7:
Украси́ твой черто́г, Сио́не, и подыми́ Царя́ Христа́, целу́й Мари́ю, Небе́сную Дверь: Та бо престо́л Херуви́мский яви́ся, Та но́сит Царя́ Сла́вы. О́блак све́та есть Де́ва, нося́щи на рука́х Сы́на пре́жде денни́цы, Его́же прие́мь Симео́н на ру́ки своя́, пропове́дуя лю́дям Влады́ку Сего́ бы́ти живота́ и сме́рти и Спа́са ми́ру.
По стихи́ре свята́я литурги́я начина́ется.
Глава́ 6. Моли́твы в нача́ле поста́ святы́я Четыредеся́тницы,
я́же свяще́нник свои́м парохиа́ном в понеде́льник пе́рвый свята́го вели́каго поста́ или́ во ины́й де́нь пе́рвыя по́стныя седми́цы, в це́ркви по у́трени, или́ по часе́х, взе́м на себе́ епитрахи́ль, чте́т моли́твы сия́ со вся́ким умиле́нием
Го́споду помо́лимся.
Наде́яние все́м конце́м земли́, и су́щым в мо́ри дале́че, Бо́же, пронареки́й святы́я дни́ сия́ по́стныя зако́ном и проро́ки, и евангели́сты, сподо́би все́х в чистоте́ тече́ние по́стное прейти́, ве́ру неразлу́чну соблюсти́, и за́поведи Твоя́ сохрани́ти во вся́ дни́ живота́ на́шего. А́нгелу ми́рну запове́ждь соблюда́ти вхо́ды на́шя и исхо́ды на вся́кое де́ло благо́е и спослу́шающу, и соугожда́ющу к соверше́нному причаще́нию Пречи́стых Твои́х Та́ин. Приими́ же Влады́ко, коле́нное поклоне́ние и по́ст рабо́в Твои́х, подая́ и́м благослове́ние духо́вное, и все́м на́м, о Христе́ Иису́се Го́споде на́шем, с Ни́мже благослове́н еси́, с Пресвяты́м, и Благи́м и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Моли́тва втора́я тому́жде.
Го́споду помо́лимся.
Благослове́н еси́ Го́споди Вседержи́телю, Бо́же оте́ц на́ших, Авраа́мов и Исаа́ков и Иа́ковль, сотвори́вый не́бо и зе́млю, мо́ре и вся́ су́щыя в ни́х, положи́вый челове́ком покая́ние во спасе́ние, и презира́яй и́х прегреше́ния, приимы́й сле́зы раба́ Твоего́ Дави́да проро́ка, и да́вый ему́ оставле́ние грехо́в ка́ющемуся, Манасси́и у́зами желе́зными свя́заннаго, покая́нием же испове́давшагося Тебе́ моли́тву приимы́й, и грехи́ его́ оста́вивый, блудни́цу, позна́вшую ми́лость Твою́ и схо́дники прии́мшую, и с ми́ром пусти́вшую, спасы́й, услы́ши ны́не моле́ние мене́ недосто́йнаго раба́ Твоего́, и пре́зри вся́ согреше́ния си́х рабо́в Твои́х, в покая́нии к Тебе́ прибега́ющих, и да́ждь и́м серде́чное сокруше́ние, и боле́знь о гресе́х, и́миже Тебе́ Творца́ своего́ прогне́ваша, могу́щую и́х от грехо́в очи́стити. Да́ждь и́м благода́ть Твою́, я́ко да то́ю возбужда́еми и подкрепля́еми, в па́мять зла́я своя́ дела́ приведу́т, и сия́ вся́ во стра́се Твое́м духо́вному своему́ отцу́, от Тебе́ же уста́вленному судии́, и́стинно испове́дят, и са́ми на себе́ я́ко на ви́нных в се́рдце сокруше́нном и смире́нном пои́мствовати, и ка́ятися, и жале́ти себе́ о ни́х, и соверше́ннаго проще́ния, и от ни́х разреше́ния Твои́м милосе́рдием чрез и́х духовника́, Твоего́ же судию́, по нело́жному Твоему́ обеща́нию сподо́би. Ты́ бо ре́кл еси́: е́же а́ще разрешите́ на земли́, бу́дет разреше́но на небесе́х. Е́й, Влады́ко Го́споди Иису́се Христе́ Бо́же на́ш, приими́ рабы́ Твоя́, ка́ющыяся о свои́х гресе́х ве́домых и неве́домых, во́льных и нево́льных, и сия́ испове́дати по Твоему́ повеле́нию предложи́вших, и Твое́ю си́лою и благода́тию прии́м и́х ми́лостивно, укрепи́, е́же ктому́ не возврати́тися и́м ко греху́, и к злы́м и неподо́бным дело́м, в ни́хже мно́гажды впадо́ша, но воздви́гни и заступи́ и́х от ко́зней диа́вольских, и от все́х се́тей неприя́зненных, я́ко да без препя́тия послу́жат Ти́ в преподо́бии и пра́вде, во вся́ дни́ живота́ своего́. Ты́ бо еси́ Бо́г на́ш, в ми́р прише́дый, не пра́ведных призва́ти, но гре́шных на покая́ние, и се́дмьдесят кра́т седмери́цею впа́дающым во гре́х оставля́ти согреше́ния повеле́вый. Я́коже у́бо жену́ в прелюбодея́нии я́тую, фарисе́йми искуша́ющими Тя́ приведе́нную не осуди́л еси́, но ми́лостивно ре́кл еси́: иди́, и отсе́ле ктому́ не согреша́й, и си́х не осужда́й, но человеколю́бно поми́луй. И я́коже и другу́ю блудни́цу пла́чущуюся, и слеза́ми но́зе Твои́ омы́вшую, и главы́ своея́ власы́ оте́ршую, поми́ловал еси́ ми́лости Твоея́ ра́ди, пода́ждь и си́м рабо́м Твои́м невозбра́нныя и те́плыя во и́стинном покая́нии сле́зы. Утверди́ и́х у́м и се́рдце, зна́ти Тебе́ еди́наго и́стиннаго Сы́на Бо́жия, взе́млющаго грехи́ ми́ра. Приими́ и́х я́коже Петра́ отве́ргшагося Тебе́ и покая́нием и го́рькими слеза́ми обра́щшагося прия́л еси́, простри́ десни́цу Твою́, и приими́ и́х, я́коже того́ в мо́ри утопа́ющаго прия́л еси́, и укрепи́ и́х на борю́щаго и́х диа́вола, очи́сти и́х ду́шу и те́ло от вся́кия скве́рны. Са́м бо ре́кл еси́ благи́й Го́споди, не тре́бовати здра́вым врача́, но боля́щым, и прише́л еси́ не спаса́емых спасти́, но погиба́ющих. Да́ждь у́бо Го́споди Иису́се Христе́ Бо́же на́ш рабо́м Твои́м си́м, сконча́ти без поро́ка нача́тый се́й святы́й по́ст, и в не́м Твоя́ за́поведи исполня́ти, в моли́твах же прилежа́ти и все́ми доброде́тельми Тебе́ во вся́ дни́ живота́ своего́ благоугожда́ти, я́ко да в чи́стой со́вести причасти́тися неосужде́нно Твоему́ Боже́ственному Те́лу, и животворя́щей Кро́ви излия́нной за ве́сь ми́р во оставле́ние грехо́в, сподо́бятся, и да победя́т и посра́мят диа́вола на ни́х вою́ющаго. Ты́ бо еси́ Бо́же Бо́г ка́ющихся, не хотя́й сме́рти гре́шнаго, но е́же обрати́тися, и жи́ву бы́ти ему́. Не хо́щеши бо Влады́ко, созда́ние Твои́х ру́к погуби́ти, ниже́ благоволи́ши о поги́бели челове́честей, но хо́щеши все́м спасти́ся, и в ра́зум и́стинный приити́. Те́мже и ны́не Влады́ко, не отврати́ лица́ Твоего́ от ра́б Твои́х си́х, но да́ждь и́м и́стинное от грехо́в к Тебе́ обраще́ние, и от все́х де́л лука́вых избавле́ние, и сподо́би все́х на́с в ми́ре испо́лненных де́л благи́х доити́, и поклони́тися спаси́тельным Твои́м страсте́м, и свято́му воскресе́нию, и на кончи́не живота́ на́шего ра́дости ве́чныя со все́ми Тебе́ благоугоди́вшими получи́ти, в Тебе́ Бо́зе и Спаси́теле на́шем. Ты́ бо еси́ Бо́г ми́лостей и щедро́т, и человеколю́бия, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Посе́м благословля́ет и́х десни́цею, глаго́ля:
Благослове́ние Госпо́дне на ва́с, того́ благода́тию и щедро́тами, и человеколю́бием, всегда́, ны́не и при́сно, и во ве́ки веко́в, ами́нь.
Глава́ 7. Моли́тва на благослове́ние ва́ий
Диа́кон: Го́споду помо́лимся.
Ли́к: Го́споди, поми́луй.
Иере́й взе́м кади́ло, кади́т крестообра́зно, глаго́ля моли́тву на благослове́ние ва́ий.
Го́споди Бо́же наш, седя́й на херуви́мех, возста́вивый си́лу Твоего́ Сы́на, Го́спода на́шего Иису́са Христа́, да спасе́т мир Кресто́м, и погребе́нием, и воскресе́нием Свои́м. Его́же и ны́не прише́дша во Иерусали́м на во́льную страсть, лю́дие седя́щии во тьме, и се́ни сме́ртней, прие́мше воскресе́ния зна́мения, ве́тви древе́с, и ва́иа фи́ник, воскресе́ние зна́менующе срето́ша. Сам, Влады́ко, и нас по подража́нию о́нех, в предпра́зднственный сей день, ва́иа и ве́тви древе́с в рука́х нося́щих соблюди́ и сохрани́. Да я́коже о́нии наро́ди и де́ти оса́нна Тебе́ приноша́ху, и мы та́кожде в пе́снех и пе́ниих духо́вных, животворя́щаго и тридне́внаго Воскресе́ния дости́гнем, в то́мже Христе́ Иису́се Го́споде на́шем, с Ни́мже благослове́н еси́, с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.
Глава́ 8. Моли́тва во е́же благослови́ти бра́шна, мяса́, во святу́ю и вели́кую неде́лю Па́схи
Твори́т свяще́нник: Благослове́н Бо́г на́ш ны́не и при́сно и во ве́ки веко́в. Ами́нь.
Христо́с воскре́се: три́жды.
Та́же, Го́споду помо́лимся. Го́споди поми́луй.
При́зри Го́споди Иису́се Христе́, (Бо́же наш,) на бра́шна мяс, и освяти́ я̀, я́коже освяти́л еси́ овна́, его́же тебе́ приведе́ ве́рный Авраа́м, и а́гнца, его́же тебе́ А́вель во всепло́дие принесе́; подо́бне и тельца́ упита́ннаго, его́же жре́ти повеле́л еси́ сы́нови Твоему́ заблу́ждшему, и па́ки к Тебе́ возвра́щшемуся; да я́коже той сподо́бися Твоея́ бла́гости наслади́тися, си́це и освяще́нных от Тебе́, и благослове́нных, наслади́мся в пи́щу всех нас. Ты бо еси́ и́стинная пи́ща, и пода́тель благи́х, и Тебе́ сла́ву возсыла́ем, со безнача́льным Твои́м Отце́м, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.
Глава́ 9. Моли́тва, е́же благослови́ти сыр и я́ица
Влады́ко Го́споди Бо́же наш, Зижди́телю и Соде́телю всех, благослови́ млеко́ огусте́вшее, с ни́мже и я́ица, и нас соблюди́ во бла́гости Твое́й: я́ко да причаща́ющеся их, Твои́х незави́стно пода́тельных даро́в испо́лнимся и неизглаго́ланныя Твоея́ бла́гости. Я́ко Твоя́ держа́ва, и Твое́ е́сть Ца́рство, и си́ла, и сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Глава́ 10. Моли́тва на благослове́ние а́ртоса во Святу́ю Неде́лю Па́схи
Принесе́н быва́ет а́ртос, си́есть хле́б на сие́ приугото́вленный, и на не́м кре́ст напи́санный обы́чно, к иере́ю в олта́рь, по соверше́нии Боже́ственныя литурги́и и по заамво́нной моли́тве, ре́кшу диа́кону: Го́споду помо́лимся. И кли́ру: Го́споди поми́луй. Чте́т над ни́м иере́й моли́тву сию́:
Бо́же всеси́льный и Го́споди Вседержи́телю, И́же рабо́м Твои́м Моисе́ом во исхо́де Изра́илеве от Еги́пта, и в освобожде́нии люде́й Твои́х от го́рькия рабо́ты фарао́новы, а́гнца закла́ти повеле́л еси́, прообразу́я на кресте́ закла́ннаго во́лею на́с де́ля А́гнца, взе́млющаго всего́ ми́ра грехи́, возлю́бленнаго Сы́на Твоего́, Го́спода на́шего Иису́са Христа́, Ты́ и ны́не, смире́нно мо́лим Тя́, при́зри на хле́б се́й, и благослови́ и освяти́ его́. И́бо и мы́ раби́ Твои́ в че́сть и сла́ву, и в воспомина́ние сла́внаго воскресе́ния того́жде Сы́на Твоего́ Го́спода на́шего Иису́са Христа́, и́мже от ве́чныя рабо́ты вра́жия, и от а́довых нереши́мых у́з разреше́ние, свобо́ду и преведе́ние улучи́хом, пред Твои́м вели́чеством ны́не во всесве́тлый се́й, пресла́вный и спаси́тельный де́нь Па́схи, се́й прино́сим, на́с же сего́ принося́щих, и того́ лобза́ющих, и от него́ вкуша́ющих, Твоему́ небе́сному благослове́нию прича́стники бы́ти сотвори́, и вся́кую боле́знь и неду́г от на́с Твое́ю си́лою отжени́, здра́вие все́м подава́я. Ты́ бо еси́ исто́чник благослове́ния, и цельба́м Пода́тель, и Тебе́ сла́ву возсыла́ем Безнача́льному Отцу́, со Единоро́дным Твои́м Сы́ном, и Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
А́бие же кропи́т а́ртос свяще́нною водо́ю, глаго́ля:
Благословля́ется и освяща́ется а́ртос се́й, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
И посе́м исхо́дит, и полага́ет его́ на анало́гии, лю́дие же, прие́млюще анти́дор, лобза́ют а́ртос.
Глава́ 11. Моли́тва на раздробле́ние а́ртоса в суббо́ту Све́тлыя неде́ли
По Боже́ственной литурги́и, принесе́ну бы́вшу а́ртосу обы́чно в трапе́зу, и отпе́вше три́жды, Христо́с воскре́се: с поклоне́нием, проче́тшу, О́тче на́ш: и трапе́зу благослови́вшу обы́чно, диа́кон глаго́лет:
Го́споду помо́лимся.
И бра́тия: Го́споди поми́луй.
Иере́й глаго́лет моли́тву сию́ над а́ртосом:
Го́споди Иису́се Христе́, Бо́же на́ш, хле́бе а́нгельский, хле́бе живота́ ве́чнаго, соше́дый с небесе́, напита́вый на́с во всесве́тлыя сия́ дни́ пи́щею духо́вною твои́х Боже́ственных благодея́ний, тридне́внаго ра́ди и спаси́тельнаго воскресе́ния: при́зри и ны́не, смире́нно мо́лим тя́, на мольбы́ и благодаре́ния на́ша, и я́коже благослови́л еси́ пя́ть хле́бов в пусты́не, и ны́не благослови́ хле́б се́й, я́ко да вси́ вкуша́ющии от него́, теле́снаго и душе́внаго благослове́ния и здра́вия сподо́бятся благода́тию и щедро́тами Твоего́ человеколю́бия. Ты́ бо еси́ освяще́ние на́ше, и Тебе́ сла́ву возсыла́ем со Безнача́льным Твои́м Отце́м, и Всесвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Бра́тия: Ами́нь.
Раздроби́в же а́ртос обы́чно, раздае́т все́м пре́жде обе́да. Мо́жет же раздроби́ть его́ и на литурги́и по заамво́нной моли́тве, и раздава́ть ве́рующым вме́сто анти́дора.
Глава́ 12. Моли́тва в причаще́нии гро́здия в 6-й де́нь а́вгуста
Го́споду помо́лимся.
Го́споди поми́луй.
Благослови́ Го́споди пло́д се́й ло́зный но́вый, и́же благорастворе́нием возду́шным, и ка́плями дожде́вными, и тишино́ю вре́менною, в се́й зре́лейший приити́ ча́с благоволи́вый, да бу́дет в на́с от того́ рожде́ния ло́знаго причаща́ющихся в весе́лие, и приноси́ти Тебе́ да́р во очище́ние грехо́в, свяще́нным и святы́м Те́лом Христа́ Твоего́, с Ни́мже благослове́н еси́, со Пресвяты́м, и Благи́м и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Ве́домо же бу́ди, я́ко сия́ моли́тва глаго́лется над гро́здием, иде́же виногра́ды, и прино́сятся на благослове́ние во хра́м в се́й шесты́й де́нь а́вгуста. Зде́ же в Вели́цей Росси́и, иде́же не обрета́ются виногра́ды, прино́сятся в се́й де́нь ко хра́му я́блока, и глаго́лется моли́тва о принося́щих нача́тки овоще́й, е́йже нача́ло:
Влады́ко Го́споди Бо́же на́ш:
Та́кожде и и́но ово́щие да прино́сится ко́еждо во свое́ вре́мя ко хра́му на благослове́ние, и моли́тва глаго́лется над ни́ми та́же.
Глава́ 13. Моли́тва о принося́щих нача́тки овоще́й
Влады́ко Го́споди Бо́же на́ш, Твоя́ от Твои́х приноси́ти Тебе́ по предложе́нию кому́ждо повеле́вый, и ве́чных Твои́х бла́г воздая́ние си́м да́руяй, И́же вдовы́ по си́ле приноше́ние благоуго́дно прие́мый, приими́ и ны́не принесе́ная от раба́ Твоего́ и́мярек, и в ве́чных Твои́х сокро́вищах возложи́тися си́м сподо́би, да́руй ему́ и мирски́х Твои́х бла́г оби́льное восприя́тие, со все́ми поле́зными ему́.
Я́ко благослови́ся Твое́ и́мя, и просла́вися Твое́ Ца́рство, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Глава́ 14. Чи́н быва́емый, а́ще случи́тся чесому́ скве́рному или́ нечи́стому но́во впа́сти в сосу́д вина́, или́ еле́а, или́ ме́да, или́ ино́го чесого́
Подоба́ет впа́дшее нечи́стое а́бие взя́ти, и изврещи́ во́н, и во и́н сосу́д вложи́ти вино́, или́ еле́й, истоще́нный же сосу́д мы́ти отвну́трь и отвне́. Свяще́ннику же взе́мшу кади́льницу, по е́же кади́ти измове́нный сосу́д отвну́трь, вложи́ти во́нь во́ду святы́х богоявле́ний, творя́щу креста́ о́браз, три́жды, та́же вложи́ти во́нь вино́ или́ еле́й, и покади́в мо́лится си́це:
Го́споду помо́лимся.
Го́споди поми́луй.
Святы́й Го́споди Бо́же на́ш, И́же Твои́м благоутро́бным прише́ствием вся́кую нечистоту́ вра́жию упраздни́вый, повеле́вый не входя́щым скверни́ти челове́ка, но вся́ чи́ста бы́ти чи́стым, И́же сосу́дом избра́нным Твои́м апо́столом научи́вый на́с, все́м созда́нным Тобо́ю до́брым бы́ти ве́ровати, и ничто́же отме́тно мне́ти, Боже́ственным сло́вом и моли́твою к Тебе́ освяща́емое, Са́м благослови́ вино́ сие́, (или́ еле́й, или́ и́но что́ а́ще бу́дет, зде́ имену́й) Твое́ю благода́тию и лия́нием святы́я воды́, вся́кую скве́рну, или́ сумне́ние от впа́дшаго во́нь га́да ко́знию лука́ваго, отжени́ от мы́сли рабо́в Твои́х, во е́же бы́ти все́м употребля́ющым е́ в весе́лие, дая́й все́м из него́ причаща́ющымся во освяще́нии, и в чи́стой со́вести приступа́ти к Пречи́стым Твои́м Та́йнам.
Я́ко Ты́ еси́ благословля́яй и освяща́яй вся́ческая, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Та́же вкуша́ет пе́рвее свяще́нник из него́, и дае́т и́ до́му господи́ном. А́ще же случи́тся впа́дшему нечи́стому закосне́вшему в сосу́де вина́, или́ еле́а, согни́ти, подоба́ет излия́ти сия́, вино́ или́ еле́й, и ничесому́же си́х прикаса́тися.
Глава́ 15. Моли́тва о копа́нии кла́дязя
Го́споди Бо́же на́ш Вседержи́телю, и Всеси́льне, творя́й вся́ и претворя́яй, то́чию е́же хоте́ти, Иже в непрохо́дных прохо́д обрета́яй неизрече́нною и непостижи́мою му́дростию, Иже от суха́го ка́мене во́дным пода́вый тещи́ пото́ком, и жа́ждущыя лю́ди Твоя́ насы́тивый, Са́м и ны́не Влады́ко все́х, услы́ши моле́ние на́с недосто́йных рабо́в Твои́х, и да́руй на́м во́ду на се́м ме́сте, сла́дкую же и вку́сну, дово́льну у́бо к потре́бе невреди́тельную же ко прия́тию, я́ко да и в се́м сла́вим Пресвято́е и Великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Глава́ 16. Моли́тва над кла́дязем но́вым
Зижди́телю во́д, и Соде́телю все́х, Го́споди Бо́же Вседержи́телю, вся́ сотвори́вый и претворя́яй, Ты́ са́м освяти́ во́ду сию́, посли́ на ню́ святу́ю Твою́ си́лу, на вся́ку сопроти́вну де́тель, и да́ждь все́м прие́млющым от нея́, пития́ ра́ди, или́ умове́ния ра́ди, здра́вие души́ и те́лу, на измене́ние вся́кия стра́сти, и вся́каго неду́га, я́ко да бу́дет исцеле́ния вода́ и поко́я, все́м прикаса́ющымся к не́й, и прие́млющым ю́.
Я́ко Тебе́ подоба́ет вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
Глава́ 17. Чи́н быва́емый, а́ще случи́тся чесому́ скве́рному якову́любо впа́сти в кла́дязь водны́й
Подоба́ет пе́рвее вы́черпати из кла́дязя ка́дей 40, и излия́ти во́н. Та́же возже́г свяще́нник свещы́, и взе́м кади́льницу, кади́т о́крест кла́дязя. Та́же влага́ет во́ду святы́х богоявле́ний крестови́дно, три́жды.
И та́ко ста́в к восто́ку, мо́лится глаго́ля:
Го́споду помо́лимся.
Го́споди Бо́же си́л, вся́ добра́ зело́ сотвори́вый, очища́яй И́менем Твои́м вся́кую скве́рну и нечистоту́, и претвори́вый освяща́яй вся́, Са́м и ны́не Влады́ко, прииди́ в настоя́щий ча́с о́бразом креста́ Твоего́, и очи́сти кла́дязь се́й от обре́тшияся ему́ нечистоты́, и от впа́дшаго во́нь скве́рнаго, или́ га́да, снизходя́ несоверше́нней мы́сли на́шей, и не́мощи помышле́ний, и да не осу́диши на́с до́брых зело́ не вмеща́ющыя, но очи́сти на́с от вся́кия скве́рны пло́ти и ду́ха, и освяти́ во́ду сию́ Ду́хом Твои́м Святы́м.
Я́ко Ты́ еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
Го́споду помо́лимся.
Го́споди поми́луй.
Бо́же вели́кий и ди́вный, неисповеди́мою Твое́ю бла́гостию, и бога́тым про́мыслом стро́яй челове́ческий живо́т, и мирска́я на́м дарова́вый блага́я Твоя́, И́же го́рькую во́ду при Моисе́и лю́дем в сла́дость претвори́вый, и вре́дныя во́ды при Елиссе́и со́лию исцели́вый, И́же апо́столу Твоему́ Петру́ виде́нием законоположи́вый, ничто́же мне́ти скве́рно, или́ нечи́сто, Са́м Человеколю́бче, очи́сти во́ду сию́ знаменова́нием о́браза креста́ Твоего́ от вся́кия скве́рны, и освяти́ ю́ Ду́хом Твои́м Святы́м, во е́же бы́ти е́й чи́стей причаща́ющымся из нея́.
Я́ко Ты́ еси́ Бо́г на́ш, благословля́яй и освяща́яй вся́ческая, и Тебе́ сла́ву возсыла́ем, Отцу́ и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
И отпу́ст.
Глава́ 18. Чи́н благослове́ния но́ваго кла́дязя
Прише́дшу иере́ю ко кла́дязю со свято́ю водо́ю и кропи́лом, и вже́гшу свещы́ три́, взе́млет на себе́ епитрахи́ль, и покади́в кла́дязь о́крест, и ста́в к восто́ком, начина́ет обы́чно:
Благослове́н Бо́г на́ш, ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный. Трисвято́е. О́тче на́ш:
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди, поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Приидите, поклони́мся и припаде́м Самому́ Христу́, Царе́ви и Бо́гу на́шему.
И псало́м 28.
Принеси́те Го́сподеви сы́нове Бо́жии, принеси́те Го́сподеви сы́ны о́вни, принеси́те Го́сподеви сла́ву и че́сть. Принеси́те Го́сподеви сла́ву и́мени Его́, поклони́теся Го́сподеви во дворе́ святе́м Его́. Гла́с Госпо́день на вода́х, Бо́г сла́вы возгреме́, Госпо́дь на вода́х мно́гих. Гла́с Госпо́день в кре́пости, гла́с Госпо́день в великоле́пии. Гла́с Го́спода сокруша́ющаго ке́дры, и стры́ет Госпо́дь ке́дры лива́нския. И истни́т я́ я́ко тельца́ лива́нска, и возлю́бленный я́ко сы́н единоро́жь. Гла́с Го́спода пресеца́ющаго пла́мень огня́. Гла́с Го́спода стряса́ющаго пусты́ню, и стрясе́т Госпо́дь пусты́ню Кадди́йскую. Гла́с Госпо́день сверша́ющий еле́ни, и откры́ет дубра́вы, и в хра́ме Его́ вся́кий глаго́лет сла́ву, Госпо́дь пото́п населя́ет, и ся́дет Госпо́дь Ца́рь в ве́к. Госпо́дь кре́пость лю́дем Свои́м да́ст, Госпо́дь благослови́т лю́ди Своя́ ми́ром.
Го́споду помо́лимся.
Го́споди поми́луй.
И чте́т над кла́дязем моли́тву сию́:
Зижди́телю и Тво́рче вся́ческих, в нача́ле сотвори́вый не́бо и зе́млю и во́ды, и́хже верху́ ноша́шеся Ду́х Бо́жий, и сло́вом Свои́м собра́вый во́ды поднебе́сныя в совокупле́ние еди́но, посыла́яй исто́чники в де́брех, и посреде́ го́р провожда́яй во́ды, напая́ющыя вся́ зве́ри се́льныя, го́рькия во́ды при Моисе́и в пусты́ни дре́вом услади́вый, порази́вый ка́мень, и потеко́ша во́ды, и жа́ждущыя лю́ди Своя́ напои́вый, при Елиссе́и же проро́це со́лию безча́дныя во́ды исцели́вый, Ты́ и ны́не я́ко Бла́г и Человеколю́бец, смире́нно мо́лим Ти ся, при́зри на моли́тву на́с недосто́йных рабо́в Твои́х, и низпосли́ благослове́ние Твое́ небе́сное на во́ду сию́, в студенце́ се́м су́щую, Боже́ственною Твое́ю си́лою и кре́пкою десни́цею отжени́ от нея́ вся́кую сопроти́вную де́тель, и де́йство диа́воле, отими́ от нея́ вся́кую го́ресть и сла́ность и безча́дство, и благослови́ и освяти́ ю́, услади́ же и благоча́дну сотвори́, и все́м прие́млющым и пию́щым от нея́, и мы́ющымся е́ю, да́ждь бы́ти во здра́вие, и измене́ние вся́кия стра́сти и неду́га, и во исцеле́ние вся́кия боле́зни, в сла́ву Тебе́ еди́наго в Тро́ице сла́вимаго Бо́га. Ты́ бо еси́ благословля́яй и освяща́яй вся́ческая, и Тебе́ сла́ву возсыла́ем, Отцу́, и Сы́ну, и Свято́му Ду́ху, и ны́не и при́сно, и во ве́ки веко́в.
Кли́р: Ами́нь.
А́бие же взе́м свяще́нную во́ду, влива́ет ю́ три́жды крестообра́зно в студене́ц, глаго́ля:
Благословля́ется и освяща́ется студене́ц се́й, и вода́ в не́м су́щая, благода́тию Свята́го Ду́ха, излия́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
И твори́т обы́чный дневны́й отпу́ст.
Глава́ 19. Моли́тва о скве́рно я́дших
Влады́ко Го́споди Бо́же на́ш, и́же в вы́шних живы́й и на смире́нныя призира́яй, И́же во святы́х почива́яй, Хвало́ Изра́илева, приклони́ у́хо Твое́, и услы́ши на́с моля́щихся Тебе́, и пода́ждь проще́ние Твоему́ рабу́ (или́ Твое́й рабе́), и́мярек скве́рно я́дшему и вку́сшему (или́ я́дшей и вку́сшей) мя́с, или́ каковы́хлюбо бра́шен не чи́стых, и́хже сне́ди отре́кл еси́ в зако́не святе́м Твое́м, си́х же нево́лею причасти́вшагося (или́ причасти́вшуюся) прости́, и сподо́би его́ (или́ ю́) неосужде́нно причасти́тися стра́шных та́инств, честна́го Те́ла же и Кро́ве Христа́ Твоего́, я́ко да изба́вится про́чее вся́каго нечи́стаго восприя́тия и дея́ния, и я́ко да напитова́яся Боже́ственными Твои́ми та́инствы, и наслажда́яся святы́я Твоея́ и та́йныя Трапе́зы, и безсме́ртных Та́инств, и сохраня́емый с на́ми во Святе́й Твое́й Це́ркви, восхва́лит и просла́вит и́мя Твое́ вы́шнее во вся́ дни́ живота́ своего́.
Я́ко Твое́ е́сть Ца́рство, и си́ла, и сла́ва, Отца́ и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Глава́ 20. Моли́тва над сосу́дом оскве́рншимся
Подоба́ет измы́ти, и влага́емей святе́й воде́ крестови́дно, глаго́лати и моли́тву сию́:
Го́споду помо́лимся.
Го́споди Бо́же на́ш, Еди́не Свя́те, освяти́ сосу́д се́й освяти́тельным Твои́м наи́тием, и очи́сти и́, е́же бы́ти в слу́жбу рабо́в Твои́х нескве́рну, и да́ждь на́м всегда́ во святы́ни моли́тися во святы́х Твои́х це́рквах, я́ко да Тобо́ю всегда́ храни́ми, сла́ву и поклоне́ние Тебе́ возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
Глава́ 21. Моли́тва над пшени́цею оскве́рншеюся, или́ муко́ю или́ ви́дом не́киим
Го́споду помо́лимся.
Го́споди Бо́же на́ш, И́же в смотре́нии Твое́м, е́же по пло́ти, повеле́вый не входя́щым скверни́ти челове́ка, но вся́ чи́ста бы́ти чи́стым, И́же сосу́дом избра́нным Па́влом Твои́м апо́столом научи́вый на́с ве́ровати, вся́ Тобо́ю созда́нна добра́ бы́ти, Боже́ственным сло́вом, и е́же к Тебе́ моли́твою освяща́емая, Са́м и ны́не Влады́ко, состражда́яй не́мощем на́шим, благослови́ пшени́цу сию́ Твое́ю благода́тию и человеколю́бием, благослове́нием, и окропле́нием воды́ сея́, о и́мени Твое́м освяще́нныя, и вся́кую скве́рну, или́ сумне́ние от впа́дшаго в ню́ нечи́стаго ко́знию диа́волею, отжени́ от мы́сли рабо́в Твои́х, и да́ждь и́м наде́ждею я́же в Тя́, и увере́нием Твои́х щедро́т, сея́ причасти́тися прича́стия, во благодаре́ние свята́го Твоего́ И́мене неосужде́нным сохрани́тися.
Я́ко Ты́ еси́ благословля́яй и освяща́яй вся́ческая, и Тебе́ сла́ву возсыла́ем со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Глава́ 22. Моли́тва над со́лию
Бо́же Спаси́телю на́ш, прише́дый во Иерихо́н при Елиссе́и проро́це, и вре́дныя во́ды со́лию исцели́вый, Са́м благослови́ и со́ль сию́, и преложи́ ю́ в же́ртву ра́дования. Ты́ бо еси́ Бо́г на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
Глава́ 23. Моли́тва моле́бная на вся́кую лити́ю
Го́споду помо́лимся.
Го́споди поми́луй.
Го́споди, еди́не в ми́лости бога́тый, и утро́бами бла́гости преклоня́яйся к моле́нием на́с гре́шных и недосто́йных ра́б Твои́х, вся́ на́ша поле́зно стро́яй и правля́яй, прему́дрым Твои́м про́мыслом житие́ на́ше провожда́яй, и вся́ким о́бразом спасе́ния на́шего жела́яй, естество́м долготерпели́в сы́й и многоми́лостив, наказу́яй, и па́ки исцеля́яй, и наказа́ние простира́яй бла́гостне же и человеколю́бне, не во е́же погуби́ти созда́ние ру́к Твои́х, но па́че е́же к нача́льной добро́те па́ки привести́, и к пе́рвому о́ному благоро́дию, его́же погуби́хом простото́ю ума́, и сове́том окая́ннейшаго, па́ки возвести́ хотя́, и все́ми о́бразы смотря́яй, е́же па́ки спасти́ оскуде́вшее от паде́жа о́наго. Са́м Влады́ко Вседержи́телю, при́зри на ны́, и вонми́ моле́нием на́с гре́шных, мно́жество бо беззако́ний на́ших недерзнове́нны на́с сотвори́, и ниже́ сме́ти отню́д проси́ти проще́ния о прегреше́нии. Но ве́дуще Твое́ человеколю́бие, благоутро́бие, мно́гую ми́лость, долготерпе́ние, беззло́бие и премно́гую бла́гость, дерза́юще на глубину́ си́х, и на пучи́ну бла́гости Твоея́, возде́ем ру́це и приле́жно вопие́м Ти́: согреши́хом, беззако́нновахом, нече́ствовахом, я́ко забы́хом за́поведи Твоя́, и в сле́д мы́сли на́шея лука́выя ходи́хом, и я́ко недосто́йно зва́нию и ева́нгелию Христа́ Твоего́ жи́тельствовахом, и святы́м Его́ страсте́м, и е́же о на́с истоща́нию, я́ко бы́хом поноше́ние возлю́бленному Своему́. Свяще́нницы и лю́дие Твои́ изступи́хом, вку́пе вси́ уклони́хомся, непотре́бни бы́хом: не́сть творя́й су́д и пра́вду, не́сть до еди́наго, затвори́хом щедро́ты Твоя́, и человеколю́бие Твое́, и утро́бы ми́лости Бо́га на́шего, зло́бы ра́ди на́шея и лука́вства начина́ний, с ни́миже пожи́хом. Ты́ бла́г еси́, но мы́ беззако́нновахом, Ты́ долготерпели́в, но мы́ я́зв досто́йни. Ве́мы Твою́ бла́гость, а́ще и неразу́миви есмы́, ма́ло, о ни́хже согреши́хом, бие́ни бы́хом. Ты́ стра́шен еси́, и кто́ противоста́нет ти́? Тре́пет прии́мут от Тебе́ го́ры, и вели́честву мы́шцы Твоея́ кто́ противорече́т? А́ще заключи́ши не́бо, кто́ отве́рзет? И а́ще заключи́ши хля́би Твоя́, кто́ постои́т? Легко́ е́сть пред очи́ма Твои́ма и оубо́жити и обогати́ти, оживи́ти и умертви́ти, порази́ти и исцели́ти, е́же хоте́ти Тебе́, дея́ние е́сть соверше́нно. Ты́ разгне́вался еси́, мы́ же согреши́хом, глаго́лет не́кто от дре́вних испове́даяся. На́м же и сопроти́в вре́мя е́сть рещи́: мы́ согреши́хом, Ты́ же разгне́вался еси́, сего́ ра́ди бы́хом поноше́ние сосе́дом на́шим, отврати́л еси́ лице́ Твое́, и нече́стия испо́лнихомся. Но преста́ни Го́споди от гне́ва, осла́би Го́споди, уми́лостивися Го́споди, и не преда́ждь на́с до конца́ беззако́ний ра́ди на́ших, ниже́ на́шими ра́нами да нака́жеши ины́х. Да́ждь на́м муче́нием ины́х уцелому́дритися, ки́их си́х? Язы́ков неве́дающих Тя́ и ца́рств не повину́вшихся держа́ве Твое́й, мы́ же лю́дие Твои́, и же́зл насле́дия Твоего́. Сего́ ра́ди накажи́ ны́, оба́че в бла́гости, а не с я́ростию Твое́ю, да не ума́леных на́с сотвори́ши, и па́че все́х живу́щих на земли́ во уничиже́ние бу́дем, ми́лость бо Твоя́ неизрече́нна, и человеколю́бие Твое́ непобеди́мо, и бога́тство бла́гости Твоея́ неизсле́димо, на ня́же и дерза́юще мо́лимся, и ми́ли ся де́ем прекланя́юще коле́на серде́ц на́ших, преста́ни от се́чи гне́ва Твоего́, мо́лим приле́жно, я́коже при Дави́де дре́вле о и́же на лю́дех Твои́х, а́ще и не подо́бное покая́ние показу́ем, но я́ко преблаги́й уста́ви гне́в Тво́й, укроти́ я́рость Твою́ пра́ведную, и да́ждь стра́ждущым здра́вие, немощству́ющым кре́пость, здра́выя же соблюди́, вся́к неду́г, и вся́кую я́зю отжени́ от люде́й Твои́х, все́х от сего́ ча́яния свободи́, соблюда́яй безнаве́тны по бы́вшей боле́зни и сохраня́яй вседержи́тельною Твое́ю руко́ю неприкоснове́нны от лю́таго сего́ озлобле́ния, и губи́тельнаго сокруше́ния, вои́стинну бо поколеба́ все́х, и смути́ я́рость гне́ва Твоего́. А́ще у́бо и не обраща́емся вся́ко от лука́вств на́ших, но Ты́ са́м изба́ви от лука́выя со́вести все́х на́с, и да́ждь во вся́ком благодея́нии благоугоди́ти Тебе́, моли́твами неискусому́жно Тебе́ ро́ждшия, Чи́стыя Богома́тере, Присноде́вы Мари́и, предста́тельствы святы́х и богови́дных а́нгел, и все́х святы́х я́ко Ты́ еси́ ми́лости исто́чник, и благоутро́бия неизсле́димая пучи́на, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Глава́ 24. Моли́тва во е́же благослови́ти ста́до
Влады́ко Го́споди Бо́же на́ш, вла́сть име́яй вся́кия тва́ри, Тебе́ мо́лимся, и Тебе́ про́сим, я́коже благослови́л и умно́жил еси́ стада́ патриа́рха Иа́кова, благослови́ и ста́до ското́в си́х раба́ Твоего́, (или́ рабы́ Твоея́) и́мярек, и умно́жи, и укрепи́, и сотвори́ е́ в ты́сящы, и изба́ви е́ от наси́лия диа́воля, и от иноплеме́нник, и от вся́каго наве́та враго́в, и возду́ха сме́ртнаго, и губи́тельнаго неду́га, огради́ е́ святы́ми а́нгелы Твои́ми, вся́кую не́мощь, вся́кую за́висть, и искуше́ние, чаровства́ же и волше́бства, от де́йства находя́щыя диа́вольскаго отгоня́я от него́, я́ко Твое́ е́сть Ца́рство, и си́ла, и сла́ва, Отца́ и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Глава́ 25. Моли́тва над се́янием
Го́споди Бо́же на́ш, от Пречи́стыя и Пребога́тыя дла́ни Твоея́, предлежа́щее пред очи́ма Твои́ма се́мен подая́ние принесо́хом Влады́ко, и сему́ Тебе́ вручи́тися мо́лимся: не бо́ сме́яхом в безду́шных земли́ не́дрех заключи́ти сия́, а́ще не воззри́м на повеле́ние Твоего́ вели́чества, повелева́ющее роди́ти, и прозяба́ти земли́, и да́ти се́мена се́ющему, и хле́б в сне́дь. И ны́не мо́лимся Тебе́ Бо́же на́ш, услы́ши ны́ моля́щыяся Тебе́, и отве́рзи на́м сокро́вище Твое́ вели́кое, и благо́е, и небе́сное, и изле́й благослове́ние Твое́, доне́леже удовли́мся по нело́жным Твои́м обеща́нием, и отжени́ от на́с вся́ снеда́ющая пло́д на́ш земны́й, и вся́кое наказа́ние пра́ведно наводи́мое на ны́, гре́х ра́ди на́ших, и бога́тыя Твоя́ щедро́ты низпосли́ на вся́ лю́ди Твоя́, благода́тию и человеколю́бием Единоро́днаго Твоего́ Сы́на, с Ни́мже благослове́н еси́, и с Пресвяты́м и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Глава́ 26. Моли́тва над гумно́м
Го́споди Бо́же на́ш, Исто́чниче благи́х, повеле́вый земли́ извести́ пло́д, благоутро́бия ра́ди Твоего́ и бла́гости, благослови́ и умно́жи и гумно́ сие́, и плодоноше́ние рабо́в Твои́х, испо́лни сокро́вища и́х вся́каго блага́го плода́, пшени́цы, вина́ и еле́а, и сохрани́ и́х от вся́каго искуше́ния, со все́ми су́щими у ни́х, и просвети́ и́х в позна́нии Твое́м, да благоуго́дни Тебе́ бы́вше, сподо́бятся ве́чных Твои́х бла́г, я́ко благослови́ся Твое́ и́мя, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Глава́ 27. Моли́тва, о е́же благослови́ти мре́жи
Го́споди Иису́се Христе́ Бо́же на́ш, от пяти́ хле́бов и двою́ ры́бу, пя́ть ты́сящь насы́тивый, и от избы́ток мно́жество укру́хов собра́ти устро́ивый, Са́м Влады́ко Всеси́льный, и предлежа́щыя мре́жи благослови́, моли́твами Преблагослове́нныя, Сла́вныя Влады́чицы на́шея Богоро́дицы, и Присноде́вы Мари́и, свята́го сла́внаго и всехва́льнаго апо́стола, и первоверхо́внаго апо́столов Петра́, и и́же от ни́х причаща́ющыяся ры́б, в ми́ре и здра́вии душе́вном и теле́сном сохрани́. Я́ко Ты́ еси́ Пода́тель все́х благи́х, и Тебе́ сла́ву возсыла́ем со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Глава́ 28. Чи́н благослове́ния пче́л
Прише́д иере́й на ме́сто, иде́же стоя́т пче́лы, начина́ет:
Благослове́н Бо́г на́ш, всегда́, ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный. Трисвято́е. О́тче на́ш:
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди, поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Приидите, поклони́мся и припаде́м Самому́ Христу́, Царе́ви и Бо́гу на́шему.
И псало́м 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.
Та́же, псало́м 84:
Благоволи́л еси́, Го́споди, зе́млю Твою́, возврати́л еси́ пле́н Иа́ковль: оста́вил еси́ беззако́ния люде́й Твои́х, покры́л еси́ вся́ грехи́ и́х. Укроти́л еси́ ве́сь гне́в Тво́й, возврати́лся еси́ от гне́ва я́рости Твоея́. Возврати́ на́с Бо́же спасе́ний на́ших, и отврати́ я́рость Твою́ от на́с. Еда́ во ве́ки прогне́ваешися на ны́? Или́ простре́ши гне́в Тво́й от ро́да в ро́д? Бо́же, Ты́ обра́щься оживи́ши ны́, и лю́дие Твои́ возвеселя́тся о Тебе́. Яви́ на́м Го́споди ми́лость Твою́, и спасе́ние Твое́ да́ждь на́м. Услы́шу, что́ рече́т о мне́ Госпо́дь Бо́г, я́ко рече́т ми́р на лю́ди Своя́ и на преподо́бныя Своя́, и на обраща́ющыя сердца́ к Нему́. Оба́че бли́з боя́щихся Его́ спасе́ние Его́, всели́ти сла́ву в зе́млю на́шу. Ми́лость и и́стина срето́стеся, пра́вда и ми́р облобыза́стася. И́стина от земли́ возсия́, и пра́вда с небесе́ прини́че, и́бо Госпо́дь да́ст бла́гость, и земля́ на́ша да́ст пло́д сво́й. Пра́вда пред Ни́м предъи́дет, и положи́т в пу́ть стопы́ своя́.
Та́же псало́м 122.
К Тебе́ возведо́х о́чи мои́, живу́щему на небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́. Поми́луй на́с Го́споди, поми́луй на́с, я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих, и уничиже́ния го́рдых.
Чита́емым же псалмо́м, окропля́ет иере́й места́ пче́л вся́, глаго́ля и са́м псало́м 50-й та́йно: Поми́луй мя́ Бо́же:
Та́же ре́к: Го́споду помо́лимся.
И чте́ц: Го́споди поми́луй.
Чте́т иере́й моли́твы сия́
Созда́телю все́х Бо́же, се́мена благословля́яй и умножа́яй, и к употребле́нию на́шему сия́ благопотре́бна творя́й, хода́тайством Предте́чи и Крести́теля Иоа́нна, ми́лостивно вне́мля моли́твам на́шим, пче́лы сия́ благослови́ти и освяти́ти Свои́м благоутро́бием благоизво́ли, да оби́льнее плоды́ своя́ прино́сят, во е́же ко хра́му Твоему́ и святы́х олтаре́й Твои́х ле́поте и украше́нию, ку́пно же и к на́шему употребле́нию бы́ти и́м, о Христе́ Иису́се Го́споде на́шем, Ему́же че́сть и сла́ва, во ве́ки веко́в, ами́нь.
Го́споду помо́лимся.
Чте́ц: Го́споди поми́луй.
Иере́й:
Бо́же, трудо́м челове́ческим и безслове́сными живо́тными благоде́йствовати ве́дый, и неизрече́нным милосе́рдием Твои́м саме́х пче́л плоды́ и дела́ к ну́ждам на́шим употребля́ти научи́вый, смире́нно мо́лимся вели́чествию Твоему́: пче́лы сия́ благослови́ти изво́ли, и к приобре́тению челове́ческому ро́ду умно́жи я́, снабдева́я и́х, и препитава́я, да ки́йждо на вели́чество Твое́ и безме́рныя щедро́ты Твоя́ упова́яй, в хране́нии же си́х живо́тных тружда́яйся, трудо́в свои́х оби́льныя плоды́ сподо́бится восприя́ти, и небе́снаго благослове́ния испо́лнится, о Христе́ Иису́се Го́споде на́шем, Ему́же че́сть и сла́ва во ве́ки веко́в, ами́нь.
И па́ки окропля́ет ме́сто пче́л, и чте́т Ева́нгелие от Луки́, зача́ло 114.
Во вре́мя о́но, воскре́с Иису́с от ме́ртвых, ста́ посреде́ учени́к свои́х, и глаго́ла и́м: ми́р ва́м. Убоя́вшеся же и пристра́шни бы́вше, мня́ху ду́х ви́дети. И рече́ и́м: что́ смуще́ни есте́? И почто́ помышле́ния вхо́дят в сердца́ ва́ша? Ви́дите ру́це Мои́ и но́зе Мои́, я́ко Са́м А́з е́смь. Осяжи́те Мя́ и ви́дите, я́ко ду́х пло́ти и ко́сти не и́мать, я́коже Мене́ ви́дите иму́ща. И сие́ ре́к, показа́ и́м ру́це и но́зе. Еще́ же не ве́рующым и́м от ра́дости и чудя́щымся, рече́ и́м: и́мате ли что́ сне́дно зде́? Они́ же да́ша Ему́ ры́бы печены́ ча́сть, и от пче́л со́т. И взе́м пред ни́ми яде́. Рече́ же и́м: сия́ су́ть словеса́, я́же глаго́лах к ва́м, еще́ сы́й с ва́ми, я́ко подоба́ет сконча́тися все́м напи́санным в зако́не Моисе́ове и проро́цех и псалме́х о Мне́.
По Ева́нгелии же глаго́лет сие́:
Си́ми ева́нгельскими словесы́, да очи́стятся грехи́ на́шя, и разоря́тся и поги́бнут вся́ обая́ния, а́ще ка́я су́ть на ме́сте се́м, да сни́дет же на не́ благослове́ние всемогу́щаго Бо́га Отца́, и Сы́на, и Свята́го Ду́ха, ами́нь.
И па́ки кропи́т ме́сто пче́л, и быва́ет отпу́ст.
Глава́ 29. Благослове́ние ро́ев пче́льных, во у́лия но́ва всажде́нных
Нача́ло я́коже и в предъиду́щей главе́, по псалме́х же моли́тва сия́:
Бо́же Всемоги́й, Предве́чный, содержа́й го́рстию всю́ тва́рь, облада́яй не́бом и земле́ю, и все́ми я́же на ни́х, вся́кому же созда́нию, е́же на по́льзу бы́ти ще́дро подая́й, умиле́нно мо́лим Ти ся Всебла́же, я́коже дре́вле Изра́ильтяном зе́млю ме́дом и млеко́м теку́щую дарова́ти, в пусты́ни Иоа́нна крести́теля Твоего́ ди́виим ме́дом воспита́ти благоизво́лил еси́, та́кожде ны́не призре́ния Твоего́ благоволе́нием к живопита́нию на́шему се́й пче́льник и его́ у́лия благослови́, умножа́я преумно́жи в не́м пче́лы, и благода́тию Твое́ю я́ соблюда́ющи, ту́чнаго на́с ме́да испо́лни, да ника́ко се́й пче́льник созда́ний Твои́х пче́льных лише́н, но всегда́ преиспо́лнен со́ты ме́да бу́дет, и по премно́гой благосты́ни и непобеди́мей кре́пости Твое́й, да яви́тся неподви́жимь мно́гими лука́вствы, и непоколеби́мь зазо́рными обая́нии, но Твое́ю всеси́льною огражде́н держа́вою, и остене́н ополче́нием, от вся́каго кова́рства волше́бнаго сохране́н, и всегда́ в Твое́й Христе́ рукоя́ти невреди́мь пребу́дет. Твое́ бо е́сть, е́же ми́ловати и спаса́ти ны́ Христе́ Бо́же на́ш, и Тебе́ сла́ву возсыла́ем, со Отце́м и Святы́м Ду́хом, во ве́ки, ами́нь.
И кропи́т иере́й пче́л и у́лия водо́ю свяще́нною:
Во и́мя Отца́, и Сы́на, и Свята́го Ду́ха, ами́нь.
Посе́м глаго́лет обы́чный дневны́й отпу́ст.
Глава́ 30. Моли́тва, е́же освяти́ти како́е-ли́бо благово́нное зе́лие
Благослове́н Бо́г на́ш, ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный. Трисвято́е. О́тче на́ш:
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споду помо́лимся.
И чте́тся моли́тва сия́:
Го́споди Бо́же Вседержи́телю, сло́вом Твои́м вся́ческая испо́лнивый, и возрасти́ти повеле́вый земли́ вся́ плоды́ во своя́ времена́, и дая́ти я́ в ра́дость и в живо́т челове́ком, Ты́ Са́м, Всеблаги́й Влады́ко, и се́мена сия́, с разли́чными зе́лиями принесе́нныя во святы́й хра́м се́й, благослови́ и освяти́ Ду́хом Твои́м Святы́м, и рабо́в Твои́х си́х, прие́млющих зе́лия сия́ с се́менами, от вся́кия скве́рны очи́сти, и до́мы и́х вся́каго благово́ния испо́лни, во е́же бы́ти си́м и все́м ве́рою храня́щым я́, и кадя́щымся и́ми в соблюде́ние и изба́ву от все́х вра́жиих прило́гов и во отгна́ние вся́каго мечта́ния, от де́йства диа́воля находя́щаго, дневна́го и нощна́го, на благослове́ние же душа́м и телесе́м, ве́рным Твои́м лю́дем и ското́м, домово́м же и ме́стом. Я́ко да вси́, прие́млющии сия́ зе́лия, восприи́мут себе́ покро́в души́ и те́ла, и да бу́дет на́шему спасе́нию врачевство́ Твоея́ благода́ти та́инство, да в ко́ем-ли́бо ме́сте возло́жится, или́ на ко́ем употребля́емо бу́дет, во е́же получи́ти благослове́ние, вся́ (проти́вной си́ле отту́ду прогна́нней) десни́ца Твоя́ да покры́ет, во сла́ву Пресвята́го, Великоле́паго и Всепокланя́емаго и́мене Твоего́. Ему́же подоба́ет вся́кая сла́ва че́сть и поклоне́ние, со Отце́м и Святы́м Ду́хом, ны́не и при́сно, и во ве́ки веко́в, ами́нь.
И окропля́ются свято́ю водо́ю три́жды, с обы́чными слова́ми окропле́ния и освяще́ния, и отпу́ст.
Глава́ 31. После́дование моле́бнаго пе́ния, пева́емаго во вре́мя бездо́ждия
Иере́й обы́чно начина́ет: Благослове́н Бо́г на́ш, ны́не и при́сно, и во ве́ки веко́в. Ами́нь.
Чте́ц же а́бие чте́т: Сла́ва Тебе́, Бо́же на́ш, сла́ва Тебе́.
Царю́ Небе́сный. Трисвято́е: Пресвята́я Тро́ице: О́тче на́ш:
Иере́й: Я́ко Твое́ е́сть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Чте́ц: Го́споди, поми́луй 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Приидите, поклони́мся и припаде́м Самому́ Христу́, Царе́ви и Бо́гу на́шему.
И псало́м 64:
Тебе́ подоба́ет песнь, Бо́же, в Сио́не, и Тебе́ возда́стся моли́тва во Иерусали́ме. Услы́ши моли́тву мою́, к Тебе́ вся́ка плоть прии́дет. Словеса́ беззако́нник премого́ша нас, и нече́стия на́ша Ты очи́стиши. Блаже́н, eго́же избра́л еси́ и прия́л, всели́тся во дво́рех Твои́х. Испо́лнимся во благи́х до́му Твоего́, свят храм Твой, ди́вен в пра́вде. Услы́ши ны, Бо́же, Спаси́телю наш, упова́ние всех конце́й земли́, и су́щих в мо́ри дале́че, уготовля́яй го́ры кре́постию Свое́ю, препоя́сан си́лою, смуща́яй глубину́ морску́ю, шу́му волн eго́ кто постои́т? Смяту́тся язы́цы, и убоя́тся живу́щии в конца́х от зна́мений Твои́х, исхо́ды у́тра и ве́чера украси́ши. Посети́л еси́ зе́млю и упои́л еси́ ю́, умно́жил еси́ обогати́ти ю́. Река́ Бо́жия напо́лнися вод. Угото́вал еси́ пи́щу им, я́ко та́ко [есть] угото́вание. Бразды́ ея́ упо́й, умно́жи жи́та ея́, в ка́плях ея́ возвесели́тся возсия́ющи. Благослови́ши вене́ц ле́та бла́гости Твоея́, и поля́ Твоя́ испо́лнятся ту́ка, разботе́ют кра́сная пусты́ни, и ра́достию хо́лми препоя́шутся. Оде́яшася о́вни о́вчии, и удо́лия умно́жат пшени́цу, воззову́т, и́бо воспою́т.
Сла́ва, и ны́не. Аллилу́иа, три́жды.
Диа́кон же а́бие глаго́лет ектению́ вели́кую:
Ми́ром Го́споду помо́лимся.
Ли́к: Го́споди, поми́луй.
О свы́шнем ми́ре и спасе́нии душ на́ших Го́споду помо́лимся.
Ли́к: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й, и соедине́нии всех, Го́споду помо́лимся.
Ли́к: Го́споди, поми́луй.
О святе́м хра́ме сем, и с ве́рою, благогове́нием, и стра́хом Бо́жиим входя́щих в о́нь, Го́споду помо́лимся.
Ли́к: Го́споди, поми́луй.
О Вели́ком Господи́не и отце́ на́шем, Святе́йшем Патриа́рхе Кири́лле, и о господи́не на́шем преосвяще́ннейшем митрополи́те (или́ архиепи́скопе, или́ епи́скопе) и́мярек, честне́м пресви́терстве, во Христе́ диа́констве и о все́м при́чте и лю́дех, Го́споду помо́лимся.
Ли́к: Го́споди, поми́луй.
О Богохрани́мей стране́ на́шей, власте́х и во́инстве ея́ Го́споду помо́лимся.
Ли́к: Го́споди, поми́луй.
О гра́де сем, (а́ще в монастыре́, о святе́й оби́тели сей), вся́ком гра́де, стране́ и ве́рою живу́щих в них, Го́споду помо́лимся.
Ли́к: Го́споди, поми́луй.
О благорастворе́нии возду́хов, о изоби́лии плодо́в земны́х, и вре́менех ми́рных, Го́споду помо́лимся.
Ли́к: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных, и о спасе́нии их, Го́споду помо́лимся.
Ли́к: Го́споди, поми́луй.
Та́же прилага́ет сия́:
О е́же не помяну́ти беззако́ний и непра́вд люде́й Свои́х, и отврати́ти от на́с ве́сь гне́в Сво́й пра́ведно дви́жимый на ны́, и не умори́ти на́с гла́дом и жа́ждою, Го́споду помо́лимся.
Ли́к: Го́споди, поми́луй.
О е́же благорастворе́нныя возду́хи и дожди́ благовре́менныя к плодоноше́нию ми́лостивно посла́ти земли́, и лю́дем Свои́м, Го́споду помо́лимся.
Ли́к: Го́споди, поми́луй.
О е́же во гне́ве Свое́м не погуби́ти люде́й Свои́х, и ското́в, но повеле́ти о́блакам свы́ше одожди́ти и к плодоноше́нию ороси́ти зе́млю, Го́споду помо́лимся.
Ли́к: Го́споди, поми́луй.
О е́же повеле́ти земли́ прозяба́ти плоды́ на весе́лие и пи́щу люде́й Свои́х, и зла́к на слу́жбу челове́ком, траву́ же ското́м, Го́споду помо́лимся.
Ли́к: Го́споди, поми́луй.
О е́же ми́лостивно призре́ти на во́пль, пла́ч, стена́ния, и умиле́нныя моли́твы ста́рых и ю́ных, младе́нцев же и все́х люде́й Свои́х, и не погуби́ти на́с гла́дом гре́х ра́ди на́ших, но пощади́ти от сме́рти ду́ши на́ша, и препита́ти на́с в гла́де, Го́споду помо́лимся.
Ли́к: Го́споди, поми́луй.
О е́же благоприя́тным бы́ти мольба́м на́шим и я́коже Илию́ иногда́ послу́шати на́с и до́ждь и благорастворе́ние возду́ха пода́ти, и поми́ловати на́с, Го́споду помо́лимся.
Ли́к: Го́споди, поми́луй.
О е́же ми́лостивно услы́шати гла́с моли́твы на́шея, и изба́вити на́с от гла́да, губи́тельства, тру́са, пото́па, огня́, гра́да, меча́, наше́ствия иноплеме́нников, междоусо́бныя бра́ни, и вся́кой смертоно́сныя я́звы, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Ли́к: Го́споди, поми́луй.
Заступи́, спаси́ поми́луй и сохрани́ нас Бо́же, Твое́ю благода́тию.
Ли́к: Го́споди, поми́луй.
Пресвяту́ю, Пречи́стую, преблагослове́нную, сла́вную Влады́чицу на́шу Богоро́дицу, и Присноде́ву Мари́ю, со все́ми святы́ми помяну́вше, са́ми себе́, и другъдру́га, и ве́сь живо́т наш Христу́ Бо́гу предади́м.
Ли́к: Тебе́ Го́споди.
Возглас:
Я́ко подоба́ет Тебе́ вся́кая сла́ва, че́сть и поклоне́ние, со Отце́м и Святы́м Ду́хом, ны́не и при́сно, и во ве́ки веко́в, ами́нь.
Ли́к: Ами́нь.
И абие поет: Бог Госпо́дь и яви́ся нам, благослове́н Гряды́й во И́мя Госпо́дне.
Сти́х 1: Испове́дайтеся Го́сподеви, я́ко благ, я́ко в век ми́лость Его́.
Сти́х 2: Обыше́дше обыдо́ша мя, и и́менем Госпо́дним противля́хся им.
Сти́х 3: Не умру́, но жив бу́ду, и пове́м дела́ Госпо́дня.
Сти́х 4: Ка́мень, его́же небрего́ша зи́ждущии, сей бысть во главу́ у́гла: от Го́спода бысть сей, и есть ди́вен во очесе́х на́ших.
И тропари́ сия́:
Возду́ха растворе́ние повеле́нием Твои́м изменя́яй Го́споди, во́льный до́ждь с теплото́ю со́лнечною да́руй земли́, да прино́сит лю́дем Твои́м плоды́ изоби́льныя, и насы́тити все́ живу́щее Твои́м благоволе́нием, моли́твами Богоро́дицы и все́х святы́х Твои́х.
Сла́ва, гла́с 6:
Все́х Творца́ и Зижди́теля, и благи́х Да́теля Тя́ ве́дуще, Го́споди, к Тебе́ припа́даем, и приле́жно мо́лим: пощади́, Милосе́рде, и прости́ я́ко Бла́г беззако́ния на́ша, и настоя́щаго пра́веднаго гне́ва изба́ви рабо́в Твои́х, пода́й я́ко Бла́г жа́ждущей земли́ благопло́дныя дожди́, я́ко Еди́н Многоми́лостив.
И ны́не. Богоро́дичен, гла́с то́йже:
Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы, но предвари́ я́ко Блага́я на по́мощь на́с, ве́рно зову́щих Ти́: ускори́ на моли́тву, и потщи́ся на умоле́ние, предста́тельствующи при́сно Богоро́дице, чту́щих Тя́.
Таже, псалом 50:
Поми́луй мя, Бóже, по вели́цей ми́лости Твоéй, и по мнóжеству щедрóт Твои́х очи́сти беззакóние моé. Наипáче омы́й мя от беззакóния моегó, и от грехá моегó очи́сти мя; я́ко беззакóние моé аз знáю, и грех мой прéдо мно́ю есть вы́ну. Тебé еди́ному согреши́х и лукáвое пред Тобóю сотвори́х; я́ко да оправди́шися во словесéх Твои́х, и победи́ши внегдá суди́ти Ти. Се бо в беззакóниих зачáт есмь, и во гресéх роди́ мя мáти моя́. Се бо и́стину возлюби́л еси́; безвéстная и тáйная прему́дрости Твоея́ яви́л ми еси́. Окропи́ши мя иссóпом, и очи́щуся; омы́еши мя, и пáче снéга убелю́ся. Слу́ху моему́ дáси рáдость и весéлие; возрáдуются кóсти смирéнныя. Отврати́ лицé Твоé от грех мои́х и вся беззакóния моя́ очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó и Ду́ха Твоегó Святáго не отыми́ от менé. Воздáждь ми рáдость спасéния Твоегó и Ду́хом Влады́чним утверди́ мя. Научу́ беззакóнныя путéм Твои́м, и нечести́вии к Тебé обратя́тся. Избáви мя от кровéй, Бóже, Бóже спасéния моегó; возрáдуется язы́к мой прáвде Твоéй. Гóсподи, устнé мои́ отвéрзеши, и устá моя́ возвестя́т хвалу́ Твою́. Я́ко áще бы восхотéл еси́ жéртвы, дал бых у́бо: всесожжéния не благоволи́ши́. Жéртва Бóгу дух сокрушéн; сéрдце сокрушéнно и смирéнно Бог не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Твой тельцы́.
Кано́н моле́бный к Человеколю́бцу Го́споду в бездо́ждие, его́ же краестро́чие:
Да́ждь до́ждь земле́ жа́ждущей, Спа́се.
Пе́снь 1.
Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския, я́ко просла́вися.
Приими́, Спа́се, моле́ние от недосто́йных на́ших у́ст и низпосли́ с небесе́ земли́ дожди́ плодоно́сны, Человеколю́бец сы́й и Многоми́лостив.
Очи́сти ны́не, Го́споди, грехи́ на́ша и пра́ведный гне́в Тво́й отврати́, Спа́се, и пода́ждь с небесе́ дожди́ потре́бныя земле́.
Сла́ва: Прииди́те челове́цы, воспла́чем к Бо́гу все́х, во умиле́нии зову́ще: прости́ Человеколю́бче, на́ша прегреше́ния, и посли́ с небесе́ дожди́ жа́ждущей земли́.
И ны́не, Богоро́дичен: Све́т Тобо́ю позна́хом, Богороди́тельнице, те́мже Тя́ мо́лим и умилостивля́ем: моля́щи не преста́й Творца́ и Сы́на Твоего́, посла́ти земли́ до́ждь.
Катава́сия по вся́кой пе́сни.
Пе́снь 3.
Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в се́рдца на́с пою́щих Тя́.
Всю́ тва́рь дла́нию содержа́й, Го́споди, услы́ши я́ко Ще́др моле́ния рабо́в Твои́х и низпосли́ во́ду на всю́ зе́млю.
Сы́й Бла́г и Благопремени́тель я́ко имы́й бе́здну милосе́рдия, не пре́зри моле́ния на́ша, но посли́ на́м ми́рный до́ждь.
Сла́ва: Бога́тство е́же на́м да́л еси́, ижди́хом блу́дно: но я́ко име́яй, Го́споди, бе́здну милосе́рдия, и Оте́ц бла́г сы́й умилосе́рдися и дожди́ благовре́менныя пода́ждь земле́.
И ны́не, Богоро́дичен: Я́ко иму́щая к Человеколю́бцу Сы́ну Твоему́ благоприя́тное дерзнове́ние, умоли́, Чи́стая, пода́ти земли́ дожди́ плодоно́сны, по хода́тайствы Твои́ми.
Изба́ви от бе́д рабы́ Твоя́, Ми́лостиве, я́ко мы́ усе́рдно к Тебе́ прибега́ем, к Ми́лостивому Изба́вителю, все́х Влады́це Го́споду Иису́су.
Спаси́ от бе́д рабы́ Твоя́, Пресвята́я Богоро́дице Де́во, я́ко мы́ вси́ по Бо́зе к Тебе́ прибега́ем, я́ко к Неруши́мей Стене́ и Предста́тельнице.
Пе́снь 4
Ирмо́с: Пою́ Тя́, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.
Свы́ше при́зри, Бла́же, на на́с согреши́вших, и да́руй, Го́споди, ми́лость Твою́ по все́й земли́, и низпосли́, мо́лимся, бога́тно ми́лости Твоя́, Человеколю́бче.
На́йде на на́с согреши́вших гне́в Тво́й, Человеколю́бче, и небеса́ заключи́ не да́ти дожде́в земли́ Твое́й: те́мже мо́лим Тя́ раби́ Твои́, да не я́ростию Твое́ю, Сло́ве, нака́жеши на́с.
Сла́ва: Растворе́ние изменя́яй возду́ха, повеле́нием Твои́м, Го́споди, до́ждь во́льный да́руй на́м, да принесе́т земля́ плоды́ изоби́льныя в насыще́ние всего́ живу́щаго, благоволе́нием Твои́м.
И ны́не, Богоро́дичен: Ты́, Ма́ти, Богоро́дице, была́ еси́ Бо́га на́шего, те́мже ве́рою вси́ мо́лим Тя́, Влады́чице, я́ко иму́щую дерзнове́ние: Того́ моли́ о все́х на́с, да низпо́слет во́ду по все́й земли́.
Пе́снь 5
Ирмо́с: Све́та пода́телю, и веко́в тво́рче Го́споди, во све́те Твои́х повеле́ний наста́ви; ра́зве бо Тебе́ ино́го Бо́га не зна́ем.
Моли́твами, Спа́се, безпло́тных, благосе́рдно услы́ши все́х на́с, при́сно моля́щихся, и да́ждь до́ждь земле́ Твое́й жа́ждущей, я́ко еди́н Человеколю́бец.
Двоенадеся́тице ученико́в со страда́льцами к Бо́гу моли́тву о на́с твори́те, я́ко да изба́вит на́с от вся́кия ну́жди, гне́ва же и ско́рби.
Сла́ва: Бу́ди на́м Благосе́рд во вре́мя искуше́ния, Го́споди, и преще́ния належа́щаго спаси́ на́с и посли́ земли́ Твое́й до́ждь во́лен.
И ны́не, Богоро́дичен: Вси́ Хода́таицу Тя́ ны́не к Бо́гу и́мамы, я́ко вои́стину, те́мже мо́лимся, кро́вом Твои́м, Чи́стая, гра́д Тво́й спаса́й от вся́каго зла́.
Пе́снь 6
Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́ Бо́же мя́ возведи́.
Мно́жество му́чеников, я́ко иму́щии ко Го́споду дерзнове́ние мно́гое, моли́те ны́не до́ждь дарова́ти, и пло́д изоби́лия по все́й земле́.
Мо́лимся моли́твами Твои́х ученико́в, осла́би, оста́ви, Го́споди, грехи́ на́ша, и гне́в отврати́ от на́с, и пода́ждь земле́ до́ждь.
Сла́ва: Мо́лим, Влады́ко Го́споди, Тебя́, я́ко Блага́го Человеколю́бца, любо́вию душе́вною пощади́ на́с, и да́руй дожди́ плодоно́сны жа́ждущей земле́.
И ны́не, Богоро́дичен: Моли́ти не преста́й, мо́лимся Сы́на Твоего́, Пречи́стая Богороди́тельнице, о на́с рабе́х Твои́х, умири́ти, и спасти́ от вся́каго гне́ва.
Пе́снь 7
Ирмо́с: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша, и ороси́ я̀ а́нгел: услы́шася уже́ у́ст ва́ших моли́тва.
Душа́ми, Бла́же, госпо́дствующа все́ми, Тебе́ ве́дуще, Бла́же, мо́лим: пощади́, прости́, я́ко Бла́г и Человеколю́бец, и настоя́щаго пра́веднаго преще́ния на́с изба́ви, и да́руй я́ко Бла́г дожди́ жа́ждущей земле́.
Я́коже иногда́ Манасси́ю от живо́тна ме́днаго пока́явшагося, Спа́се, изба́вил еси́, и спа́сл еси́ от смертоно́снаго слу́чая, Благоутро́бне, Ще́дре, пода́ждь и на́м ми́лости Твоя́, и сохрани́ на́с от губи́тельства и гла́да.
Сла́ва: Умилосе́рдися ны́не на на́с я́ко Бла́г и Ми́лостив, и́бо согреши́хом, беззако́нновахом, и непра́вдовахом вси́. Те́мже мо́лим Тя́ со стра́хом: не гне́вом Твои́м, Человеколю́бче, накажи́ при́чет и лю́ди, но во́ду посли́ земле́.
И ны́не, Богоро́дичен: Тебе́ вси́ челове́цы прибе́жище тве́рдое и ору́жие необори́мое, Богороди́тельнице, ве́мы и мо́лим рабы́ Твои́, изба́ви преще́ния ва́рварскаго лю́ди и гра́д Тво́й: от гла́да же и губи́тельства, тру́са и вся́кия беды́.
Пе́снь 8
Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.
Илия́ сло́вом до́ждь уде́рживает и па́ки сло́вом с небесе́ на зе́млю низво́дит. Те́м же мо́лим Тя́: того́ моли́твами, Ще́дре, посли́ и ны́не земле́ дожди́ водны́я с небесе́.
С безпло́тных ли́ки апо́столов, проро́ков же и му́чеников, свяще́нников Собо́р и преподо́бных мно́жество, я́ко Созда́теля все́х и Го́спода, Тебе́ мо́лит спасти́ пою́щия Тя́.
Сла́ва: Я́коже Ио́ну от зве́ря и мо́ря и Дании́ла от ро́ва и звере́й я́ко Бо́г изба́вил еси́, та́ко и ны́не услы́ши, Бла́же, рабо́в Твои́х и изба́ви от вся́кия ну́жды люде́й Твои́х.
И ны́не, Богоро́дичен: Тебе́ ро́ждшую, Иису́се, Богоро́дицу на моли́тву ны́не подвиза́ем, уще́дрити и спасти́ согреши́вшия лю́ди и па́ки любо́вию к Тебе́ прибега́ющыя и превознося́щыя во вся́ ве́ки.
Пе́снь 9
Ирмо́с: От Бо́га Бо́га Сло́ва, неизрече́нною му́дростию преше́дшаго обнови́ти Ада́ма, я́дию в тле́ние па́дшаго лю́те; от святы́я Де́вы неизрече́нно воплоти́вшагося на́с ра́ди, ве́рни единому́дренно пе́сньми велича́ем.
Земле́ жа́ждущей, Ще́дре, и на́м прося́щим Твоего́ человеколю́бия, Бла́же, ми́лостивый Влады́ко, яви́ся, я́ко Бо́г Вседержи́тель, и да́руй на́м я́ко Бла́г дожди́ плодоно́сны, и спаси́ души́ на́ша.
Поми́луй, Ми́лостиве, ру́ку Твое́ю де́ло, прости́ на́с я́ко Бла́г: не я́ростию Твое́ю обличи́ лю́ди, но преклони́ у́хо Твое́, и вонми́ моли́тве на́шей, и пода́ждь земле́ Твое́й дожди́ водны́я, Го́споди.
Сла́ва: Изба́ви от язы́к и ва́рваров и вся́каго супоста́та гра́д Тво́й и вся́ лю́ди, и дожди́ на́м да́руй плодоно́сны, Ще́дре, во изоби́лие все́х плодо́в, и спасе́ние низпосли́, Человеколю́бче.
И ны́не, Богоро́дичен: Тебе́ прообразу́ющи халде́йская пе́щь, Богоро́дице, о́троки росо́ю прохлажда́ше, посреде́ пла́мене ликовству́ющих, ны́не же и на́с я́ко в пещи́ о́гненной горя́щих су́шею дожде́м прохлади́, Влады́чице, и спаси́ рабы́ Твоя́, Твои́ми моли́твами, Ма́ти Бо́га Человеколю́бца.
Посе́м а́бие о́ба ли́ка соше́дшеся пою́т:
Досто́йно е́сть я́ко вои́стинну блажи́ти Тя́, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и славне́йшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя́ велича́ем.
Чте́ц: Трисвято́е. Пресвята́я Тро́ице: О́тче на́ш:
Иере́й: Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Тропари́, гла́с 6:
Поми́луй на́с, Го́споди, поми́луй на́с: вся́каго бо отве́та недоуме́юще, сию́ Ти́ моли́тву я́ко Влады́це, гре́шнии прино́сим: поми́луй на́с.
Сла́ва: Го́споди поми́луй на́с, на Тя́ бо упова́хом, не прогне́вайся на ны́ зело́, и не помяни́ беззако́ний на́ших, но при́зри и ны́не я́ко Благосе́рд, и изба́ви на́с; от враго́в на́ших: Ты́ бо еси́ Бо́г на́ш, и мы́ лю́дие Твои́, вси́ дела́ ру́к Твои́х, и и́мя Твое́ призыва́ем.
И ны́не, Богоро́дичен: Милосе́рдия две́ри отве́рзи на́м, благослове́нная Богоро́дице, наде́ющиися на Тя́ да не поги́бнем, но да изба́вимся Тобо́ю от бе́д: Ты́ бо еси́ спасе́ние ро́да христианского.
Посе́м а́бие иере́й возглаша́ет:
Я́ко Свя́т еси́ Бо́же на́ш, и на святы́х почива́еши, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Ли́к: Ами́нь.
И а́бие пое́т: Святы́й Бо́же:
Сла́ва, и ны́не: обы́чно.
По сконча́нии же трисвята́го пе́ния, диа́кон глаго́лет: Во́нмем.
Иере́й: Ми́р все́м.
Чте́ц: И ду́хови твоему́.
Диа́кон: Прему́дрость, во́нмем.
Чте́ц: Проки́мен, гла́с 4: Бразды́ земны́я упо́й, и умно́жи жи́та ея́.
Сти́х: В ка́плях ея́ возвесели́тся возсия́ющи.
Посе́м чте́т Апо́стол зач. 56 и 57 (Иак. 5:7–9, 17–18).
Собо́рнаго посла́ния Иа́ковля чте́ние.
Бра́тие, долготерпи́те у́бо, бра́тие моя́, до прише́ствия Госпо́дня. Се земледе́лец ждет честна́го плода́ от земли́, долготерпя́ о нем, до́ндеже прии́мет дождь ран и по́зден. Долготерпи́те у́бо и вы, утверди́те сердца́ ва́ша, я́ко прише́ствие Госпо́дне прибли́жися. Не воздыха́йте друг на дру́га, бра́тие, да не осужде́ни бу́дете; се Судия́ пред две́рьми стои́т. О́браз приими́те, бра́тие моя́, злострада́ния и долготерпе́ния, проро́ки, и́же глаго́лаша и́менем Госпо́дним. Се блажи́м терпя́щия. Терпе́ние И́овле слы́шасте и кончи́ну Госпо́дню ви́десте, я́ко многоми́лостив есть Госпо́дь и щедр. Пре́жде же всех, бра́тие моя́, не клени́теся ни не́бом, ни земле́ю, ни ино́ю ко́ею кля́твою, бу́ди же вам е́же ей, ей, и е́же ни, ни, да не в лицеме́рие впаде́те. Злостра́ждет ли кто в вас, да моли́тву де́ет; благоду́шствует ли кто, да пое́т. Боли́т ли кто в вас, да призове́т пресви́теры Церко́вныя, и да моли́тву сотворя́т над ним, пома́завше его́ еле́ем во и́мя Госпо́дне. И моли́тва ве́ры спасе́т боля́щаго, и воздви́гнет его́ Госпо́дь, и а́ще грехи́ бу́дет сотвори́л, отпу́стятся ему́. Испове́дайте у́бо друг дру́гу согреше́ния и моли́теся друг за дру́га, я́ко да исцеле́ете: мно́го бо мо́жет моли́тва пра́веднаго поспешеству́ема. Илиа́ челове́к бе подобостра́стен нам, и моли́твою помоли́ся, да не бу́дет дождь, и не одожди́ по земли́ ле́та три и ме́сяц шесть. И па́ки помоли́ся, и не́бо дождь даде́, и земля́ прозябе́ плод свой.
Иере́й: Ми́р ти́.
Чте́ц: И ду́хови твоему́.
Диа́кон: Прему́дрость, во́нмем.
Чте́ц: Псало́м Дави́дов, Аллиалуия, гла́с 8.
Певцы́ пою́т: Аллилуия.
Чте́ц же глаго́лет стихи́.
Сти́х 1. Благослови́ши вене́ц ле́та бла́гости Твоея́, Го́споди, и по́ля Твоя́ насы́тятся ту́ка.
Сти́х 2: Разботе́ют кра́сная пусты́ни, и ра́достию хо́лми препоя́шутся.
Диа́кон: Прему́дрость, прости́ услы́шим Свята́го Ева́нгелия.
Иере́й же: От Матфе́я Свята́го Ева́нгелия чте́ние.
Ли́к: Сла́ва Тебе́, Го́споди, сла́ва Тебе́.
Диа́кон: Во́нмем.
Иере́й же чте́т Ева́нгелие от Матфе́я, зач. 65:
Во вре́мя о́но, приступи́ша ко Иису́су фарисе́е и саддукее, искуша́юще вопроси́ша Его́, зна́мение с небесе́ показа́ти и́м. О́н же отвеща́в рече́ и́м: ве́черу бы́вшу, глаго́лете, ве́дро, чермнует бо ся́ не́бо. И у́тру, дне́сь зима́: чермнеет бо ся́ дряселуя не́бо. Лицеме́ри, лице́ у́бо небесе́ уме́ете разсужда́ти, зна́мений же времено́м не мо́жете искуси́ти. Ами́нь глаго́лю ва́м, я́ко ни кото́рый проро́к прия́тен е́сть во оте́чествии свое́м. Пои́стинне же глаго́лю ва́м: мно́ги вдови́цы бе́ша во дни́ Илиины́ во Изра́или, егда́ заключи́ся не́бо три́ ле́та, и ме́сяц ше́сть, я́ко бы́сть гла́д вели́к по все́й земли́. И ни ко еди́ной и́х по́слан бы́сть Илия́, то́кмо в Саре́пту сидо́нскую, к жене́ вдови́це. Ре́ша же Ему́: ко́е у́бо Ты́ твори́ши зна́мение, да ви́дим, и ве́ру и́мем Тебе́, что́ де́лаеши? Отцы́ на́ши ядо́ша ма́нну в пусты́ни, я́коже е́сть пи́сано: хле́б с небесе́ да́ст и́м я́сти. Рече́ у́бо и́м Иису́с: ами́нь ами́нь глаго́лю ва́м: не Моисе́й даде́ ва́м хле́б с небесе́, но Оте́ц Мо́й да́ст ва́м хле́ба и́стиннаго с небесе́. Хле́б бо Бо́жий е́сть сходя́й с небесе́, и дая́й живо́т ми́ру.
Ли́к: Сла́ва Тебе́, Го́споди, сла́ва Тебе́.
Диа́кон же а́бие со вся́ким умиле́нием, ничто́же борзя́ся во услы́шание все́м, глаго́лет ектении́ сия́:
Поми́луй на́с, Бо́же, по вели́цей ми́лости Твое́й, мо́лим Ти́ ся́, услы́ши и поми́луй.
Го́споди, поми́луй (три́жды).
Не хотя́й сме́рти гре́шнаго, но ожида́яй обраще́ния и покая́ния его́, услы́ши на́с Тебе́ моля́щих.
Го́споди, поми́луй (три́жды).
Возводя́й о́блаки от после́дних земли́, повели́ те́м пода́ти на ню́ до́ждь ми́рен, мо́лимся Тебе́.
Го́споди, поми́луй (три́жды).
Призыва́яй во́ду морску́ю и излива́яй о́ную на лице́ всея́ земли́, низпосли́ благослове́ние Твое́ на на́с моля́щихся Тебе́.
Го́споди, поми́луй (три́жды).
Одева́яй не́бо о́блаки и уготовля́яй земли́ до́ждь, низпосли́ на́м ми́лости Твоя́, моля́щимся Тебе́.
Го́споди, поми́луй (три́жды).
Прозяба́яй траву́ ското́м и зла́к на слу́жбу челове́ком, спаси́ челове́ков со скота́ми, Тебе́ моля́щихся.
Го́споди, поми́луй (три́жды).
До́ждь во́лен и ту́чу ми́рную пода́ждь земли́, и спаси́ вся́ческая, Человеколю́бче, и на́с моля́щихся Тебе́.
Го́споди, поми́луй (три́жды).
Низпосли́ дожди́ Твоя́ на тре́бующая и прося́щая ме́ста, Человеколю́бче, и услы́ши на́с моля́щихся Тебе́.
Го́споди, поми́луй (три́жды).
Ще́дре и Ми́лостиве, уще́дри, Человеколю́бче, и возвесели́ на́с, моля́щихся Тебе́.
Го́споди, поми́луй (три́жды).
Услы́ши на́с, Бо́же, я́ко бла́га ми́лость Твоя́, и Твои́м благосе́рдием поми́луй на́с моля́щихся Тебе́.
Го́споди, поми́луй (три́жды).
Возгла́с: Я́ко ми́лостив и Человеколю́бец Бо́г еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в, ами́нь.
Еще́ мо́лимся, о е́же сохрани́тися земли́ на́шей, и вся́кому гра́ду и стране́, от гла́да, губи́тельства, землетрясения, пото́па, огня́, меча́, саранчи, гра́да, наше́ствия иноплеме́нников и междоусо́бней бра́ни и внеза́пной сме́рти: и ми́лостиву, благоветливу и благоприменительному бы́ти, благо́му и человеколю́бцу Бо́гу, о гресе́х на́ших, отврати́ти и расточи́ти вся́кий гне́в на на́с дви́жимый и изба́вити на́с от належа́щаго пра́веднаго Своего́ преще́ния: и низпосла́ти на́м до́ждь ми́рный, и одожди́ти земли́ до́ждь бла́гости, и поми́ловати на́с моля́щихся Ему́.
Го́споди, поми́луй 40.
Услы́ши ны́, Бо́же, Спаси́телю на́ш, упова́ние все́х конце́в земли́, и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй на́с: ми́лостив бо и Человеколю́бец Бо́г еси́, и Тебе́ сла́ву возсыла́ем, Отцу́ и Сы́ну и Свято́му ду́ху, ны́не и при́сно и во ве́ки веко́в.
Ли́к: Ами́нь.
Моли́твы в бездо́ждие
(творе́ние Ка́ллиста, патриа́рха Константинопо́льскаго)
Моли́тва пе́рвая
Го́споду помо́лимся.
Влады́ко Го́споди Бо́же на́ш, послу́шавый Илию́ Фесви́тянина ра́ди ре́вности его́ о сла́ве Твое́й, и во вре́мя посыла́емому земли́ дождю́ удержа́тися повеле́вый, та́же па́ки моли́твою его́ до́ждь плодоно́сный е́й дарова́вый: Са́м, Влады́ко все́х, от сама́го Твоего́ благосе́рдия умоля́емь, до́ждь во́лен да́ждь насле́дию Твоему́, и согреше́нная на́ми презре́в, дожди́ Твоя́ низпосли́ на тре́бующая и прося́щая ме́ста; возвесели́ лице́ земли́, ни́щих ра́ди люде́й Твои́х, младе́нцев, и ското́в и ины́х все́х творе́ний Твои́х, поне́же все́ от Тебе́ ча́ют получа́ти пи́щу во бла́го вре́мя. Ты́ бо еси́ на́ш Бо́г, Бо́г ми́лующий и спасющий, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в, ами́нь.
Моли́тва втора́я
Го́споду помо́лимся.
Го́споди Бо́же Вседержи́телю, возводя́й о́блаки от после́дних земли́, мо́лнии в до́ждь сотвори́вый, изводя́й ве́тры от сокро́вищ свои́х, призыва́яй во́ду морску́ю, и пролива́яй сию́ на лице́ всея́ земли́, Тебе́ мо́лимся, и Тебе́ ми́ли си́ де́ем, испове́дающе грехи́ на́ша, и от Тебе́ бога́тыя ми́лости прося́ще: запове́ждь о́блакам одожди́ти до́ждь, уще́дри вся́ земна́я Твоя́; умилосе́рдися на ста́рцы и ю́ноты, и младе́нцы ссу́щыя сосцы́, на и на рабы́ни Твоя́, сы́ны и дще́ри, и на вся́ скоты́ земли́, да изведе́т на́м хле́б в сне́дь, и зла́к ското́м. Приими́ моле́ния все́х люде́й Твои́х и не отри́ни воздыха́ния убо́гих, ниже́ я́ростию Твое́ю обличи́ши на́с, ниже́ гне́вом Твои́м нака́жеши на́с, ниже́ да растли́ши гла́дом, и жа́ждею лю́ди Твоя́: все́х бо о́чи на Тя́ упова́ют, прия́ти от Тебе́ пи́щу во бла́го вре́мя. На Тя́ наде́емся, и ра́зве Тебе́ ино́го не ве́мы, от Тебе́ бога́тыя ми́лости ожида́ем, я́ко Бла́г и Человеколю́бец Бо́г еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в, ами́нь.
Моли́тва тре́тия
Го́споду помо́лимся.
Го́споди Бо́же на́ш, ве́мы, я́ко недосто́йни есмы́ Твои́х щедро́т, и не́смы досто́йни возвести́ о́чи на́ши, и зре́ти на не́бо, и ста́ти пред Тобо́ю, и проше́ния на́ша глаго́лати к Тебе́. Ко́е бо добро́ сотвори́хом, да и проше́ния получи́м. И́бо Твоея́ ра́ди безме́рныя бла́гости от небытия́ во е́же бы́ти приве́д, о́бразом Твои́м поче́л еси́, и тва́рь всю́ на́м покори́л еси́, но мы́ толи́ко облагоде́тельствовани бы́вше, я́коже врази́ представихомся, и Тебе́, Благоде́теля, за́поведи презре́хом, и житие́ порочно и мы́сль скве́рну и нечи́сту стяжа́хом. И не то́чию Твою́ любо́вь отверго́хом, но и я́коже зве́рие дру́г на дру́га носимся, и пло́ти дру́г дру́га снеда́ем лихоимственными о́бразы, и непра́ведным произволе́нием на́шим. Ка́ко у́бо досто́йни есмы́ Твои́х благодетельств восприя́ти? Ты́ бо Пра́веден, мы́ непра́ведни; Ты́ лю́биши, мы́ враждуем; Ты́ благоутро́бен, мы́ неблагоутробны; Ты́ Благоде́тель, мы́ хи́щницы. Ко́е обще́ние к Тебе́ и́мамы, да и Твои́х благи́х приобщи́мся? Испове́дуем пра́вду Твою́, познава́ем осужде́ние на́ше, пропове́дуем благодея́ния Твоя́, тьма́м сме́ртей пови́нни есмы́. Се́ под Твое́ю действи́тельною, и вся́ содержа́щею руко́ю пребыва́ем: удо́бно е́сть Твое́й всесильной рукце во мгнове́ние о́ка погуби́ти на́с. И ели́ко от на́шего наме́рения и жития́, пра́ведно е́сть на́м па́губе предадитися, Пра́веднейший Судие́, но Твое́й непобеди́мей бла́гости и неизрече́нней благосты́ни не́сть, вся́ко тжостойно, Человеколюбнейший Влады́ко. Сего́ ра́ди на неизсле́димое Твое́ и непамятозлобную Твою́ Утро́бу дерза́юще, приступа́ем к Тебе́, Благоде́телю, неразу́мнии и неблагода́рнии. Не преда́ждь на́с гре́х ра́ди на́ших в ру́це су́хости, и ниже́ беззако́ний ра́ди на́ших, сокруши́ши на́с у́зами гла́да, но бла́гости ра́ди Твоея́, пода́ждь земли́, ю́же определи́л еси́, и насле́дию Твоему́ до́ждь во́лен и испо́лни не́дра земны́я живородными Твои́ми вода́ми: се́ бо предлежи́т сия́, я́ко же ма́ти, млека́ лишающееся, сме́рть прино́сит младе́нцу. Си́це и земля́, бразды́ своя́ неприча́стны вла́жности иму́щи, увлаждение твори́ти зла́ку, и растле́ние рожде́нием свои́м прино́сит, и губи́тельство на́м претительное, и сме́рть. И́бо от су́хости зно́й, а́ки не́кая разжигающая огне́вица, прозябе́ния увяди́вый, поги́бель провозвеща́ет рожде́нием ея́. Но ми́лостию Твое́ю посети́ ю́, и водны́ми о́блакам возду́х благораствори. И бога́тым Твои́м дожде́м зе́млю ороси́ и прозябе́ния ея́ оживи́, и возвеянием добрейших ве́тров плоды́ це́лы и по́лны сотвори́, и умно́жи я́ благосе́рдием Твои́м. Те́ми бо определи́л еси́ теле́сный живо́т содержа́ти. А́ще бо не Ты́ во́льными Твои́ми дожди́ да́си бла́гость, земля́ на́ша не да́ст плода́ своего́. Но мно́жества ра́ди щедро́т Твои́х услы́ши моле́ние на́с недосто́йных рабо́в Твои́х. Ты́ бо еси́ Исто́чник ми́лости, и благи́х Пода́телю, и Тебе́ сла́ву возсыла́ем, со Безнача́льным Твои́м Отце́м и с Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в, ами́нь.
Моли́тва четве́ртая
Го́споду помо́лимся.
Го́споди, Го́споди, проро́ком Твои́м Илиею разрешивый сухость, и тече́нием дожде́в лице́ земли́ одожди́вый, и оби́лием плодо́в напита́в лю́ди Твоя́ Бога́тно. Са́м и ны́не есте́ственною Твое́ю благосты́нею усоляемь, да́руй земли́ дожди́ ми́рны, во плодоно́сие ле́тных плодо́в. Ты́ бо еси́, во́ды в ме́ста и́х устро́ивый и зе́млю, и́ми покрыва́емую, ви́диму сотвори́вый. Ты́ еси́ повеле́вый е́й разли́чныя изращати плоды́; в наслажде́ние на́ше, Ты́ еси́ греха́ ра́ди, и́же при Но́и челове́ков, исто́чники бе́здн разве́рзый и хля́би отве́рзый небе́сныя, и лице́ земли́ наводнивый во истребле́ние вся́кия пло́ти. Ты́ еси́ вода́ми покрыва́яй превы́спренняя Твоя́. Ты́ еси́ о́блаки возвыша́яй, и си́м повелева́яй дожде́вныя испуща́ти ка́пли. Ты́ еси́ возводя́й во́ду морску́ю, и излива́яй на лице́ земли́. Ты́ еси́ дожди́ определи́вый, и дожди́ во́льныя отлучи́вый, и ре́ки во́д наполня́яй, и напоя́яй зе́млю, и упоеваяй бразды́ ея́, во умноже́ние кра́сных ея́ плодо́в. Ты́ еси́ раздели́вый мо́ре, и реку́ проходиму соде́лавый, и во́ду из ка́мене источи́вый, и го́ресть водну́ю в сла́дость преложи́вый. Ве́сть водно́е естество́ своего́ Творца́, зна́ет своего́ Влады́ку, но не ве́сть до́лжное свое́ служе́ние. А́ще у́зрит Тебе́, Влады́ку, гневающагося на ны́, или́ безме́рно дви́жимо, поги́бель соде́ловает, или́ спрятаемо удержава́ется, и сухость вмеще́ние е́млет, и пламенови́дный возду́х быва́ет, и земна́я прозябе́ния увядаются, и мы́ в ру́це беды́ впа́даем. А́ще же па́ки ви́дит Тебе́, Человеколю́бца Бо́га, благоуве́тлива и благопремени́тельна, дожди́ уготовля́ет, и ту́чи на зе́млю низносятся, и возду́х благодышущий быва́ет, и земля́ Твое́ повеле́ние услы́шавши, изоби́льныя плоды́ от свои́х боко́в прозяба́ет. Тебе́ у́бо Творца́ и Созда́теля все́х мо́лим, глаго́люще: поми́луй на́с, Го́споди, поми́луй на́с: помяни́ я́ко дела́ ру́к Твои́х есмы́, вонми́ неможе́нию естества́ на́шего, я́ко Ты́ сотвори́л еси́ на́с. Ви́ждь пти́ц стена́ние, ското́в вопиение, младе́нческий пла́ч, ю́ношей во́пль, ста́рых окая́нство, сиро́т лише́ние, вдови́ц уедине́ние, убо́гих недоста́точество, и все́х люде́й Твои́х моле́бный гла́с, и посети́ зе́млю, и упо́й о́ную тучными дожди́: мокроты́ бо лишающися, свои́м у́бо прозябе́нием увядение, человекам же к скотам пагубою прети́т. Водо́ю па́губу навед иногда́, помяну́л еси́ Но́я носи́маго в ковче́ге, от безме́рных во́д о́ных: помяну́л же еси́ его́, и пти́ц и скоты́, и зве́ри, и ползающая. И наве́л еси́ и наве́л ду́х на зе́млю, и преста́ вода́: и Но́я, и с ни́м живо́тная, я́коже се́мя соблю́л еси́, в бытие́ втора́го ми́ра; и ны́не содержа́щею су́хостию возду́х, гла́дом прещаяй на́м и сме́ртию. Помяни́ упова́ющих на Тя́ лю́ди: помяни́ и пти́цы, помяни́ и скоты́, и ду́х росы́ наведи́, и сухость да преста́нет, и се́мена земли́ сотвори́ к питанию челове́ков же и живо́тных: и все́х па́ки е́же от Тебе́ попече́ния сподо́би. Ты́ бо еси́ Прозяба́яй траву́ скотам, зла́к слу́жбе челове́ков: и Ты́ еси́ изводя́й хле́б от земли́ и вино́ источа́яй, и еле́ем умаща́яй челове́ческая лица́: я́ко да подава́емым от Тебе́ благи́м во изоби́лии причаща́ющеся, в весе́лии се́рдца просла́вим Твою́ бла́гость, Отца́ и Сы́на и Свята́го Ду́ха, ны́не и при́сно и во ве́ки веко́в, ами́нь.
Моли́тва пя́тая
Го́споду помо́лимся.
Влады́ко Го́споди Иису́се Христе́ Бо́же на́ш, глаго́лом Свои́м все́ от небытия́ в бытие́ приведы́й, пе́рсть взе́мый от земли́, и созда́вый челове́ка, и душе́ю слове́сною и о́бразом Твои́м почты́й того́, и реки́й: расти́теся и мно́житеся, и наполня́йте зе́млю; дая́й пи́щу ското́м и птенце́м вра́новым. И́же и в вели́цем и спаси́тельном пло́тию прише́ствии Твое́м, пре́жде у́бо седмию́, пото́м же пятию́ хле́бы, ты́сящи насы́тил еси́ мно́гия: Са́м, всеблаги́й Влады́ко, и Твоя́ лю́ди сия́ призыва́ющих Пресвято́е Твое́ и́мя, Твое́ю вседе́тельною и великодарною десни́цею бога́тно препита́й. При́зри, Го́споди, на убо́гия лю́ди Твоя́, отверза́яй ру́ку Твою́, и насыща́яй вся́кое живо́тно благоволе́ния, уще́дри все́х на́с ми́лостивно. Ты́ бо, Влады́ко Человеколю́бче, еди́н еси́ Оте́ц все́х на́с, и к Тебе́ еди́ному о́чи возводи́м, я́ко младе́нцы на ма́терь свою́. Твое́ е́сть сло́во, Преблаги́й Влады́ко: проси́те и да́стся ва́м, ищи́те, и обря́щете. Пода́ждь у́бо прося́щим ны́не, Влады́ко, с духо́вною пи́щею и ну́жную пло́ти, и препита́й а́лчущыя Твоя́ лю́ди, дожди́ временны и благорастворе́ние возду́хов, и плодо́в разли́чных изоби́лие земли́ да́руй: в не́мощи и губительстве, и огевице, и в неду́зех разли́чных бе́дствующих посети́. Изба́ви, Го́споди, и́мя Твое́ призыва́ющий се́й гра́д и страну́ от гла́да, губи́тельства, тру́са, пото́па, огня́, меча́ и уби́йства, да́руй на́м ми́лости Твоя́, благода́тию Безнача́льнаго и Единосу́щнаго Твоего́ Отца́ и Пресвята́го и Единоче́стнаго Твоего́ Ду́ха: моли́твами и моле́ньми Преблагослове́нныя Богоро́дицы, богоглаго́ливых Твои́х апо́столов, и все́х святы́х Твои́х, ами́нь.
Моли́тва шеста́я
Го́споду помо́лимся.
Го́споди Иису́се Христе́ Бо́же на́ш, на́шего ра́ди спасе́ния изво́ливый пло́ть носи́ти, да просла́виши чу́дно слове́сное естество́, неизрече́нным Твои́м благоусердием и бла́гостию, и и́же во и́стинном позна́нии обраща́ющыяся из глубины́ грехо́вныя прости́ти обещаяй: егда́ бо к Тебе́ воззря́т рабиим о́бразом, и и́стинным исполне́нием боже́ственных Твои́х за́поведей, тогда́ и ти́и со дерзнове́нием возмо́гут Тя́, Бо́га Ми́лостиваго и Благосе́рдаго име́ти. Ны́не у́бо оста́ви вся́ беззако́ния на́ша, и приклони́ к на́м у́хо Твое́, и услы́ши на́с смире́нных и гре́шных, я́коже иногда́ Фесви́тянина Илию́ услы́шал еси́, я́ко же глаго́лом еди́ным связа́ти не́бо к целому́дрию непокори́вых о́ных люде́й: та́же те́м па́ки обы́чное человеколю́бие употреби́вый о́блакам повеле́вый, зе́млю всю́ напои́л еси́ водо́ю благо́ю: си́це и ны́не па́ки моле́ньми и те́плыми моли́твами того́ Твоего́ уго́дника, пре́зри беззако́ния на́ша и грехи́, и приими́ моли́твы на́ша, и услы́ши на́с в ча́с се́й те́пле моля́щихся Тебе́ и разреши́ сухость сию́ земну́ю, испове́данием и во́плем люде́й Твои́х, и низпосли́ на на́с до́ждь благи́й, я́ко да насы́тимся во́ды и земля́ на́ша да́ст плоды́ во вре́мя благопотре́бно в пи́щу на́шу, и безслове́сных живо́тных. Е́й, Го́споди Бо́же, на́ш, услы́ши ны́ гре́шныя; и недосто́йныя рабы́ Твоя́, и не пре́зри моле́ния на́ша, и да не победи́т беззако́ние на́ше ми́лость Твою́, но приклони́, Го́споди, у́хо Твое́, и услы́ши ны́. Ви́ждь сокруше́ние и умилосе́рдися, ви́ждь от свята́го Твоего́ жили́ща, ви́ждь воздыха́ние убо́гих; ви́ждь незре́лый во́зраст младе́нцев, зельнейшею жа́ждею изнуряемый. Ви́ждь незло́бивых младе́нцев озлобле́ние, ви́ждь утро́бы ма́терни, ви́ждь сосцы́ изсушаемыя убие́нных младе́нцев, ви́ждь состаревшыяся и ю́ношы, я́коже вери́ги в руки́ беззако́нных изда́нныя. И пре́зри у́бо согреше́ния на́ша, я́же в ве́дении и не в ве́дении, я́же во уме́ и помышле́нии, и не отри́ни на́с доконца. Не бо во́ды еди́ныя жа́ждею таем, но и тьма́ми ины́х зо́л, гре́х на́ших ра́ди: и к Тебе́ зри́м, да налиется на на́с до́ждь зре́лейший же и изобильнейший, да и пра́ведный Тво́й гне́в уставиши лю́таго сего́ плене́ния. Обоя́ у́бо про́сим, и мо́лимся Тебе́, Человеколю́бче, да кла́дязи и се́ла на́ша напо́лниши водоы, и душе́вныя на́ша ни́вы в сы́тость напои́ши, и испо́лниши Твоея́ бла́гости: и кладези, си́речь се́рдца на́ша, весе́лием и неизрече́нною ра́достию и ра́дованием упоиши и уставиши належа́щее на на́с нестерпи́мое стремле́ние безбо́жных ага́рян. Ты́ бо еси́ Свободи́тель ду́ш и теле́с на́ших, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки ве́ки веко́в, ами́нь.
Моли́тва седьма́я
о бездо́ждии и измене́нии ве́тров.
Го́споду помо́лимся.
Благи́й Человеколю́бче Го́споди, и́же тва́рь еди́ным сло́вом соде́лавый, и из нея́ челове́ка созда́вый, последи́ же неизрече́нным человеколю́бием падшего сего́, и раба́ греху́ бы́вша восприе́мый и освяти́вый, я́ко до не поги́бнет до конца́ де́ло ру́ку Твое́ю, да́вый же сему́ и Своя́ за́поведи в па́мять Твоего́ прише́ствия и Твои́х повеле́ний, и Боже́ственнаго вочелове́чения. Те́мже труди́лся еси́, и подвиза́лся еси́, и взалка́л и вжадал еси́, испо́лнивый вся́ на́с ра́ди: вше́дый же в кора́бль, и по мо́рю ходи́вый, и во́лны ди́вия и зельности ве́тров обузда́вый, и вся́ пострада́ти претерпе́вый, да́же до Креста́ и сме́рти: да в не́мже пострада́л еси́, и искусился еси́, помо́жеши на́м немощству́ющим. Са́м и ны́не, Царю́ Святы́й, е́же на́ше неможе́ние человеколю́бно восприе́мый, умилосе́рдися о на́с обурева́емых зело́, и ну́жд ску́достию изнуряемых: да́ждь на́м тишину́ и упокое́ние от ско́рбных. Е́й Го́споди Иису́се Христе́ Бо́же на́ш, ви́ждь и при́зри от свята́го жили́ща Твоего́ на виногра́д се́й, и соверши́ и, его́же насади́ десни́ца Твоя́, и да́ждь Ду́ха пра́ваго ко премене́нию от находя́щих на на́с напа́стей, моли́твами ро́ждшия Тя́ Ма́тере, и все́х святы́х Твои́х, ами́нь.
И обы́чный отпу́ст.
Глава́ 32. После́дование моле́бнаго пе́ния ко Го́споду Бо́гу на́шему Иису́су Христу́, пева́емаго во вре́мя безве́дрия, егда́ до́ждь мно́гий безго́дно и́дет
Благослове́н Бо́г на́ш всегда́, ны́не и при́стно и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный. Та́же, Трисвято́е. О́тче на́ш:
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Чте́ц: Го́споди, поми́луй. 12.
И псалом 68-й:
Спаси́, мя, Бо́же, я́ко внидо́ша во́ды до души́ моея́. Углебо́х в тиме́нии глубины́, и несть постоя́ния. Приидо́х во глубины́ морски́я, и бу́ря потопи́ мя. Утруди́хся зовы́й, измолче́ горта́нь мой, исчезо́сте о́чи мои́, от е́же упова́ти ми на Бо́га моего́. Умно́жишася па́че влас главы́ моея́ ненави́дящии мя ту́не, укрепи́шася врази́ мои́, изгоня́щии мя непра́ведно: я́же не восхища́х, тогда́ воздая́х. Бо́же, Ты уве́дел еси́ безу́мие мое́, и прегреше́ния моя́ от Тебе́ не утаи́шася. Да не постыдя́тся о мне терпя́щии Тебе́, Го́споди, Го́споди Сил, ниже́ да посра́мятся о мне и́щущии Тебе́, Бо́же Изра́илев. Я́ко Тебе́ ра́ди претерпе́х поноше́ние, покры́ срамота́ лице́ мое́. Чуждь бых бра́тии мое́й, и стра́нен сыново́м ма́тepe моея́. Я́ко ре́вность до́му Твоего́ снеде́ мя, и поноше́ния понося́щих Ти нападо́ша на мя. И покры́х посто́м ду́шу мою́, и бысть в поноше́ние мне, и положи́х одея́ние мое́ вре́тище, и бых им в при́тчу. О мне глумля́хуся седя́щии во врате́х, и о мне поя́ху пию́щии вино́. Аз же моли́твою мое́ю к Тебе́, Бо́же, вре́мя благоволе́ния, Бо́же, во мно́жестве ми́лости Твоея́ услы́ши мя, во и́стине спасе́ния Твоего́. Спаси́ мя от бре́ния, да не угле́бну, да изба́влюся от ненави́дящих мя и от глубо́ких вод. Да не потопи́т мене́ бу́ря водна́я, ниже́ да пожре́т мене́ глубина́, ниже́ сведе́т о мне рове́нник уст свои́х. Услы́ши мя, Го́споди, я́ко бла́га ми́лость Твоя́, по мно́жеству щедро́т Твои́х при́зри на мя. Не отврати́ лица́ Твоего́ от о́трока Твоего́, я́ко скорблю́, ско́ро услы́ши мя. Вонми́ души́ мое́й, и изба́ви ю́, враг мои́х ра́ди изба́ви мя. Ты бо ве́си поноше́ние мое́ и студ мой, и срамоту́ мою́: пред Тобо́ю вси оскорбля́ющии мя. Поноше́ние ча́яше душа́ моя́, и страсть и ждах соскорбя́щаго, и не бе́, и утеша́ющих, и не обрето́х. И да́ша в снедь мою́ желчь, и в жа́жду мою́ напои́ша мя о́цта. Да бу́дет трапе́за их пред ни́ми в сеть, и в воздая́ние, и в собла́зн. Да помрача́тся о́чи их, е́же не ви́дети, и хребе́т их вы́ну сляцы́. Проле́й на ня гнев Твой, и я́рость гне́ва Твоего́ да пости́гнет их. Да бу́дет двор их пуст, и в жили́щах их да не бу́дет живы́й. Зане́ eго́же Ты порази́л еси́, ти́и погна́ша, и к боле́зни язв мои́х приложи́ша. Приложи́ беззако́ние к беззако́нию их, и да не вни́дут в пра́вду Твою́. Да потребя́тся от кни́ги живы́х и с пра́ведными да не напи́шутся. Нищ и боля́й есмь аз: спасе́ние Твое́, Бо́же, да прии́мет мя. Восхвалю́ и́мя Бо́га моего́ с пе́снию, возвели́чу Его́ во хвале́нии: и уго́дно бу́дет Бо́гу па́че тельца́ ю́на, ро́ги износя́ща и па́знокти. Да у́зрят ни́щии и возвеселя́тся: взыщи́те Бо́га, и жива́ будет душа́ ва́ша. Я́ко услы́ша убо́гия Госпо́дь и окова́нныя Своя́ не уничижи́. Да восхва́лят Его́ небеса́ и земля́, мо́ре и вся живу́щая в нем. Я́ко Бог спасе́т Сио́на, и сози́ждутся гра́ди Иуде́йстии, и вселя́тся та́мо, и насле́дят и́, и се́мя рабо́в Твои́х удержи́т и́, и лю́бящии и́мя Твое́ вселя́тся в нем.
Посе́м, Сла́ва, и ны́не: Аллилу́иа, аллилу́иа, аллилу́иа, сла́ва Тебе́, Бо́же. Три́жды.
Посе́м диа́кон глаго́лет ектению́ вели́кую:
Ми́ром Го́споду помо́лимся.
Ли́к: Го́споди, поми́луй.
О свы́шнем ми́ре и спасе́нии душ на́ших Го́споду помо́лимся.
Ли́к: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й и соедине́нии всех, Го́споду помо́лимся.
Ли́к: Го́споди, поми́луй.
О святе́м хра́ме сем, и с ве́рою, благогове́нием, и стра́хом Бо́жиим входя́щих в о́нь, Го́споду помо́лимся.
Ли́к: Го́споди, поми́луй.
О Вели́ком Господи́не и отце́ на́шем, Святе́йшем Патриа́рхе Кири́лле, и о господи́не нашем преосвяще́ннейшем митрополи́те (или́ архиепи́скопе, или́ епи́скопе) имярек, честне́м пресви́терстве, во Христе́ диа́констве и о все́м при́чте и лю́дех, Го́споду помо́лимся.
Ли́к: Го́споди, поми́луй.
О Богохрани́мей стране́ на́шей, власте́х и во́инстве ея́ Го́споду помо́лимся.
Ли́к: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных, и о спасе́нии их, Го́споду помо́лимся.
Ли́к: Го́споди, поми́луй.
И а́бие прилага́ет сия́:
О е́же не в гне́ве преще́ния Своего́ умáлити на́с, гре́х ра́ди и беззако́ний на́ших, но ми́лости и щедро́ты Своя́ от ве́ка су́щия помяну́ти и поми́ловати на́с, Го́споду помо́лимся.
Ли́к: Го́споди, поми́луй.
О е́же помяну́ти Заве́т Сво́й, и́же к Но́ю, и не растли́ ти́ безго́дною мокрото́ю, и мра́чным злорастворным возду́хом, и те́мною мгло́ю зе́млю, и ни́щих люде́й Свои́х, но ми́лостивно пощади́ти достоя́ние Свое́ и со́лнцу плодоносными луча́ми и мерною теплото́ю возсия́ти на земли́ повеле́ти, Го́споду помо́лимся.
Ли́к: Го́споди, поми́луй.
О е́же повеле́ти облако́м преста́ти от безгоднаго дождя́ и мра́ком разы́тися, све́тлости же со́лнечней возсия́ти, Го́споду помо́лимся.
Ли́к: Го́споди, поми́луй.
О е́же пощади́ти лю́ди, и скоты́, и всю́ зе́млю сию́, и не растли́ти ю́ безгодным дожде́вным лия́нием, Го́споду помо́лимся.
Ли́к: Го́споди, поми́луй.
О е́же пода́ти благорастворенное вéдро достоя́нию Своему́ и умно́жити плоды́ земны́я, Го́споду помо́лимся.
Ли́к: Го́споди, поми́луй.
О е́же не по грехо́м на́шым возда́ти на́м и казни́ти на́с, но по вели́цей ми́лости Свое́й и по мно́гим щедро́там Свои́м яви́ти на на́с ско́рое Свое́ человеколю́бие и бла́гость, Го́споду помо́лимся.
Ли́к: Го́споди, поми́луй.
О е́же не растли́ти плоды́ и сéмена земна́я гре́х ра́ди на́ших безгодным дожде́вным лия́нием, но во́льным ведром пощади́ти и угобзи́ти я́ ни́щих ра́ди люде́й Свои́х, Го́споду помо́лимся.
Ли́к: Го́споди, поми́луй.
О е́же благоприя́тным бы́ти моли́твам на́шым и изба́вити на́с от гла́да, губи́тельства, тру́са, пото́па, огня́, гра́да, меча́, наше́ствия иноплеме́нник, междоусо́бныя бра́ни и вся́кия смертоно́сныя я́звы, Го́споду помо́лимся.
Ли́к: Го́споди, поми́луй.
Заступи́, спаси́ поми́луй и сохрани́ нас Бо́же, Твое́ю благода́тию.
Ли́к: Го́споди, поми́луй.
Пресвяту́ю, Пречи́стую, преблагослове́нную, сла́вную Влады́чицу на́шу Богоро́дицу, и Присноде́ву Мари́ю, со все́ми святы́ми помяну́вше, са́ми себе́, и другъ дру́га, и ве́сь живо́т наш Христу́ Бо́гу предади́м.
Ли́к: Тебе́ Го́споди.
Возглаше́ние:
Я́ко подоба́ет Тебе́ вся́кая сла́ва, че́сть и поклоне́ние, со Отце́м и Святы́м Ду́хом, ны́не и при́сно, и во ве́ки веко́в.
Ли́к: Ами́нь.
Бог Госпо́дь и яви́ся нам, благослове́н Гряды́й во И́мя Госпо́дне.
Сти́х 1: Испове́дайтеся Го́сподеви, я́ко Бла́г, я́ко в ве́к ми́лость Его́.
Сти́х 2: Обыше́дше обыдо́ша мя́, и и́менем Госпо́дним противля́хся и́м.
Сти́х 3: Не умру́, но жи́в бу́ду, и пове́м дела́ Госпо́дня.
Сти́х 3: Ка́мень, его́же небрего́ша зи́ждущии, се́й бы́сть во главу́ у́гла, от Го́спода бы́сть се́й и е́сть ди́вен во очесе́х на́ших.
И тропа́рь, гла́с то́йже.
При́зри ми́лостивно, Бо́же, на лю́ди согрéшшыя и не прéзри в покая́нии к Тебе́ припáдающих, но, я́ко Бла́г, поми́луй и вско́ре пра́веднаго Твоего́ изба́ви преще́ния, моли́твами Богоро́дицы, Еди́не Человеколю́бче. (Два́жды).
Сла́ва, и ны́не, Богоро́дичен:
Ско́рая ми́ру Помо́щнице, Де́во Богоро́дице, Твоего́ предста́тельства и кре́пкаго заступле́ния то́щно про́сим, умилосе́рдися на скорбя́щыя лю́ди и умоли́ Ми́лостиваго Сы́на Твоего́ и Бо́га от належа́щия на́с изба́вити беды́ и пра́веднаго Своего́ преще́ния, Еди́на в женáх Благослове́нная.
Таже псалом 50:
Поми́луй мя, Бóже, по вели́цей ми́лости Твоéй, и по мнóжеству щедрóт Твои́х очи́сти беззакóние моé. Наипáче омы́й мя от беззакóния моегó, и от грехá моегó очи́сти мя; я́ко беззакóние моé аз знáю, и грех мой прéдо мно́ю есть вы́ну. Тебé еди́ному согреши́х и лукáвое пред Тобóю сотвори́х; я́ко да оправди́шися во словесéх Твои́х, и победи́ши внегдá суди́ти Ти. Се бо в беззакóниих зачáт есмь, и во гресéх роди́ мя мáти моя́. Се бо и́стину возлюби́л еси́; безвéстная и тáйная прему́дрости Твоея́ яви́л ми еси́. Окропи́ши мя иссóпом, и очи́щуся; омы́еши мя, и пáче снéга убелю́ся. Слу́ху моему́ дáси рáдость и весéлие; возрáдуются кóсти смирéнныя. Отврати́ лицé Твоé от грех мои́х и вся беззакóния моя́ очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó и Ду́ха Твоегó Святáго не отыми́ от менé. Воздáждь ми рáдость спасéния Твоегó и Ду́хом Влады́чним утверди́ мя. Научу́ беззакóнныя путéм Твои́м, и нечести́вии к Тебé обратя́тся. Избáви мя от кровéй, Бóже, Бóже спасéния моегó; возрáдуется язы́к мой прáвде Твоéй. Гóсподи, устнé мои́ отвéрзеши, и устá моя́ возвестя́т хвалу́ Твою́. Я́ко áще бы восхотéл еси́ жéртвы, дал бых у́бо: всесожжéния не благоволи́ши́. Жéртва Бóгу дух сокрушéн; сéрдце сокрушéнно и смирéнно Бог не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Твой тельцы́.
По сконча́нии же псалма́, а́бие певцы́ пою́т кано́н, гла́с 6-й.
Пе́снь 1.
Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припе́в: Поми́луй ны́, Го́споди, лю́ди согрéшшыя.
Тропа́рь: Прииди́те, ве́рнии, пе́снь но́ву воспои́м Влады́це Бо́гу, глаго́люще: умилосе́рдися, я́ко Ще́др, и поми́луй безме́рно согрéшшыя.
Сла́ва: Приими́ моли́твы и сле́зы, Христе́ Бо́же, моля́щихся Тебе́ ны́не на́с, рабо́в Твои́х, и пода́ждь времена́ ведренна к плодоноше́нию земли́.
И ны́не: Ускори́, Влады́чице Мари́е, Пречи́стеи Си́ ру́це моли́твенно возде́ти к Сы́ну Твоему́ и Бо́гу, е́же пода́ти вéдро и пи́щу ве́рным рабо́м Свои́м.
Катава́сия по вся́кой пе́сни.
Пе́снь 3.
Ирмо́с: Не́сть свя́т я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утвержди́вый на́с на ка́мени испове́дания Твоего́.
Не я́ростию Твое́ю обличи́ши на́с, Го́споди, я́коже проро́к вопие́т, ни гне́вом Твои́м накажи́ на́с, но моли́твами Пречи́стыя Твоея́ Ма́тере изле́й на ны́ оби́льно ми́лости Твоя́.
Сла́ва: Новозвáнный язы́к со слеза́ми вопие́т Ти́, Влады́ко: умилосе́рдися, я́ко Ще́др, и пода́ждь на́м вéдро и возду́хи благорастворны, оби́лие же и ве́лию мило́сть.
И ны́не, Богоро́дичен: Не прéзри сле́з на́ших, Богоро́дице Влады́чице, и не ме́рзко Ти́ бу́ди воздыха́ние на́ше, но моли́ Сы́на Твоего́ приле́жно пода́ти вéдро земли́΄ и лю́дем Твои́м ве́лию ми́лость.
Изба́ви от бе́д рабы́ Твоя́, Многоми́лостиве, я́ко мы́ усе́рдно к тебе́ прибега́ем, ми́лостивому изба́вителю, все́х Влады́це, Го́споду Иису́су.
Спаси́ от бе́д рабы́ Твоя́, Богоро́дице, я́ко вси́ по Бо́зе к Тебе́ прибега́ем, я́ко неруши́мей стене́ и предста́тельству.
Диа́кон ектению́: Поми́луй на́с, Бо́же, по вели́цей ми́лости Твое́й, мо́лим Ти́ ся́, услы́ши и поми́луй.
Го́споди, поми́луй, три́жды.
Еще́ мо́лимся о Вели́ком Господи́не и отце́ на́шем, Святе́йшем Патриа́рхе Кири́лле, и о господи́не на́шем блаже́ннейшем митрополи́те (или́ архиепи́скопе, или́ епи́скопе) и́мярек, и о все́й во Христе́ бра́тии на́шей.
Го́споди, поми́луй, три́жды.
Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Го́споди, поми́луй, три́жды.
Досто́йная ка́знем сотвори́хом, и пра́ведный су́д Тво́й пости́же на́с, Го́споди, но пощади́, пощади́ лю́ди согрéшшыя и отврати́ гне́в Тво́й, пра́ведно на ны́ дви́жимый, в покая́нии к Тебе́ припáдаем и смире́нно мо́лим Тя́, услы́ши и поми́луй.
Го́споди, поми́луй, три́жды.
Да не потопи́т на́с, Го́споди, бу́ря воднáя, и да не растли́ши зе́млю и гла́дом умори́ши на́с, люде́й Твои́х, но, я́ко Бла́г, уста́ви водно́е лия́ние, и теплоте́ солнечной возсия́ти на земли́, я́ко Си́лен, повели́, приле́жно мо́лим Ти́ ся́, Царю́ Пресвяты́й, услы́ши и поми́луй.
Го́споди, поми́луй, три́жды.
Ни́щих ра́ди люде́й Твои́х и ско́т, мра́чному возду́ху и те́мной мгле́ разы́тися и луча́м со́лнечным возсия́ти повели́, Всеще́дрый Го́споди, да не безго́дно сконча́емся, мо́лим Ти́ ся́, ско́ро услы́ши и поми́луй.
Го́споди, поми́луй, три́жды.
Спаси́ на́с от бре́ния, Го́споди, и от тимéния глубины́ и от глубо́ких во́д, да не исче́знут в суете́ дни́е на́ши и лéта на́ша в воздыха́ниих, но помяни́ Заве́т Тво́й, и́же к Но́ю, и сотвори́ с на́ми по ми́лости Твое́й, сокруше́нным се́рдцем мо́лим Ти́ ся́, услы́ши и поми́луй.
Го́споди, поми́луй, три́жды.
В ско́рби и печа́ли на́шей и смутной тузé, к Тебе́ Го́споду Бо́гу на́шему умиле́нно вопие́м: да прии́дет к Тебе́ моли́тва на́ша, и да изы́дет из истле́ния живо́т на́ш, да не безго́дно исче́знет, ми́лостивно услы́ши гла́с ни́щих люде́й Твои́х и человеколю́бно поми́луй.
Го́споди, поми́луй, три́жды.
Не на дугу́, ю́же в знáмение Заве́та на о́блацех поста́вил еси́, Го́споди, но на Твоя́ щедро́ты взира́ем и Твою́ ми́лость привлещи́ и́щем, к Тебе́, бога́тому в ми́лости и безме́рному в щедро́тах, се́рдцем сокруше́нным мо́лим Ти́ ся́: пода́ждь на́м ме́рное и плодоно́сное вéдро с благорастворенными возду́хи и ско́ро, я́ко Ще́др, услы́ши и поми́луй.
Го́споди, поми́луй, три́жды.
Иере́й возглаша́ет:
Услы́ши ны́, Бо́же, Спаси́телю на́ш, упова́ние все́х конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны́. Ми́лостив бо и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
Седа́лен, гла́с 5: К Тебе́, Спа́се на́ш, Иису́се, Преве́чный Бо́же, прибега́ем, гре́шнии раби́ Твои́, и со слеза́ми в покая́нии припáдающе вопие́м Ти́: пощади́, пощади́, Ще́дре, лю́ди безотве́тныя и не растли́ на́с безгодным дожде́вным лия́нием и злорастворением возду́шным, но пода́ждь ве́дро и умно́жи плоды́ земны́я, я́ко Человеколю́бец.
Сла́ва, и ны́не, Богоро́дичен: Святе́йшую Херуви́мов и Вы́шшую небе́с, Препе́тая Богоро́дице, Тя́ вои́стинну исповéдающе, и́мамы гре́шнии Засту́пницу, и обрета́ем во вре́мя спасе́ния, те́м не преста́й за ны́ моля́щи, Держа́во и Прибе́жище душáм на́шим.
Пе́снь 4.
Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста о Го́споде пра́зднующи.
В руку́ Твое́ю, Влады́ко Христе́, содержи́ши превы́шше небе́сныя и поднебе́сныя во́ды и теплоту́ со́лнечную. Те́мже мо́лим Тя́: обоé по ме́ре тре́бования да́руй на по́льзу рабо́м Твои́м.
Сла́ва: Исповéдающым Твое́ влады́чество, Строи́телю всея́ тва́ри, Христе́, содержáй ски́петро небе́сное и окропляяй всю́ тва́рь, пода́ждь благорастворе́нныя возду́хи и оби́лие земли́, моли́твами Пречи́стыя Твоея́ Ма́тере.
И ны́не, Богоро́дичен: Вели́кое дерзнове́ние и́маши к Ро́ждшемуся из Тебе́, я́ко никто́же и́н. Те́м, Влады́чице, моли́ся о рабе́х Твои́х, изба́витися на́м от гла́да и от наше́ствия иноплеме́нник.
Пе́снь 5.
Ирмо́с: Бо́жиим све́том Твои́м Бла́же, у́тренюющих Ти́ ду́шы любо́вию озари́, молю́ся, Тя́ ве́дети Сло́ве Бо́жий, и́стиннаго Бо́га, от мра́ка грехо́внаго взыва́юща.
Пла́вающих Приста́нище и Наде́ждо ненаде́жных, Христе́, власте́й утвержде́ние и все́х христиа́н в бедáх ско́рый Послу́шателю, услы́ши и на́с ны́не и пода́ждь вéдро к плодоноше́нию земли́.
Сла́ва: Врачу́ боля́щих и скорбя́щих Утéшителю, Небе́сный Царю́, Христе́, при́зри с высоты́ Свята́го Твоего́ жили́ща, и услы́ши пла́ч и стена́ние рабо́в Твои́х, и, я́ко Ще́др, пода́ждь ве́дро к плодоноше́нию земли́.
И ны́не, Богоро́дичен: Ско́ро приими́, Госпоже́, моли́тву рабо́в Твои́х, не помина́ющи на́ши бесчисленная зла́я, и испроси́ на́м, Де́во, ве́дро на по́льзу к плодоноше́нию земли́.
Пе́снь 6.
Ирмо́с: Жите́йское мо́ре воздвиза́емое зря́ напа́стей бу́рею к ти́хому приста́нищу Твоему́ прите́к вопию́ Ти́: возведи́ от тли́ живо́т мо́й Многоми́лостиве.
Моле́нием проро́ка Твоего́, Го́споди, затвори́л еси́ небеса́ три́ ле́та и ме́сяцев ше́сть, к позна́нию и покая́нию проти́вных, его́же ны́не от на́с, Го́споди, не истязуй, но ми́лостию Твое́ю уще́дри ны́.
Сла́ва: Прии́мый разбо́йничо покая́ние, Христе́, и того́ еди́нем часо́м спасы́й, вопию́ща: помяни́ мя́, Спа́се, во Ца́рствии, и на́с ны́не в покая́нии Ти́ припадáющих пощади́ и поми́луй.
И ны́не, Богоро́дичен: Помоли́ся о на́с, Влады́чице, к Сы́ну Твоему́ и Бо́гу, да не я́коже при Но́и лия́нием водны́м, гре́х ра́ди на́ших, растли́т на́с, но я́коже Ниневи́тяны пока́явшыяся поми́лует.
Диа́кон ектению́ ма́лую обы́чную.
Иере́й: Возгла́с: Я́ко Ты́ еси́ Ца́рь ми́ра:
И по возгла́се конда́к, гла́с 2:
Не отри́ни до конца́ согрéшшыя лю́ди Твоя́, Влады́ко, нижé отста́ви ми́лости и щедро́ты Твоя́ от на́с, но я́ко бе́здна сы́й щедро́т и милосе́рдия пучи́на, приими́ мольбы́ на́ша и изба́ви на́с от належа́щия беды́ и ну́жды, Еди́н бо еси́ благоуве́тлив.
Та́же: степе́нна, антифо́н 1 6-го гла́са:
На не́бо о́чи мои́ возвожу́ к Тебе́, Сло́ве, уще́дри мя́, да жи́ву Тебе́.
Поми́луй на́с, уничиже́нных, устроя́я благопотре́бныя Твоя́ сосу́ды, Сло́ве.
Свято́му Ду́ху вся́кая всеспаси́тельная вина́, а́ще ко́ему се́й по достоя́нию дхнéт, ско́ро взе́млет от земны́х, восперя́ет, возраща́ет, устроя́ет горé.
Та́же проки́мен, гла́с 4-й:
Спаси́ мя́, Бо́же, я́ко внидо́ша во́ды до души́ моея́.
Сти́х: Углебо́х в тимéнии глубины́, и не́сть постоя́ния.
Та́же, Вся́кое дыха́ние:
От Матфе́я Свята́го Ева́нгелия чте́ние, зача́ло 20, от полу́.
Рече́ Госпо́дь:Проси́те и да́стся ва́м, ищи́те и обря́щете, толцы́те и отве́рзется ва́м. Вся́к бо прося́й прие́млет, и ищя́й обрета́ет, и толку́щему отве́рзется. Или́ кто́ е́сть от ва́с челове́к, его́же а́ще воспро́сит сы́н его́ хле́ба, еда́ ка́мень пода́ст ему́? Или́ а́ще ры́бы про́сит, еда́ змию́ пода́ст ему́? А́ще у́бо вы́, лука́ви су́ще, уме́ете дая́ния бла́га дая́ти ча́дом ва́шим, ко́льми па́че Оте́ц ва́ш Небе́сный да́ст бла́га прося́щим у Него́.
Та́же, Сла́ва: О́тче, Сло́ве и Душе́, Тро́ице Свята́я, очи́сти мно́жества грехо́в на́ших.
И ны́не: Моли́твами Богоро́дицы, Ми́лостиве, очи́сти мно́жества согреше́ний на́ших. Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.
Та́же пою́т стихи́ру сию́, гла́с 6-й:
Стра́шен еси́, Го́споди, и кто́ стерпи́т пра́ведный Тво́й гне́в, или́ кто́ Тебе́ умо́лит, Благи́й, о люде́й согрéшших и отча́явшихся; то́кмо небе́снии а́нгели, Нача́ла и Вла́сти, Престо́ли и Госпо́дствия, Херуви́ми и Серафи́ми, непреста́нно Тебе́ вопию́щии: Свя́т, Свя́т, Свя́т еси́, Го́споди! Те́м, Пресвяты́й Влады́ко, делá руку́ Твое́ю не прéзри, но за милосе́рдие Твоея́ ми́лости спаси́ лю́ди Твоя́ и гра́д погиба́ющий.
Сла́ва, и ны́не, Богоро́дичен:
Никто́же притекáяй к Тебе́ посрáмлен от Тебе́ исхо́дит, Чи́стая Де́во Богоро́дице, но про́сит благода́ти и прие́млет дарова́ния на по́льзу проше́нием.
Иере́й: Спаси́, Бо́же, лю́ди Твоя́:
Ли́к: Го́споди, поми́луй, 15.
Возгла́с: Ми́лостию и щедро́тами:
Пе́снь 7.
Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́ Бо́же оте́ц на́ших.
Никогда́же отлучáяйся на́с, Спа́се Ще́дрый, я́ко па́стырь ове́ц свои́х, но при́сно с на́ми неотлу́чно пребыва́я, от вся́ких бе́д свободи́ ве́рно Ти́ от сéрдца вопию́щих: благослове́н еси́, Бо́же, и Препросла́вленный.
Сла́ва: Ты́, Бо́же Всеси́льный и Царю́ Пресвяты́й, пропны́й не́бо, я́ко ко́жу, и мо́ре песко́м огради́вый, посли́ на́м теплоту́ со́лнечную и благорастворе́нны возду́хи, ве́рно Ти́ вопию́щым: благослове́н еси́, Бо́же, и Препросла́вленный.
И ны́не, Богоро́дичен: Научи́, Влады́чице, язы́к мо́й глаго́лати поле́зная, Наде́жде все́м конце́м земли́, и моли́ся Сы́ну Си́ и Бо́гу, пода́ти вéдро на земли́ и уще́дрити Христу́ вопию́щих: благослове́н еси́, Бо́же, и Препросла́вленный.
Пе́снь 8.
Ирмо́с: Из пла́мене преподо́бным ро́су источи́л еси́. и пра́веднаго же́ртву водо́ю попали́л еси́: вся́ бо твори́ши Христе́, то́кмо е́же хоте́ти, Тя́ превозно́сим во вся́ ве́ки.
Чии раби́ и созда́ние есмы́; не Твои́ ли, Преве́чный Бо́же, услы́ши у́бо на́ша моли́твы худы́я и испусти́ вéдро на земли́ и ро́су поле́зную, да Тя́ превозно́сим во вся́ ве́ки.
Сла́ва: Ре́кл еси́, Ми́лостивый Влады́ко, наказу́я на́с к покая́нию: ищи́те, и обря́щете; толцы́те, и отве́рзется ва́м; проси́те, и прии́мете. Те́мже к Тебе́ припáдаем и приле́жно мо́лим: пощади́ на́с, Ми́лостиве, превознося́щих Тя́ во вся́ ве́ки.
И ны́не: Чи́стая Влады́чице Богоро́дице, изба́ви моли́твами Си́ лю́ди Своя́ от стра́сти и бра́ни вся́кия, подаю́щи оби́льныя ми́лости и плоды́ на пи́щу чту́щым Тя́ и превознося́щым во вся́ ве́ки.
Пе́снь 9-я́. Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти: Тобо́ю же Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Па́вел, пока́явся от гонительства, сосу́д избрáнен бы́сть Тебе́, Влады́це и Бо́гу все́х, и мы́, гре́шнии, наде́ющеся Твоему́ милосе́рдию, в покая́нии Тебе́ вопие́м: прости́ вся́ согреше́ния на́ша и посли́ вéдро земли́ и ро́су благу́ю и поле́зную, моли́твами Пречи́стыя Ти́ Ма́тере.
Сла́ва: Верхо́вный учени́к Тво́й Пе́тр три́жды отве́ргся Тебе́, пла́чем го́рьким обрéте у тебе́, Милосе́рде Христе́, проще́ние и мы́ того́ ревну́юще покая́нию, Тебе́ во умиле́нии со слеза́ми вопие́м: согреши́хом, прости́, Милосе́рде, и изба́ви на́с от вся́каго зла́, моли́твами Пречи́стыя Ти́ Ма́тере.
И ны́не, Богоро́дичен: Изба́ви ны́, Пречи́стая, от вся́каго зла́го обстоя́ния и от безгоднаго лия́ния дожде́внаго, наше́дшаго ны́не на ны́, и испроси́ свы́ше у Сы́на Ти́ и Бо́га пода́ти благовре́менное вéдро рабо́м Свои́м и изоби́льный пло́д земны́й на пи́щу лю́дем, да Тя́ непреста́нно велича́ем.
Катава́сия.
Таже: Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Трисвято́е. По О́тче наш:
Тропарь: Поми́луй нас, Го́споди, поми́луй нас; вся́каго бо отве́та недоуме́юще, сию́ Ти моли́тву я́ко Влады́це, гре́шнии прино́сим: поми́луй нас.
Слава: Го́споди, поми́луй нас, на Тя бо упова́хом; не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны от враг на́ших; Ты бо еси́ Бог наш, и мы лю́дие Твои́, вси́ дела́ руку́ Твое́ю, и и́мя Твое́ призыва́ем.
И ныне, Богородичен: Милосе́рдия две́ри отве́рзи нам, благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да христиа́нскаго.
Ли́к: Го́споди, поми́луй, трижды.
О Вели́ком Господи́не и отце́ на́шем, Святе́йшем Патриа́рхе Кири́лле, и о господи́не нашем преосвяще́ннейшем митрополи́те (или́ архиепи́скопе, или́ епи́скопе) имярек, и о всей во Христе братии нашей.
Ли́к: Го́споди, поми́луй.
Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Го́споди, поми́луй, три́жды.
Еще́ мо́лимся о е́же отврати́ти от на́с вся́к гне́в Сво́й, пра́ведно дви́жимый на ны́, и прости́ти на́м вся́кое согреше́ние во́льное же и нево́льное и поми́ловати на́с, недосто́йных рабо́в Свои́х, в се́рдце сокруше́нном рце́м вси́: Го́споди, услы́ши и поми́луй.
Го́споди, поми́луй, три́жды.
Еще́ мо́лимся о е́же услы́шати Го́споду Бо́гу гла́с моли́твы на́шея, и поми́ловати на́с, и посла́ти благовре́менное вéдро на земли́, и утéшити на́с, ско́рбных рабо́в Свои́х, рце́м вси́ со слеза́ми: услы́ши, Ми́лостиве, и поми́луй.
Собирáяй во́ды во о́блацех от конце́в земны́х, повеле́нием Твои́м удержи́ я́, и пусти́ вéдро на земли́, со умиле́нием мо́лим Ти́ ся́, Всеще́дрый Влады́ко, услы́ши и ми́лостивно поми́луй».
Го́споди, поми́луй, три́жды.
Призывáяй во́ду морску́ю и сию́ па́ки всемогу́щею си́лою Твое́ю удержа́ти моги́й и просвети́ти поднебе́сную, в покая́нии мо́лим Ти́ ся́, Всеми́лостиве Го́споди, услы́ши и человеколю́бно поми́луй.
Го́споди, поми́луй, три́жды.
Вéдро во́льное пусти́, Го́споди, на земли́ и от истле́ния ско́ро изба́ви на́с, боле́зненным се́рдцем мо́лим Ти́ ся́, услы́ши и щедростно поми́луй.
Го́споди, поми́луй, три́жды.
Посещáяй зе́млю и умножáяй жи́та ея́, прозяба́яй же па́жить ското́м и траву́ на слу́жбу челове́ком, поми́луй челове́ки и скоты́ и запрети́ безгодному дождевному лия́нию, со́лнцу же благовре́менно возсия́ти на земли́ и умно́жити плоды́ ея́ повели́, мо́лим Ти́ ся́, Благоутро́бне Го́споди, услы́ши и, я́ко Бла́г, поми́луй.
Го́споди, поми́луй, три́жды.
Я́ко о́чи ра́б в руку́ госпо́дий свои́х, та́ко о́чи на́ши к Тебе́, Бо́же на́ш, ве́рою взира́ют, до́ндеже ущéдриши ны́. Те́мже не погуби́ на́с безме́рною мокрото́ю, но ми́лостивно при΄зри́ на ны́ вéдром и щедротно поми́луй.
Го́споди, поми́луй, три́жды.
Осиявáяй со́лнце на злы́я и благи́я, и подава́яй вéдро, и ро́су благоплодоносну, и благорастворныя возду́хи на по́льзу созда́нию Твоему́, не я́ростию Твое́ю накажи́ на́с, но ми́лостивно умно́жи сéмена земна́я и плоды́ ея́, в покая́нии мо́лим Ти́ ся́, Человеколю́бче Го́споди, услы́ши и, я́ко Ще́др, поми́луй.
Го́споди, поми́луй, три́жды.
Одея́йся све́том, я́ко ри́зою, возсия́й све́т со́лнечный на земли́ на́шей и изсуши́ изли́шнюю мокроту́ ея́ ко изобильному плодоноше́нию, мо́лим Ти́ ся́, услы́ши и ми́лостивно поми́луй.
Го́споди, поми́луй, три́жды.
Не помяни́ беззако́ний на́ших, Влады́ко, а́ще бо беззако́ния нáзриши, никто́же постои́т пред Тобо́ю, но ско́ро да предваря́т ны́ щедро́ты Твоя́, Го́споди, я́ко обнищáхом зело́, да не растли́т на́с безведрие и до конца́ да не погуби́т, мо́лим Ти́ ся́, ско́ро услы́ши и ми́лостивно поми́луй.
Го́споди, поми́луй, три́жды.
Упова́ние и спасе́ние правосла́вно в Тя́ ве́рующих, Го́споди, изба́ви (а́ще в монастыре́, глаго́ли сие́) оби́тель сию́, (а́ще во гра́де, сие́) гра́д се́й и вся́к гра́д, и страну́ (а́ще же на селе́, сие́) ве́сь сию́ от гла́да, губи́тельства, тру́са, пото́па, огня́, меча́, наше́ствия иноплеме́нных и междоусо́бныя бра́ни и вся́кия смертоно́сныя я́звы, и Ми́лостив, и ти́х, и благоуве́тлив бу́ди, Человеколю́бче, о гресéх на́ших и поми́луй на́с, и отврати́ ве́сь гне́в Тво́й, пра́ведно дви́жимый на ны́, и изба́ви на́с належа́щаго пра́веднаго преще́ния Твоего́, и просвети́ благода́тию Твое́ю всю́ поднебе́сную к плодоноше́нию земли́ и ко окормлению жития́ на́шего, рце́м вси́ со слеза́ми: Го́споди Святы́й, ско́ро услы́ши и ми́лостивно поми́луй.
И пою́т вси́: Го́споди, поми́луй, три́жды.
Иере́ю же не возгласившу, диа́кон глаго́лет:
Со умиле́нием вси́, коле́на прекло́ньше, Го́споду помо́лимся.
И отпе́вше три́жды, Го́споди, поми́луй:
Преклоня́ют коле́на: иере́й же чте́т моли́тву велегла́сно:
Влады́ко Го́споди Бо́же на́ш, дре́вле ревни́теля Илии́, проро́ка Твоего́, мольбу́ послу́шавый и е́же на вре́мя до́ждь удержа́ти изво́ливый! И ны́не, Человеколюби́вый Тво́рче и Ми́лостивый Го́споди, при́зри на на́с, смире́нных и недосто́йных рабо́в Твои́х, смире́нныя мольбы́, и, я́ко Ще́др, прéзри на́ша прегреше́ния и, умолéн бы́в от сама́го Твоего́ человеколю́бия, пода́ждь вéдро достоя́нию Твоему́ и со́лнце просвети́ на тре́бующыя и прося́щыя от Тебе́ ми́лости, возвесели́ лице́ земли́ ни́щих ра́ди люде́й Твои́х, младе́нец же и ско́т и ины́х все́х живо́тных, и́хже насыща́еши Твои́м благоволе́нием и дае́ши пи́щу и́м во блáго вре́мя. Е́й, Го́споди Бо́же на́ш, не отри́ни вотщé мольбу́ на́шу, нижé посрами́ на́с от ча́яния на́шего, но пощади́ на́с по ми́лости Твое́й и посети́ щедро́тами Твои́ми, исчеза́ют бо всу́е дни́е на́ши и оскудева́ет в боле́зни живо́т на́ш. Не погуби́ у́бо на́с беззако́ний ра́ди на́ших, и́миже негодова́ние и я́рость Твою́ на себе́ привлеко́хом, но сотвори́ с на́ми по ти́хости Твое́й и по мно́жеству ми́лости Твоея́. Се́ бо душе́ю сокруше́нною и ду́хом смире́нным пред Тобо́ю припáдаем и, я́ко раби́ непотре́бнии, па́че же бо́льшия ка́зни досто́йнии, в покая́нии умиле́нно Тебе́ вопие́м: согреши́хом, и беззако́нновахом, и прегреши́хом во все́м, за́поведи Твоя́ преступáюще, и сего́ ра́ди вся́, я́же наво́диши на ны́, и́стиною и судо́м наво́диши. Но не до конца́ тле́нию, гла́ду же и поги́бели преда́ждь на́с, нижé да потопи́т на́с бу́ря во́дная, но во гне́ве ми́лости помяни́, и ту́не щедро́т Твои́х ра́ди уми́лостивися, и Твое́ созда́ние и де́ло ру́к Твои́х, я́ко Бла́г, поми́луй, и от вся́каго зла́ ско́ро изба́ви.
Возгла́с: Твое́ бо е́сть, е́же ми́ловати и спаса́ти ны́, Бо́же на́ш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Ли́к: Ами́нь.
Диа́кон: Прему́дрость.
Иере́й же или́ архиере́й твори́т отпу́ст обы́чный дне́ или́ пра́зднику.
Глава́ 33. После́дование моле́бнаго пе́ния во вре́мя губи́тельнаго пове́трия и смертоно́сныя зара́зы
Иерей начинает: Благослове́н Бо́г на́ш ны́не и при́стно и во ве́ки веко́в. Ами́нь. Сла́ва Тебе́, Бо́же наш, сла́ва Тебе́.
Клир поет: Царю́ Небе́сный: и Чтец: Трисвято́е. О́тче наш:
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди, поми́луй 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псалом 37:
Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Яко стре́лы Твоя́ унзо́ша во мне, и утверди́л еси́ на мне ру́ку Твою. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Яко беззако́ния моя́ превзыдо́ша главу́ мою, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Яко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя сила́ моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Яко на Тя, Го́споди, упова́х, Ты услы́шиши, Го́споди Бо́же мой. Яко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Яко аз на ра́ны гото́в, и боле́знь моя́ предо мно́ю есть вы́ну. Яко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою, Го́споди спасе́ния моего́.
Или псалом 90.
Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна, плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тме преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тма одесну́ю тебе́, к тебе́ же не прибли́жится, оба́че очи́ма твои́ма смо́триши, и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва и зми́я. Я́ко на Мя упова́ и изба́влю и́, покры́ю и́, я́ко позна́ и́мя Мое́. Воззове́т ко Мне и услы́шу eго́, с ним есмь в ско́рби, изму́ eго́ и просла́влю eго́, долгото́ю дний испо́лню eго́ и явлю́ eму́ спасе́ние Мое́.
По конце Сла́ва, и ны́не: Аллилу́иа, трижды.
Диакон глаголет ектению:
Миром Господу помолимся.
Ли́к: Го́споди, поми́луй.
О свы́шнем ми́ре и спасе́нии душ на́ших Го́споду помо́лимся.
Ли́к: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й, и соедине́нии всех, Го́споду помо́лимся.
Ли́к: Го́споди, поми́луй.
О святе́м хра́ме сем, и с ве́рою, благогове́нием, и стра́хом Бо́жиим входя́щих в о́нь, Го́споду помо́лимся.
Ли́к: Го́споди, поми́луй.
О Вели́ком Господи́не и отце́ на́шем, Святе́йшем Патриа́рхе Кири́лле, и о господи́не нашем преосвяще́ннейшем митрополи́те (или́ архиепи́скопе, или́ епи́скопе) имярек, честне́м пресви́терстве, во Христе́ диа́констве и о все́м при́чте и лю́дех, Го́споду помо́лимся.
Го́споду помо́лимся.
Ли́к: Го́споди, поми́луй.
О Богохрани́мей стране́ на́шей, власте́х и во́инстве ея́ Го́споду помо́лимся.
Ли́к: Го́споди, поми́луй.
О гра́де сем, (а́ще в монастыре́, о святе́й оби́тели сей), вся́ком гра́де, стране́ и ве́рою живу́щих в них, Го́споду помо́лимся.
Ли́к: Го́споди, поми́луй.
О благорастворе́нии возду́хов, о изоби́лии плодо́в земны́х, и временах ми́рных, Го́споду помо́лимся.
Ли́к: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных, и о спасе́нии их, Го́споду помо́лимся.
Ли́к: Го́споди, поми́луй.
и прилага́ются сия́:
О е́же не помяну́ти беззако́ний и собла́знов на́с гре́шных и недосто́йных рабо́в Свои́х, но ми́лостивно очи́стити грехи́ на́ша, и отврати́ти гне́в Сво́й, пра́ведно дви́жимый на ны́, Го́споду помо́лимся.
Ли́к: Го́споди, поми́луй.
О е́же не я́ростию Свое́ю обличи́ти, ни гне́вом наказа́ти на́с, но помяну́ти, я́ко пло́ть есмы́, ду́х ходя́й и не обраща́яйся, и ми́лостивно пощади́ти от сме́рти души́ на́ша, Го́споду помо́лимся.
Ли́к: Го́споди, поми́луй.
О е́же не вни́ти в су́д с рабы́ Свои́ми, и не назрити беззако́ния на́ша, но очи́стити я́, и ми́лостиву бы́ти, и пощади́ти люде́й согре́шшия, Го́споду помо́лимся.
Ли́к: Го́споди, поми́луй.
О е́же помяну́ти щедро́ты и ми́лости Своя́, от ве́ка су́ть, грехо́в же ю́ности и неве́дения на́шего не помяну́ти, и поми́ловати на́с, Го́споду помо́лимся.
Ли́к: Го́споди, поми́луй.
О е́же услы́шати от хра́ма Свята́го Своего́ гла́с на́ш, и исцели́ти боле́зни сме́ртныя одержа́щия на́с, и пото́ки беззако́ния смутившия на́с изсуши́ти, Го́споду помо́лимся.
Ли́к: Го́споди, поми́луй.
О е́же вско́ре изъя́ти на́с от сете́й сме́ртных и от боле́зней изба́вити, Го́споду помо́лимся.
Ли́к: Го́споди, поми́луй.
О е́же ми́лостивно продолжи́ти раба́м Свои́м покая́ния вре́мя, и не безго́дно я́ко непло́дную смоко́вницу посещи́, но благосе́рдием окопати, и милосе́рдия росо́ю напои́ти, плодо́в покая́ния и обраще́ния на́шего человеколю́бно еще́ ожида́я, Го́споду помо́лимся.
Ли́к: Го́споди, поми́луй.
О е́же вознести́ на́с от вра́т сме́ртных, и ме́ч изъя́тый, и лу́к Сво́й напряженный, и в не́м сосу́ды сме́ртныя на на́с пра́ведно угото́ванныя со стрела́ми горя́щими, ми́лостивно (да не поги́бнем) от на́с отврати́ти, Го́споду помо́лимся.
Ли́к: Го́споди, поми́луй.
О е́же услы́шати моли́тву на́шу, и моле́ние на́ше прия́ти, и сле́з на́ших не премолчати: но осла́бити на́м, да почием пре́жде да́же не оты́дем, и ктому́ не бу́дем, Го́споду помо́лимся.
Ли́к: Го́споди, поми́луй.
О изба́витися на́м от вся́кия ско́рби, гне́ва и ну́жды, Го́споду помо́лимся.
Ли́к: Го́споди, поми́луй.
Заступи́, спаси́, поми́луй и сохрани́ на́с, Бо́же, Твое́ю благода́тию.
Ли́к: Го́споди, поми́луй.
Пресвяту́ю, Пречи́стую Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми се́бе и дру́г дру́га, и ве́сь живо́т на́ш Христу́ Бо́гу предади́м.
Ли́к: Тебе́ Го́споди.
Иере́й возгла́с: Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Гла́с 2: Бо́г Госпо́дь и яви́ся на́м, благослове́н Гряды́й во И́мя Госпо́дне.
Сти́х 1: Испове́дайтеся Го́сподеви, я́ко бла́г, я́ко в ве́к ми́лость Его́.
Сти́х 2: Обыше́дше обыдо́ша мя́, и и́менем Госпо́дним противля́хся и́м.
Сти́х 3: Не умру́, но жи́в бу́ду, и пове́м дела́ Госпо́дня.
Сти́х 4: Ка́мень, его́же небрего́ша зи́ждущии, се́й бы́сть во главу́ у́гла: от Го́спода бы́сть се́й, и е́сть ди́вен во очесе́х на́ших.
Тропа́рь:
Во гне́ве Твое́м, Бо́же, помяни́ щедро́ты Твоя́, пра́х бо и пе́пел есмы́, ду́х ходя́й и не обраща́яйся, и не я́ростию Твое́ю обличи́ на́с, да не поги́бнем до конца́, но пощади́ души́ на́ша, я́ко еди́н Милосе́рд. (Два́жды.)
Сла́ва, и ны́не. Богоро́дичен:
Засту́пнице усе́рдная, Ма́ти Го́спода Вы́шняго, за все́х мо́лиши Сы́на Твоего́ Христа́ Бо́га на́шего, и все́м твори́ши спасти́ся, в держа́вный Тво́й покро́в прибега́ющим. Все́х на́с заступи́, о Госпоже́ Цари́це и Влады́чице, и́же в напа́стех и в ско́рбех и в боле́знех, обремене́нных грехи́ мно́гими, предстоя́щих и моля́щихся Тебе́ умиле́нною душе́ю и сокруше́нным се́рдцем пред пречи́стым Твои́м о́бразом со слеза́ми, и невозвра́тно наде́жду иму́щих на Тя́, избавле́ния все́х зо́л, все́м поле́зная да́руй и вся́ спаси́, Богоро́дице Де́во: Ты́ бо еси́ Боже́ственный покро́в рабо́м Твои́м.
Та́же, псало́м 50:
Поми́луй мя́, Бóже, по вели́цей ми́лости Твоéй, и по мнóжеству щедрóт Твои́х очи́сти беззакóние моé. Наипáче омы́й мя́ от беззакóния моегó, и от грехá моегó очи́сти мя́; я́ко беззакóние моé а́з знáю, и гре́х мо́й прéдо мно́ю е́сть вы́ну. Тебé еди́ному согреши́х и лукáвое пред Тобóю сотвори́х; я́ко да оправди́шися во словесéх Твои́х, и победи́ши внегдá суди́ти Ти́. Се́ бо в беззакóниих зачáт е́смь, и во гресéх роди́ мя́ мáти моя́. Се́ бо и́стину возлюби́л еси́; безвéстная и тáйная прему́дрости Твоея́ яви́л ми́ еси́. Окропи́ши мя́ иссóпом, и очи́щуся; омы́еши мя́, и пáче снéга убелю́ся. Слу́ху моему́ дáси рáдость и весéлие; возрáдуются кóсти смирéнныя. Отврати́ лицé Твоé от гре́х мои́х и вся́ беззакóния моя́ очи́сти. Сéрдце чи́сто сози́жди во мне́, Бóже, и ду́х пра́в обнови́ во утрóбе моéй. Не отвéржи менé от лицá Твоегó и Ду́ха Твоегó Святáго не отыми́ от менé. Воздáждь ми́ рáдость спасéния Твоегó и Ду́хом Влады́чним утверди́ мя́. Научу́ беззакóнныя путéм Твои́м, и нечести́вии к Тебé обратя́тся. Избáви мя́ от кровéй, Бóже, Бóже спасéния моегó; возрáдуется язы́к мо́й прáвде Твоéй. Гóсподи, устнé мои́ отвéрзеши, и устá моя́ возвестя́т хвалу́ Твою́. Я́ко áще бы восхотéл еси́ жéртвы, да́л бы́х у́бо: всесожжéния не благоволи́ши́. Жéртва Бóгу ду́х сокрушéн; сéрдце сокрушéнно и смирéнно Бо́г не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Тво́й тельцы́.
Кано́н:
Пресвяте́й и Единосу́щней и Животворя́щей и Нераздели́мей Тро́ице
Гла́с 8
Пе́снь 1
Ирмо́с: Колесницегони́теля фарао́ня погрузи́, чудотворя́й иногда́ Моисе́йский же́зл, крестообра́зно порази́в, и раздели́в мо́ре: Изра́иля же беглеца́ пешехо́дца спасе́, пе́снь Бо́гови воспева́юща.
Вседе́тельная и Единосу́щная, и Сопресто́льная, и Единоси́льная, и Трисве́тлая Сла́во, О́тче Непостижи́ме, Сы́не и Душе́ Святы́й, от лю́тыя боле́зни рабо́в Твои́х свободи́, я́ко да благода́рственно Тя́ сла́вим.
Грехо́в бу́ря изри́ну на́с в глубину́ не́мощи, и ча́стыя боле́зни, я́коже треволне́ние на́с обурева́ют окая́нных: Единоси́льная Держа́во, Тро́ице Свята́я, умилосе́рдися, и спаси́ на́с, лю́те погиба́ющих.
Сла́ва: О Тро́ице неразде́льная, изба́ви на́с Твои́х рабо́в от грехо́в на́ших, росо́ю ми́лости Твоея́ угаша́ющи зно́й лю́тых на́ших боле́зней, и здра́вие подаю́щи, я́ко да правосла́вно воспева́ем Тя́.
И ны́не. Богоро́дичен: Изба́вителя и Вседе́теля и Го́спода во чре́ве носи́вшая, на́ша неду́ги поне́сшаго, Того́ у́бо Всечи́стая моли́, от лю́тыя не́мощи Твои́х рабо́в изба́вити, еди́на челове́ков По́моще.
Пе́снь 3.
Ирмо́с: Небе́снаго кру́га Верхотво́рче Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.
Небе́снии у́мове, а́нгельстии чи́нове, Престо́ли, и Нача́ла, и Си́лы, и Госпо́дьства, мо́лят Тя́, Блага́го и Спа́са: от губи́тельнаго неду́га свободи́ рабы́ Твоя́.
Да человеколю́бия на мно́зе, Влады́ко, Твоего́ пока́жеши бе́здну, Всеси́льне, неду́га свободи́ смертоно́снаго, и боле́зней лю́тых рабо́в Твои́х, еди́не Долготерпели́ве.
Сла́ва: Я́ко Бо́жии предстоя́тели, служе́бнии ду́си, А́нгелы и Арха́нгелы, Сего́ моли́те, утоли́ти неду́г, разори́ти печа́ль, и от смертоно́сныя же ча́сти изба́вити.
И ны́не. Исцеле́ний исто́чника Тя́ благи́х показа́, бе́здна из Тебе́ проше́дшая, Христо́с Госпо́дь, Отрокови́це Пренепоро́чная: те́мже рабы́ Твоя́ изба́ви не́мощи бу́рею потопляемы.
Сия́ глаго́ли по 3-й и по 6-й пе́сни то́кмо:
Изба́ви от бе́д рабы́ Твоя́, Многоми́лостиве, я́ко мы́ усе́рдно к Тебе́ прибега́ем, к Ми́лостивому Изба́вителю все́х Влады́це в Тро́ице сла́вимому Бо́гу.
Посе́м ектения́ сугу́бая:
Поми́луй на́с, Бо́же: и про́чая.
Та́же седа́лен, гла́с 2:
Не отри́ни до конца́ согре́шшыя лю́ди Твоя́, Влады́ко, и не отста́ви ми́лости и щедро́ты Твоя́ от на́с: но я́ко Бе́здна сы́й щедро́т, и милосе́рдия Пучи́на, приими́ мольбы́ на́ша, и изба́ви на́с от угрожа́ющия на́м беды́ и ну́жды, еди́н бо еси́ Благоуве́тливый.
Пе́снь 4
Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.
Ны́не вои́стину се́нь сме́ртная обы́де, и ко а́довым врата́м прибли́жи, но Ты́, Спа́се, я́ко си́лен на́с возста́вивый, удиви́ ми́лости Твоя́, спаса́яй в ве́ре несумне́нной вопию́щих: си́ле Твое́й сла́ва, Человеколю́бче.
Христо́вы таи́нницы, самови́дцы и пропове́дницы, прии́мшии да́р исцеле́ния и вра́чеве су́ще душе́внии, апо́столи, изба́вите на́с oт угрожающего неду́га, Иису́са моля́ще Влады́ку, и Изба́вителя, и Го́спода.
Сла́ва: Грехо́в бу́ря ны́не на́с пости́же, не́мощи во́лны обурева́ют, боле́зни погружа́ют ча́стыя, ско́рби бо и боле́зни на́с окая́нных обрето́ша, апо́столи Госпо́дни, ва́шими мольба́ми по́мощи ру́ку пода́йте.
И ны́не. Богоро́дичен: Боле́зньми лю́тыми и ча́стыми ударяеми, Де́во, вси́ Тебе́ припа́даем: держа́вным покро́вом Твои́м, Чи́стая, спаси́ на́с все́х. Уще́дри, Богоневе́стная, изба́ви от мо́ра и лю́той не́мощи, и боле́зни исцели́, Влады́чице.
Пе́снь 5
Ирмо́с: Вску́ю мя́ отри́нул еси́ от лица́ Твоего́ Све́те незаходи́мый, и покры́ла мя́ е́сть чужда́я тьма́ окая́ннаго: но обрати́ мя́, и к све́ту за́поведей Твои́х пути́ моя́ напра́ви, молю́ся.
Мо́ря ле́сти медото́чными ва́шими моле́ньми, свяще́ннии проро́цы, потопи́вше, ны́не преложи́те го́ресть всю́ губи́тельныя ны́нешния не́мощи, на боже́ственную благомо́щия сла́дость.
Пронзени бы́хом стрела́ми не́мощи повеле́нием Твои́м, Го́споди, и утверди́ся на на́с рука́ Твоя́, Всеси́льне. Я́ко Бо́г Ще́дрый, уще́дри все́х Твое́ю ми́лостию, моли́твами святы́х му́чеников Твои́х.
Сла́ва: Я́коже дре́вле сы́на вдови́цы уме́рша возста́вил еси́ Твои́м повеле́нием, Сло́ве, та́ко и ны́не лю́тыя не́мощи рабы́ Твоя́, я́ко еди́н Бла́г и Ми́лостив изба́вив, оживотвори́, еди́не Человеколю́бче.
И ны́не. Богоро́дичен: В но́щи жите́йской бу́ря пости́же вся́каго озлобле́ния, покрыло мя́, Де́во, не́мощи омраче́ние: но возсия́й ми́ прохлажде́ния, Пречи́стая, све́т, и к све́ту благомо́щия наста́ви.
Пе́снь 6
Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.
В пучи́не про́пастей и не́мощей облежим, и губи́тельныя напа́сти обурева́ют во́лны, Прави́телю Го́споди, по́мощи ру́ку просте́р ны́не, спаси́.
Разсла́бленнаго я́коже дре́вле стягну́л еси́, Боже́ственным ма́нием от неду́га боле́зненнаго, и одра́ озлобле́ния и от неду́га тягча́йшаго, уще́дрив, да́ждь здра́вие, Многоми́лостиве.
Проро́ческий ли́к, апо́столов собра́ние, по́лк страда́льцев ны́не мо́лит Тя́, еди́не Многоми́лостиве, о лю́дех Твои́х, Бла́же, си́х уще́дри.
Богоро́дичен: Мари́е, чи́стое де́вства Сокро́вище, Ты́ очи́сти на́с, и неду́гов и скорбе́й, и содержа́щия ны́не не́мощи изба́ви, да ве́рою Тя́ просла́вим.
Та́же, Изба́ви от бе́д и боле́зней рабы́ Твоя́, Многоми́лостиве, я́ко мы́ усе́рдно к Тебе́ прибега́ем, к Ми́лостивому Изба́вителю все́х Влады́це в Тро́ице сла́вимому Бо́гу.
Ектения́ ма́лая.
И по возгла́се а́бие кондаки́, гла́с 6:
Боле́зни а́довы обыдо́ша на́с, и покры́ на́с се́нь сме́ртная, и я́ко во́ск от огня́, дни́е на́ши та́ют от лица́ гне́ва Твоего́, Го́споди: но я́ко Ще́др, во гне́ве ми́лости помяни́ и пощади́ люде́й Твои́х, да жи́ви су́ще в покая́нии сла́вим Тя́, еди́наго Человеколю́бца.
Во́нмем. Прему́дрость, во́нмем.
Проки́мен, гла́с 4:
Го́споди, да не я́ростию Твое́ю обличи́ши мене́, ни гне́вом Твои́м нака́жеши мене́.
Сти́х: Я́ко стре́лы Твоя́ унзо́ша во мне́, и утверди́л еси́ на мне́ ру́ку Твою́.
Апо́стол ко Евре́ем, зач. 331 от полу́.
Бра́тие, его́же бо лю́бит Госпо́дь, наказу́ет, бие́т же вся́каго сы́на, его́же прие́млет. А́ще наказа́ние терпите́, я́коже сыново́м обрета́ется ва́м Бо́г. Кото́рый бо е́сть сы́н, его́же не наказу́ет оте́ц? А́ще же без наказа́ния есте́, ему́же прича́стницы бы́ша вси́, у́бо прелюбоде́йчищи есте́, а не сы́нове. К си́м, пло́ти на́шей отца́ име́хом наказа́теля, и срамля́хомся, не мно́го ли па́че повине́мся Отцу́ духово́м, и жи́ви бу́дем? Они́ бо в ма́ло дне́й, я́коже го́де и́м бе́, нака́зоваху на́с, а Се́й на по́льзу, да причасти́мся святы́ни Его́. Вся́кое бо наказа́ние в настоя́щее вре́мя не мни́тся ра́дость бы́ти, но печа́ль: последи́ же пло́д ми́рен науче́ным те́м воздае́т пра́вды. Те́мже осла́бленныя ру́ки и осла́бленная коле́на испра́вите. И стези́ пра́вы сотвори́те нога́ми ва́шими, да не хро́мое соврати́тся, но па́че да исцеле́ет.
Аллилуия гла́са.
Сти́х 1: Одержа́ша мя́ боле́зни сме́ртныя, и пото́цы беззако́ния смято́ша мя́.
Сти́х 2: Боле́зни а́довы обыдо́ша мя́, предвари́ша мя́ се́ти сме́ртныя.
И о сподо́битися на́м слы́шанию Свята́го Ева́нгелия, Го́спода Бо́га мо́лим.
Ева́нгелие от Луки́, зач. 16.
Во вре́мя о́но, вни́де Иису́с в до́м Си́монов: те́ща же Си́монова бе́ одержи́ма огне́м ве́лиим, и моли́ша Его́ о не́й. И ста́в над не́ю, запрети́ огню́, и оста́ви ю́. А́бие же воста́вши служа́ше и́м. Заходя́щу же со́лнцу, вси́, ели́цы име́яху боля́щия неду́ги разли́чными, привожда́ху и́х к Нему́, О́н же на еди́ном коего́ждо и́х ру́це возло́жь, исцеля́ше и́х. Исхожда́ху же и бе́си от мно́гих, вопию́ще и глаго́люще, я́ко Ты́ еси́ Христо́с Сы́н Бо́жий. И запреща́я не дая́ше и́м глаго́лати, я́ко ве́дяху Христа́ Самаго́ су́ща. Бы́вшу же дню́, изше́д и́де в пу́сто ме́сто, и наро́ди иска́ху Его́, и приидо́ша до Него́, и держа́хуся Его́, да не бы отше́л от ни́х. О́н же рече́ к ни́м, я́ко и други́м градово́м благовести́ти Ми́ подоба́ет Ца́рствие Бо́жие, я́ко на се́ по́слан е́смь. И бе́ пропове́дая на со́нмищах галиле́йских.
Пе́снь 7
Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще поя́ху: благослове́н еси́ Бо́же оте́ц на́ших.
Опаля́ет пе́щь безме́рных боле́зней, и сжига́ет мя́ огне́вицы губи́тельныя пла́мень непреста́нно безсту́днейший: но росо́ю ми́лости Твоея́, Спа́се, прохлади́ пою́ща: благослове́н, Бо́г оте́ц на́ших.
Проро́цы, апо́столи, му́чеников Собо́ри, боже́ственнии учи́телие, боле́зни неду́гующих на́с мольба́ми ва́шими укроти́те, и здра́вие да́руйте пою́щим: благослове́н, Бо́г оте́ц на́ших.
Сло́вом Ла́заря воскреси́вый, ны́не я́ко из гро́ба на́с лю́тыя не́мощи возста́вивый оживи́, Го́споди, да вопие́м пе́снь благода́рственную: благослове́н, Бо́г оте́ц на́ших.
Богоро́дичен: Ще́дра су́щая и Ма́ти Всеще́драго, уще́дривши изба́ви Твои́х люде́й, призыва́ющыя ми́лости Твоя́, Де́во, и пою́щыя: благослове́н, Бо́г оте́ц на́ших.
Пе́снь 8
Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.
Боле́зненно стенем, от одра́ боле́зни на́шея, и от губи́тельныя не́мощи, вопие́м к Тебе́, Человеколю́бцу, серде́чныя о́чи ны́не простира́юще, здра́вия про́сим. Посети́ на́с, Спа́се, и возста́ви пе́ти: лю́дие превозноси́те во вся́ ве́ки.
В на́шу не́мощь ми́лостивне облекшийся, и уподо́битися человекам изво́ливый, моли́твами преподо́бных Твои́х, отча́янных спаси́ на́с, воздви́гни из гро́ба отча́яния пе́ти: о́троцы благослови́те, свяще́нницы воспо́йте, лю́дие превозноси́те во вся́ ве́ки.
Соде́телю естества́, Пода́телю исцеле́ния, утро́бы щедро́т и благоутро́бия пучи́ну, я́ко име́яй, Долготерпели́ве, посеще́нием посети́ от губи́тельныя не́мощи лю́ди Твоя́ и оживи́ вопи́ти: свяще́нницы, благослови́те, лю́дие превозноси́те во вся́ ве́ки.
Богоро́дичен: Кре́пкая По́моще, и изве́стное Заступле́ние, отча́явшихся Наде́жде, Пренепоро́чная, посети́ стра́ждущих боле́зненно рабы́ Твоя́: облегчи́ тя́жесть го́рькой не́мощи: отжени́ неду́г губительной боле́зни, и спаси́ рабы́ Твоя́, Де́во Богоро́дице.
Пе́снь 9
Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют.
Чудеса́ ве́лия и́мже не́сть числа́ сотвори́вый, Безсме́ртне, на рабы́ Твоя́ ми́лости Твои́, Бо́же, я́ко Ми́лостив покажи́, и от содержа́щия на́с ны́не свободи́ боле́зни, моле́ньми ро́ждшия Тя́, и ли́ка страстоте́рпцев Твои́х.
А́нгелов, Арха́нгелов и проро́ков, апо́столов, му́чеников, преподо́бных же, иера́рхов, священному́чеников Твои́х моли́твами, пла́ч рабо́в Твои́х обрати́, Всеси́льне, в ра́дость: исцели́ боле́знь, облегчи́ неду́ги, и здра́вие на́м да́руй.
Ду́ш же и теле́с Врача́, в ми́лости бога́таго Го́спода, Тебе́ мо́лим: исцели́ стра́сти моя́ мно́гия, от боле́зней и скорбе́й изба́ви на́с я́ко Бла́г и еди́н Благоде́тель, и спаса́й ве́рою чи́стою Тя́ велича́ющих.
Богоро́дичен: Ще́драго ро́ждшая и Ми́лостиваго, и Влады́ку, и Созда́теля и Го́спода, ны́не на на́с покажи́ Твоя́ обы́чно щедро́ты, и лю́таго мя́ изба́ви неду́га, изнуряющего ду́шу мою́, Де́во Богоро́дице, и пода́ждь на́м здра́вие, я́ко да непреста́нно величаемю Тя́.
По окочании кано́на, Досто́йно е́сть я́ко вои́стину блажи́ти Тя́, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя́ велича́ем.
Трисвято́е. и по О́тче на́ш: Возгла́с:
И по возгла́се, тропари́:
Поми́луй на́с, Го́споди, поми́луй на́с: вся́каго бо отве́та недоуме́юще, сию́ Ти́ моли́тву я́ко Влады́це, гре́шнии прино́сим: поми́луй на́с.
Сла́ва: Го́споди, поми́луй на́с, на Тя́ бо упова́хом; не прогне́вайся на ны́ зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны́ от вра́г на́ших; Ты́ бо еси́ Бо́г на́ш, и мы́ лю́дие Твои́, вси́ дела́ руку́ Твое́ю, и и́мя Твое́ призыва́ем.
И ны́не, Богоро́дичен: Милосе́рдия две́ри отве́рзи на́м, благослове́нная Богоро́дице, наде́ющиися на Тя́ да не поги́бнем, но да изба́вимся Тобо́ю от бе́д: Ты́ бо еси́ спасе́ние ро́да христиа́нскаго.
Поми́луй на́с, Бо́же, по вели́цей ми́лости Твое́й, мо́лим Ти́ ся́ услы́ши и поми́луй.
Го́споди, поми́луй три́жды.
Еще́ мо́лимся о Вели́ком Господи́не и отце́ на́шем, Святе́йшем Патриа́рхе Кири́лле, и о господи́не на́шем преосвяще́ннейшем митрополи́те (или́ архиепи́скопе, или́ епи́скопе) и́мярек, честне́м пресви́терстве, во Христе́ диа́констве и о все́м при́чте и лю́дех, Го́споду помо́лимся.
Го́споди поми́луй, три́жды.
Еще́ мо́лимся о богорани́мей стране́ на́шей, власте́х и во́инстве ея́, да ти́хое и безмо́лвное житие́ прживе́м во вся́ком благоче́стии и чистоте́.
Го́споди поми́луй, три́жды.
Согреши́хом и беззако́нновахом, сего́ ра́ди пра́ведный Тво́й гне́в пости́же на́с, Го́споди Бо́же на́ш, и се́нь сме́ртная обы́де на́с, и ко а́довым врато́м прибли́жихомся, но к Тебе́ Бо́гу на́шему в боле́зни на́шей уми́льно вопие́м: пощади́, пощади́ лю́ди Твоя́, и не погуби́ до конца́, смире́нно мо́лим Ти́ ся́, услы́ши и поми́луй.
Го́споди поми́луй, три́жды.
Живото́м и сме́ртию влады́чествуяй Го́споди, не затвори́ в сме́рти души́ рабо́в Твои́х, но преста́ни от гне́ва, и оста́ви я́рость, зане́ исчеза́ют я́ко ды́м дни́е на́ши, и и́зсше кре́пость на́ша, и погиба́ем до конца́ гре́х ра́ди на́ших. Ми́лостив бу́ди рабо́м Твои́м, в покая́нии со слеза́ми мо́лим Ти́ ся́, услы́ши и поми́луй.
Го́споди поми́луй, три́жды.
Помяни́, я́ко пло́ть есмы́, Го́споди, ду́х ходя́й и не обраща́яйся, и и ми́лостивно отврати́ гне́в Тво́й, пра́ведно на ны́ дви́жимый, и́мже я́ко мече́м безго́дно посеца́еши на́с: уста́ви боле́знь, и утоли́ я́зву напра́сно губя́щую на́с. Не ме́ртвии бо восхва́лят Тя́, ниже́ вси́ низходя́щии во а́д, но мы́ живи́и хва́лим Тя́, и в боле́зни се́рдца стеня́ще мо́лим Ти́ ся́, услы́ши и поми́луй.
Го́споди поми́луй, три́жды.
Па́че все́х согреши́хом Тебе́, и беззако́нновахом, Влады́ко, и а́ще покая́ния не стяжа́хом, предложе́ние на́ше вме́сто покая́ния приими́, и на ми́лость преложи́ся, смертоно́снаго неду́га и боле́зней лю́тых я́ко Всеси́лен свободи́ рабы́ Твоя́, боле́зненно стеня́ще мо́лим Ти́ ся́, ско́ро услы́ши и поми́луй.
Го́споди поми́луй, три́жды.
Не помяни́ беззако́ний и непра́вд люде́й Твои́х, и не вни́ди в су́д с рабы́ Твои́ми, ниже́ уклони́ся гне́вом от рабо́в Твои́х. А́ще беззако́ния на́зриши Го́споди, кто́ постои́т; пра́х бо и пе́пел есмы́, и соста́в на́ш я́ко ничто́же пред Тобо́ю, но я́ко Ще́др и Человеколю́бец умилосе́рдися, и не погуби́ на́с во гне́ве Твое́м со беззако́ньми на́шими, мо́лим Ти́ ся́, Бо́же Преблаги́й, услы́ши и поми́луй.
Го́споди поми́луй, три́жды.
Не хотя́й сме́рти гре́шных, но е́же обрати́тися и живы́м бы́ти и́м, я́ко живота́ исто́чник, оживотвори́ на́с пра́ведным Твои́м судо́м сме́рти досто́йных: Бо́г бо еси́, живы́ми и ме́ртвыми облада́яй, и не погуби́ на́с во гне́ве преще́ния Твоего́, во́плем кре́пким в го́рести се́рдца со слеза́ми мо́лим Ти́ ся́, услы́ши и поми́луй.
Го́споди поми́луй, три́жды.
Ми́лостивно при́зри, Го́споди, на озлобле́ние люде́й Твои́х, и умилосе́рдися, и повели́ А́нгелу, простершему ру́ку свою́ е́же погуби́ти все́х на́с, я́коже иногда́ при Дави́де повеле́л еси́, е́же довле́ти ны́не и удержа́ти ру́ку свою́, да не до конца́ на́с погуби́т. И мы́ бо, в покая́нии Тебе́ испове́дающеся, я́ко Дави́д, вопие́м: согреши́хом и беззако́нновахом, и не́смы досто́йны Твоего́ милосе́рдия, но Ты́ са́м я́ко Ще́др, еди́наго ра́ди благосе́рдия Твоего́ умоле́н бы́в, покажи́ ми́лости Твоя́ дре́вния, и пощади́ лю́ди, и о́вцы па́жити Твоея́, мо́лим Ти́ ся́, ско́ро услы́ши и поми́луй.
Го́споди поми́луй, три́жды.
Иере́й же возгла́с: Услы́ши ны́, Бо́же Спаси́телю на́ш, упова́ние все́х концов земли́ и су́щих в мо́ре дале́че: и ми́лостив, ми́лостив бу́ди, Влады́ко, о гресе́х на́ших и поми́луй ны́. Ми́лостив бо и человеколю́бец, Бо́г еси́, и Тебе́ сла́ву воссылаем, Отцу́ и Сы́ну, и Свято́му Ду́ху, ны́не и при́сно и во ве́ки веко́в.
Ли́к: Ами́нь.
И по возгла́се:
Со умиле́нием па́ки и па́ки, прекло́ньше коле́на, Го́споду помо́лимся.
Го́споди поми́луй, три́жды.
Го́споди Бо́же на́ш при́зри с высоты́ Святы́я Твоея́ на моли́тву на́с, гре́шных и недосто́йных рабо́в Твои́х, беззако́ньми на́шими Твою́ бла́гость прогне́вавших и благоутро́бие Твоё раздражи́вших, и не вни́ди в су́д с рабы́ Твои́ми, но отврати́ стра́шный гне́в Тво́й, пра́ведно на ны́ дви́жимый, утоли́ губи́тельное преще́ние, уста́ви Гро́зный Тво́й ме́ч, неви́димо безго́дно секу́щий на́с, и пощади́ ни́щих и убо́гих рабо́в Твои́х,и не затвори́ в сме́рти души́ на́ши, в покоянии сокруше́нных се́рдцем и со слеза́ми к Тебе́ Милосе́рдному, Благоуветливому и Благоприменительному Бо́гу на́шему припа́дающи.
Твое́ бо е́сть е́же ми́ловати и спаса́ти ны́, Бо́же на́ш,и Тебе́ сла́ву возсыла́ем Отцу́ и Сы́ну и Свято́му Ду́ху, ны́не и пресно и во ве́ки веко́в. Ами́нь.
Глава́ 34. Чи́н обхожде́ния поле́й насеянных
Пе́рвее в це́ркви зачина́ется обы́чно моле́бен. Егда́же зачнется кано́н, исхо́дят лю́дие из це́ркви и гряду́т в по́ля. Та́же свяще́нник с певцы́ на пе́рвой статии́ к восто́ку ста́вше, глаго́лет:
Псало́м 84.
Благоволи́л еси́, Го́споди, зе́млю Твою́, возврати́л еси́ пле́н Иа́ковль: оста́вил еси́ беззако́ния люде́й Твои́х, покры́л еси́ вся́ грехи́ и́х. Укроти́л еси́ ве́сь гне́в Тво́й, возврати́лся еси́ от гне́ва я́рости Твоея́. Возврати́ на́с, Бо́же спасе́ний на́ших, и отврати́ я́рость Твою́ от на́с. Еда́ во ве́ки прогне́ваешися на ны́? Или́ простре́ши гне́в Тво́й от ро́да в ро́д? Бо́же, Ты́ обра́щься оживи́ши ны́, и лю́дие Твои́ возвеселя́тся о Тебе́. Яви́ на́м, Го́споди, ми́лость Твою́, и спасе́ние Твое́ да́ждь на́м. Услы́шу, что́ рече́т о мне́ Госпо́дь Бо́г: я́ко рече́т ми́р на лю́ди Своя́, и на преподо́бныя Своя́, и на обраща́ющыя сердца́ к Нему́. Оба́че бли́з боя́щихся Его́ спасе́ние Его́, всели́ти сла́ву в зе́млю на́шу. Ми́лость и и́стина срето́стеся, пра́вда и ми́р облобыза́стася. И́стина от земли́ возсия́, и пра́вда с небесе́ прини́че, и́бо Госпо́дь да́ст бла́гость, и земля́ на́ша да́ст пло́д сво́й. Пра́вда пред Ни́м предъи́дет, и положи́т в пу́ть стопы́ своя́.
Сла́ва, и ны́не:
Го́споду помо́лимся.
Ли́к: Го́споди, поми́луй.
Всемогу́щий, Преве́чный Бо́же, О́тче милосе́рдия, при́зри мо́лим Ти́ ся́ на на́ша повседне́вныя тре́бования, и жа́тву дово́льную на́шему житию́ изобильне да́руй. Возвели́чи над на́ми И́мя Твое́ Свято́е, и на по́ля, виногра́ды, вертогра́ды на́ша, изли́й преизобильное Твое́ благослове́ние, да вся́ труды́ рабо́в Твои́х, дре́ва, и насажде́ния на́ша, по́лно плодоносят. Отврати́, Милосе́рде Бо́же, от кончин на́ших небеса́ неприя́зненна, сту́дени, во́лны, гра́ды, дожди́ вредящие, мно́жество во́д, и вся́ зла́, я́же мо́гут челове́ческая вреди́ти требованиям. Я́ко Ты́ еси́ Бо́г на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
Та́же Ева́нгелие от Матфе́я, зача́ло 44.
Во вре́мя О́но, и́де Иису́с в суббо́ты сквозе́ се́яния, ученицы́ же Его́ взалка́ша и нача́ша востерза́ти кла́сы и я́сти. Фарисе́е же ви́девше ре́ша Ему́: се́ ученицы́ Твои́ творя́т, его́же не досто́ит твори́ти в суббо́ту. О́н же рече́ и́м: не́сте ли чли́, что́ сотвори́ Дави́д, егда́ взалка́ са́м и су́щии с ни́м? Ка́ко вни́де в хра́м Бо́жий и хле́бы предложе́ния снеде́, и́хже не досто́йно бе́ ему́ я́сти, ни су́щим с ни́м, то́кмо иере́ем еди́ным? Или́ не́сте чли́ в зако́не, я́ко в суббо́ты свяще́нницы в це́ркви суббо́ты скверня́т и непови́нни су́ть? Глаго́лю же ва́м, я́ко це́ркве бо́ле е́сть зде́. А́ще ли бы́сте ве́дали, что́ е́сть: ми́лости хощу́, а не же́ртвы, николи́же у́бо бы́сте осужда́ли непови́нных. Госпо́дь бо е́сть и суббо́ты Сы́н Челове́ческий.
Го́споду помо́лимся.
Всемогу́щий Бо́же, милосе́рдие Твое́ призыва́ем, да сия́ се́мена, и́же возду́хом идождем воспита́ти благоволи́л еси́, благослове́нием Твои́м возлиеши. Пода́ждь, Влады́ко, лю́дем Твои́м, Тебе́ всегда́ о Твои́х благодари́ти дарова́ниих, от непло́дствия же земли́ души́ а́лчущих отврати́, да ни́щ и бога́т, неду́жный и кре́пкий, сла́вят И́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Та́же благослови́т се́мена:
Да благослови́т ны́ Бо́г, Бо́г на́ш, и земли́ на́шей всепло́дие пода́ст, и стори́цею расти́ти твори́т плоды́ ея́, да прише́дше с ра́достию, рукоя́ти на́ша с благодаре́нием соберем о Христе́ Иису́се Го́споде на́шем, Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и Пресвяты́м, и Благи́м, и Животворя́щим Ду́хом, ны́не и при́сно, и во ве́ки веко́в. Ами́нь.
Посе́м иере́й кропи́т водо́ю свяще́нною по́ля, и гряде́т с людьми́ да́лее, пою́ще кано́н моле́бный. Та́же на второ́й статии́ на ю́г ста́вше глаго́лет Псало́м 125.
Внегда́ возврати́ти Го́споду пле́н Сио́нь, бы́хом я́ко уте́шени. Тогда́ испо́лнишася ра́дости уста́ на́ша и язы́к на́ш весе́лия, тогда́ реку́т во язы́цех: возвели́чил е́сть Госпо́дь сотвори́ти с ни́ми. Возвели́чил е́сть Госпо́дь сотвори́ти с на́ми: бы́хом веселя́щеся. Возврати́, Го́споди, плене́ние на́ше, я́ко пото́ки ю́гом. Се́ющии слеза́ми, ра́достию по́жнут. Ходя́щии хожда́ху и пла́кахуся, мета́юще се́мена своя́, гряду́ще же прии́дут ра́достию, взе́млюще рукоя́ти своя́.
Сла́ва, и ны́не:
Го́споду помо́лимся.
Влады́ко Святы́й, О́тче Всемогу́щий, Преве́чный Бо́же, мо́лим ти́ ся́ усе́рдно, да манове́нием милосе́рдия Твоего́, да́ти на́м изво́лиши жа́твы мно́жество, плодо́в изоби́лие, древе́с овоще́й, и прибы́тки вся́ких веще́й, и от все́х сиих волне́ния небе́с губи́тельная, сту́дени и гра́ды отврати́. Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
Та́же, Ева́нгелие от Ма́рка, зача́ло 17
Во вре́мя о́но, рече́ Иису́с ученико́м Свои́м: та́ко е́сть [и] Ца́рствие Бо́жие, я́коже челове́к вмета́ет се́мя в зе́млю, И спи́т, и востае́т но́щию и дни́ю, и се́мя прозяба́ет и расте́т, я́коже не ве́сть о́н. В себе́ бо земля́ плоди́т пре́жде траву́, пото́м кла́с, та́же исполня́ет пшени́цу в кла́се. Егда́ же созре́ет пло́д, а́бие по́слет се́рп, я́ко наста́ жа́тва. И глаго́лаше: чесому́ уподо́бим Ца́рствие Бо́жие? Или́ ко́ей при́тчи приложи́м е́? Я́ко зе́рно гору́шично, е́же егда́ все́яно бу́дет в земли́, мне́е все́х се́мен е́сть земны́х. И егда́ все́яно бу́дет, возрасте́т, и бу́дет бо́ле все́х зе́лий, и сотвори́т ве́тви ве́лия, я́ко мощи́ под се́нию его́ пти́цам небе́сным вита́ти.
Го́споду помо́лимся.
Умно́жи, мо́лим Ти́ ся́, Влады́ко, на ны́ милосе́рдие Твое́, да на си́и се́мена сни́дет вожделе́ннаго благослове́ния изоби́лие, от е́же на́м испо́лненным требований, И́мя Свято́е сла́вы Твоея́ всегда́ велича́ти. Я́ко Ты́ еси́ Бо́г на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Благослови́, Го́споди, зе́млю сию́, да да́ст пло́д бла́г во вре́мя свое́, ни кийже ду́х волне́ний вреди́ти ю́ возмо́жет, над не́юже призвано е́сть И́мя Твое́ Свято́е, ами́нь.
Посе́м гряду́т да́лее, пою́ще кано́н моле́бный. Иере́й же гряду́ще кропи́т по́ля водо́ю свяще́нною. Та́же на тре́тией статии́, к за́паду ста́вше, глаго́лет Псало́м 146.
Хвали́те Го́спода, я́ко бла́г псало́м. Бо́гови на́шему да услади́тся хвале́ние. Зи́ждай Иерусали́ма Госпо́дь, разсе́яния Изра́илева собере́т. Исцеля́яй сокруше́нныя се́рдцем и обязу́яй сокруше́ния и́х. Исчита́яй мно́жество зве́зд и все́м и́м имена́ нарица́яй. Ве́лий Госпо́дь на́ш, и ве́лия кре́пость Его́, и ра́зума Его́ не́сть числа́, Прие́мляй кро́ткия Госпо́дь, смиря́яй же гре́шники до земли́. Начни́те Го́сподеви во испове́дании, по́йте Бо́гови на́шему в гу́слех. Одева́ющему не́бо о́блаки, уготовля́ющему земли́ до́ждь, прозяба́ющему на гора́х траву́ и зла́к на слу́жбу челове́ком, даю́щему ското́м пи́щу и́х, и птенце́м вра́новым призыва́ющым Его́. Не в си́ле ко́нстей восхо́щет, ниже́ в лы́стех му́жеских благоволи́т. Благоволи́т Госпо́дь в боя́щихся Его́ и во упова́ющих на ми́лость Его́ (Пс.146:1–11).
Сла́ва, и ны́не:
Го́споду помо́лимся.
Влады́ко, Иису́се Христе́, Сы́не Бо́га Жива́го, низпосли́ Свята́го А́нгела Твоего́ с небе́с, да сохрани́т житвы, се́мена и плоды́ на́ша, от дожде́й волненных, от мо́лний, от врежде́ния пти́ц, от съядения мышей, от червий угрызе́ния, и от все́х напа́стей диа́вольских: да сохрани́т хранилом Свои́м движе́ния на́ша, и бу́дет стена́ о́гненна о́крест ни́х. Благослове́нием Свои́м а́нгельским да благослови́т и умно́жит се́мена на́ша, да благослови́м И́мя Твое́ Свято́е, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Ева́нгелие от Луки́, зача́ло 34.
Во вре́мя о́но, разумева́ющу же наро́ду мно́гу, и от все́х градо́в гряду́щим к Нему́, рече́ при́тчу: Изы́де се́яй се́яти се́мене своего́, и егда́ се́яше, о́во паде́ при пути́, и попра́но бы́сть, и пти́цы небе́сныя позоба́ша е́. А друго́е паде́ на ка́мени, и прозя́б у́сше, зане́ не име́яше вла́ги. И друго́е паде́ посреде́ те́рния, и возрасте́ те́рние, и подави́ е́. Друго́е же паде́ на земли́ бла́зе, и прозя́б сотвори́ пло́д стори́цею. Сия́ глаго́ля, возгласи́: име́яй у́ши слы́шати, да слы́шит.
Го́споду помо́лимся.
Всемогу́щий, Преве́чный Бо́же, от ничего́же ми́р сотворе́нный ви́сящ содержа́й, и в житие́ ро́да челове́ческаго по́ля де́лати повелева́яй: усе́рдно прибега́ем к милосе́рдию Твоему́, да е́же на си́х полех и виноградех здра́ваго се́мени всеянно или́ насажде́нно е́сть, воззре́нием благоутро́бия Твоего́ благослови́ши, и возду́ха ме́рность пода́си, и искорени́вше волчков и те́рния нечистоту́, се́мена плодови́та пока́жеши, по ме́ре же часа́ соверше́нне дорасти да́си, да мы́ раби́ Твои́ дара́ми Твои́ми созрелыми насыще́ни, Тебе́ досто́йныя сла́вы возсыла́ти возмо́жем, всегда́, ны́не и при́сно, и во ве́ки веко́в, ами́нь.
Да благослови́т вы́ се́мена, Бо́г Оте́ц, да благослови́т вы́ Бо́г Сы́н, да благослови́т вы́ Бо́г Ду́х Святы́й, растите, и мно́житеся, и исполня́йте жи́тницы и хра́мы на́ша, в че́сть Всемогу́щаго Бо́га, и все́х Святы́х. Ами́нь
Посе́м гряду́т да́лее, пою́ще кано́н моле́бный. Иере́й же гряды́й кропи́т по́ля водо́ю свяще́нною. Та́же на четве́ртой статии́, к се́веру ста́в, глаго́лет Псало́м 147.
Похвали́, Иерусали́ме, Го́спода, хвали́ Бо́га Твоего́, Сио́не, я́ко укрепи́ вереи́ вра́т Твои́х, благослови́ сы́ны твоя́ в тебе́. Полага́яй преде́лы Твоя́ ми́р, и ту́ка пшени́чна насыща́яй тя́. Посыла́яй сло́во Свое́ земли́, до ско́рости тече́т сло́во Его́, даю́щаго сне́г Сво́й, я́ко во́лну, мглу́, я́ко пе́пел, посыпа́ющаго, мета́ющаго го́лоть Сво́й, я́ко хле́бы. Проти́ву лица́ мра́за Его́ кто́ постои́т? По́слет Сло́во Свое́, и иста́ет я́, дхне́т Ду́х Его́, и потеку́т во́ды. Возвеща́яй сло́во Свое́ Иа́кову, оправда́ния и судьбы́ Своя́ Изра́илеви. Не сотвори́ та́ко вся́кому язы́ку, и судьбы́ Своя́ не яви́ и́м.
Сла́ва, и ны́не:
Го́споду помо́лимся.
Тво́рче все́х Бо́же, и́же Моисе́ю рабу́ Твоему́ реки́й: глаго́ли сыно́м Изра́илевым: егда́ вни́дете в зе́млю, ю́же А́з да́м ва́м, и пожнете жа́тву ея́, и принесе́те но́вии снопы́ жа́твы ва́шея ко жрецу́, и о́н принесе́т сноп пред Го́сподем прия́тен ва́м: про́сим неизме́римую бла́гость Твою́, да сия́ се́мена, зе́лия, злаки благослови́ти, сохрани́ти и к дорастлости привести́ изво́лиши: да пе́рвенства и́х Тебе́, Твои́м же иере́ем, и ни́щим да́ти, пи́щу же, на́м и ското́м на́шим потре́бную, от си́х име́ти возмо́жем Тобо́ю, пита́телем на́шим: Ему́же подоба́ет вся́кая сла́ва, че́сть и поклоне́ние, со Отце́м Безнача́льным, и с Пресвяты́м, Благи́м и Животворя́щим Ду́хом, ны́не и при́сно, и во ве́ки веко́в, ами́нь.
Ева́нгелие от Иоа́нна (зача́ло 12)
Во вре́мя о́но, рече́ Госпо́дь ко ученико́м Свои́м: не вы́ ли глаго́лете, я́ко еще́ четы́ри ме́сяцы су́ть, и жа́тва прии́дет? Се́, глаго́лю ва́м: возведи́те о́чи ва́ши и ви́дите ни́вы, я́ко пла́вы су́ть к жа́тве уже́. И жня́й мзду́ прие́млет и собира́ет пло́д в живо́т ве́чный, да и се́яй вку́пе ра́дуется и жня́й. О се́м бо сло́во е́сть и́стинное, я́ко и́н е́сть се́яй, и и́н е́сть жня́й. А́з посла́х вы́ жа́ти, иде́же вы́ не труди́стеся, ини́и труди́шася, и вы́ в тру́д и́х внидо́сте.
Го́споду помо́лимся.
Влады́ко Святы́й О́тче, и́бо созда́вый и зе́млю, и непреста́нно и́ма владеяй, и Свои́м прозре́нием сохраня́яй: смире́нно Тя́ про́сим, и мо́лим Ти́ ся́, да Твое́ю несравне́нною бла́гостию, сия́ по́ля, дре́ва, се́мена и пустыны благослови́ти и и́м плодоноше́ние пода́ти изво́лиши, от е́же на́м, рабо́м и рабы́ням Твои́м, к живопита́нию, и утеше́нию теле́с, и духо́вной пи́ще душ, отто́ле жи́тельствовати и ве́рно служи́ти Тебе́, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
Та́же возвраща́ются к це́ркви, про́чее моле́бна пою́ще. Вше́дше же в це́рковь, чте́тся ектения́ вели́кая, по ектении́ же отпу́ст обы́чный.
Глава́ 35. После́дование над пе́щию
Твори́т свяще́нник освяще́ние воды́ ма́лое.
По освяще́нии же глаго́лет моли́твы:
Го́споду помо́лимся.
Бо́же ве́чный, И́же се́дмь седмери́цею разжже́нную пе́щь, и пла́мень и́же в Вавило́не на ро́су преложи́л еси́, и вве́рженныя в ню́ от царя́ Навуходоно́сора, святы́я три́ о́троки, Ана́нию, Аза́рию и Мисаи́ла, це́лы сохрани́вый, Са́м благослови́ и пе́щь сию́ вели́кия ра́ди Твоея́ ми́лости, и благослови́ в не́й дела́ ру́к рабо́в Твои́х, и благопоспеши́ я́ благодея́нием Твои́м, и испра́ви я́ по мно́жеству щедро́т Твои́х, моли́твами Пречи́стыя Влады́чицы на́шея Богоро́дицы, и Присноде́вы Мари́и, си́лою Честна́го и Животворя́щаго Креста́, предста́тельством превели́ких чинонача́льник Михаи́ла и Гаврии́ла, и все́х небе́сных си́л безпло́тных, честна́го сла́внаго Проро́ка, Предте́чи и Крести́теля Иоа́нна, святы́х сла́вных и всехва́льных апо́стол, свята́го священному́ченика Киприа́на, и́же во святы́х отца́ на́шего Никола́а, архиепи́скопа Мирлики́йскаго чудотво́рца, и все́х святы́х.
Я́ко Ты́ еси́ благословля́яй, и освяща́яй вся́ческая Бо́же на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не, и при́сно, и во ве́ки веко́в, ами́нь.
Моли́тва ина́я:
Влады́ко Го́споди Бо́же на́ш, И́же в высо́ких живы́й, и на смире́нныя призира́яй, благослови́вый до́м Лава́нов вхо́дом Иа́ковлим, и до́м Пентефри́ин вхо́дом Ио́сифовым, благослови́вый до́м Ави́дов вхо́дом ковче́га, И́же вочелове́чением Христа́ Твоего́, спасе́ние бы́в до́му Закхе́ову, Са́м благослови́ пе́щь сию́ и де́йствующыя ю́, Твои́м стра́хом соблюди́, и невреди́мы и́х от сопротиволежа́щих сохрани́, и Твое́ благослове́ние с высоты́ жили́ща Твоего́ низпосли́ и́м, и благослови́, и умно́жи дела́ ру́к и́х, да всегда́ благода́рно сла́вим Всесвято́е и́мя Твое́, Отца́, и Сы́на и Свята́го Ду́ха, ны́не и при́сно, и во ве́ки веко́в, ами́нь.
Та́же глаго́лет проше́ние:
Поми́луй на́с Бо́же, по вели́цей ми́лости Твое́й, мо́лим Ти́ ся́, услы́ши и поми́луй.
Го́споди поми́луй, три́жды.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии грехо́в рабо́в Твои́х и́мярек, и о е́же благослови́тися и умно́житися дело́м ру́к тружда́ющихся о пе́щи се́й, мо́лим Ти́ ся́ Го́споди, услы́ши и поми́луй.
Го́споди поми́луй, три́жды.
Услы́ши ны́ Бо́же Спаси́телю на́ш, упова́ние все́х конце́в земли́, и су́щих в мо́ри дале́че, и ми́лостив, ми́лостив бу́ди Влады́ко о гресе́х на́ших, и поми́луй ны́, ми́лостив бо и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
И окропля́ет пе́щь и су́щыя та́мо. Та́же твори́т отпу́ст.
Глава́ 36. Чи́н быва́емый на ни́вах, или́ виногра́де, или́ вертогра́де, а́ще случи́тся вреди́тися от гадо́в, или́ ины́х ви́дов
Подоба́ет бы́ти литурги́и, и вжига́ти канди́ло свята́го Три́фона, или́ свята́го Евста́фиа, или́ свята́го Иулиа́на Ливи́йскаго, или́ обои́х. По Боже́ственней литурги́и взя́ти еле́й от канди́л, и во́ду святы́х Богоявле́ний, и кропля́яй крестови́дно свяще́нник на ни́ву, или́ виногра́д, или́ вертогра́д, глаго́лет моли́твы сия́.
Го́споду помо́лимся.
Го́споди Бо́же на́ш, в нача́ле созда́ния Твоего́ сотвори́вый не́бо и зе́млю, и не́бо у́бо украси́вый вели́кими свети́лы, е́же просвеща́ти на земли́, и чуди́тися те́ми Тебе́ Еди́ному Соде́телю и Влады́це тва́ри, зе́млю же украси́вый зла́ком и траво́ю, и разли́чием се́мен се́емых по ро́ду, и всю́ цве́ты вообрази́в в благоукраше́ние, благослови́л еси́ ю́, Са́м и ны́не Влады́ко, при́зри от свята́го жили́ща Твоего́ на стяжа́ние сие́, и благослови́ е́. Сохрани́ е́ неврежде́нно от вся́каго чарова́ния и обая́ния, и вся́каго зла́, опла́знства же лука́ваго, и кова́рства лука́вых челове́к, и да́ждь ему́ приноси́ти плоды́ во вре́мя, испо́лнены благослове́ния Твоего́, и вся́каго зве́рия и га́да, че́рвь же и му́хи, и ржу́, зно́й и ва́р, и безго́дныя ве́тры, вре́д нанося́щыя, отжени́ от него́.
Я́ко освяти́ся и просла́вися Пречестно́е и Великоле́пое и́мя Твое́, Отца́ и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Заклина́ние свята́го му́ченика Три́фона.
Ве́ждь же, о иере́ю, я́ко не вся́ живо́тная зде́ именова́нная прочести́ досто́ит, но то́чию тогда́ врежда́ющыя.
Заклина́ю ва́с многови́днии зве́рие, че́рвие, гу́сеницы, хрущи́ и пру́зи, мы́ши, щу́ры и кри́тицы, и разли́чныя ро́ды му́х, и му́шиц, и мо́лий, и мра́вий, о́вадов же и о́с, и многоно́жиц, и многообра́зныя ро́ды по́лзающих по земли́ живо́тных, и лета́ющих пти́ц, вре́д и тщету́ ни́вам, виногра́дом, садо́м же и вертогра́дом нанося́щыя, Бо́гом Отце́м Безнача́льным, и Сы́ном Его́ Собезнача́льным и Единосу́щным, и Ду́хом Его́ Пресвяты́м, Отцу́ и Сы́ну Единосу́щным, и Животворя́щим. Заклина́ю ва́с вочелове́чением Единоро́днаго Сы́на Бо́жия, Го́спода на́шего Иису́са Христа́, и пожи́тием Его́ на земли́ с челове́ки, стра́стию же Его́ спаси́тельною, и животворя́щею Его́ сме́ртию, и тридне́вным Его́ воскресе́нием, и на небеса́ вознесе́нием, и все́м Его́ Боже́ственным спаси́тельным смотре́нием. Заклина́ю ва́с и святы́ми многоочи́тыми Херуви́мы, шестокрила́тыми Серафи́мы лета́ющими о́крест Престо́ла, и зову́щими: Свя́т, Свя́т, Свя́т, Госпо́дь Савао́ф. Заклина́ю ва́с святы́ми а́нгелы, и все́ю си́лою, и ты́сящами ты́сящ, и тьма́ми те́м, стра́хом мно́гим стоя́щими пред сла́вою Госпо́днею, да не оби́дите виногра́д, ниже́ ни́ву, ниже́ вертогра́д, древе́с же и зе́лий раба́ Бо́жия и́мярек, но отиди́те на ди́вия го́ры, на непло́дная древеса́, на ни́хже дарова́л е́сть Бо́г ва́м повседне́вную пи́щу. Заклина́ю ва́с и честны́м Те́лом и Кро́вию Го́спода на́шего Иису́са Христа́, и́стиннаго Бо́га и Спа́са на́шего, И́мже и спасе́ние даде́ся на́м и избавле́ние, за Его́же и́мя и́мамы умре́ти, да не оби́дите ниже́ ни́ву, ниже́ виногра́д, ниже́ вертогра́д, ниже́ вся́кое дре́во плодови́тое, и безпло́дное, и ниже́ ли́ст зе́лий да не оби́дите от окруже́ния преде́ла, и ме́ста раба́ Бо́жия и́мярек. А́ще же преслуша́ете мене́, и преступите́ кля́тву, е́юже заклина́х ва́с, не и́мате ко мне́ смире́нному и мале́йшему Три́фону, но к Бо́гу Авраа́ма, и Исаа́ка, и Иа́кова, гряду́щему суди́ти живы́м и ме́ртвым, те́мже я́коже предре́х ва́м, иди́те на ди́вия го́ры, на безпло́дная древа́. А́ще же не послу́шаете мене́, моли́ти и́мам человеколю́бца Бо́га, е́же посла́ти а́нгела Своего́, и́же над зверьми́, и желе́зом и свинцо́м свя́жет ва́с, и убие́т, зане́ кля́тв и моли́тв мене́ смире́ннаго отверго́стеся Три́фона, но и пти́цы посыла́емыя мое́ю моли́твою да снедя́т ва́с. Еще́ заклина́ю ва́с вели́ким и́менем, на ка́мени напи́санным, и не носи́вшем, но разсе́дшемся я́ко во́ск от лица́ огня́: изыди́те от ме́ст на́ших на места́, я́же предре́х ва́м, непроходи́мая и безво́дная, и непло́дная, изыди́те от ме́ста и о́крест преде́л рабо́в Бо́жиих, и мене́ призыва́ющих в по́мощь свою́, и заступле́ние и спасе́ние, да и в си́х сла́вится Пресвято́е и́мя Отца́, и Сы́на, и Свята́го Ду́ха, и моли́твы и проше́ния смире́ннаго Три́фона да испо́лнятся, я́ко Бо́гу подоба́ет сла́ва и держа́ва во ве́ки веко́в, ами́нь.
Свяще́нник: Ми́р все́м.
Ли́к: И ду́хови твоему́.
Свяще́нник: Главы́ ва́шя Го́сподеви приклони́те.
Ли́к: Тебе́ Го́споди.
Свяще́нник же чте́т моли́тву сию́ велегла́сно:
Влады́ко Го́споди Бо́же на́ш, плотски́м Твои́м смотре́нием благослови́вый Вифлее́м, и Гефсима́нию, и иногда́ до́м Иа́ковль, И́же и благослове́н бы́в Изра́иль преименова́ся, И́же и до́м Аведа́риин и Дави́дов благослови́вый, Са́м благослови́ и стяжа́ние сие́, и сотвори́ е́ о благослове́нии плодоноси́ти, моли́твами Пречи́стыя Влады́чицы на́шея Богоро́дицы, и Присноде́вы Мари́и, си́лою Честна́го и Животворя́щаго Креста́, честна́го, сла́внаго Проро́ка, Предте́чи и Крести́теля Иоа́нна, святы́х сла́вных и всехва́льных апо́стол, святы́х добропобе́дных му́ченик, святы́х сла́вных великому́ченик, Три́фона, Евста́фиа и Иулиа́на, и свята́го и́мярек, его́же дне́сь па́мять соверша́ем, и все́х Твои́х святы́х.
Я́ко Ты́ еси́ благословля́яй и освяща́яй вся́ческая, и Тебе́ сла́ву возсыла́ем, со Безнача́льным Твои́м Отце́м и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.
Глава́ 37. Чи́н быва́емый при основа́нии це́ркве и водруже́нии Креста́
Ве́стно бу́ди, я́ко це́рковь никто́же мо́жет основа́ти, ниже́ ка́менную, ниже́ древя́ную, кроме́ сама́го епи́скопа, или́ осо́бнаго его́ на сие́ благослове́ния чрез протоиере́я, или́ еди́наго от иере́й, его́же о́н изво́лит посла́ти. А́ще же кто́ де́рзнет без благослове́ния епи́скопа нача́ти це́рковь зда́ти, изверже́нию подлежа́ти бу́дет, я́ко презри́тель епи́скопской вла́сти.
Сие́ же основа́ние быва́ет си́це: а́ще ка́менная созида́тися и́мать це́рковь, выко́пывлются рвы́ на то́м ме́сте, иде́же основа́ние и́мать бы́ти, уготовля́ются же ка́мни и ме́л, и на еди́ном четвероуго́льном ка́мне изъобража́ется или́ изсека́ется кре́ст, под кресто́м же [а́ще епи́скоп, или́ его́ наме́стник изво́лит] изготовля́ется ме́сто для вложе́ния святы́х моще́й, и полага́ется надписа́ние сицево́е:
Во и́мя Отца́ и Сы́на и Свята́го Ду́ха, основа́ся сия́ це́рковь в че́сть и па́мять (имену́ется и́мя пра́здника или́ свята́го храмова́го (и́мя его́) при святи́тельстве же преосвяще́ннейшаго (и́мя епи́скопа и гра́да его́) и положены́ су́ть мо́щи свята́го (и́мя его́): в ле́то от сотворе́ния ми́ра (тако́е-то́), от рождества́ же по пло́ти Бо́га сло́ва (число́ го́да, ме́сяц и де́нь).
Ве́стно же бу́ди, я́ко и кроме́ моще́й свята́го и надписа́ния сицева́го положи́тися основа́ние хра́ма мо́жет, но кроме́ предрече́ннаго четвероуго́льнаго ка́мене не быва́ет. К сему́ же предъугото́влен быва́ет кре́ст древя́ный вели́кий, и ме́сто, иде́же престо́л и́мать бы́ти, ро́в, во е́же бы водрузи́ти в не́м о́ный кре́ст.
А́ще же древя́ная и́мать бы́ти це́рковь, рво́в не быва́ет, то́чию еди́н под стено́ю олта́рною к восто́ку для положе́ния четвероуго́льнаго ка́мене, и други́й для постановле́ния креста́, на ме́сте иму́щаго бы́ти престо́ла. Приуготовля́ются же и бре́вна, или́ древа́, на ни́хже це́рковь стоя́ти и́мать. Си́м же си́це предъугото́вленным бы́вшым, святи́тель или́ наме́стник его́, в це́ркви ближа́йшей от ме́ста о́наго, иде́же основа́ние бы́ти и́мать, оде́явся во вся́ святи́тельская (а́ще же свяще́нник, в свяще́нническая) одея́ния, исхо́дит со все́м кли́ром, предъиду́щым ему́ диа́коном с кади́льницами, иере́ем же со кресты́, два́ два́, кли́рицы же пою́т стихи́ры лити́йны хра́му бу́дущей це́ркви.
Прише́дше же на ме́сто, полага́ют на предъугото́вленном та́мо столе́ свято́е Ева́нгелие и Кре́ст, и взе́м настоя́тель кади́льницу, и покади́в е́ю сто́л крестообра́зно три́жды, возгласи́вшу диа́кону:
Благослови́ Влады́ко, начина́ет обы́чно:
Благослове́н Бо́г на́ш ны́не и при́стно и во ве́ки веко́в. Ами́нь.
Ли́к пое́т: Царю́ Небе́сный: и доне́леже око́нчится пе́ние, стои́т нача́льствуяй пред святы́м Ева́нгелием, кадя́ сие́. Пото́м кади́т вся́ рвы́, иде́же основа́ние бы́ти и́мать, наче́н от пе́рвыя стены́ олтаре́вы и иды́й проти́во со́лнцу о́крест, до́ндеже прии́дет отню́дуже нача́. И посе́м кади́т кли́р и лю́ди, и па́ки свято́е Ева́нгелие.
Чте́ц же чте́т Сла́ва Тебе́, Бо́же на́ш, сла́ва Тебе́.
Царю́ Небе́сный. Трисвято́е. О́тче на́ш:
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди, поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 142:
Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя́ в пра́вде Твое́й и не вни́ди в су́д с рабо́м Твои́м, я́ко не оправди́тся пред Тобо́ю вся́к живы́й. Я́ко погна́ вра́г ду́шу мою́, смири́л е́сть в зе́млю живо́т мо́й, посади́л мя́ е́сть в те́мных, я́ко ме́ртвыя ве́ка. И уны́ во мне́ ду́х мо́й, во мне́ смяте́ся се́рдце мое́. Помяну́х дни́ дре́вния, поучи́хся во все́х де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя́, Го́споди, исчезе́ ду́х мо́й, не отврати́ лица́ Твоего́ от Мене́, и уподо́блюся низходя́щым в ро́в. Слы́шану сотвори́ мне́ зау́тра ми́лость Твою́, я́ко на Тя́ упова́х. Скажи́ мне́, Го́споди, пу́ть во́ньже пойду́, я́ко к Тебе́ взя́х ду́шу мою́. Изми́ мя́ от вра́г мои́х, Го́споди, к Тебе́ прибего́х. Научи́ мя́ твори́ти во́лю Твою́, я́ко Ты́ еси́ Бо́г мо́й. Ду́х Тво́й благи́й наста́вит мя́ на зе́млю пра́ву. И́мене Твоего́ ра́ди, Го́споди, живи́ши мя́, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся́ стужа́ющыя души́ мое́й, я́ко а́з ра́б Тво́й е́смь.
Сла́ва, и ны́не: Аллилу́иа, три́жды.
Диа́кон же ектению́ сию́:
Ми́ром Го́споду помо́лимся.
Ли́к: Го́споди, поми́луй.
О свы́шнем ми́ре, и спасе́нии ду́ш на́ших, Го́споду помо́лимся.
Ли́к: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й, и соедине́нии все́х, Го́споду помо́лимся.
Ли́к: Го́споди, поми́луй.
О святе́м хра́ме се́м, и с ве́рою, благогове́нием, и стра́хом Бо́жиим входя́щих во́нь, Го́споду помо́лимся.
Ли́к: Го́споди, поми́луй.
О гра́де се́м, (а́ще в монастыре́: о святе́й оби́тели се́й,) вся́ком гра́де, стране́, и ве́рою живу́щих в ни́х, Го́споду помо́лимся.
Ли́к: Го́споди, поми́луй.
О благорастворе́нии возду́хов, о изъоби́лии плодо́в земны́х, и вре́менех ми́рных, Го́споду помо́лимся.
Ли́к: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных, и о спасе́нии и́х, Го́споду помо́лимся.
Ли́к: Го́споди, поми́луй.
О е́же призре́ти ми́лостивно на ме́сто сие́ к созда́нию на не́м це́ркве, в сла́ву Пресвята́го И́мене Его́ избра́нное, и благослове́нием Свои́м небе́сным благослови́ти е́, Го́споду помо́лимся.
Ли́к: Го́споди, поми́луй.
О е́же благослови́ти до́брое сие́ наме́рение, и де́ло рабо́в свои́х (или́: раба́ своего́ и́мярек: и помина́ет кти́торов хра́ма), Го́споду помо́лимся.
Ли́к: Го́споди, поми́луй.
О е́же благослови́ти нача́ток основа́ния зда́ния сего́, и благополу́чно в сла́ву и́мене Своего́ нача́лу его́ положи́тися и спе́шно в соверше́ние кроме́ вся́каго препя́тия произвести́ся, си́лою, де́йством и благода́тию Пресвята́го Ду́ха, Го́споду помо́лимся.
Ли́к: Го́споди, поми́луй.
О е́же тружда́ющымся де́лателем благопоспе́шество во все́м пода́ти, и дела́ ру́к и́х испра́вити, и в соверше́ние си́лою, де́йством и благода́тию Пресвята́го Ду́ха спе́шно произвести́, Го́споду помо́лимся.
Ли́к: Го́споди, поми́луй.
О е́же благо́му сему́ тща́нию рабо́в свои́х (или́ раба́ своего́) и́мярек, благопоспе́шество со вся́ким дово́льством, си́лою, де́йством и благода́тию Пресвята́го Ду́ха пода́ти, Го́споду помо́лимся.
Ли́к: Го́споди, поми́луй.
О е́же приста́вити де́лу сему́, и де́лателем его́ а́нгела своего́ храни́теля, е́же неви́димо отрази́ти вся́ сопроти́вныя наве́ты ви́димых и неви́димых враго́в, и во все́м благопоспе́шество, к сооруже́нию же му́дрость, и к соверше́нию си́лу, си́лою, де́йством и благода́тию Пресвята́го Ду́ха пода́ти, Го́споду помо́лимся.
Ли́к: Го́споди, поми́луй.
О е́же изба́витися на́м от вся́кия ско́рби, гне́ва и ну́жды, Го́споду помо́лимся.
Ли́к: Го́споди, поми́луй.
Заступи́, спаси́, поми́луй и сохрани́ на́с Бо́же Твое́ю благода́тию.
Ли́к: Го́споди, поми́луй.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу, и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и ве́сь живо́т на́ш Христу́ Бо́гу предади́м.
Ли́к: Тебе́ Го́споди.
Настоя́тель же возглаша́ет:
Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
По возгла́се же пою́т:
Бо́г Госпо́дь, и яви́ся на́м, благослове́н Гряды́й во И́мя Госпо́дне.
Сти́х 1: Испове́дайтеся Го́сподеви, я́ко бла́г, я́ко в ве́к ми́лость Его́.
Сти́х 2: Обыше́дше обыдо́ша мя́, и и́менем Госпо́дним противля́хся и́м.
Сти́х 3: Не умру́, но жи́в бу́ду, и пове́м дела́ Госпо́дня.
Сти́х 4: Ка́мень, его́же небрего́ша зи́ждущии, се́й бы́сть во главу́ у́гла: от Го́спода бы́сть се́й, и е́сть ди́вен во очесе́х на́ших.
А́ще хра́м Госпо́дский бы́ти и́мать, на гла́с тропаря́ пра́здничнаго, по пра́здничном же, на Сла́ве пое́м основа́нию, И ны́не, пра́зднику.
А́ще же не Госпо́дский, то́ тропа́рь се́й основа́нию, гла́с 2-й:
Тво́рче и Созда́телю вся́ческих Бо́же, де́ло ру́к на́ших, к сла́ве Твое́й начина́емое, Твои́м благослове́нием спе́шно испра́ви, и си́лою Твое́ю в соверше́ние ско́ро произведи́, я́ко еди́н Всеси́лен и Человеколю́бец.
А́ще же Богоро́дичен и́мать бы́ти хра́м, пое́тся два́жды тропа́рь основа́нию, повторя́юще на Сла́ве то́йже хра́му. А́ще же ина́го ко́его от святы́х, пе́рвее пое́м тропа́рь основа́нию, на Сла́ве же свято́му: И ны́не, Богоро́дичен по гла́су тропаря́ свята́го.
По тропаре́х же а́бие чте́тся псало́м 50:
Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя́; я́ко беззако́ние мое́ а́з зна́ю, и гре́х мо́й предо мно́ю е́сть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти́. Се́ бо, в беззако́ниих зача́т е́смь, и во гресе́х роди́ мя́ ма́ти моя́. Се́ бо, и́стину возлюби́л еси́; безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся; омы́еши мя́, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от гре́х мои́х и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми́ ра́дость спасе́ния Твоего́ и Ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́; возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо: всесожже́ния не благоволи́ши. Же́ртва Бо́гу ду́х сокруше́н; се́рдце сокруше́нно и смире́нно Бо́г не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Тво́й тельцы́.
Прино́сятся же и поставля́ются на столе́ два́ сосу́да, еди́н с водо́ю чи́стою, други́й с еле́ем.
По сконча́нии псалма́, пою́т три́жды тропа́рь се́й, гла́с 6-й:
С небесе́ посли́ благода́ть, Жизнода́вче, и во́ду сию́ освяти́, и все́м скве́рнам яви́ ю́ бы́ти очище́ние.
Ре́кшу же диа́кону: Го́споду помо́лимся.
И ли́ку: Го́споди поми́луй.
Настоя́тель чте́т над водо́ю моли́тву сию́:
Бо́же Великоимени́тый, О́тче Го́спода на́шего Иису́са Христа́, творя́й чудеса́ Еди́н, и́мже не́сть числа́, Его́же гла́с на вода́х мно́гих, Его́же ви́девше во́ды убоя́шася, и смято́шася бе́здны и мно́жество шу́ма во́д, Его́же путие́ в мо́ри, и стези́ в вода́х мно́гих, и стопы́ Твоя́ не позна́ются, И́же креще́нием Единоро́днаго Сы́на Твоего́ воплоще́ннаго, и сни́тием на́нь Пресвята́го Ду́ха в виде́нии го́лубя, и Твои́м Оте́ческим гла́сом Иорда́нския струи́ освяти́л еси́, Тебе́ ны́не смире́нно недосто́йнии раби́ Твои́ мо́лим и ми́ли ся́ де́ем, посли́ благода́ть Пресвята́го Ду́ха на во́ду сию́, и небе́сным Твои́м благослове́нием благослови́, очи́сти и освяти́ ю́, и да́руй е́й благода́ть и благослове́ние Иорда́ново, и си́лу вся́ скве́рны очища́ющую, и вся́к неду́г исцеля́ющую, и бесо́в и все́х наве́тов и ко́зней и́х прогони́тельную. И яви́ ю́ си́лою, де́йством и благода́тию Пресвята́го Ду́ха, бы́ти все́м от нея́ с ве́рою пию́щым, прие́млющым же и кропя́щымся рабо́м Твои́м, грехо́в оставле́ние, измене́ние страсте́м, прогна́ние вся́каго зла́, умноже́ние доброде́телей, боле́знем исцеле́ние, домово́м же и вся́кому ме́сту освяще́ние и благослове́ние, губи́тельных и вся́ких злотво́рных возду́хов отгна́ние, и благода́ти Твоея́ присвое́ние. Я́ко Ты́ еси́ благословля́яй и освяща́яй вся́ческая, Бо́же на́ш, и Тебе́ сла́ву возсыла́ем со Единоро́дным Твои́м Сы́ном, и с Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
Иере́й же чте́т та́йно моли́тву сию́:
Приклони́ Го́споди у́хо Твое́ и услы́ши мя́, во́ды Иорда́нския явле́нием Христа́ Твоего́ освяти́вый, и благослови́ все́х на́с, преклоне́нием своея́ вы́и зна́менающих Тебе́ повинове́ние, и сподо́би на́с испо́лнитися Твоего́ освяще́ния воды́ сея́ прия́тием, и да бу́дет на́м в здра́вие душа́м же и те́лом.
И возглаша́ет:
Ты́ бо еси́ освяще́ние на́ше, и Тебе́ сла́ву возсыла́ем, со Единоро́дным Твои́м Сы́ном, и с Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Настоя́тель же взе́м кре́ст, погружа́ет его́ в воде́ крестообра́зно, поя́ тропа́рь, гла́с 1-й:
Спаси́ Го́споди лю́ди Твоя́, и благослови́ достоя́ние Твое́, побе́ды правосла́вным христианном на сопроти́вныя да́руя, и Твое́ сохраня́я Кресто́м Твои́м жи́тельство. (Три́жды.)
Посе́м благословля́ет еле́й десни́цею три́жды, глаго́ля:
Во и́мя Отца́, и Сы́на, и Свята́го Ду́ха, ами́нь.
Ре́кшу же диа́кону: Го́споду помо́лимся.
И кли́ру: Го́споди поми́луй.
Чте́т моли́тву сию́:
Го́споди Бо́же оте́ц на́ших, Ему́же излия́ние еле́а, е́же излия́ Иа́ков на ка́мень, Его́же поста́ви в сто́лп, и до́м Бо́жий нарече́, благоуго́дно и прия́тно бы́сть, при́зри, мо́лим Ти́ ся́, и ны́не ми́лостивно на еле́й се́й, и небе́сным Твои́м благослове́нием благослови́ и освяти́ его́, и да́ждь ему́ си́лу благода́тию Пресвята́го Твоего́ Ду́ха, во е́же бы все́ те́м в сла́ву Твою́ помазу́емое освяще́нно и благослове́нно, и Тебе́ благоуго́дно и прия́тно бы́ло, щедро́тами Единоро́днаго Сы́на Твоего́, с Ни́мже благослове́н еси́, с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Настоя́тель же а́бие взе́м свяще́нную во́ду, кропи́т е́ю ме́сто, иде́же кре́ст водруже́н и́мать бы́ти, глаго́ля:
Благоволи́ Го́споди Иису́се Христе́ Бо́же на́ш, зна́мением стра́шным и си́лою Креста́ Твоего́ огради́тися ме́сту сему́, в сла́ву Тебе́ распя́таго Бо́га на́шего, и Твоего́ Безнача́льнаго Отца́, и Пресвята́го Твоего́ Ду́ха, и а́ггел всегуби́тельный, и вся́ сопроти́вныя си́лы да отсту́пят от него́. Я́ко Твоя́ е́сть держа́ва, и Твое́ е́сть Ца́рство, и си́ла вели́каго Бо́га и Спа́са на́шего Иису́са Христа́, ны́не и при́сно, и во ве́ки веко́в, ами́нь.
Свяще́нницы же взе́мше кре́ст, водружа́ют его́ в предъугото́вленное ме́сто, вку́пе с настоя́телем, пою́ще тропа́рь се́й, гла́с 2:
Кресту́ водрузи́вшуся на земли́ низпаде́ и отню́д потреби́ся шата́ние враго́в, пре́жде же отринове́нный челове́к в ра́й па́ки вхо́дит, но сла́ва Тебе́ еди́ному Бо́гу на́шему, си́це благоизво́лившему.
Посе́м пою́т конда́к основа́нию, гла́с 6:
Ско́рый в заступле́ние и кре́пкий в по́мощь, предста́ни благода́тию си́лы Твоея́ ны́не, и благослови́в укрепи́, и в соверше́ние благо́е дела́ рабо́в Твои́х произведи́, вся́ бо ели́ка хо́щеши, я́ко всеси́льный Бо́г, твори́ти мо́жеши.
Сла́ва, и ны́не: Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь на́с, ве́рно зову́щих Ти́: ускори́ на моли́тву, и потщи́ся на умоле́ние, предста́тельствующи при́сно, Богоро́дице, чту́щих Тя́.
Ре́кшу же диа́кону:
Го́споду помо́лимся,
настоя́тель чте́т моли́тву сию́ пред водруже́нным кресто́м, зря́ на восто́к:
Го́споди Бо́же Вседержи́телю прообрази́вый жезло́м Моисе́овым Честны́й и Животворя́щий Кре́ст возлю́бленнаго Сы́на Твоего́, Го́спода на́шего Иису́са Христа́, Са́м благослови́ и освяти́ ме́сто сие́, си́лою и де́йством Честна́го и Животворя́щаго дре́ва о́наго кре́стнаго, (е́же снабди́ окропле́нием честны́я Кро́ве Сы́на Твоего́,) в отгна́ние бесо́в и вся́каго сопротивле́ния, сохраня́я ме́сто сие́ и на не́м Тебе́ служа́щих от вся́каго зла́ невре́дны, моли́твами Пресла́вныя Влады́чицы на́шея Богоро́дицы и Присноде́вы Мари́и, (зде́ помина́ет и свята́го, его́же и́мать бы́ти хра́м).
Я́ко благослови́ся и просла́вися Ца́рство Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Ли́к: Ами́нь.
Посе́м и́дет настоя́тель к ро́ву, иде́же основа́ние положено́ и́мать бы́ти, четвероуго́льный же приугото́вленный ка́мень полага́ется пред ни́м на столе́, и пое́тся кли́ром псало́м 83:
Ко́ль возлю́бленна селе́ния твоя́ Го́споди си́л! Жела́ет и скончава́ется душа́ моя́ во дворы́ Госпо́дни: се́рдце мое́ и пло́ть моя́ возра́довастася о Бо́зе жи́ве. И́бо пти́ца обре́те себе́ хра́мину, и го́рлица гнездо́ себе́, иде́же положи́т птенцы́ своя́, олтари́ Твоя́ Го́споди си́л, Царю́ мо́й и Бо́же мо́й. Блаже́ни живу́щии в дому́ Твое́м, в ве́ки веко́в восхва́лят Тя́. Блаже́н му́ж, ему́же е́сть заступле́ние его́ у тебе́; восхожде́ния в се́рдце свое́м положи́, во юдо́ль плаче́вную, в ме́сто, е́же положи́, и́бо благослове́ние да́ст законополага́яй. По́йдут от си́лы в си́лу: яви́тся Бо́г бого́в в Сио́не. Го́споди Бо́же си́л, услы́ши моли́тву мою́, внуши́ Бо́же Иа́ковль. Защи́тниче на́ш, ви́ждь Бо́же, и при́зри на лице́ Христа́ Твоего́. Я́ко лу́чше де́нь еди́н во дво́рех Твои́х, па́че ты́сящ: изво́лих примета́тися в дому́ Бо́га моего́ па́че, не́же жи́ти ми́ в селе́ниих гре́шничих. Я́ко ми́лость и и́стину лю́бит Госпо́дь, Бо́г благода́ть и сла́ву да́ст, Госпо́дь не лиши́т благи́х, ходя́щих незло́бием. Го́споди Бо́же Си́л, блаже́н челове́к упова́яй на Тя́.
Сла́ва, и ны́не: Аллилу́иа, три́жды.
Диа́кону же ре́кшу: Го́споду помо́лимся.
И кли́ру: Го́споди поми́луй.
Чте́т настоя́тель над ка́менем моли́тву сию́:
Го́споди Иису́се Христе́, Сы́не Бо́га Жива́го, и́стинный Бо́же, сия́ние и о́бразе Безнача́льнаго Отца́, и Животе́ ве́чный, краеуго́льный сы́й ка́мень, от Пречи́стыя Деви́ческия Горы́ без ру́к му́жескаго се́мене отсе́ченныя, и непозы́блемое Своея́ це́ркве основа́ние, и́же излия́нием честны́я Твоея́ Кро́ве Свою́ це́рковь основа́л еси́, сме́ртию же воздви́гл, воскресе́нием соверши́л, вознесе́нием благослови́л, соше́ствием же Свята́го Твоего́ Ду́ха освяти́л и разшири́л ю́ еси́, Тебе́ ны́не смире́нно мо́лим, посли́ благода́ть Свята́го Твоего́ Ду́ха, и благослови́ положе́ние ка́мене сего́, и все́ основа́ние начина́ющагося зда́ния, в сла́ву Пресвята́го Твоего́ и́мене, (а́ще е́сть Госпо́дский пра́здник глаго́лет в че́сть же и па́мять свята́го Твоего́ (Рождества́ или́ ина́го, или́ Успе́ния Пречи́стыя Твоея́ Ма́тере, или́ ина́го Ея́ пра́здника, или́ свята́го, имену́я и́мя его́) и Ты́, И́же еси́ А́лфа и Оме́га, Нача́ло и Коне́ц, и́же искони́ вся́ческая созда́, бу́ди нача́ло, умноже́ние и соверше́ние де́лу сему́, кти́торов же и де́лателей благослови́, и де́лу ру́к и́х поспеши́, и вся́ потре́бная к сооруже́нию и соверше́нию хра́ма сего́ Твои́м Боже́ственным про́мыслом изъоби́льно умно́жи, я́ко да бу́дет хра́м соверше́н и по́лн Твоея́ сла́вы, и в не́м просла́вится Твое́ Пресвято́е и Вели́кое и́мя со Отце́м и Пресвяты́м Ду́хом, благослове́но су́щее всегда́ ны́не и при́сно, и во ве́ки веко́в.
Ли́к: Ами́нь.
Нача́льствуяй же, взе́м свяще́нную во́ду, кропи́т е́ю ка́мень, глаго́ля:
Благословля́ется ка́мень се́й окропле́нием свяще́нныя воды́ сея́ в непоколеби́мое основа́ние хра́ма, созида́емаго во и́мя Отца́, и Сы́на, и Свята́го Ду́ха, ами́нь.
А́бие же, а́ще хо́щет в ка́мень вложи́ти мо́щи святы́х, проче́т надписа́ние еди́н от иере́й, влага́ет мо́щи в предъугото́вленное в ка́мени о́ном ме́сто, глаго́ля:
Хвали́те Бо́га во святы́х Его́, хвали́те Его́ во утверже́нии си́лы Его́, я́ко восхва́лятся преподо́бнии во сла́ве, и возра́дуются на ло́жах свои́х.
И сия́ ре́к, покрыва́ет я́. А́ще у́бо не су́ть мо́щи, ничто́же от си́х твори́т, но взе́м ка́мень настоя́тель свои́ма рука́ма, полага́ет его́ на пригото́вленной и́звести в ро́ве, глаго́ля:
Осно́вывается це́рковь сия́ в сла́ву Вели́каго Бо́га и Спа́са на́шего Иису́са Христа́, в че́сть и па́мять (и́мя пра́здника его́ или́ Богоро́дична, или́ свята́го храмова́го) во и́мя Отца́, и Сы́на, и Свята́го Ду́ха, ами́нь.
Взе́м же и еле́й глаго́лет:
Вы́шний основа́ сию́ це́рковь, Бо́г посреде́ ея́, и не подви́жится, помо́жет е́й Бо́г у́тро зау́тра.
И возлива́ет еле́й на положе́нный ка́мень, глаго́ля:
Благослове́но и зна́менано бу́ди ме́сто сие́ в до́м моли́твенный, в че́сть и сла́ву Бо́га, в Тро́ице Святе́й сла́вимаго, Отца́, и Сы́на, и Свята́го Ду́ха, ами́нь.
Посе́м со все́м кли́ром пое́т сие́, гла́с 6:
Воста́в Иа́ков зау́тра, и взя́т ка́мень, его́же бе́ положи́л в возгла́вие себе́, и поста́ви его́ сто́лп, и возлия́ еле́й верху́ его́, и рече́: я́ко е́сть Госпо́дь на ме́сте се́м, а́з же не ве́дех, стра́шно е́сть ме́сто сие́, не́сть сие́, но до́м Бо́жий, и сия́ су́ть врата́ небе́сная.
Аллилу́иа, аллилу́иа, аллилу́иа.
Ве́стно же бу́ди, я́ко а́ще древя́ной це́ркви быва́ет основа́ние, вся́ преждерече́нная соверши́вше, настоя́тель, взе́м секи́ру, ударя́ет е́ю три́жды в сре́днее бревно́ олта́рное, глаго́ля:
Начина́ется де́ло сие́, во и́мя Отца́, и Сы́на, и Свята́го Ду́ха, в че́сть же и в па́мять (и́мярек пра́здника или́ свята́го) ами́нь.
Посе́м же а́бие начина́ет кропи́ти вся́ основа́ния о́крест, иды́й от се́верныя страны́ про́тив со́лнца, и глаго́ля:
Во и́мя Отца́, и Сы́на, и Свята́го Ду́ха, ами́нь.
Кли́ру чту́щу псало́м 86:
Основа́ния его́ на гора́х святы́х; лю́бит Госпо́дь врата́ Сио́ня, па́че все́х селе́ний Иа́ковлих. Пресла́вная глаго́лашася о тебе́, гра́де Бо́жий. Помяну́ Раа́в и Вавило́на ве́дущым мя́, и се́ иноплеме́нницы, и Ти́р, и лю́дие Ефио́пстии, си́и бы́ша та́мо. Ма́ти Сио́н рече́т: челове́к, и челове́к роди́ся в не́м, и То́й основа́ и Вы́шний. Госпо́дь пове́сть в писа́нии люде́й, и князе́й си́х бы́вших в не́м. Я́ко веселя́щихся все́х жили́ще в тебе́.
Де́лателие же а́бие спе́шно во и́мя Госпо́дне начина́ют де́лати. Проше́дшу же настоя́телю пе́рвую ча́сть основа́ний се́верныя страны́, а́бие ста́нет к се́веру лице́м, и сконча́ну псалму́, диа́кону ре́кшу: Го́споду помо́лимся. и кли́ру: Го́споди поми́луй.
Чте́т настоя́тель моли́тву сию́:
Го́споди Бо́же на́ш, се́вер и мо́ре, и вся́ческая созда́вый, Его́же не́бо, и земля́ вмести́ти не мо́жет, на земли́ хра́м Себе́ име́ти ко всегда́шнему хвале́нию Пресвята́го и́мене Твоего́ изво́ливый, смире́нно припа́дающе, Твое́ человеколю́бие мо́лим: основа́ния хра́ма сего́, и все́ его́ зда́ние благослови́, и си́лою Твое́ю утверди́, непозы́блемо же и неразруши́мо сотвори́, во сла́ву Тебе́ еди́наго в Тро́ице Святе́й сла́вимаго Бо́га, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Ли́к: Ами́нь.
По моли́тве же, а́ще древя́на и́мать бы́ти це́рковь, па́ки взе́м секи́ру, ударя́ет в сре́днее бревно́, то́жде глаго́ля, е́же и в пе́рвом ударе́нии, и и́дет, втору́ю ча́сть основа́ния кропя́, и глаго́ля:
Во и́мя Отца́, и Сы́на, и Свята́го Ду́ха, ами́нь.
Кли́р же чте́т псало́м 126:
А́ще не Госпо́дь сози́ждет до́м, всу́е труди́шася зи́ждущии. А́ще не Госпо́дь сохрани́т гра́д, всу́е бде́ стреги́й. Всу́е ва́м е́сть у́треневати, воста́нете по седе́нии, яду́щии хле́б боле́зни, егда́ да́ст возлю́бленным свои́м со́н. Се́ достоя́ние Госпо́дне сы́нове, мзда́ плода́ чре́внаго. Я́ко стре́лы в руце́ си́льнаго, та́ко сы́нове оттрясе́нных. Блаже́н, и́же испо́лнит жела́ние свое́ от ни́х. Не постыдя́тся, егда́ глаго́лют враго́м свои́м во врате́х.
Прише́д же на за́падную страну́, и ста́в лице́м к за́паду, сконча́ну уже́ су́щу псалму́,
И диа́кону ре́кшу: Го́споду помо́лимся,
и кли́ру: Го́споди поми́луй.
Чте́т настоя́тель моли́тву сию́:
Го́споди Бо́же на́ш, Его́же хва́льно и́мя от восто́к со́лнца до за́пад, Твои́м Боже́ственным про́мыслом избра́вый в жили́ще Себе́ ме́сто сие́, посли́ ны́не, смире́нно мо́лим Тя́, небе́сное Твое́ благослове́ние на не́, и благослови́ нача́ло зда́ния сего́, и укрепи́ и утверди́ е́, и благопоспе́шно к соверше́нию приведи́. Ты́ бо еси́ вся́ на по́льзу ду́ш на́ших де́йствуя, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
По моли́тве же, па́ки ударя́ет секи́рою три́жды, и и́дет, тре́тию ча́сть основа́ния кропя́, и глаго́ля:
Во и́мя Отца́, и Сы́на, и Свята́го Ду́ха, ами́нь.
Кли́р же чте́т псало́м 121:
Возвесели́хся о ре́кших мне́: в до́м Госпо́день по́йдем. Стоя́ще бя́ху но́ги на́шя во дво́рех твои́х, Иерусали́ме. Иерусали́м зи́ждемый я́ко гра́д, ему́же прича́стие его́ вку́пе. Та́мо бо взыдо́ша коле́на, коле́на Госпо́дня, свиде́ние Изра́илево, испове́датися и́мени Госпо́дню. Я́ко та́мо седо́ша престо́ли на су́д, престо́ли в дому́ Дави́дове. Вопроси́те же я́же о ми́ре Иерусали́ма: и оби́лие лю́бящым тя́. Бу́ди же ми́р в си́ле твое́й, и оби́лие в столпостена́х твои́х. Ра́ди бра́тий мои́х, и бли́жних мои́х глаго́лах у́бо ми́р о тебе́. До́му ра́ди Го́спода Бо́га на́шего взыска́х блага́я тебе́.
Прише́д же на ю́жную страну́ настоя́тель, и ста́в лице́м к ю́гу, по сконча́нии псалма́:
диа́кону ре́кшу: Го́споду помо́лимся, и кли́ру: Го́споди поми́луй.
Чте́т моли́тву сию́:
Го́споди Иису́се Христе́ Бо́же на́ш, от ю́га на спасе́ние на́ше прише́дый, и от присе́нныя деви́ческия горы́ я́ко свя́т яви́выйся, и с челове́ки пожи́вый, при́зри ми́лостивно, мо́лимся, на кти́торов зача́таго во и́мя Твое́ зда́тися хра́ма, и во все́м благослови́ и́х, и да́руй и́м си́лу и кре́пость, благомо́щие же и изъоби́лие с здра́вием, и во все́м к соверше́нию в сла́ву Твою́ зача́таго де́ла поспе́шество. Ты́ бо еси́ Бо́г ми́лости, и щедро́т, и человеколю́бия, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
По моли́тве же, па́ки твори́т, я́коже и пе́рвее. И и́дет, четве́ртую ча́сть основа́ния кропя́, и глаго́ля:
Во и́мя Отца́, и Сы́на, и Свята́го Ду́ха, ами́нь.
Кли́р же чте́т псало́м 131:
Помяни́, Го́споди, Дави́да и всю́ кро́тость его́: я́ко кля́тся Го́сподеви, обеща́ся Бо́гу Иа́ковлю: а́ще вни́ду в селе́ние до́му моего́, или́ взы́ду на о́др посте́ли моея́, а́ще да́м со́н очи́ма мои́ма и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се́ слы́шахом я́ во Евфра́фе, обрето́хом я́ в поля́х дубра́вы. Вни́дем в селе́ния Его́, поклони́мся на ме́сто, иде́же стоя́сте но́зе Его́. Воскресни́ Го́споди в поко́й Тво́й, Ты́ и киво́т святы́ни Твоея́. Свяще́нницы Твои́ облеку́тся пра́вдою, и преподо́бнии Твои́ возра́дуются. Дави́да ра́ди раба́ Твоего́, не отврати́ лице́ пома́заннаго Твоего́. Кля́тся Госпо́дь Дави́ду и́стиною, и не отве́ржется ея́: от плода́ чре́ва твоего́ посажду́ на престо́ле твое́м. А́ще сохраня́т сы́нове твои́ заве́т Мо́й, и свиде́ния Моя́ сия́, и́мже научу́ я́, и сы́нове и́х до ве́ка ся́дут на престо́ле твое́м. Я́ко избра́ Госпо́дь Сио́на, изво́ли и́ в жили́ще Себе́. Се́й поко́й Мо́й во ве́к ве́ка, зде́ вселю́ся, я́ко изво́лих и́. Лови́тву его́ благословля́яй благословлю́, ни́щыя его́ насыщу́ хле́бы, свяще́нники его́ облеку́ во спасе́ние, и преподо́бнии его́ ра́достию возра́дуются. Та́мо возращу́ ро́г Дави́дови, угото́вах свети́льник пома́занному Моему́. Враги́ его́ облеку́ студо́м, на не́мже процвете́т святы́ня Моя́.
Прише́д же на ме́сто, иде́же нача́ кропи́ти, престае́т, и ше́д ста́нет пред водруже́нным кресто́м к восто́ку лице́м, по сконча́нии же псалма́ са́м настоя́тель со вся́ким умиле́нием начина́ет пе́ти вку́пе со все́м кли́ром:
Царю́ Небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́ши на́ша.
По сконча́нии же пе́ния,
диа́кону ре́кшу: Го́споду помо́лимся,
и кли́ру: Го́споди поми́луй.
Чте́т моли́тву сию́:
Го́споди Бо́же на́ш, изво́ливый на се́м ме́сте, и на се́м положе́нном и во и́мя Твое́ благослове́нном ка́мени основа́ти себе́ це́рковь, Са́м Твоя́ от Твои́х Тебе́ принося́щих, в воздви́жении к Твоему́ славосло́вию зи́ждемаго хра́ма, в че́сть же и па́мять, (и́мярек пра́здника или́ свята́го,) ми́лостивно прии́м, мно́жеством Твои́х небе́сных и земны́х бла́г возда́ждь, все́м же к сооруже́нию и соверше́нию це́ркве сея́ по́мощь творя́щым, теле́сное здра́вие и душе́вное спасе́ние да́руй, де́латели укрепи́, невре́дны от вся́каго зла́ соблюда́я, основа́ния же сия́ неразори́ма, и непозы́блема соблюди́, и хра́м Тво́й се́й в соверше́ние ско́ро приведи́, я́ко да в не́м непреста́нно всехва́льными пе́сньми и славословле́нии, и безкро́вными же́ртвами сла́вим и воспева́ем Тя́, еди́наго и́стиннаго Бо́га на́шего. Тебе́ бо подоба́ет вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
Настоя́тель: Ми́р все́м.
Ли́к: И ду́хови твоему́.
Диа́кон же со вся́ким умиле́нием рече́т:
Па́ки и па́ки, прекло́ньше коле́на, Го́споду помо́лимся.
Ли́к: Го́споди поми́луй, три́жды.
И вси́ преклоня́ют коле́на.
Настоя́тель же и са́м прекло́нь коле́на, умиле́нно чте́т моли́тву сию́:
Хва́лим Тя́ Го́споди Бо́же си́л, Спаси́телю на́ш, я́ко премно́гия ра́ди Твоея́ бла́гости и человеколю́бия, избра́л и освяти́л еси́ ме́сто сие́, и к созида́нию на не́м це́ркве в сла́ву Пресвята́го и́мене Твоего́, на́ми недосто́йными рабы́ Твои́ми основа́л еси́. Мо́лим у́бо Тя́ смире́нно, коле́на ду́ш и теле́с на́ших прекло́ньше, благоволи́ на ме́сте се́м и же́ртвеннику к приноше́нию на не́м безкро́вныя же́ртвы Пресвята́го Те́ла и честны́я Кро́ве Христа́ Твоего́, в сла́ву Твою́ и в спасе́ние ду́ш на́ших созда́тися, и я́коже хра́м, си́це и же́ртвенник се́й, нача́ло ны́не прие́мля, в соверше́ние спе́шно Твое́ю Боже́ственною си́лою приведи́, да в не́м и на не́м да́же до сконча́ния ве́ка славосло́вие Твоего́ Пресвята́го и́мене и безкро́вныя Твоя́ слове́сныя же́ртвы от правове́рных люде́й Твои́х, Тебе́ безпреста́нно кроме́ вся́каго препя́тия приноси́мы и соверша́емы бу́дут, вся́ бо у тебе́ возмо́жна су́ть. И Тебе́ сла́ву возсыла́ем, со Единоро́дным Твои́м Сы́ном, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Все́м же воста́вшым, диа́кон глаго́лет ектению́ сию́:
Поми́луй на́с Бо́же, по вели́цей ми́лости Твое́й, мо́лим Ти́ ся́, услы́ши и поми́луй.
Ли́к: Го́споди поми́луй, три́жды.
Еще́ мо́лимся о е́же Го́споду Бо́гу на́шему услы́шати гла́с моле́ния на́шего, и благослови́ти дела́ ру́к на́ших. Рце́м вси́, Го́споди, услы́ши и поми́луй.
Ли́к: Го́споди поми́луй, три́жды.
Еще́ мо́лимся о благочести́вых кти́торах, и основа́телех в сла́ву Бо́жию сооружа́тися наче́ншаго хра́ма и́мярек, и о благополу́чном поспеше́нии свята́го де́ла и́х, о здра́вии же, спасе́нии, и оставле́нии грехо́в и́х, рце́м вси́, Го́споди услы́ши и поми́луй.
Ли́к: Го́споди поми́луй, три́жды.
Еще́ мо́лимся о е́же приста́вити де́лу сему́ свято́му а́нгела храни́теля, от вся́каго зла́го обстоя́ния, и ви́димых и неви́димых враго́в препя́тий избавля́юща и защища́юща, и де́лателей укрепля́юща, рце́м вси́, Го́споди услы́ши и поми́луй.
Ли́к: Го́споди поми́луй, три́жды.
Настоя́тель же возглаша́ет:
Услы́ши ны́ Бо́же Спаси́телю на́ш, упова́ние все́х конце́в земли́, и су́щих в мо́ри дале́че, и ми́лостив, ми́лостив бу́ди Влады́ко о гресе́х на́ших, и поми́луй на́с и основа́телей свята́го хра́ма сего́, ми́лостив бо и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
И а́бие быва́ет отпу́ст обы́чный хра́му.
Пода́в же благослове́ние лю́дем, святи́тель или́ протоиере́й, а́ще у́бо с лити́ею прише́л е́сть, я́коже предъуказа́ся, та́кожде с лити́ею возвраща́ется в це́рковь, отню́дуже прии́де, пою́щу кли́ру стихи́ры хра́му, или́ и́но что́ е́же изво́лят, в сла́ву Бо́жию.
Глава́ 38. Чи́н моли́твенный на поставле́ние креста́ на ве́рх кро́ва новосозда́нныя це́ркве
Взе́м иере́й епитрахи́ль на себе́, и покади́в кре́ст фимиа́мом благослове́нным, начина́ет обы́чно:
Благослове́н Бо́г на́ш ны́не и при́стно и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный. Трисвято́е. О́тче на́ш:
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
И а́бие пою́т, или́ чту́т тропари́ сия́, гла́с 1: Спаси́, Го́споди, лю́ди Твоя́ и благослови́ достоя́ние Твое́, побе́ды правосла́вным христианам на сопроти́вныя да́руя, и Твое́ сохраня́я Кресто́м Твои́м жи́тельство.
Сла́ва: Вознесы́йся на кре́ст во́лею тезоимени́тому Твоему́ но́вому жи́тельству, щедро́ты Твоя́ да́руй, Христе́ Бо́же, возвесели́ на́с си́лою Твое́ю, побе́ды дая́ на́м на сопоста́ты, посо́бие иму́щим Твое́ ору́жие ми́ра, непобеди́мую побе́ду.
И ны́не: Предста́тельство Христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь на́с, ве́рно зову́щих Ти́: ускори́ на моли́тву, и потщи́ся на умоле́ние, предста́тельствующи при́сно, Богоро́дице, чту́щих Тя́.
Посе́м ре́кшу диа́кону: Го́споду помо́лимся,
и кли́ру: Го́споди поми́луй.
Чте́т иере́й моли́тву сию́:
Го́споди Вседержи́телю Бо́же оте́ц на́ших, жезло́м Моисе́овым, и дре́вом о́ным, на не́мже змию́ ме́дяную в пусты́ни, от угрызе́ния змие́в избавля́я лю́ди, привяза́ти повеле́л еси́, о́браз Честна́го и Животворя́щаго Креста́ возлю́бленнаго Сы́на Твоего́ Го́спода на́шего Иису́са Христа́ прообрази́вый, и́мже диа́воля си́ла упраздни́ся, и зми́ем о́ным дре́вним вселука́вым угрызе́нный и умерщвле́нный ро́д на́ш оживотвори́ся, смире́нно Твоему́ безме́рному человеколю́бию припа́дающе, мо́лимся и ми́ли ся́ де́ем, посли́ ны́не благослове́ние Твое́ небе́сное, и благослови́ зна́мение сие́ кре́стное, и да́ждь ему́ си́лу и кре́пость благослове́ннаго о́наго, кро́вию Сы́на Твоего́ окропле́ннаго дре́ва, во е́же бы́ти хра́му сему́, и́мени Твоему́ созда́нному, покро́в держа́вен, тве́рдое огражде́ние, от вся́каго зла́го обстоя́ния всегда́шнее избавле́ние, благоле́пие же и украше́ние, и зна́мение ви́димым и неви́димым враго́м стра́шное и ужа́сное, все́х же в хра́м се́й с ве́рою входя́щих, и на не́ взира́ющих, и распя́тому на кресте́ Сы́ну Твоему́ кла́няющихся благослови́, и си́лою кре́стною огради́в, неврежде́нных от вся́каго зла́ всегда́ соблюди́. Кре́ст бо е́сть красота́ церко́вная, царе́м держа́ва, ве́рным утвержде́ние, Па́влова похвала́, бесо́в же я́зва. Е́й, Го́споди Бо́же на́ш, все́х ве́рою на зна́мение сие́ взира́ющих, и спаси́тельную Го́спода на́шего Иису́са Христа́ Сы́на Твоего́ сме́рть воспомина́ющих, и Тебе́ приле́жно моля́щихся, ми́лостивно услы́ши и человеколю́бне поми́луй, здра́вие же с долгоде́нствием да́руй, и Ца́рствия Твоего́ сподо́би, благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́ со Пресвяты́м, и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й же взе́м свяще́нную во́ду, кропи́т е́ю кре́ст, глаго́ля:
Благословля́ется и освяща́ется зна́мение сие́ кре́стное, благода́тию Свята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь.
А́бие же пое́тся конда́к се́й, гла́с 4:
Вознесы́йся на кре́ст во́лею тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ си́лою Твое́ю, побе́ды дая́ нам на супоста́ты, посо́бие иму́щу Твое́ ору́жие ми́ра, непобеди́мую побе́ду.
Посе́м твори́т обы́чный отпу́ст хра́му, де́лателие же взе́мше Кре́ст, поставля́ют его́ на свое́м ме́сте верху́ Це́ркве.
Глава́ 39. Чи́н освяще́ния хра́ма, от архиере́а твори́маго
Хра́му соверше́ну бы́вшу, прихо́дит от архиере́а по́сланный, ему́же повели́т, пре́жде еди́наго дне́ или́ бо́льши, и предъуготовля́ет потре́бная к освяще́нию, ка́к вну́трь олтаря́, та́к и во все́м хра́ме, а наипа́че дабы́ Престо́л бы́л на четы́рех столпа́х, пя́тый столпе́ц посреди́ с я́щиком, я́щик бы бы́л посреде́ под Престо́лом, вышино́ю по́л-арши́на, Престо́л высото́ю арши́на, и шести́ вершко́в, а широто́ю по ме́ре олтаря́, доска́ напресто́льная по ме́ре Престо́ла, же́ртвенник тако́й же высоты́, ширина́ и длина́ по ме́ре олтаря́. Наверху́ у столпо́в Престо́льных вы́нять я́щики на че́тверть вершка́, где́ бы́ть воскомасти́ху, на те́хже столпа́х, от по́лу уступя́ вершка́ с два́, вы́резать зазу́бриной для утвержде́ния ве́рви, а вкру́г Престо́льной доски́ вы́резать же на че́тверть вершка́, где́ бы́ть ве́рви, на дска́х, на Престо́льной и на же́ртвенной, по угла́м что́бы бы́ло прове́рчено, где́ бы́ть гвоздя́м, и сде́лать гне́здышка, где́ бу́дут гвозди́нныя шля́пки, что́б гвозди́нныя шля́пки бы́ли в ра́венстве со Престо́льною дско́ю, та́кож и на столпа́х наверте́ть, что́б гво́зди шли́ пря́мо, к утвержде́нию Престо́ла четы́ре гвоздя́, а к же́ртвеннику ско́лько на́добно, четы́ре ка́мня, ко́ими прибива́ются гво́зди, срачи́ца на одея́ние Престо́ла, и друга́я на же́ртвенник. На обяза́ние Престо́ла ве́рвь в шестьдеся́т арши́н, и ве́рхнее одея́ние на Престо́л и на же́ртвенник, пелены́, что́б покры́ть Престо́л и же́ртвенник, во́здухи, пла́ты, кото́рыми Престо́л отира́ть, за́навес к Ца́рским две́рем, два́ илито́на на Престо́л и на же́ртвенник, воды́ ро́зовой, и вина́ церко́внаго по сткля́нице, кропи́ло, ко́им кропи́ть, свято́е ми́ро, и струче́ц, четы́ре гу́бы, отира́ть и́ми Престо́л, гу́ба во антими́нс, гу́ба во святу́ю ча́шу, я́щичек оловя́нный на святы́я мо́щи под Престо́л, архиере́ю свеща́, и свещы́ на розда́чу про́чым духо́вным, и миря́ном, ла́дон росно́й и просто́й, две́ свещи́ вы́носныя большы́я, хору́гви, а́ще су́ть, вкру́г це́ркви что́б бы́ло чи́сто.
Та́же снима́ется дска́ со столпо́в, и поставля́ется на десне́й стране́ к стене́, и замеча́ется, ка́к е́й бы́ть по пре́жнему на столпа́х Престо́льных.
Пото́м пред Ца́рския врата́ поставля́ется сто́л, и постила́ется ска́терть, пове́рх ска́терти постила́ется пелена́, и полага́ется свято́е Ева́нгелие, и честны́й кре́ст, и поставля́ются святы́е сосу́ды, лжи́ца, копие́, пелены́, во́здухи, ве́рвь, одея́ние на Престо́л и на же́ртвенник, гво́зди, гу́бы, и покрыва́ются пелено́ю и поставля́ются по угла́м четы́ре подсве́щника, а друго́й столе́ц поставля́ется в олтаре́ к го́рнему ме́сту, и сте́лется пелена́, и поставля́ется на столе́ц свято́е ми́ро, вино́ церко́вное, вода́ ро́зовая в сткля́ницах, струче́ц, кропи́ло, ка́мение, кото́рыми гво́зди прибива́ть.
А мо́щи святы́я поставля́ются на ди́скосе, покрове́ны звездо́ю и во́здухом, в на́вечерии освяще́ния на анало́гии пред о́бразом Спаси́телевым, у Ца́рских вра́т в то́мже хра́ме, и пое́тся вне́ олтаря́ всено́щное бде́ние обновле́нию и хра́му, кому́ от архиере́а повелено́ бу́дет. Пред водоосвяще́нием же изно́сятся мо́щи с благогове́нием в бли́з су́щий хра́м по́сле ра́нней литурги́и, и поставля́ются на святе́м Престо́ле, а свято́е Ева́нгелие поставля́ется от восто́ка над мощьми́, и ста́вится подсве́щник пред святы́ми мощьми́. Бу́де же не́т в бли́зости друга́го хра́ма, то́ стоя́т до вре́мени прия́тия своего́ на то́мже ме́сте.
О составле́нии воскомасти́ха:
Во у́трии пре́жде прише́ствия архиере́йскаго, воскомасти́х составля́ется си́це во́ск, и масти́х толче́н, и ла́дон толче́н, [а́ще не́сть масти́ха, вме́сто его́ бе́лый ла́дон довле́ет,] и росно́й ла́дон толче́н же, и ало́й толче́н же, а́ще же не́сть ало́я, вме́сто его́ се́ра бе́лая, и полага́ют пре́жде во́ск в горне́ц но́вый, проти́ву ме́ры веще́й. И егда́ расто́пится во́ск, полага́ют и вышепи́санныя ве́щи, и меша́ют я́ в горнце́ стручце́м опа́сно, что́бы от воскипе́ния не прелило́ся во о́гнь, и по ма́лом кипе́нии, отставля́ют от огня́ во страну́. А́ще же соизво́лится примеша́ти и ины́я благово́нныя прили́чныя ве́щи, и сие́ невозбра́нно е́сть.
Нача́ло освяще́ния.
Приспе́вшу вре́мени святы́я литурги́и, и прибы́вшу архиере́ю во освяща́емый хра́м, облача́ется во вся́ архиере́йская облаче́ния, и верху́ архиере́йских оде́жд возлага́ется ктому́ наро́читая срачи́ца или́ за́пон. И та́ко укра́шен вхо́дит во святы́й олта́рь, преди́ же архиере́а вно́сят сослужа́щии свяще́нницы, та́кожде све́рх свяще́ннических оде́жд име́ющие возложе́нныя срачи́цы, в Ца́рская врата́ сто́л угото́ванный со вся́кою потре́бою, я́же су́ть прили́чна ко освяще́нию, и поставля́ют одесну́ю страну́. Архиере́й же, отда́в по́сох у Ца́рских вра́т по́дьяку, вхо́дит во олта́рь, и помоля́ся осеня́ет сослужа́щих на о́бе страны́. В то́ вре́мя диа́кон подно́сит архиере́ю святу́ю во́ду, архиере́й же приня́в кропи́ло, кропи́т свято́ю водо́ю столпы́. Пото́м прино́сит ключа́рь воскомасти́х кипя́щ, архиере́й кропи́т свято́ю водо́ю воскомасти́х, и прие́млет горне́ц с воскомасти́хом, и возлива́ет са́м на столпцы́ крестообра́зно проти́в ме́ры, обходя́ круго́м, и отдае́т горне́ц, пото́м па́ки кропи́т свято́ю водо́ю на столпцы́, что́бы ско́ро усты́л воскомасти́х, а свяще́нницы подува́ют на столпцы́, иде́же воскомасти́х, до́ндеже усты́нет.
По исполне́нии о́наго, протодиа́кон глаго́лет:
Го́споду помо́лимся.
Свяще́нницы: Го́споди поми́луй.
Архиере́й же чте́т моли́тву во услы́шание все́м:
Моли́тва 1:
Го́споди Бо́же Спаси́телю на́ш, вся́ творя́й и стро́яй о спасе́нии ро́да челове́ческаго, приими́ моли́тву на́с недосто́йных ра́б Твои́х, и удовли́ на́с в настоя́щий ча́с, во е́же неосужде́нно освяще́ние соверши́ти хра́ма сего́, ко Твоему́ славосло́вию созда́ннаго, во и́мя свята́го и́мярек: (или́ святы́я и́мярек) и воздви́жение в не́м сотвори́ти трапе́зы.
Возгла́с: Я́ко подоба́ет Тебе́ вся́кая сла́ва, че́сть и поклоне́ние, Отцу́ и Сы́ну, и Свято́му Ду́ху, ны́не и при́сно, и во ве́ки веко́в.
Свяще́нницы: Ами́нь.
Пото́м прино́сят свяще́нницы трапе́зную дску́, и кропи́тся дска́ от архиере́а с обои́х стра́н, и полага́ется на столпца́х Престо́льных.
В то́ вре́мя пое́тся псало́м 144:
Вознесу́ Тя́, Бо́же мо́й, Царю́ мо́й, и благословлю́ и́мя Твое́ в ве́к и в ве́к ве́ка. На вся́к де́нь благословлю́ Тя́, и восхвалю́ и́мя Твое́ в ве́к и в ве́к ве́ка. Ве́лий Госпо́дь и хва́лен зело́, и вели́чию его́ не́сть конца́. Ро́д и ро́д восхва́лят дела́ Твоя́, и си́лу Твою́ возвестя́т. Великоле́пие сла́вы святы́ни Твоея́ возглаго́лют и чудеса́ Твоя́ пове́дят. И си́лу стра́шных Твои́х реку́т, и вели́чие Твое́ пове́дят. Па́мять мно́жества бла́гости Твоея́ отры́гнут, и пра́вдою Твое́ю возра́дуются. Ще́др и ми́лостив Госпо́дь, Долготерпели́в и Многоми́лостив. Бла́г Госпо́дь вся́ческим, и щедро́ты Его́ на все́х де́лех Его́. Да испове́дятся Тебе́, Го́споди, вся́ дела́ Твоя́, и преподо́бнии Твои́ да благословя́т тя́. Сла́ву Ца́рствия Твоего́ реку́т, и си́лу Твою́ возглаго́лют, сказа́ти сыново́м челове́ческим си́лу Твою́, и сла́ву великоле́пия Ца́рствия Твоего́. Ца́рство Твое́, Ца́рство все́х веко́в, и Влады́чество Твое́ во вся́ком ро́де и ро́де. Ве́рен Госпо́дь во все́х словесе́х Свои́х, и преподо́бен во все́х де́лех Свои́х. Утвержда́ет Госпо́дь вся́ низпа́дающыя, и возставля́ет вся́ низве́рженныя. О́чи все́х на Тя́ упова́ют, и Ты́ дае́ши и́м пи́щу во благовре́мении. Отверза́еши Ты́ ру́ку Твою́, и исполня́еши вся́кое живо́тно благоволе́ния. Пра́веден Госпо́дь во все́х путе́х Свои́х, и преподо́бен во все́х де́лех Свои́х. Бли́з Госпо́дь все́м призыва́ющым Его́, все́м призыва́ющым Его́ во и́стине. Во́лю боя́щихся Его́ сотвори́т, и моли́тву и́х услы́шит, и спасе́т я́. Храни́т Госпо́дь вся́ лю́бящыя Его́, и вся́ гре́шники потреби́т. Хвалу́ Госпо́дню возглаго́лют уста́ моя́, и да благослови́т вся́ка пло́ть и́мя свято́е Его́ в ве́к, и в ве́к ве́ка.
По сконча́нии же псалма́, глаго́лет архиере́й:
Благослове́н Бо́г на́ш ны́не и при́стно и во ве́ки веко́в. Ами́нь.
Сте́кшу же воскомасти́ху, и очища́емым ме́стом, на ни́хже истече́.
Па́ки глаго́лют псало́м 22:
Госпо́дь пасе́т мя́, и ничто́же мя́ лиши́т. На ме́сте зла́чне, та́мо всели́ мя́, на воде́ поко́йне воспита́ мя́. Ду́шу мою́ обрати́, наста́ви мя́ на стези́ пра́вды, и́мене ра́ди Своего́. А́ще бо и пойду́ посреде́ се́ни сме́ртныя, не убою́ся зла́, я́ко Ты́ со мно́ю еси́, же́зл Тво́й и па́лица Твоя́, та́ мя́ уте́шиста. Угото́вал еси́ предо мно́ю трапе́зу сопроти́в стужа́ющым мне́, ума́стил еси́ еле́ом главу́ мою́, и ча́ша Твоя́ упоява́ющи мя́ я́ко держа́вна. И ми́лость Твоя́ пожене́т мя́ вся́ дни́ живота́ моего́, и е́же всели́ти ми́ ся́ в до́м Госпо́день, в долготу́ дни́й.
Та́же архиере́й:
Благослове́н Бо́г на́ш, всегда́, ны́не и при́сно, и во ве́ки веко́в.
Свяще́нницы: Ами́нь.
Та́же прино́сит ключа́рь четы́ре гво́здя, и полага́ет на трапе́зе, архиере́й же кропи́т свято́ю водо́ю, и влага́ет и́х в столпы́. Па́ки прино́сит ключа́рь четы́ре ка́мня, взя́в же архиере́й еди́н ка́мень, и про́чии священнослужи́тели, утвержда́ют трапе́зу. По внегда́ же утверди́тися трапе́зе, кове́р а́бие пред святы́ми две́рьми постила́ется, и возгла́вие полага́ется, и изше́д архиере́й из олтаря́, протодиа́кону возгласи́вшу:
Па́ки и па́ки, прекло́ньше коле́на, Го́споду помо́лимся.
Свяще́нником же вну́трь олтаря́ пою́щым: Го́споди поми́луй, три́жды.
Преклоня́ет коле́на, и чте́т моли́тву сию́ велегла́сно:
Бо́же Безнача́льный и Присносу́щный, И́же от не су́щих в бытие́ вся́ приведы́й, И́же во све́те живы́й непристу́пнем, и престо́л име́яй не́бо, зе́млю же подно́жие, И́же Моисе́ови повеле́ние да́вый и начерта́ния, Веселеи́лу же ду́х прему́дрости вложи́вый, и удовли́в и́х к соверше́нию свиде́ния ски́нии, в не́йже служе́ния оправда́ния бя́ху и́стины о́бразы и предначерта́ния, И́же Соломо́ну широту́ и простра́нство се́рдца дарова́вый, и те́м дре́вний хра́м возста́вивый, святы́м же всехва́льным апо́столом, в Ду́се слу́жбу, и ски́нии и́стинныя обнови́вый благода́ть, и те́ми святы́я Твоя́ це́ркви, и же́ртвенники Твоя́, Го́споди си́л, во все́й земли́ насади́вый, во е́же приноси́тися Тебе́ свяще́нным и безкро́вным же́ртвам, И́же и сему́ хра́му ны́не благоволи́л еси́ во и́мя созда́тися свята́го, (или́ святы́я) и́мярек, ко сла́ве Твое́й, и Единоро́днаго Твоего́ Сы́на, и Всевята́го Твоего́ Ду́ха, Са́м Безсме́ртне и Великодарови́тый Царю́, помяни́ щедро́ты Твоя́ и ми́лости Твоя́, я́ко от ве́ка су́ть, и да не возгнуша́ешися на́с, мно́жеством оскверне́нных грехо́в, ниже́ да разруши́ши заве́та Твоего́ на́шея ра́ди нечистоты́, но пре́зри и ны́не прегреше́ния на́ша, и укрепи́ на́с, и удовли́ благода́тию и прише́ствием Животворя́щаго и Свята́го Твоего́ Ду́ха, соверши́ти без осужде́ния обновле́ние хра́ма сего́, и и́же в не́м же́ртвенника (же́ртвенников) сотвори́ти освяще́ние: да и на се́м (и на си́х) благослови́м Тя́ псалмы́ и пе́сньми, и та́йными [ та́йнами ] слу́жбами, и Твое́ благоутро́бие вы́ну велича́ем. Е́й, Влады́ко Го́споди Бо́же на́ш, упова́ние все́х конце́в земли́, услы́ши на́с гре́шных моля́щихся Тебе́, и низпосли́ Пресвята́го Твоего́ и Покланя́емаго и Всеси́льнаго Ду́ха, и освяти́ хра́м се́й, и же́ртвенник се́й (и же́ртвенники сия́) испо́лни его́ [ я́ ] све́та присносу́щнаго, избери́ его́ (я́) в жили́ще Твое́, сотвори́ его́ (я́) ме́сто селе́ния сла́вы Твоея́, украси́ его́ (я́) Боже́ственными Твои́ми и преми́рными дарова́ньми, уста́ви его́ [ я́ ] приста́нище обурева́емых, врачевство́ страсте́й, прибе́жище немощны́х, бесо́в прогоне́ние, во е́же бы́ти очеса́м Твои́м отве́рстым на́нь (на ни́х) де́нь и но́щь, и ушеса́м Твои́м вне́млющым в моли́тву, со стра́хом Твои́м и благогове́инством в него́ приходя́щих (к ни́м приходя́щих), и призыва́ющих всечестно́е и покланя́емое и́мя Твое́, да ели́ка воспро́сят у тебе́, и Ты́ услы́шиши на небеси́ горе́, и сотвори́ши ми́лость, и ми́лостив бу́деши, сохрани́ его́ да́же до сконча́ния ве́ка непоколеби́ма, и и́же в не́м же́ртвенник святы́й (же́ртвенники святы́я) святы́х покажи́, си́лою и де́йством Свята́го Твоего́ Ду́ха, просла́ви его́ (я́) па́че е́же по зако́ну очисти́лища: я́ко да я́же на не́м (на ни́х) соверша́емая священноде́йства во святы́й и пренебе́сный, и мы́сленный Тво́й же́ртвенник достиза́ют, и благода́ть на́м Твоего́ Пречи́стаго прино́сят осене́ния, дерза́ем бо не на на́ших ру́к служе́ние, но на Твою́ неизрече́нную благосты́ню.
И по соверше́нии моли́твы воста́нет архиере́й, и и́дет во олта́рь ко святе́й трапе́зе, а протодиа́кон вну́трь свята́го олтаря́ глаго́лет [Ца́рская врата́ затвори́ти]:
Заступи́, спаси́, поми́луй, возста́ви и сохрани́ на́с, Бо́же, Твое́ю благода́тию.
Свяще́нницы: Го́споди поми́луй.
О свы́шнем ми́ре, и о спасе́нии ду́ш на́ших, Го́споду помо́лимся.
Го́споди поми́луй.
О ми́ре всего́ ми́ра, благостоя́нии святы́х Бо́жиих церкве́й, и соедине́нии все́х, Го́споду помо́лимся.
Го́споди поми́луй.
И о преосвяще́ннейшем епи́скопе на́шем и́мярек, и де́лех руку́ его́, и и́же с ни́м свяще́нницех и диа́конех, Го́споду помо́лимся.
Го́споди поми́луй.
О е́же освяти́тися хра́му сему́, и и́же в не́м же́ртвеннику сему́, (же́ртвенником си́м) прише́ствием и си́лою Свята́го Ду́ха, Го́споду помо́лимся.
Го́споди поми́луй.
О гра́де се́м (а́ще в монастыре́: О святе́й оби́тели се́й), вся́ком гра́де, стране́, и ве́рою живу́щих в ни́х, Го́споду помо́лимся.
Ли́к: Го́споди, поми́луй.
О изба́витися на́м от вся́кия ско́рби, гне́ва и ну́жды, Го́споду помо́лимся.
Ли́к: Го́споди, поми́луй.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу, и Присноде́ву Мари́ю, (и свята́го, его́же е́сть освяща́емый хра́м) со все́ми святы́ми помяну́вше, са́ми себе́, и дру́г дру́га, и ве́сь живо́т на́ш Христу́ Бо́гу предади́м.
Возгла́с: Я́ко свя́т еси́ Бо́же на́ш, И́же на пострада́вших по Тебе́ честны́х му́ченицех почива́еши, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Свяще́нницы: Ами́нь.
Та́же прино́сится возлива́льник с те́плою водо́ю, и вино́ кра́сное, и ро́зовая вода́.
Протодиа́кон глаго́лет: Го́споду помо́лимся.
Архиере́й, преклони́в главу́, глаго́лет моли́тву сию́ над вода́ми и вино́м та́йно:
Го́споди Бо́же на́ш, освяти́вый струи́ Иорда́нския спаси́тельным Твои́м явле́нием, Са́м и ны́не низпосли́ благода́ть Свята́го Твоего́ Ду́ха, и благослови́ во́ды сия́ и вино́ ко освяще́нию и соверше́нию же́ртвенника Твоего́ сего́ (же́ртвенников Твои́х си́х), я́ко благослове́н еси́ во ве́ки веко́в, ами́нь.
И по моли́тве возлива́ет на трапе́зу три́жды от те́плыя воды́, глаго́ля:
Во и́мя Отца́, и Сы́на, и Свята́го Ду́ха, ами́нь.
А вино́ кра́сное с ро́зовою водо́ю сме́шивается во еди́ном сосу́де.
Та́же ключа́рь прино́сит четы́ре пла́та. Архиере́й же приня́в еди́н пла́т, про́чыя благословля́ет прия́ти сослужа́щым, и отира́ют и́ми трапе́зу.
Внегда́ же сия́ соверша́ются, глаго́лется псало́м 83:
Ко́ль возлю́бленна селе́ния Твоя́, Го́споди си́л! Жела́ет и скончава́ется душа́ моя́ во дворы́ Госпо́дни, се́рдце мое́ и пло́ть моя́ возра́довастася о Бо́зе жи́ве. И́бо пти́ца обре́те себе́ хра́мину, и го́рлица гнездо́ себе́, иде́же положи́т птенцы́ своя́, олтари́ Твоя́, Го́споди си́л, Царю́ мо́й и Бо́же мо́й. Блаже́ни живу́щии в дому́ Твое́м, в ве́ки веко́в восхва́лят Тя́. Блаже́н му́ж, ему́же е́сть заступле́ние его́ у тебе́; восхожде́ния в се́рдце свое́м положи́, во юдо́ль плаче́вную, в ме́сто, е́же положи́, и́бо благослове́ние да́ст законополага́яй. По́йдут от си́лы в си́лу, яви́тся Бо́г бого́в в Сио́не. Го́споди Бо́же си́л, услы́ши моли́тву мою́, внуши́ Бо́же Иа́ковль. Защи́тниче на́ш ви́ждь Бо́же, и при́зри на лице́ Христа́ Твоего́. Я́ко лу́чше де́нь еди́н во дво́рех Твои́х, па́че ты́сящ: изво́лих примета́тися в дому́ Бо́га моего́ па́че, не́же жи́ти ми́ в селе́ниих гре́шничих. Я́ко ми́лость и и́стину лю́бит Госпо́дь, Бо́г благода́ть и сла́ву да́ст, Госпо́дь не лиши́т благи́х, ходя́щих незло́бием. Го́споди Бо́же си́л, блаже́н челове́к упова́яй на Тя́.
И по соверше́нном омове́нии трапе́зном и отира́нии, глаго́лет архиере́й:
Сла́ва Бо́гу на́шему во ве́ки веко́в.
Свяще́нницы: Ами́нь.
Прие́млет архиере́й у ключаря́ вино́ кра́сное, с водо́ю ро́зовою сме́шенное, и возлива́ет на трапе́зу три́жды, крестови́дно, дово́льно, и напая́ют трапе́зу, растира́юще рука́ми, и кропи́т архиере́й те́м же смеше́нием освяща́емыя антими́нсы про́чыя. Егда́ же сие́ де́ется, глаго́лет на вся́ком кропле́нии:
Окропи́ши мя́ иссо́пом, и очи́щуся, омы́еши мя́, и па́че сне́га убелю́ся.
А по окропле́нии престо́ла и антими́нсов присовокупля́ет и после́дующее:
Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от гре́х мои́х, и вся́ беззако́ния моя́ очи́сти. Се́рдце чи́сто сози́жди во мне́ Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отими́ от Мене́. Возда́ждь ми́ ра́дость спасе́ния Твоего́, и ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й Бо́же, Бо́же спасе́ния моего́, возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо: всесожже́ния не благоволи́ши. Же́ртва Бо́гу ду́х сокруше́н, се́рдце сокруше́нно и смире́нно Бо́г не уничижи́т. Ублажи́ Го́споди благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Тво́й тельцы́.
Пото́м ключа́рь прино́сит гу́бы. Архиере́й прие́млет еди́ну гу́бу, а про́чыя други́и сослужа́щии, и отира́ют гу́бами трапе́зу. Пото́м полага́ется антими́нс (или́ антими́нсы) на трапе́зу горе́.
Та́же глаго́лет архиере́й:
Благослове́н Бо́г на́ш, всегда́, ны́не и при́сно, и во ве́ки веко́в.
Свяще́нницы: Ами́нь.
Пото́м прино́сит ключа́рь свято́е ми́ро. Архиере́й, приня́в струче́ц, помазу́ет на трапе́зе крестообра́зно.
Протодиа́кону глаго́лющу к Престо́лу и ко (вся́кому]) антими́нсу: Во́нмем: Архиере́й твори́т на трапе́зе три́ кресты́, еди́н среди́, а два́ по обою́ страну́ ма́ло пони́же, глаго́ля: Аллилу́иа: по три́жды. Помазу́ет же и на столпе́х престо́льных с дву́ стра́н, и на среде́, и на ре́брех. Посе́м свяще́нницы прие́млют антими́нс (антими́нсы) и полага́ют и́ (я́) на престо́ле, еди́н по еди́ному, ни́же кресто́в, иде́же назна́менаны святы́м ми́ром, для того́, что́б те́ кресты́ не сотре́нны бы́ли. Архиере́й твори́т три́ кресты́ на вся́ком антими́нсе ми́ром, я́коже и на престо́ле.
Егда́ же сие́ соверши́тся, глаго́лется псало́м 132:
Се́ что́ добро́, или́ что́ красно́? Но е́же жи́ти бра́тии вку́пе. Я́ко ми́ро на главе́, сходя́щее на браду́, браду́ Ааро́ню, сходя́щее на оме́ты оде́жды его́, я́ко роса́ Аермо́нская, сходя́щая на го́ры Сио́нския, я́ко та́мо запове́да Госпо́дь благослове́ние и живо́т до ве́ка.
Та́же архиере́й глаго́лет: Сла́ва Тебе́ Свята́я Тро́ице, Бо́же на́ш, во ве́ки веко́в.
Свяще́нницы: Ами́нь.
И отлага́ется антими́нс (антими́нсы)на блю́до. Посе́м свяще́нницы прино́сят срачи́цу, архиере́й кропи́т свято́ю водо́ю вну́трь и вне́, и надева́ют на трапе́зу. Пото́м прино́сится ве́рвь. Архиере́й кропи́т ве́рвь, и обязу́ет Престо́л, обязу́ется же си́це:
От пра́выя страны́, у пе́рваго столпа́ архиере́й де́ржит коне́ц ве́рви, и и́дут по ве́рви круго́м до втора́го столпа́ к восто́ку, от втора́го же столпа́ сно́сится на ни́з к тре́тиему столпу́, и и́дет по ни́зу до четве́ртаго столпа́, и па́ки возно́сится к пе́рвому столпу́ сопреди́, и связу́ется с конце́м, иде́же архиере́й держи́т, и па́ки сно́сится вни́з ко второ́му столпу́, и и́дет ни́зом до тре́тияго столпа́, взно́сится в ве́рх к четве́ртому столпу́, от четве́ртаго же столпа́ сно́сится вни́з к пе́рвому столпу́, и та́ко бу́дет кре́ст сопреди́. От пе́рваго же столпа́ по ни́зу и́дет круго́м до втора́го столпа́, от втора́го же столпа́ взно́сит в ве́рх к тре́тиему столпу́, и та́ко бу́дет кре́ст к восто́ку. От тре́тияго же столпа́ сно́сит на ни́з к четве́ртому столпу́, и та́ко бу́дет кре́ст на се́верней стране́, от четве́ртаго же столпа́, и́дет по ни́зу кресто́м до пе́рваго столпа́. От пе́рваго же столпа́ сни́зу и́дет в ве́рх ко второ́му столпу́, и та́ко бу́дет кре́ст на ю́жной стране́. И обхо́дит круго́м, что́б бы́ло три́ ве́рви по ве́рху, вторы́й же коне́ц ве́рви связу́ется с пе́рвым конце́м у пе́рваго столпа́.
Егда́ же сия́ соверша́ются, то́ е́сть, одева́ется трапе́за срачи́цею, и опоясу́ется ве́рвию, глаго́лется еди́ножды, два́жды и три́жды
псало́м 131:
Помяни́ Го́споди Дави́да, и всю́ кро́тость его́: я́ко кля́тся Го́сподеви, обеща́ся Бо́гу Иа́ковлю: а́ще вни́ду в селе́ние до́му моего́, или́ взы́ду на о́др посте́ли моея́, а́ще да́м со́н очи́ма мои́ма, и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се́ слы́шахом я́ во Евфра́фе, обрето́хом я́ в поля́х дубра́вы. Вни́дем в селе́ния Его́, поклони́мся на ме́сто, иде́же стоя́сте но́зе Его́. Воскресни́ Го́споди в поко́й Тво́й, Ты́ и киво́т святы́ни Твоея́. Свяще́нницы Твои́ облеку́тся пра́вдою, и преподо́бнии Твои́ возра́дуются. Дави́да ра́ди раба́ Твоего́, не отврати́ лице́ пома́заннаго Твоего́. Кля́тся Госпо́дь Дави́ду и́стиною, и не отве́ржется ея́: от плода́ чре́ва твоего́ посажду́ на престо́ле твое́м. А́ще сохраня́т сы́нове твои́ заве́т Мо́й, и свиде́ния Моя́ сия́, и́мже научу́ я́, и сы́нове и́х до ве́ка ся́дут на престо́ле твое́м. Я́ко избра́ Госпо́дь Сио́на, изво́ли и́ в жили́ще себе́. Се́й поко́й мо́й во ве́к ве́ка, зде́ вселю́ся, я́ко изво́лих и́. Лови́тву его́ благословля́яй благословлю́, ни́щыя его́ насыщу́ хле́бы, свяще́нники его́ облеку́ во спасе́ние, и преподо́бнии его́ ра́достию возра́дуются. Та́мо возращу́ ро́г Дави́дови, угото́вах свети́льник пома́занному Моему́. Враги́ его́ облеку́ студо́м, на не́мже процвете́т святы́ня Моя́.
По соверше́нии же глаго́лет архиере́й:
Сла́ва Бо́гу на́шему, во ве́ки веко́в.
Пото́м прино́сят свяще́нницы инди́тию, си́есть, ве́рхнее одея́ние.
Архиере́й кропи́т свято́ю водо́ю вну́трь и вне́, и одева́ют е́ю святы́й престо́л, и полага́ют илито́н, а на илито́не антими́нс (антими́нсы) и свято́е Ева́нгелие на Престо́ле, и честны́й кре́ст, и покрыва́ются пелено́ю, вся́ же сия́ кропя́тся свято́ю водо́ю.
Си́м же соверши́вшымся, глаго́лется псало́м 92:
Госпо́дь воцари́ся, в ле́поту облече́ся: облече́ся Госпо́дь в си́лу, и препоя́сася, и́бо утверди́ вселе́нную, я́же не подви́жится. Гото́в престо́л тво́й отто́ле: от ве́ка Ты́ еси́. Воздвиго́ша ре́ки Го́споди, воздвиго́ша ре́ки гла́сы своя́. Во́змут ре́ки сотре́ния своя́ от гласо́в во́д мно́гих. Ди́вны высоты́ морски́я, ди́вен в высо́ких Госпо́дь. Свиде́ния Твоя́ уве́ришася зело́, до́му Твоему́ подоба́ет святы́ня Го́споди, в долготу́ дни́й.
По псалме́ глаго́лет архиере́й:
Благослове́н Бо́г на́ш всегда́ ны́не и при́стно и во ве́ки веко́в. Ами́нь.
Та́же повели́т архиере́й нача́льствующему из сослужа́щих украша́ти предложе́ние со окропле́нием святы́я воды́, (и поставля́ются сосу́ды, и покро́вы, и пелено́ю покрыва́ются) ничто́же глаго́ля, то́кмо водо́ю свято́ю кропя́. Посе́м снима́ется со архиере́а за́пон, а протодиа́кон прино́сит архиере́ю кади́ло. Архиере́й же кади́т кресто́м Престо́л и же́ртвенник и ве́сь олта́рь, а протодиа́кон предхо́дит со свеще́ю, и глаго́лется
Псало́м 25:
Суди́ ми́ Го́споди, я́ко а́з незло́бою мое́ю ходи́х, и на Го́спода упова́я не изнемогу́. Искуси́ мя́ Го́споди, и испыта́й мя́, разжзи́ утро́бы моя́ и се́рдце мое́. Я́ко ми́лость Твоя́ пред очи́ма мои́ма е́сть, и благоугоди́х во и́стине Твое́й. Не седо́х с со́нмом су́етным, и со законопресту́пными не вни́ду. Возненави́дех це́рковь лука́внующих, и с нечести́выми не ся́ду. Умы́ю в непови́нных ру́це мои́, и обы́ду же́ртвенник Тво́й Го́споди. Е́же услы́шати ми́ гла́с хвалы́ Твоея́, и пове́дати вся́ чудеса́ Твоя́. Го́споди, возлюби́х благоле́пие до́му Твоего́, и ме́сто селе́ния сла́вы Твоея́. Да не погуби́ши с нечести́выми ду́шу мою́, и с му́жи крове́й живо́т мо́й. И́хже в руку́ беззако́ния, десни́ца и́х испо́лнися мзды́. А́з же незло́бою мое́ю ходи́х, изба́ви мя́ Го́споди, и поми́луй мя́. Нога́ моя́ ста́ на правоте́: в це́рквах благословлю́ Тя́ Го́споди.
Мно́гажды, до́ндеже окади́т олта́рь и всю́ це́рковь по обы́чаю.
Внегда́ же архиере́й кади́т, после́дуют по не́м дво́е архимандри́тов, или́ игу́менов, или́ свяще́нников, еди́н кропи́т сте́ны свято́ю водо́ю, а вторы́й держя́ сосу́д ми́ра, помазу́ет стручце́м, обмочя́ в ми́ро, крестообра́зно, пе́рвее во олтаре́ над го́рним ме́стом над окно́м, та́же над церко́вными враты́, я́же к за́паду це́ркве, та́же на ю́жной стране́, и на се́верной над две́рьми, или́ над окно́м на стена́х, а́ще же высо́ко, приставля́ется ле́ствица.
Соверши́вшу же ся́ кажде́нию и псалму́, и́дет архиере́й во олта́рь и глаго́лет:
Сла́ва Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
И прие́млет протодиа́кон кади́ло, и кади́т архиере́а три́жды.
Пото́м глаго́лет ектению́ ма́лую: Па́ки и па́ки: пред Престо́лом, по ле́вую страну́ архиере́а.
Возгла́са же архиере́й не глаго́лет, но протодиа́кон: Го́споду помо́лимся, и снима́ется ми́тра. Архиере́й же пред святы́м Престо́лом глаго́лет моли́тву велегла́сно:
Го́споди небесе́ и земли́, и́же святу́ю Твою́ Це́рковь неизрече́нною прему́дростию основа́вый, и во о́браз а́нгельскаго на небеси́ служе́ния, свяще́нничества чи́н на земли́ соста́вивый, Ты́ Влады́ко великода́рне, приими́ и ны́не моля́щихся на́с, не я́ко досто́йных су́щих о толи́ких проси́ти, но да превосхо́дство пока́жется Твоея́ бла́гости, не бо́ преста́л еси́ челове́ческому ро́ду многообра́зне благоде́я. Глави́зну же на́м дарова́л еси́ благодея́ний, е́же во пло́ти Единоро́днаго Твоего́ Сы́на прише́ствие, И́же на земли́ я́влься, и возсия́в су́щым во тьме́ све́т спасе́ния, принесе́ Себе́ о на́с же́ртву, и бы́сть ми́рови всему́ Очисти́лище, о́бщники на́с Своего́ воскресе́ния сотвори́в, и вознесы́йся на небеса́, облече́ Своя́ ученики́ и апо́столы, я́коже обеща́ся, си́лою свы́ше, я́же е́сть Ду́х Святы́й, покланя́емый и всеси́льный, И́же от Тебе́ Бо́га и Отца́ исходя́щ, И́мже бы́вше си́льнии де́лом и сло́вом, креще́ние преда́ша сыноположе́ния, це́ркви воздвиго́ша, утверди́ша же́ртвенники, свяще́нства положи́ша пра́вила и зако́ны, и́хже мы́ гре́шнии держа́ще преда́ние, припа́даем Ти́ ве́чному Бо́гу, и мо́лимся Ти́ благоутро́бне: к Твоему́ песнопе́нию созда́нный се́й хра́м, Боже́ственныя Твоея́ испо́лни сла́вы, и в не́м воздви́женный же́ртвенник святы́й (и предложе́нныя же́ртвенники святы́я) святы́х покажи́, я́ко на́м предстоя́щым ему́ (и́м) я́ко стра́шному Ца́рствия Твоего́ Престо́лу, неосужде́нно служи́ти Тебе́, мольбы́ о на́с и о лю́дех все́х возпосыла́ющым, и безкро́вную же́ртву Твое́й принося́щым бла́гости, о во́льных и нево́льных гресе́х в проще́ние, во управле́ние жития́, во исправле́ние блага́го жи́тельства, во исполне́ние вся́кия пра́вды.
Я́ко благослови́ся Твое́ Пресвято́е И́мя, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Свяще́нницы: Ами́нь.
Архиере́й же глаго́лет: Ми́р все́м.
Протодиа́кон: Главы́ ва́шя Го́сподеви приклони́те.
Архиере́й глаго́лет моли́тву та́йно:
Благодари́м Тя́ Го́споди Бо́же си́л, я́ко ю́же излия́л еси́ благода́ть на святы́я Твоя́ апо́столы, и на преподо́бныя на́ши отцы́, сподо́бил еси́ мно́гаго ра́ди Твоего́ человеколю́бия, и да́же до на́с гре́шных и непотре́бных ра́б Твои́х о́ную простре́ти, и мо́лимся Тебе́, Влады́ко многоми́лостиве, испо́лни сла́вы, и святы́ни, и благода́ти же́ртвенник се́й (же́ртвенники сия́) я́коже претворя́тися, я́же на не́м (на ни́х) приноси́мым Тебе́ безкро́вным же́ртвам, в пречи́стое Те́ло, и честну́ю Кро́вь Единоро́днаго Твоего́ Сы́на и Го́спода и Бо́га и Спа́са на́шего Иису́са Христа́, ко спасе́нию все́х люде́й Твои́х, и на́шего недосто́инства.
Возгла́с: Ты́ бо еси́ Бо́г на́ш, Бо́г ми́ловати и спаса́ти, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не, и при́сно, и во ве́ки веко́в.
Свяще́нницы: Ами́нь.
По соверше́нии сего́ прино́сится архиере́ю све́щник с невозжже́нною но́вою свеще́ю [Зри́. До сего́ освяще́ния вре́мени во олтари́ свещи́ никаковы́я не возжига́ти], ю́же возже́г архиере́й свои́ми рука́ми, поставля́ет на го́рнем ме́сте во́зле Престо́ла. Посе́м ключа́рь управля́ет, ка́ко идти́ по мо́щи в ину́ю це́рковь со кресты́, архиере́й же отдае́т Ева́нгелие, и кре́ст свяще́нникам, и свещы́ в олтаре́ раздае́т предстоя́щым, а вы́шед из олтаря́ на амво́не мирски́м лю́дем. Пото́м вхо́дит архиере́й в олта́рь, а из олтаря́ предъиду́щым свяще́нником, и́дет архиере́й Ца́рскими враты́ по мо́щи, прия́в по́сох у Ца́рских вра́т у по́дьяка, и глаго́лет:
С ми́ром изы́дем.
И та́ко и́дут по святы́я мо́щи по чи́ну: напреди́ же и́дут с хору́гви и со ико́ны, я́коже обы́чай хо́ду быва́ти со кресты́. Архиере́а же подде́ржат два́ диа́кона. Свяще́нники же и́дут со Ева́нгелием и кресто́м напреди́ архиере́а, а протодиа́кон со диа́коном кадя́т.
Пе́вчие пою́т тропа́рь, гла́с 4:
И́же во все́м ми́ре му́ченик Твои́х, я́ко багряни́цею и ви́ссом, кровьми́ Це́рковь Твоя́ украси́вшися, те́ми вопие́т Ти́ Христе́ Бо́же: лю́дем Твои́м щедро́ты Твоя́ низпосли́, ми́р жи́тельству Твоему́ да́руй, и душа́м на́шим ве́лию ми́лость.
Сла́ва, и ны́не, гла́с 8:
Я́ко нача́тки естества́ насади́телю тва́ри, вселе́нная прино́сит Ти́ Го́споди, богоно́сныя му́ченики, те́х моли́твами, в ми́ре глубо́це Це́рковь Твою́, жи́тельство Твое́, Богоро́дицею соблюди́ Многоми́лостиве.
И прише́д архиере́й во хра́м, иде́же поста́влены мо́щи, вхо́дит в олта́рь Ца́рскими враты́, с двумя́ предстоя́щими сослужи́тели, по́сох же отдае́т у Ца́рских вра́т по́дьяку, и покланя́ются святы́м моще́м, и осеня́ет предстоя́щих ту́.
Протодиа́кон же глаго́лет ектению́ ма́лую: Па́ки и па́ки: пред Ца́рскими враты́. Свяще́нницы: Го́споди поми́луй: вне́ олтаря́.
По ектении́ же архиере́й говори́т возгла́с пред Престо́лом:
Я́ко свя́т еси́ Бо́же на́ш, И́же на пострада́вших по Тебе́ честны́х му́ченицех почива́еши, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Пе́вчие: Ами́нь. И пою́т Трисвято́е.
Пото́м протодиа́кон: Го́споду помо́лимся.
Пе́вчие: Го́споди поми́луй.
И снима́ется с архиере́а ми́тра, и кладе́тся на блю́до. Архиере́й же глаго́лет моли́тву:
Го́споди Бо́же на́ш, ве́рный во словесе́х Твои́х, и нело́жный во обеща́ниих Твои́х, дарова́вый святы́м Твои́м му́чеником по́двигом до́брым подвиза́тися, и тече́ние благоче́стия соверши́ти, и ве́ру и́стиннаго испове́дания сохрани́ти, Са́м Влады́ко Пресвяты́й, те́х моле́нием умоле́н бу́ди, и да́руй на́м недосто́йным Твои́м рабо́м ча́сть и насле́дие име́ти с ни́ми, да подража́телие те́х бы́вше, сподо́бимся и предлежа́щих те́м благи́х.
Возгла́с: Ми́лостию и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Пе́вчие: Ами́нь.
Та́же: Ми́р все́м:
Протодиа́кон: Главы́ ва́шя:
Архиере́й же глаго́лет моли́тву та́йно:
Го́споди Бо́же на́ш, моли́твами Пресвяты́я Влады́чицы на́шея Богоро́дицы, и все́х святы́х Твои́х, дела́ ру́к на́ших недосто́йных ра́б Твои́х напра́ви, и во все́х угожда́ти на́с Твое́й бла́гости сподо́би.
Возгла́с: Бу́ди держа́ва Ца́рствия Твоего́ благослове́на и препросла́влена, Отца́ и Сы́на, и Свята́го Ду́ха, ны́не и при́сно, и во ве́ки веко́в.
Пе́вчие: Ами́нь.
Архиере́й прие́млет кади́ло у протодиа́кона и кади́т святы́я мо́щи три́жды, по три́жды, и отда́в кади́ло, и прие́м святы́й ди́кос со святы́ми мощьми́, покрове́н возду́хом по звезде́, поставля́ет на главу́ свою́, и и́дет Ца́рскими враты́, поддержи́мь первосвященнослужи́тельми, ди́скос же де́ржить са́м архиере́й обе́ма рука́ма, и та́ко и́дут по чи́ну. Напреди́ же и́дут с хору́гви и ико́ны хра́ма, пред ико́ною и́дут пе́вчие, та́же и́дут свяще́нницы, пото́м лампа́дчик с посошнико́м, посреди́ же с ми́трою. Та́же протодиа́кон с диа́коном с кади́лы, и кадя́т мо́щи и архиере́а, над ди́скосом же несу́т диа́коны две́ рипи́ды или́ четы́ре, пред архиере́ом иподиа́коны несу́т трики́рий и дики́рий.
Пе́вчие пою́т тропа́рь, гла́с 3:
И́же на ка́мени ве́ры созда́вый це́рковь Твою́, Бла́же, в то́й испра́ви моле́ния на́ша, и приими́ лю́ди в ве́ре вопию́щыя Тебе́: спаси́ ны́ Бо́же на́ш, спаси́ ны́.
А́ще же доста́нет вре́мя, пою́тся и сле́дующии ирмосы́, гла́с 3. Пе́снь 3:
Утвержде́ние на Тя́ наде́ющихся, утверди́ Го́споди Це́рковь, ю́же стяжа́л еси́ честно́ю Твое́ю кро́вию.
Гла́с 8. Пе́снь 3:
Небе́снаго кру́га Верхотво́рче Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.
Гла́с 5. Пе́снь 3:
Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х, Це́рковь Твою́ утверди́, еди́не Бла́же и Человеколю́бче.
Егда́ до́йдут до освяща́емаго хра́ма, обхо́дят его́ от за́падных двере́й на ю́жную страну́, к восто́ку вкру́г, а свяще́нник предходя́ кропи́т свято́ю водо́ю сте́ны хра́ма.
Егда́ же прии́дут пред церко́вная вели́кая врата́, пе́вчие пою́т тропари́, на гла́с 7:
Святи́и му́ченицы, и́же до́бре страда́вше и венча́вшеся, моли́теся ко Го́споду спасти́ся душа́м на́шим. Два́жды.
Сла́ва Тебе́, Христе́ Бо́же, апо́столов похвало́, и му́чеников весе́лие, и́хже про́поведь Тро́ица Единосу́щная. Еди́ножды.
Архиере́й снима́ет со главы́ своея́ ди́скос с мощьми́, поставля́ет его́ на угото́ванном столе́ пред церко́вными враты́, и покланя́ется святы́м моще́м три́жды, и налага́ется ми́тра, и осеня́ет свяще́нников на о́бе страны́.
Егда́ же пе́вчие пропою́т тропари́, и́дут вну́трь хра́ма.
Архиере́й же стоя́ пред святы́ми мощьми́, глаго́лет:
Благослове́н еси́ Христе́ Бо́же на́ш, всегда́, ны́не и при́сно, и во ве́ки веко́в.
Пе́вчие отвеща́ют вну́трь хра́ма: Ами́нь.
Архиере́й глаго́лет:
Возми́те врата́ кня́зи ва́шя, и возми́теся врата́ ве́чная и вни́дет Ца́рь сла́вы.
Пе́вчие же пою́т вну́трь хра́ма:
Кто́ е́сть се́й Ца́рь сла́вы;
А протодиа́кон подно́сит архиере́ю кади́ло. Архиере́й же приня́в, кади́т святы́й ди́скос три́жды, по три́жды, та́же свято́е Ева́нгелие и кре́ст, и ико́ны, пра́вую и ле́вую страну́, та́же священнослужи́телей.
Врата́м же затворе́нным, или́ за́навесом заве́шенным, со ико́нами, со Ева́нгелием и со кресты́, стоя́т свяще́нницы за столо́м пред две́рьми, обратя́ся на за́пад на столе́ же постлана́ пелена́, по угла́м стола́ четы́ре подсве́щника, или́ два́, а диа́коны рипи́ды держа́т над святы́ми мощьми́.
По кажде́нии же прие́млет протодиа́кон у архиере́а кади́ло, и кади́т архиере́а три́жды.
Егда́ пе́вчие пропою́т пе́рвое: Кто́ е́сть се́й Ца́рь сла́вы; Па́ки архиере́й глаго́лет второ́е: Возми́те врата́ кня́зи ва́шя, и возми́теся врата́ ве́чная, и вни́дет Ца́рь сла́вы.
Пе́вчие пою́т: Кто́ е́сть се́й Ца́рь сла́вы;
Посе́м протодиа́кон: Го́споду, помо́лимся.
Пе́вчие: Го́споди поми́луй.
С архиере́а отлага́ется ми́тра, и глаго́лет моли́тву велегла́сно:
Бо́же и О́тче Го́спода на́шего Иису́са Христа́, Сы́й благослове́н во ве́ки, И́же заве́сою пло́ти Его́ обнови́л еси́ на́м в перворо́дных Це́рковь на небесе́х впи́саных вхо́д, иде́же жи́тельство пра́зднующих и гла́с ра́дования, Са́м человеколю́бче Влады́ко, при́зри на ны́ гре́шныя и недосто́йныя рабы́ Твоя́, обновле́ние пра́зднующыя честна́го хра́ма и́мярек во о́браз святе́йшия Твоея́ Це́ркве, си́речь, са́маго телесе́ на́шего, е́же у́бо и хра́м Тво́й, (и у́ды Христа́ Твоего́), всехва́льным апо́столом Па́влом именова́ти сподо́бил еси́, и утверди́ его́ до сконча́ния ве́ка непоколеби́ма, и просла́влена в Тебе́, и сподо́би на́с в не́м хвалы́ и славосло́вия незазо́рна приноси́ти сла́ве Твое́й, и Единоро́дному Твоему́ Сы́ну Го́споду на́шему Иису́су Христу́, и Свято́му Твоему́ Ду́ху, в ра́зуме и вся́ком чу́встве, покланя́ющымся Тебе́ во стра́се Твое́м, Боже́ственных щедро́т досто́йным показа́тися, и благоприя́тным Твое́й бла́гости бы́ти мольба́м си́м, о на́с и все́х лю́дех Твои́х неизрече́нному Твоему́ благоутро́бию приноси́мым, моли́твами Пречи́стыя Влады́чицы на́шея Богоро́дицы, и Присноде́вы Мари́и.
Возгла́с: Я́ко свя́т еси́ Бо́же на́ш, и на святы́х почива́еши, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Пе́вчие: Ами́нь.
Архиере́й: Ми́р все́м.
Протодиа́кон: Главы́ ва́шя Го́сподеви приклони́те.
Пе́вчие: Тебе́ Го́споди.
Архиере́й чте́т моли́тву вхо́да та́йно:
Влады́ко Го́споди Бо́же на́ш, уста́вивый на небесе́х чи́ны, и во́инства а́нгел и арха́нгел во служе́ние Твоея́ сла́вы, сотвори́ со вхо́дом на́шим вхо́ду святы́х а́нгелов бы́ти, сослужа́щих на́м и сославосло́вящих Твою́ бла́гость.
Возгла́с: Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Пе́вчие: Ами́нь.
Та́же архиере́й прие́млет ди́скос со святы́ми мощьми́, и зна́менает врата́ хра́ма крестообра́зно, и глаго́лет:
Госпо́дь си́л, То́й е́сть Ца́рь сла́вы.
Пе́вчие пою́т та́кожде:
Госпо́дь си́л, То́й е́сть Ца́рь сла́вы.
Егда́ пе́вчие запою́т после́днее: Госпо́дь си́л, То́й е́сть Ца́рь сла́вы, в то́ вре́мя оте́млется сто́л, а архиере́й поставля́ет ди́скос с мощьми́ на главу́ свою́ и и́дут во хра́м. В то́ вре́мя пе́вчие пою́т тропа́рь, гла́с 4:
Я́коже вы́шния тве́рди благоле́пие, и ни́жнюю споказа́л еси́ красоту́ свята́го селе́ния сла́вы Твоея́, Го́споди, утверди́ сие́ во ве́к ве́ка, и приими́ на́ша в не́м непреста́нно приноси́мая Тебе́ моле́ния Богоро́дицею, все́х Животе́ и Воскресе́ние.
Архиере́й же вхо́дит во святы́й олта́рь Ца́рскими враты́, и поставля́ет ди́скос со святы́ми мощьми́ на святе́м Престо́ле, и покланя́ется святы́м моще́м, и налага́ется на архиере́а ми́тра. А протодиа́кон подно́сит архиере́ю кади́ло, и прие́м архиере́й, кади́т святы́я мо́щи три́жды, по три́жды, и на о́бе страны́ сослужи́телей, протодиа́кон же приня́в у архиере́а кади́ло, кади́т архиере́а три́жды. Архиере́й же помоля́ся осеня́ет сослужа́щих, и отлага́ет с ди́скоса возду́х и звезду́, а ключа́рь подно́сит свято́е ми́ро, и я́щичек для святы́х моще́й, что́ под Престо́л, по не́м подно́сит иподиа́кон воскомасти́х не́сколько приусты́л. И прие́млет архиере́й святы́я мо́щи, разверну́в из бума́жек, в кото́рых заве́рнуто по три́ части́цы, обле́пленныя во́ском, кладе́т, напре́дь ми́ром пома́зав, в я́щичек о́ныя, и залива́ет воскомасти́хом, и отдае́т ключарю́.
Ключа́рь же приня́в и целова́в архиере́йскую ру́ку, закрыва́ет я́щичек, и полага́ет под Престо́лом в сре́днем столпе́.
Та́же архиере́й и в антими́нс (или́ в антими́нсы), пома́зав пе́рвее в меше́чке святы́м ми́ром, влага́ет приугото́вленныя части́цы, и укрепля́ет воскомасти́хом же наро́читою лопа́точкою.
(зри́) Егда́ бли́з освяща́емаго хра́ма друго́й це́ркви не́сть, тогда́ святы́я мо́щи поставля́ются та́кожде с ве́чера на анало́гии пред о́бразом спаси́телевым, что́ у Ца́рских вра́т на пра́вой стране́, в то́мже хра́ме, его́же освяща́ть. Егда́ же прии́дет вре́мя по мо́щи идти́, выхо́дит архиере́й Ца́рскимиж враты́, и стано́вится проти́во моще́й на орлеце́, и помоля́ся осеня́ет сослужа́щих, и прие́млет архиере́й кади́ло, и кади́т святы́я мо́щи, три́жды по три́жды, а пе́вчие пою́т вышепи́санный тропа́рь:
И́же во все́м ми́ре му́ченик Твои́х, я́ко багряни́цею и ви́ссом, кровьми́ Це́рковь Твоя́ украси́вшися, те́ми вопие́т Ти́ Христе́ Бо́же: лю́дем Твои́м щедро́ты Твоя́ низпосли́, ми́р жи́тельству Твоему́ да́руй, и душа́м на́шим ве́лию ми́лость.
Сла́ва, и ны́не, конда́к:
Я́ко нача́тки естества́, Насади́телю тва́ри, вселе́нная прино́сит Ти́ Го́споди богоно́сныя му́ченики. Те́х моли́твами в ми́ре глубо́це Це́рковь Твою́, жи́тельство Твое́, Богоро́дицею соблюди́ Многоми́лостиве.
А ка́к пропою́т пе́вчие, протодиа́кон глаго́лет ектению́ ма́лую: Па́ки и па́ки: пред мощьми́, и все́ быва́ет по чи́ну, я́коже предписа́ся вы́ше сего́. И прие́млет архиере́й святы́я мо́щи на главу́, и и́дут со кресты́ вкру́г це́ркви по чи́ну. А егда́ не возмо́жно нико́ими ме́ры вокру́г хра́ма с мощьми́ ходи́ти: то́ пред церко́вная вели́кая врата́ выхо́дят, и поставля́ет архиере́й святы́я мо́щи на угото́ванном столе́, и покланя́ется святы́м моще́м, и прие́млет у протодиа́кона кади́ло, и кади́т святы́я мо́щи, три́жды по три́жды, и быва́ет все́ по предпи́санному чи́ну. По исполне́нии всего́ прие́млет архиере́й святы́я мо́щи на главу́ свою́, и зна́меновав о́ными церко́вная вели́кая врата́, па́ки поставля́ет на главу́ свою́. и́дет во олта́рь Ца́рскими враты́ по обы́чаю, и вше́д во олта́рь, обхо́дит со святы́ми мощьми́ вокру́г Престо́ла еди́ножды, вме́сто того́, е́же что́ идти́ бы́ло вкру́г хра́ма, и поставля́ет святы́я мо́щи на святе́й трапе́зе, и влага́ет о́ныя в я́щичек, и в антими́нсы, и про́чее де́йствует по чи́ну вы́ше пока́занному.
По исполне́нии того́, протодиа́кон глаго́лет: Го́споду помо́лимся.
Свяще́нницы: Го́споди поми́луй.
Архиере́й глаго́лет моли́тву:
Го́споди Бо́же на́ш, И́же и сию́ сла́ву, о Тебе́ пострада́вшым святы́м му́чеником дарова́вый, е́же се́ятися по все́й земли́ моще́м и́х, во святы́х хра́мех Твои́х, и плоды́ исцеле́ний прозяба́ти, Са́м Влады́ко, все́х благи́х Пода́тель сы́й, моли́твами святы́х, и́хже благоизво́лил еси́ положе́нию моще́й в се́м честне́м же́ртвеннице Твое́м (в си́х честны́х же́ртвенницех Твои́х) бы́ти, сподо́би на́с неосужде́нно безкро́вную Тебе́ на не́м (на ни́х) приноси́ти же́ртву, и да́руй на́м вся́ я́же ко спасе́нию проше́ния, возме́здие подая́й и в се́м пострада́вшым за свято́е и́мя Твое́, е́же чудоде́йствовати те́ми к на́шему спасе́нию.
Возгла́с: Я́ко Твое́ е́сть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Свяще́нницы: Ами́нь.
Посе́м протодиа́кону ре́кшу: Па́ки и па́ки прекло́ньше коле́на, Го́споду помо́лимся.
Архиере́й приклони́в коле́на своя́ (та́кожде и наро́д стоя́щий во хра́ме приклоня́ет коле́на своя́), чте́т сию́ моли́тву во услы́шание все́м:
Го́споди Бо́же на́ш, И́же тва́рь еди́ным сло́вом созда́вый, и во е́же бы́ти приведы́й, неизрече́нными же о́бразы разли́чно сию́ украси́вый, И́же надноси́мый на ню́ Тво́й Ду́х собра́вый, и со́лнечный се́й све́т на ню́ излия́вый во обновле́ние ея́, И́же уго́днику Твоему́ Моисе́ю вдохну́вый хвалу́ не́кую изря́дну приложи́ти добре́йшему Твоему́ созда́нию, и рещи́ ви́дети Тебе́ све́т я́ко до́брый, и дне́м нарещи́ се́й. Его́же у́бо и мы́ ви́дяще, и светле́йшее сие́ со́лнце, обновля́ющее на вся́к де́нь тва́рь, Тя́ и́стиннаго дне́ сла́вим Со́лнце, и све́т Тво́й невече́рний, И́же Сы́ном Твои́м на́м запове́давый обнови́тися на́шему естеству́ Святы́м Твои́м Ду́хом, я́ко и по да́ру сему́ пра́ведным возсия́ти я́ко со́лнцу, Тебе́ мо́лимся, и Тебе́ про́сим Отца́ Сло́ва, Го́спода и Бо́га на́шего: [ поне́же неизрече́нным Твои́м человеколю́бием, и безме́рною Твое́ю ми́лостию, тва́рь и дре́вний зако́н во о́браз Но́ваго Заве́та во Твое́м боговиде́нии у Сина́йския горы́, и в купине́ о́ной ди́вной, и в се́ни свиде́ния, и в предо́брейшем хра́ме Соломо́на о́наго обновле́ние прия́, ми́лостивным о́ком при́зри на ны́ гре́шныя и недосто́йныя рабы́ Твоя́, пребыва́ющыя в се́м дому́ небоподо́бном, вселе́нныя похвале́, же́ртвеннице и́стинном неизрече́нныя Твоея́ сла́вы, и низпосли́ Пресвята́го Твоего́ Ду́ха на ны́, и на насле́дие Твое́, и по Боже́ственному Дави́ду, обнови́ в сердца́х на́ших ду́х пра́вый и Ду́хом Влады́чним утверди́ на́с. И правосла́вным победи́тельная и побе́ды на ви́димыя и неви́димыя враги́ да́руй, на́м же единомы́слие и ми́р. Сотво́ршым же зда́ние сие́ и хра́ма освяще́ние, по любви́ к Тебе́ Бо́гу тща́тельно, оставле́ние согреше́ний пода́ждь, да́руй и́м я́же ко спасе́нию проше́ния, воздви́гни я́ к де́ланию за́поведей Твои́х, да́руй и́м обновле́ние да́ра Свята́го Твоего́ Ду́ха, да неосужде́нно покло́нятся Тебе́ Еди́ному и́стинному Бо́гу, и Его́же посла́л еси́ Иису́су Христу́, моли́твами Богоро́дицы, (и его́же е́сть хра́м) и все́х святы́х Твои́х, ами́нь.
И по моли́тве воста́в архиере́й и про́чии, протодиа́кон глаго́лет:
Заступи́, спаси́, поми́луй, возста́ви, и сохрани́ на́с Бо́же, Твое́ю благода́тию.
Ли́к: Го́споди, поми́луй.
Пресвяту́ю, Пречи́стую Преблагослове́нную, Сла́вную Влады́чицу на́шу Богоро́дицу, и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и ве́сь живо́т на́ш Христу́ Бо́гу предади́м.
Ли́к: Тебе́ Го́споди
Архиере́й возгла́с:
Я́ко свя́т еси́ Бо́же на́ш, и на святы́х по Тебе́ пострада́вших, честны́х му́ченицех почива́еши, и Тебе́ сла́ву возсыла́ем, Отцу́ и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
Та́же архиере́й и́дет на облача́льное свое́ ме́сто, а́ще е́сть, с по́сохом, а́ще не́т облача́льнаго ме́ста, стано́вится на предъолта́рном амво́не, а свяще́нницы стано́вятся на о́бе страны́ по чи́ну. Архиере́й же ста́в и помоля́ся, осеня́ет предстоя́щих.
Протодиа́кон глаго́лет ектению́:
Еще́ мо́лимся о блаже́нных и приснопа́мятных созда́телех свята́го хра́ма сего́.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии на́шея.
Го́споди, поми́луй три́жды.
Еще́ мо́лимся о плодонося́щих и доброде́ющих во святе́м и всечестне́м хра́ме се́м, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Архиере́й глаго́лет возгла́с:
Я́ко ми́лостив и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Пе́вчие: Ами́нь.
Ключа́рь подно́сит архиере́ю кре́ст на блю́де. Архиере́й прии́м кре́ст, на то́мже облача́льном ме́сте (или́ на предъолта́рном амво́не) стоя́, осеня́ет кресто́м по три́жды на четы́ре страны́: на восто́к, на за́пад, на ю́г и на се́вер. А протодиа́кон кади́т проти́во креста́ по три́жды, и преходя́ глаго́лет:
Го́споду помо́лимся, рце́м вси́.
Пе́вчие: Го́споди поми́луй. По три́жды.
По осене́нии, протодиа́кон: Прему́дрость.
Архиере́й же положи́в кре́ст ключарю́ на блю́до, и́дет (а́ще ли стоя́л на облача́льном ме́сте) на предъолта́рный амво́н с по́сохом, глаго́ля:
Пресвята́я Богоро́дице, спаси́ на́с.
Пе́вчие: Честне́йшую Херуви́м, и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя́ велича́ем.
Архиере́й: Сла́ва Тебе́ Христе́ Бо́же, упова́ние на́ше, сла́ва Тебе́.
Пе́вчие: Сла́ва, и ны́не: Го́споди поми́луй. Три́жды: Влады́ко, благослови́.
Архиере́й, возше́д на амво́н, и отда́в по́сох, па́ки прие́млет кре́ст, и глаго́лет отпу́ст со кресто́м. По отпу́сте возглаша́ет протодиа́кон и́х импера́торским вели́чествам и и́х импера́торским высо́чествам многоле́тствие.
По многоле́тствии же диа́кон подно́сит архиере́ю святу́ю во́ду, архиере́й кропи́т свято́ю водо́ю се́нь, за́пад, се́вер и ю́г. По окропле́нии са́м архиере́й целу́ет честны́й кре́ст, по не́мже и про́чии священнослужи́телие и лю́дие, и кропи́т и́х ка́ждаго свято́ю водо́ю.
А пе́вчие, до́ндеже прикла́дываются лю́дие, пою́т: Мно́гая ле́та.
По пропе́тии же многоле́тия, начина́ют часы́.
На литурги́и, проки́мен освяще́нию, и хра́му. Апо́стол к евре́ем, зача́ло 308, и хра́му. Ева́нгелие от Иоа́нна, зача́ло 37 от полу́, и хра́му.
Глава́ 40. Чи́н благослове́ния и освяще́ния сосу́дов служе́бных: си́есть ди́скоса, ча́ши, звезди́цы и лжи́цы, с тремя́ и́х покро́вцы, предложе́нных вку́пе
Поста́влену су́щу столу́ и че́стно покры́ту пред святы́ми враты́, полага́ются на не́м сосу́ды. Иере́й, оде́ян в епитрахи́ль и фело́нь, с кади́льницею исхо́дит святы́ми враты́, и покади́в крестообра́зно, начина́ет обы́чно:
Благослове́н Бо́г на́ш всегда́ ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 22:
Госпо́дь пасе́т мя́, и ничто́же мя́ лиши́т. На ме́сте зла́чне, та́мо всели́ мя́, на воде́ поко́йне воспита́ мя́. Ду́шу мою́ обрати́, наста́ви мя́ на стези́ пра́вды, и́мене ра́ди Своего́. А́ще бо и пойду́ посреде́ се́ни сме́ртныя, не убою́ся зла́, я́ко Ты́ со мно́ю еси́, же́зл Тво́й и па́лица Твоя́, та́ мя́ уте́шиста. Угото́вал еси́ предо мно́ю трапе́зу сопроти́в стужа́ющым мне́, ума́стил еси́ еле́ом главу́ мою́, и ча́ша Твоя́ упоява́ющи мя́, я́ко держа́вна. И ми́лость Твоя́ пожене́т мя́ вся́ дни́ живота́ моего́, и е́же всели́ти ми́ ся́ в до́м Госпо́день, в долготу́ дни́й.
Сла́ва, и ны́не: Аллилу́иа, три́жды.
Диа́кон: Го́споду помо́лимся.
Ли́к: Го́споди поми́луй.
Иере́й же чте́т моли́тву сию́:
Влады́ко Вседержи́телю Го́споди Бо́же на́ш, пода́вый Моисе́ю рабу́ Твоему́ зако́н, оправда́ния же и слу́жбы, и в святи́лищи Твое́м, в сла́ву Пресвято́му и́мени Твоему́ сооруже́нном, сосу́ды зла́ты и сре́бряны к приноше́нию разли́чных же́ртв Тебе́ и́стинному Бо́гу на́шему (я́же бы́ша се́нь и о́браз ны́нешней и́стинной безкро́вной на́шей же́ртвы) твори́ти и освяти́ти повеле́л еси́. Ты́ Са́м и ны́не человеколю́бче Го́споди, благослови́ ди́скос се́й, ча́шу, звезди́цу и лжи́цу с покро́вами и́х, и освяти́ я́ си́лою, де́йством и благода́тию всесвята́го и Животворя́щаго Твоего́ Ду́ха, я́ко да прино́сится Тебе́ на ни́х и́стинная, жива́я, безкро́вная и слове́сная же́ртва, Пресвято́е Те́ло вели́каго Бо́га и Спа́са на́шего Иису́са Христа́, Сы́на Твоего́, И́же на́с де́ля и на́шего ра́ди спасе́ния Тебе́ Бо́гу и Отцу́ Своему́ еди́ною Самаго́ Себе́ в же́ртву благоприя́тну на кре́стном же́ртвеннице принесе́. Тебе́ бо с Ни́м, и с Пресвяты́м, и Благи́м, и Животворя́щим Твои́м Ду́хом, подоба́ет вся́ческая сла́ва, че́сть и поклоне́ние ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
Иере́й же, прекло́нь главу́, глаго́лет моли́тву сию́ та́йно:
Го́споди Бо́же на́ш, при́зри ны́не на моли́тву недосто́йнаго мене́ раба́ Твоего́, и низпосли́ бога́тство благослове́ния Твоего́ на сосу́ды сия́, и освяти́ я́ Ду́хом Твои́м Святы́м во окропле́нии свяще́нныя сея́ воды́, во е́же бы́ти и́м досто́йное вмести́лище Пречи́стаго Те́ла, и Честны́я Кро́ве Христа́ Твоего́.
И возглаша́ет: Ты́ бо еси́ исто́чник освяще́ния, и Тебе́ со Единоро́дным Сы́ном, и с Пресвяты́м, и Благи́м, и Животворя́щим Твои́м Ду́хом, подоба́ет вся́кая сла́ва, че́сть и поклоне́ние, ны́не и при́сно, и во ве́ки веко́в.
Ли́к: Ами́нь.
И а́бие кропи́т сосу́ды свяще́нною водо́ю, глаго́ля:
Освяща́ются сосу́ды сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
А́ще у́бо служи́ти а́бие и́мать, взе́млет са́м сосу́ды, и вно́сит я́ в олта́рь, и поста́вив на же́ртвеннице, слу́жит и́ми. А́ще же служи́ти не бу́дет, сотвори́в обы́чно дневны́й отпу́ст, вно́сит сосу́ды в олта́рь.
Глава́ 41. Моли́тва над еди́ным ди́скосом но́вым
При освяще́нии еди́наго то́чию ди́скоса, нача́ло быва́ет обы́чное, псало́м 22, и чте́тся сия́ же вышепредложе́нная моли́тва, с опуще́нием то́кмо наименова́ний про́чих сосу́дов, и моли́тва главоприклоне́ния, и кропле́ние, я́коже пока́зано в предъиду́щей главе́.
Глава́ 42. Моли́тва над поти́ром еди́ным, си́есть, ча́шею но́вою
Благослове́н Бо́г на́ш всегда́ ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 22.
Госпо́дь пасе́т мя́, и ничто́же мя́ лиши́т. На ме́сте зла́чне, та́мо всели́ мя́, на воде́ поко́йне воспита́ мя́. Ду́шу мою́ обрати́, наста́ви мя́ на стези́ пра́вды, и́мене ра́ди Своего́. А́ще бо и пойду́ посреде́ се́ни сме́ртныя, не убою́ся зла́, я́ко Ты́ со мно́ю еси́, же́зл Тво́й и па́лица Твоя́, та́ мя́ уте́шиста. Угото́вал еси́ предо мно́ю трапе́зу сопроти́в стужа́ющым мне́, ума́стил еси́ еле́ом главу́ мою́, и ча́ша Твоя́ упоява́ющи мя́, я́ко держа́вна. И ми́лость Твоя́ пожене́т мя́ вся́ дни́ живота́ моего́, и е́же всели́ти ми́ ся́ в до́м Госпо́день, в долготу́ дни́й.
Сла́ва, и ны́не: Аллилу́иа, три́жды.
Та́же диа́кону ре́кшу: Го́споду помо́лимся.
Ли́к: Го́споди поми́луй.
Иере́й же чте́т моли́тву сию́:
Влады́ко Вседержи́телю, Го́споди Бо́же оте́ц на́ших, Тебе́ мо́лимся, и Тебе́ призыва́ем, и приле́жно про́сим: низпосли́ благода́ть Пресвята́го Всеосвяща́ющаго и Животворя́щаго Твоего́ Ду́ха на ча́шу сию́, (а́ще су́ть покро́вцы и лжи́ца, глаго́ли и сие́: и на все́ украше́ние его́) и благослови́, очи́сти, и освяти́ ю́, я́коже благослови́л, очи́стил и освяти́л еси́ ча́шу свяще́нника Твоего́ Мелхиседе́ка, и ча́шу святы́х апо́стол на та́йной ве́чери Христа́ Твоего́ и досто́йну же́ртвенника Твоего́ бы́ти сотвори́, во е́же приноси́тися в не́й Тебе́ Бо́гу и Отцу́ умилостиви́тельной безкро́вной же́ртве, Те́ла и Кро́ве Единоро́днаго Сы́на Твоего́, Го́спода Бо́га и Спа́са на́шего Иису́са Христа́, с Ни́мже Тебе́, и Пресвято́му и Животворя́щему Твоему́ Ду́ху, подоба́ет вся́кая сла́ва, че́сть и поклоне́ние, ны́не и при́сно, и во ве́ки веко́в.
Ли́к: Ами́нь.
Про́чее же, ка́к пока́зано в преъиду́щей главе́.
Глава́ 43. Моли́тва е́же осо́бне благослови́ти но́вую ди́скосную звезду́
Ре́кшу же диа́кону: Го́споду помо́лимся.
И ли́ку: Го́споди поми́луй.
Иере́й чте́т моли́тву сию́:
Го́споди Иису́се Христе́ Бо́же на́ш, в верте́пе от Де́вы роди́выйся, и волхвы́ звездо́ю к поклоне́нию Своему́ наста́вивый, посли́ ны́не, смире́нно мо́лим Тя́, небе́сное Твое́ благослове́ние на звезду́ сию́, и благослови́ и освяти́ ю́, я́коже бы́ти е́й досто́йное ору́жие к служе́нию святы́м Твои́м Та́йнам, и в воспомина́ние и славосло́вие боготеле́снаго Твоего́ от Де́вы рождества́. Ты́ бо еси́ благословля́яй и освяща́яй вся́ческая, Христе́ Бо́же на́ш, и Тебе́ сла́ву возсыла́ем со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
И а́бие по моли́тве главоприклоне́ния (Го́споди Бо́же на́ш, при́зри ны́не, я́коже пока́зано в преъиду́щей главе́, кропи́т звезду́ водо́ю свяще́нною, глаго́ля:
Освяща́ется звезда́ сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
Моли́тва е́же осо́бне благослови́ти но́вую лжи́цу к боже́ственным та́йнам.
Диа́кон: Го́споду помо́лимся.
Ли́к: Го́споди поми́луй.
Иере́й же чте́т моли́тву сию́:
Го́споди Бо́же Вседержи́телю, у́глем от Серафи́ма клеща́ми взя́тым, и прикоснове́нием усты́ проро́ка очища́ющим, прообрази́вый иногда́ си́лу Боже́ственных Та́ин Те́ла и Кро́ве Христа́ Твоего́, лжи́цею ны́не ве́рным Твои́м лю́дем во очище́ние грехо́вных скве́рн подава́емых, при́зри ны́не ми́лостивно на моли́тву на́шу, и низпосли́ небе́сное Твое́ благослове́ние на лжи́цу сию́, и благослови́ и освяти́ ю́, во е́же бы́ти е́й досто́йный сосу́д к прия́тию и подая́нию Пречи́стаго Те́ла, и Честны́я Кро́ве Христа́ Твоего́, во оставле́ние грехо́в все́х люде́й Твои́х. Ты́ бо еси́ Исто́чник освяще́ния, и Пода́тель вся́ческих бла́г, и Тебе́ сла́ву и благодаре́ние, и поклоне́ние возсыла́ем, со Единоро́дным Твои́м Сы́ном, и с Пресвяты́м и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й же сотвори́в моли́тву главоприклоне́ния (Го́споди Бо́же на́ш, при́зри ны́не, а́бие кропи́т лжи́цу свяще́нною водо́ю, глаго́ля та́яжде, я́же и над звездо́ю, си́есть:
Освяща́ется лжи́ца сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́ и Сы́на, и Свята́го Ду́ха, ами́нь. Три́жды.
И та́ко сочетава́ет ю́ к ины́м свяще́нным сосу́дом.
Ве́стно же бу́ди, я́ко а́ще и ели́жды сосу́ды сия́ служе́бныя обновлены́, или́ изчи́щены бу́дут руко́ю не свяще́нною, толи́жды сицевы́м преднапи́санным благослове́нием благослови́ти, и святи́ти я́ подоба́ет, и́бо ина́ко творя́, о иере́е, сме́ртно согреши́ши, я́ко уничижи́тель Христо́вых Та́ин.
Глава́ 44. Моли́тва, е́же благослови́ти но́выя покро́вцы, к покрове́нию Святы́х Та́ин служа́щыя
Диа́кону ре́кшу: Го́споду помо́лимся.
И кли́ру: Го́споди поми́луй.
Иере́й чте́т моли́тву сию́:
Го́споди Бо́же Вседержи́телю, одея́йся све́том я́ко ри́зою, облага́яй не́бо о́блаки, и покрыва́яй вода́ми превы́спренняя Своя́, при́зри ны́не, смире́нно мо́лим Тя́, на приле́жное моле́ние на́ше, и низпосли́ небе́сное Твое́ благослове́ние на покро́вцы сия́ (или́ на покро́вец се́й) и благослови́, очи́сти и освяти́ я́ (или́ его́) во е́же бы́ти и́м [или́ ему́] досто́йным (или́ досто́йну) к покрове́нию святы́х и Боже́ственных Та́ин Те́ла и Кро́ве Христа́ Твоего́, с Ни́мже благослове́н еси́, с Пресвяты́м, и Благи́м, и Животворя́щим Твои́м Ду́хом, ны́не, и при́сно, и во ве́ки веко́в.
Ли́к: Ами́нь.
Иере́й же кропи́т покро́вцы водо́ю свяще́нною, глаго́ля то́жде, е́же и над звездо́ю, си́есть:
Освяща́ются покро́вцы сия́ (или́ освяща́ется покро́вец се́й) благода́тию Пресвята́го Ду́ха, окропле́нием воды́ сея́ свяще́нныя во и́мя Отца́, и Сы́на, и Свята́го Ду́ха, ами́нь. Три́жды.
Глава́ 45. Чи́н благослове́ния но́ваго киво́та, или́ сосу́да, в не́мже храни́мы бы́ти и́мут Боже́ственныя Христо́вы Та́йны
Поста́влену су́щу столу́, и че́стно покрове́нну пред ца́рскими две́рьми, и на не́м но́вому киво́ту, иере́й исхо́дит ца́рскими враты́, оде́ян в епитрахи́ль и фело́нь, с кади́льницею, и покади́в крестообра́зно киво́т, начина́ет обы́чно:
Благослове́н Бо́г на́ш всегда́ ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 131:
Помяни́ Го́споди Дави́да, и всю́ кро́тость его́: я́ко кля́тся Го́сподеви, обеща́ся Бо́гу Иа́ковлю: а́ще вни́ду в селе́ние до́му моего́, или́ взы́ду на о́др посте́ли моея́, а́ще да́м со́н очи́ма мои́ма, и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се́ слы́шахом я́ во Евфра́фе, обрето́хом я́ в поля́х дубра́вы. Вни́дем в селе́ния Его́, поклони́мся на ме́сто, иде́же стоя́сте но́зе Его́. Воскресни́ Го́споди в поко́й Тво́й, Ты́ и киво́т святы́ни Твоея́. Свяще́нницы Твои́ облеку́тся пра́вдою, и преподо́бнии Твои́ возра́дуются. Дави́да ра́ди раба́ Твоего́, не отврати́ лице́ пома́заннаго Твоего́. Кля́тся Госпо́дь Дави́ду и́стиною, и не отве́ржется ея́: от пло́да чре́ва твоего́ посажду́ на престо́ле твое́м. А́ще сохраня́т сы́нове твои́ заве́т Мо́й и свиде́ния Моя́ сия́, и́мже научу́ я́, и сы́нове и́х до ве́ка ся́дут на престо́ле твое́м. Я́ко избра́ Госпо́дь Сио́на, изво́ли и́ в жили́ще Себе́. Се́й поко́й Мо́й во ве́к ве́ка, зде́ вселю́ся, я́ко изво́лих и́. Лови́тву его́ благословля́яй благословлю́, ни́щыя его́ насы́щу хле́бы. Свяще́нники его́ облеку́ во спасе́ние и преподо́бнии его́ ра́достию возра́дуются. Та́мо возращу́ ро́г Дави́дови, угото́вах свети́льник пома́занному Моему́. Враги́ его́ облеку́ студо́м, на не́мже процвете́т святы́ня Моя́.
Сла́ва, и ны́не: Аллилу́иа, три́жды.
Диа́кон: Го́споду помо́лимся.
Ли́к: Го́споди поми́луй.
Иере́й чте́т моли́тву сию́:
Го́споди Бо́же на́ш, име́яй престо́л не́бо, и подно́жие зе́млю, а́ще и вся́ тва́рь вмести́ти Тя́ не мо́жет, ниже́ у́м а́нгельский и челове́ческий вели́чество сла́вы Твоея́ пости́гнути, и по достоя́нию сказа́ти возмога́ет, но Ты́ милосе́рдия ра́ди ми́лости и человеколю́бия, во чре́ве Деви́честем неизрече́нно вмести́тися изво́лил еси́, и челове́к бы́в, Бо́г сы́й и́стинен, да челове́ка Себе́ присво́иши, под ви́димым ви́дом хле́ба и вина́, Пло́ть и Кро́вь Свою́ в сне́дь ве́рным да́л еси́. Я́ко Бо́г у́бо, а́ще и везде́ еси́, и вся́ исполня́еши, но я́коже Бо́г и челове́к, на небеси́ одесну́ю Отца́, и на земли́ в Пресвяты́х то́чию Те́ла и Кро́ве Твоея́ та́йнах и́стинно бы́ти изволя́еши, те́мже ны́не смире́нно молю́ Тя́, при́зри ми́лостивно на моли́тву на́шу, и на сосу́д се́й, в сла́ву Твою́ сооруже́нный, и благослове́ние Твое́ небе́сное низпосли́ на́нь, благослови́, очи́сти и освяти́ его́, во е́же бы́ти ему́ досто́йное вмести́лище, но́вый же гро́б и храни́лище Святы́м и Животворя́щым Та́йнам Пресвята́го Те́ла и Честны́я Кро́ве Твоея́. Ты́ бо еси́ освяще́ние на́ше, и Тебе́ сла́ву возсыла́ем со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
Иере́й же, главу́ приклони́в, та́йно чте́т моли́тву сию́:
Го́споди Бо́же на́ш, приклони́ у́хо Твое́ и услы́ши мя́, И́же ми́лости ра́ди и человеколю́бия с на́ми неотсту́пно до сконча́ния ве́ка пребыва́ти обеща́лся еси́, и посли́ благода́ть Пресвята́го Твоего́ Ду́ха, и в окропле́нии свяще́нныя сея́ воды́, благослови́ и освяти́ сосу́д се́й, на хране́ние Боже́ственных Та́ин Те́ла и Кро́ве Твоея́ сооруже́нный.
И возглаша́ет: Ты́ бо еси́ благословля́яй и освяща́яй вся́ческая, Христе́ Бо́же на́ш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й же взе́м свяще́нную во́ду, кропи́т е́ю киво́т, глаго́ля:
Освяща́ется киво́т се́й благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́ и Сы́на, и Свята́го Ду́ха, ами́нь. Три́жды.
Сотвори́в же обы́чный дневны́й отпу́ст, взе́млет свяще́нный киво́т, и отно́сит его́ на святу́ю трапе́зу, и влага́ет в не́м Боже́ственныя Та́йны.
Глава́ 46. Чи́н благослове́ния илито́на
Из то́нкой и до́брой льняно́й или́ ше́лковой мате́рии величино́ю не́сколько бо́лее антими́нса, пригото́вленный илито́н, простира́ется на свято́й трапе́зе, иере́й же оде́ян в епитрахи́ль и фело́нь, покади́в крестообра́зно святу́ю трапе́зу, ста́нет спреди́, и обы́чно начина́ет:
Благослове́н Бо́г на́ш всегда́ ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 110:
Испове́мся Тебе́ Го́споди, все́м се́рдцем мои́м, в сове́те пра́вых и со́нме. Ве́лия дела́ Госпо́дня, изы́скана во все́х во́лях Его́. Испове́дание и великоле́пие де́ло Его́, и пра́вда Его́ пребыва́ет в ве́к ве́ка. Па́мять сотвори́л е́сть чуде́с Свои́х, ми́лостив и ще́др Госпо́дь. Пи́щу даде́ боя́щымся Его́, помяне́т в ве́к заве́т Сво́й. Кре́пость де́л Свои́х возвести́ лю́дем Свои́м, да́ти и́м достоя́ние язы́к. Дела́ ру́к Его́ и́стина и су́д, ве́рны вся́ за́поведи Его́, утверже́ны в ве́к ве́ка, сотворе́ны во и́стине и правоте́. Избавле́ние посла́ лю́дем Свои́м: запове́да в ве́к заве́т Сво́й. Свя́то и стра́шно и́мя Его́. Нача́ло прему́дрости стра́х Госпо́день, ра́зум же бла́г все́м творя́щым и́. Хвала́ Его́ пребыва́ет в ве́к ве́ка.
Сла́ва, и ны́не: Аллилу́иа, три́жды.
Диа́кон: Го́споду помо́лимся.
Ли́к: Го́споди поми́луй.
Иере́й чте́т моли́тву сию́:
Го́споди Иису́се Христе́ Бо́же на́ш, Сы́не и Сло́ве Бо́га жива́го, изво́ливый спасе́ния ра́ди на́шего от Пречи́стыя Де́вы воплоти́тися, и по Рождестве́ пелена́ми пови́т бы́ти, и в я́слех положи́тися, по сме́рти же кре́стной, ю́же на́с де́ля во́лею претерпе́л еси́, плащани́цею чи́стою и сударе́м обви́т, и во гро́бе положе́н бы́ти, Тебе́ ны́не про́сим и смире́нно мо́лим, посли́ Боже́ственное благослове́ние и благода́ть Свята́го Твоего́ Ду́ха, на илито́н се́й, и благослови́, очи́сти и освяти́ его́, во е́же бы́ти ему́ досто́йну, е́же на не́м освяти́тися Боже́ственным та́йнам Пресвята́го Те́ла и Честны́я Кро́ве Твоея́, в сла́ву Твою́ и Безнача́льнаго Твоего́ Отца́, и Единосу́щнаго и Животворя́щаго Твоего́ Ду́ха, и в спасе́ние все́х люде́й Твои́х, я́ко Ты́ еси́ освяще́ние на́ше, и Тебе́ сла́ву возсыла́ем, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
Иере́й же, главу́ приклони́в, та́йно глаго́лет моли́тву сию́:
Го́споди Иису́се Христе́ Бо́же на́ш, приле́жную сию́ мольбу́ приими́ от на́с недосто́йных рабо́в Твои́х, и я́ко Бла́г и Человеколю́бец, благоволи́ ны́не низпосла́ти благослове́ние Твое́ свято́е на илито́н се́й, и благослови́, и освяти́ его́ Ду́хом Твои́м Святы́м, в окропле́нии воды́ сея́ свяще́нныя, я́коже освяти́л еси́ святы́я Твоя́ гро́бныя пелены́, во е́же бы́ти ему́ но́вому сударю́, и синдо́ну (плащани́це) Пресвято́му Те́лу и Кро́ве Твоея́ Честны́я.
И возглаша́ет: Ты́ бо еси́ благословля́яй и освяща́яй вся́ческая, Христе́ Бо́же на́ш, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
И кропи́т иере́й илито́н свяще́нною водо́ю, глаго́ля:
Освяща́ется илито́н се́й благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
И а́бие твори́т обы́чный дневны́й отпу́ст.
Глава́ 47. Чи́н благослове́ния или́ освяще́ния но́вых свяще́ннических оде́жд: си́есть стихаря́, епитрахи́ля, по́яса, по́ручей и фело́ни
Пред Ца́рскими врата́ми на пригото́вленном столе́ полага́ются но́выя оде́жды, к освяще́нию принесе́нныя, иере́й же в епитрахи́ли и фело́ни с кади́льницею, исхо́дит в Ца́рския две́ри, и покади́в крестообра́зно оде́жды, обы́чно начина́ет:
Благослове́н Бо́г на́ш всегда́ ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 132:
Се́ что́ добро́, или́ что́ красно́? Но е́же жи́ти бра́тии вку́пе. Я́ко ми́ро на главе́, сходя́щее на браду́, браду́ Ааро́ню, сходя́щее на оме́ты оде́жды его́, я́ко роса́ Аермо́нская, сходя́щая на го́ры Сио́нския, я́ко та́мо запове́да Госпо́дь благослове́ние и живо́т до ве́ка.
Сла́ва, и ны́не: Аллилу́иа, три́жды.
Диа́кон: Го́споду помо́лимся.
Ли́к: Го́споди поми́луй.
Иере́й чте́т моли́тву сию́:
Го́споди Бо́же Вседержи́телю, изнача́ла поле́зная челове́ческому ро́ду вся́ де́йствуяй, хра́мы руко́ю челове́ческою сотворе́нная И́мени Твоему́ Свято́му созда́ти, и ты́я в сла́ву Свою́ освяща́ти, и ме́сто селе́ния сла́вы Твоея́ нарица́ти восхоте́вый? И рабо́м Твои́м Моисе́ом одея́ния архиере́йская, иере́йская же и леви́тская, и ина́я разли́чная украше́ния в благоле́пие и красоту́ святи́лища и олтаря́ Твоего́ бы́ти повеле́вый, услы́ши ми́лостивно ны́не моле́ния на́ша, и оде́жды сия́ (имену́ет и́х), в че́сть и сла́ву Пресвята́го и́мене Твоего́, в украше́ние же и благоле́пие служи́телем свята́го Твоего́ олтаря́, и святы́х Твои́х Та́ин угото́вленныя, мно́ю смире́нным и недосто́йным рабо́м Твои́м благослови́, очи́сти и освяти́, я́ко да к служе́нию святы́м Твои́м Та́йнам, и ко вся́кому славосло́вию Пресвята́го и́мене Твоего́ досто́йны бы́ти явя́тся, и свяще́нным служи́телем Твои́м те́ми одева́ющымся, да бу́дут в избавле́ние и покро́в от все́х ко́зней и собла́знов вра́жиих, в Твое́ же благоугожде́ние, и досто́йное служе́ние Святы́м Твои́м Та́йнам, и в снабде́ние Твоея́ благода́ти и милосе́рдия, благода́тию и щедро́тами, и человеколю́бием Единоро́днаго Твоего́ Сы́на, с Ни́мже благослове́н еси́, с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
Иере́й же, прекло́нь главу́, чте́т та́йно моли́тву сию́:
Влады́ко Бо́же Вседержи́телю, все́х благи́х Пода́телю и освяще́ния Исто́чниче, при́зри ны́не на моли́тву на́шу, и оде́жды сия́ (имену́ет и́х) в украше́ние и благоле́пие свяще́нных служи́телей Твои́х сооруже́нныя, благода́тию Пресвята́го Твоего́ Ду́ха, окропле́нием воды́ сея́ свяще́нныя благослове́нны, свя́ты и освяще́нны, и все́х те́ми оде́ющихся досто́йны Святы́м Твои́м Та́йнам служи́ти, и Тебе́ благоугожда́ти всегда́ сотвори́.
И возглаша́ет: Я́ко Ты́ еси́ освяще́ние на́ше, и Тебе́ сла́ву возсыла́ем со Единоро́дным Твои́м Сы́ном, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й же взе́м свяще́нную во́ду, кропи́т е́ю предлежа́щыя оде́жды, глаго́ля:
Освяща́ются оде́жды сия́ (имену́ет и́х) благода́тию Всесвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
И а́ще а́бие литургиса́ти и́мать, не творя́ отпу́ста, са́м иере́й вно́сит и́х во святы́й олта́рь, облача́ется в ня́, и слу́жит, а́ще же служи́ти не и́мать, сотвори́в обы́чный дневны́й отпу́ст, вно́сит я́ в олта́рь, и на свято́й трапе́зе полага́ет.
Глава́ 48. Чи́н благослове́ния инди́тий, или́ оде́жд и покрыва́л Боже́ственныя трапе́зы и же́ртвенника
Положе́нным бы́вшым си́м на столе́ пред святы́ми враты́, и су́щей ту́ и воде́ свяще́нной, иере́й исхо́дит из олтаря́, оде́ян в епитрахи́ль и фело́нь, и покади́в крестообра́зно, начина́ет обы́чно:
Благослове́н Бо́г на́ш всегда́, ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 92:
Госпо́дь воцари́ся, в ле́поту облече́ся: облече́ся Госпо́дь в си́лу, и препоя́сася, и́бо утверди́ вселе́нную, я́же не подви́жится. Гото́в престо́л Тво́й отто́ле: от ве́ка Ты́ еси́. Воздвиго́ша ре́ки Го́споди, воздвиго́ша ре́ки гла́сы своя́. Во́змут ре́ки сотре́ния своя́, от гласо́в во́д мно́гих. Ди́вны высоты́ морски́я, ди́вен в высо́ких Госпо́дь. Свиде́ния Твоя́ уве́ришася зело́, до́му Твоему́ подоба́ет святы́ня Го́споди, в долготу́ дни́й.
Сла́ва, и ны́не: Аллилу́иа, три́жды.
Диа́кон: Го́споду помо́лимся.
Ли́к: Го́споди поми́луй.
Иере́й же чте́т моли́тву сию́:
Го́споди Бо́же О́тче Вседержи́телю, рабу́ Твоему́ законополо́жнику Моисе́ю на Сина́йстей горе́ разли́чная украше́ния, покрыва́ла же и пла́тна, в употребле́ние служе́ния ски́нии свиде́ния, и зако́ннаго Твоего́ святи́лища твори́ти повеле́вый, Ты́ и ны́не, приле́жно мо́лим Тя́, я́коже тогда́ о́ная благоутро́бне прии́м, руко́ю Ааро́нею освяти́л еси́, и сия́ ми́лостивно прии́м, Ду́хом Твои́м Святы́м, руко́ю мене́ гре́шнаго благослови́, очи́сти и освяти́, и досто́йна к покрове́нию и обви́тию Боже́ственнаго Престо́ла и же́ртвенника возлю́бленнаго Сы́на Твоего́, Го́спода на́шего Иису́са Христа́, бы́ти сотвори́. От Тебе́ бо свы́ше вся́ко дая́ние бла́го, и вся́кий да́р соверше́нный исхо́дит, и Тебе́ сла́ву возсыла́ем, со Единоро́дным Твои́м Сы́ном, и с Пресвяты́м и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Иере́й же, главу́ приклоня́, глаго́лет моли́тву сию́:
Приклони́ Го́споди у́хо Твое́, и услы́ши мя́ недосто́йнаго раба́ Твоего́, и сия́ покрыва́льная пла́тна, к употребле́нию свята́го олтаря́ и же́ртвенника Христа́ Твоего́ устро́енная, благода́тию Твое́ю всеосвяща́ющею, в окропле́нии воды́ сея́ свяще́нныя, благослови́, очи́сти и освяти́.
И возглаша́ет: Ты́ бо еси́ благословля́яй и освяща́яй вся́ческая Бо́же на́ш, и Тебе́ сла́ву возсыла́ем, со Единоро́дным Твои́м Сы́ном, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й же а́бие кропи́т покрыва́ла, глаго́ля:
Освяща́ются покрыва́ла сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
И сотвори́в обы́чный отпу́ст, взе́млет и́х са́м, и покрыва́ет и́ми Престо́л и же́ртвенник.
Глава́ 49. Чи́н благослове́ния и освяще́ния новосооруже́ннаго Креста́
Поста́влену бы́вшу столу́ че́стно покрове́нну пред святы́ми враты́, иере́й в епитрахи́ль и фело́нь оде́ян, исхо́дит, и крестообра́зно покади́в но́вый кре́ст, начина́ет обы́чно:
Благослове́н Бо́г на́ш всегда́, ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 131:
Помяни́ Го́споди Дави́да, и всю́ кро́тость его́: я́ко кля́тся Го́сподеви, обеща́ся Бо́гу Иа́ковлю: а́ще вни́ду в селе́ние до́му моего́, или́ взы́ду на о́др посте́ли моея́, а́ще да́м со́н очи́ма мои́ма, и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се́ слы́шахом я́ во Евфра́фе, обрето́хом я́ в поля́х дубра́вы. Вни́дем в селе́ния Его́, поклони́мся на ме́сто, иде́же стоя́сте но́зе Его́. Воскресни́ Го́споди в поко́й Тво́й, Ты́ и киво́т святы́ни Твоея́. Свяще́нницы Твои́ облеку́тся пра́вдою, и преподо́бнии Твои́ возра́дуются. Дави́да ра́ди раба́ Твоего́, не отврати́ лице́ пома́заннаго Твоего́. Кля́тся Госпо́дь Дави́ду и́стиною, и не отве́ржется ея́: от плода́ чре́ва твоего́ посажду́ на престо́ле твое́м. А́ще сохраня́т сы́нове твои́ заве́т Мо́й, и свиде́ния Моя́ сия́, и́мже научу́ я́, и сы́нове и́х до ве́ка ся́дут на престо́ле твое́м. Я́ко избра́ Госпо́дь Сио́на, изво́ли и́ в жили́ще Себе́. Се́й поко́й Мо́й во ве́к ве́ка, зде́ вселю́ся, я́ко изво́лих и́. Лови́тву его́ благословля́яй благословлю́, ни́щыя его́ насыщу́ хле́бы, свяще́нники его́ облеку́ во спасе́ние, и преподо́бнии его́ ра́достию возра́дуются. Та́мо возращу́ ро́г Дави́дови, угото́вах свети́льник пома́занному Моему́. Враги́ его́ облеку́ студо́м, на не́мже процвете́т святы́ня Моя́.
Та́же, псало́м 59:
Бо́же, отри́нул ны́ еси́, и низложи́л еси́ на́с: разгне́вался еси́, и уще́дрил еси́ на́с. Стря́сл еси́ зе́млю, и смути́л еси́ ю́, исцели́ сокруше́ние ея́, я́ко подви́жеся. Показа́л еси́ лю́дем Твои́м жесто́кая, напои́л еси́ на́с вино́м умиле́ния. Да́л еси́ боя́щымся Тебе́ зна́мение, е́же убежа́ти от лица́ лу́ка. Я́ко да изба́вятся возлю́бленнии Твои́, спаси́ десни́цею Твое́ю, и услы́ши мя́. Бо́г возглаго́ла во святе́м Свое́м: возра́дуюся, и разделю́ Сики́му, и юдо́ль жили́щ разме́рю. Мо́й е́сть Галаа́д, и Мо́й е́сть Манасси́й, и Ефре́м – кре́пость главы́ Моея́, Иу́да – ца́рь Мо́й. Моа́в – коно́б упова́ния Моего́, на Идуме́ю простру́ сапо́г Мо́й, Мне́ иноплеме́нницы покори́шася. Кто́ введе́т мя́ во гра́д огражде́ния? Или́ кто́ наста́вит мя́ до Идуме́и? Не Ты́ ли, Бо́же, отри́нувый на́с? И не изы́деши, Бо́же, в си́лах на́ших? Да́ждь на́м по́мощь от ско́рби, и су́етно спасе́ние челове́ческо. О Бо́зе сотвори́м си́лу, и То́й уничижи́т стужа́ющыя на́м.
Та́же, псало́м 98:
Госпо́дь воцари́ся, да гне́ваются лю́дие: седя́й на Херуви́мех, да подви́жится земля́. Госпо́дь в Сио́не вели́к, и высо́к е́сть над все́ми людьми́. Да испове́дятся и́мени Твоему́ вели́кому, я́ко стра́шно и свя́то е́сть. И че́сть Царе́ва су́д лю́бит: Ты́ угото́вал еси́ правоты́, су́д и пра́вду во Иа́кове Ты́ сотвори́л еси́. Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть. Моисе́й и Ааро́н во иере́ех Его́, и Саму́ил в призыва́ющих и́мя Его́: призыва́ху Го́спода, и То́й послу́шаше и́х. В столпе́ о́блачне глаго́лаше к ни́м: я́ко храня́ху свиде́ния Его́ и повеле́ния Его́, я́же даде́ и́м. Го́споди Бо́же на́ш, Ты́ послу́шал еси́ и́х: Бо́же, Ты́ ми́лостив быва́л еси́ и́м, и мща́я на вся́ начина́ния и́х. Возноси́те Го́спода Бо́га на́шего, и покланя́йтеся в горе́ святе́й Его́, я́ко свя́т Госпо́дь Бо́г на́ш.
Сла́ва, и ны́не: Аллилу́иа, три́жды.
Го́споди поми́луй, три́жды.
И тропа́рь, гла́с 1:
Спаси́ Го́споди лю́ди Твоя́, и благослови́ достоя́ние Твое́, побе́ды побе́ды правосла́вным христианам на сопроти́вныя да́руя, и Твое́ сохраня́я Кресто́м Твои́м жи́тельство. Три́жды.
Сла́ва, конда́к, гла́с 4:
Вознесы́йся на кре́ст во́лею, тезоимени́тому Твоему́ но́вому жи́тельству, щедро́ты Твоя́ да́руй Христе́ Бо́же, возвесели́ си́лою Твое́ю благове́рнаго импера́тора на́шего Никола́я Алекса́ндровича, побе́ды дая́ ему́ на сопоста́ты, посо́бие иму́щу Твое́ ору́жие ми́ра, непобеди́мую побе́ду.
И ны́не, гла́с то́йже:
Животворя́щий Кре́ст Твоея́ бла́гости, его́же дарова́л еси́ на́м недосто́йным, Го́споди, Тебе́ прино́сим в моли́тву, спаси́ царя́ и ве́рныя лю́ди Богоро́дицы ра́ди, о на́с Тебе́ моля́щыяся, еди́не Человеколю́бче.
А́бие же посе́м пою́т три́жды тропа́рь се́й, гла́с 6:
Посли́ благода́ть Твою́ Жизнода́вче, и кре́ст се́й освяти́, и все́м лю́дем Твои́м яви́ его́ бы́ти по́мощь и утвержде́ние:
Диа́кон: Го́споду помо́лимся.
Ли́к: Го́споди поми́луй.
Иере́й чте́т моли́тву сию́:
Го́споди Бо́же сла́вы, О́тче Вседержи́телю, Бо́же Савао́ф, И́же дре́вом живота́ посреде́ рая́ су́щаго, прообрази́л еси́ Животво́рный Кре́ст Единоро́днаго Сы́на Твоего́, и вме́сто дре́ва преслуша́ния, его́же вку́сом вселука́вый зми́й пра́отцы на́шя, и с ни́ми ве́сь ро́д челове́ческий из рая́ изгна́, и в сме́рть привлече́, зна́мение о́наго Живоно́снаго Креста́, на не́мже возлю́бленный Тво́й Сы́н пригвожде́н бы́в у́мре, и сме́ртию сме́рть умертви́, и всю́ си́лу диа́волю упраздни́, и живо́т ми́ру дарова́, це́ркви Свое́й ору́жие непобеди́мое, освяще́ние же и покро́в держа́вен, и ве́ре утвержде́ние, и от все́х диа́вольских ко́зней изба́ву, и кре́пкое спасе́ния упова́ние, и живота́ получе́ния непосты́дную наде́жду дарова́л еси́. Те́мже мы́ раби́ Твои́, толи́кия благода́ти Твоея́ ту́не сподо́бльшеся, благода́рни су́ще, сла́ву и благодаре́ние и смире́нное поклоне́ние прино́сим Твоему́ вели́честву, и мо́лимся уми́льно, я́ко да ми́лостивно при́зриши на зна́мение сие́ кре́стное, е́же ве́рнии раби́ Твои́ от усе́рдия и тве́рдыя ве́ры и любве́, я́же к Тебе́, сооружи́ша, в зна́мение побе́ды Сы́на Твоего́, Го́спода на́шего Иису́са Христа́, свобо́ды же и избавле́ния на́шего, и низпосли́ на не́ небе́сное Твое́ благослове́ние, и благослови́ и освяти́ е́, и испо́лни си́лы и благослове́ния о́наго дре́ва, на не́мже пригвожде́но бы́сть Пресвято́е Те́ло Го́спода на́шего Иису́са Христа́ Единоро́днаго Сы́на Твоего́, И́мже си́ла диа́воля попра́ся, и земни́и свобо́ду улучи́хом, и живота́ сподо́бихомся. Е́й, мо́лим Тя́ Влады́ко Пресвяты́й, святы́х ра́ди страсте́й, и святы́я Кро́ве излия́ния, и животво́рныя сме́рти Единоро́днаго Сы́на Твоего́, Го́спода на́шего Иису́са Христа́, ю́же сове́том Тебе́ Бо́га Отца́ Безнача́льнаго, и Пресвята́го Твоего́ Ду́ха во́лею, спасе́ния на́шего ра́ди на дре́ве кре́стном претерпе́, и те́ми дре́во кре́стное, е́же иногда́ согреша́ющым и злотво́рным ка́знь бя́ше, благослове́но, свя́то, животода́тельно же, и изба́ву согреша́ющым бы́ти сотвори́, е́же в мольбу́ Ти́ прино́сим: посли́ ны́не благода́ть Пресвята́го Твоего́ Ду́ха, на зна́мение сие́ кре́стное, и благослови́ и освяти́ е́, и да́ждь ему́ бы́ти зна́мением стра́шным и кре́пким на вся́ враги́ ви́димыя и неви́димыя, прогна́ние же и отраже́ние все́х ко́зней, наве́тов же и прило́гов диа́вольских, лю́дем же Твои́м да бу́дет покро́в держа́вен, ве́ре утвержде́ние, наде́жде подкрепле́ние, во бране́х побе́да, и во все́х доброде́телех преспе́яние, и все́м пред си́м зна́мением Тебе́ кла́няющымся и мольбы́ принося́щым ми́лостивен Послу́шатель, и все́х я́же ко спасе́нию проше́ний бога́тый Пода́тель бу́ди. И я́коже кресто́м ми́р от грехо́внаго осужде́ния свободи́л еси́, си́це рабо́в Твои́х, сие́ кре́стное зна́мение Тебе́ от души́ ве́рно принося́щих, си́лою креста́ Возлю́бленнаго Сы́на Твоего́, всегда́ победи́тели бы́ти греха́ яви́, и вся́ земна́я и небе́сная Твоя́ Блага́я и́м да́руй, и кресто́м всегда́ к благо́му все́х ве́рных наставля́я, к восприя́тию небе́снаго венца́ приведи́. Ты́ бо еси́ освяще́ния Исто́чник, и все́х благи́х бога́тый Пода́тель, и Тебе́ сла́ву возсыла́ем, со Единоро́дным Твои́м Сы́ном, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
Иере́й же чте́т та́йно моли́тву сию́:
Бо́же и О́тче Го́спода на́шего Иису́са Христа́, И́же кресто́м Его́ диа́вола победи́в и сме́рть умертви́в, ро́д челове́ческий от ле́сти и мучи́тельства его́ свободи́л еси́, при́зри ны́не на моли́тву на́шу и на зна́мение сие́ кре́стное, в сла́ву Тебе́ Бо́га Отца́ и Единосу́щнаго Твоего́ Сы́на и Соесте́ственнаго Твоего́ Ду́ха, и в воспомина́ние о́ныя бы́вшия пресла́вныя над диа́волом, сме́рти же и а́да побе́ды, и на́шего избавле́ния сооруже́нное, Ду́хом Твои́м Святы́м, в окропле́нии воды́ сея́ свяще́нныя благослови́ и освяти́. И изле́й на не́ благослове́ние Твое́ свято́е и си́лу, ю́же окропле́нием Кро́ве и пригвожде́нием Те́ла возлю́бленнаго Сы́на Твоего́ о́но преблагослове́нное дре́во стяжа́ло е́сть, и тому́ пода́ждь, во е́же бы́ти ве́рным лю́дем Твои́м в сте́ну и покро́в, и в сто́лп кре́пости от лица́ вра́жия, во отгна́ние же вся́каго зла́ сопроти́внаго, и во исцеле́ние душе́вных, и теле́сных неду́гов, и во е́же услы́шанным бы́ти мольба́м и моле́ниям все́х ве́рно пред си́м зна́мением моля́щих Ти́ ся́.
И возглаша́ет: Ты́ бо еси́ Бо́г ми́лости, и щедро́т, и человеколю́бия, и Тебе́ сла́ву возсыла́ем, со Единоро́дным Твои́м Сы́ном, и с Пресвяты́м, Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й же кропи́т свяще́нною водо́ю, глаго́ля:
Освяща́ется кре́стное сие́ зна́мение благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
И а́бие посе́м ста́в благогове́йно пред святы́м кре́стным зна́мением, кади́льницу же взе́м кади́т е́ крестообра́зно, поя́ сия́ стихи́ры, гла́с 8:
Кре́ст храни́тель все́й вселе́нней, Кре́ст красота́ церко́вная, Кре́ст царе́м держа́ва, Кре́ст ве́рным утвержде́ние, Кре́ст а́нгелом сла́ва, и бесо́м я́зва.
Сла́ва, и ны́не, гла́с 4: О тебе́, треблаже́нне и жизнода́вче Кре́сте, лю́дие пита́еми спра́зднуют, с безпло́тными ли́ки, чи́н архиере́йский благогове́йно пое́т, мно́жество же и́ночествующих и по́стников покланя́ется, Христа́ же на тебе́ распе́ншагося вси́ прославля́ем.
Посе́м поя́ стихи́ру сию́ два́жды: Кресту́ Твоему́ покланя́емся Влады́ко, и свято́е воскресе́ние Твое́ сла́вим.
Покланя́ется благогове́йно до земли́, и лобза́ет честны́й и свяще́нный Кре́ст. По лобза́нии же па́ки, трети́цею поя́ то́жде, покланя́ется.
Та́кожде и вси́ предстоя́щии покланя́ются, и лобза́ют Честны́й Кре́ст:
Ли́ку пою́щу стихи́ру сию́, гла́с 2:
Прииди́те ве́рнии, Креста́ си́ле поклони́мся, дре́во бо в раи́ сме́рть прозябе́, сие́ же жи́знь процвете́, безгре́шна иму́щее пригвожде́нна на себе́ Го́спода. От него́же вси́ язы́цы нетле́ние объе́млюще, зове́м: кресто́м сме́рть упраздни́вый, и на́с от пре́лести и мучи́тельства диа́воля свободи́вый, Го́споди, сла́ва Тебе́.
А́бие же посе́м твори́т отпу́ст, ре́кшу диа́кону:
Прему́дрость.
И ли́ку: Честне́йшую Херуви́м, и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя́ велича́ем.
Сла́ва, и ны́не: Го́споди поми́луй, три́жды. Благослови́.
Иере́й: И́же на дре́ве кре́стном спасе́ния на́шего ра́ди распны́йся, и сме́рть подъя́ти изво́ливый, и тридне́вно из ме́ртвых воскресы́й, Христо́с и́стинный Бо́г на́ш, моли́твами Пречи́стыя Своея́ Ма́тере, си́лою Честна́го и Животворя́щаго Креста́, и все́х ра́ди святы́х свои́х, поми́лует и спасе́т на́с, я́ко Бла́г и Человеколю́бец.
Ли́к: Ами́нь.
Иере́й же, взе́м кре́ст, вно́сит его́ в олта́рь Ца́рскими враты́, и обра́щься к лю́дем, благословля́ет и́х кресто́м, глаго́ля:
Спаси́ Го́споди лю́ди Твоя́, и благослови́ достоя́ние Твое́, и благослови́ достоя́ние Твое́, побе́ды правосла́вным христианам на сопроти́вныя да́руя, и Твое́ сохраня́я Кресто́м Твои́м жи́тельство..
И поставля́ет кре́ст на Престо́ле, и отхо́дит благодаря́ Бо́га.
Глава́ 50. Чи́н благослове́ния но́вых сосу́дов церко́вных, вку́пе мно́гих, или́ еди́наго, яковы́ су́ть: кади́льница, ка́ция, блю́до анафо́рное, копие́, куку́мы, си́есть водоно́сные сосу́дцы, и ины́я олта́рныя принадле́жности
Благослове́н Бо́г на́ш всегда́, ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 25:
Суди́ ми́ Го́споди, я́ко а́з незло́бою мое́ю ходи́х, и на Го́спода упова́я, не изнемогу́. Искуси́ мя́ Го́споди, и испыта́й мя́, разжзи́ утро́бы моя́ и се́рдце мое́. Я́ко ми́лость Твоя́ пред очи́ма мои́ма е́сть, и благоугоди́х во и́стине Твое́й. Не седо́х с со́нмом су́етным, и со законопресту́пными не вни́ду. Возненави́дех це́рковь лука́внующих, и с нечести́выми не ся́ду. Умы́ю в непови́нных ру́це мои́, и обы́ду же́ртвенник Тво́й, Го́споди. Е́же услы́шати ми́ гла́с хвалы́ Твоея́, и пове́дати вся́ чудеса́ Твоя́. Го́споди, возлюби́х благоле́пие до́му Твоего́, и ме́сто селе́ния сла́вы Твоея́. Да не погуби́ши с нечести́выми ду́шу мою́, и с му́жи крове́й живо́т мо́й. И́хже в ру́ку беззако́ния, десни́ца и́х испо́лнися мзды́. А́з же незло́бою мое́ю ходи́х, изба́ви мя́ Го́споди, и поми́луй мя́. Нога́ моя́ ста́ на правоте́: в це́рквах благословлю́ Тя́, Го́споди.
Сла́ва, и ны́не: Аллилу́иа, три́жды.
Диа́кон: Го́споду помо́лимся.
Ли́к: Го́споди поми́луй.
Иере́й чте́т моли́тву сию́:
Го́споди Бо́же Вседержи́телю, Бо́же оте́ц на́ших, сосу́дом Твои́м избра́нным апо́столом Па́влом реки́й, я́ко все́ созда́ние Твое́ добро́ и ничто́же отме́тно, а́ще сло́вом Твои́м Боже́ственным и моли́твами освяща́ется, при́зри ны́не ми́лостивно, смире́нно мо́лимся, на моли́тву на́шу и на сосу́ды сия́ (или́ на сосу́д се́й) я́же (или́ его́же) раби́ Твои́ в сла́ву Пресвята́го и́мене Твоего́, и в служе́ние свята́го Твоего́ же́ртвенника сооруди́ша, и ми́лостивно Твои́м небе́сным благослове́нием, моли́твою же на́с недосто́йных рабо́в и служи́телей Твои́х, благослови́ и освяти́, и к служе́нию свята́го Твоего́ олтаря́, досто́йны (или́ досто́ин) бы́ти яви́, прине́сшым же небе́сною Твое́ю благода́тию возда́ждь, и оставле́ние грехо́в да́руй, и Ца́рствия Твоего́ прича́стники сотвори́.
Ты́ бо еси́ Бо́г ми́лости, и щедро́т, и человеколю́бия, и Тебе́ сла́ву возсыла́ем, со Единоро́дным Твои́м Сы́ном, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
Иере́й же прекло́нь главу́, та́йно чте́т моли́тву сию́:
При́зри Го́споди Бо́же на́ш на моли́тву на́шу, смире́нно мо́лимся, и низпосли́ благослове́ние Твое́ на сосу́ды сия́, (или́ на сосу́д се́й), и окропле́нием воды́ сея́ свяще́нныя благослови́, и освяти́ я́ (или́ его́), во е́же бы́ти и́м (или́ ему́) досто́йным (или́ досто́йну) служе́нию свята́го Твоего́ олтаря́.
И возглаша́ет: Я́ко Ты́ еси́ освяще́ние на́ше и Тебе́ сла́ву возсыла́ем, со Единоро́дным Твои́м Сы́ном, с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й же кропи́т сосу́ды свяще́нною водо́ю, глаго́ля:
Освяща́ются сосу́ды сия́ (или́ освяща́ется сосу́д се́й) благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
И а́бие твори́т дневны́й отпу́ст, и вно́сит сосу́ды во олта́рь.
Глава́ 51. Чи́н благослове́ния но́ваго киво́та, или́ ина́го ко́его сосу́да, или́ ко́его ли́бо храни́лища крестообра́зно или́ и́нако к хране́нию моще́й святы́х сооруже́ннаго
Благослове́н Бо́г на́ш всегда́, ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
А́ще мо́щи су́ть не му́ченическия, но ина́го ко́его от святы́х, чте́т псало́м 111:
Блаже́н му́ж боя́йся Го́спода, в за́поведех его́ восхо́щет зело́. Си́льно на земли́ бу́дет се́мя его́, ро́д пра́вых благослови́тся. Сла́ва и бога́тство в дому́ его́, и пра́вда его́ пребыва́ет в ве́к ве́ка. Возсия́ во тьме́ све́т пра́вым, ми́лостив и ще́др и пра́веден. Бла́г му́ж ще́дря и дая́: устро́ит словеса́ своя́ на суде́, я́ко в ве́к не подви́жится. В па́мять ве́чную бу́дет пра́ведник. От слу́ха зла́ не убои́тся. Гото́во се́рдце его́ упова́ти на Го́спода. Утверди́ся се́рдце его́, не убои́тся, до́ндеже воззри́т на враги́ своя́. Расточи́, даде́ убо́гим, пра́вда его́ пребыва́ет во ве́к ве́ка, ро́г его́ вознесе́тся в сла́ве. Гре́шник у́зрит и прогне́вается, зубы́ свои́ми поскреже́щет и раста́ет, жела́ние гре́шника поги́бнет.
А́ще же му́ченическия су́ть мо́щи, чте́т псало́м 78:
Бо́же, приидо́ша язы́цы в достоя́ние Твое́, оскверни́ша хра́м святы́й Тво́й. Положи́ша Иерусали́м я́ко ово́щное храни́лище, положи́ша тру́пия ра́б Твои́х бра́шно пти́цам небе́сным, пло́ти преподо́бных Твои́х звере́м земны́м. Пролия́ша кро́вь и́х я́ко во́ду о́крест Иерусали́ма, и не бе́ погреба́яй. Бы́хом поноше́ние сосе́дом на́шим, подражне́ние и поруга́ние су́щым о́крест на́с. Доко́ле Го́споди, прогне́ваешися до конца́, разжже́тся я́ко о́гнь рве́ние Твое́? Проле́й гне́в Тво́й на язы́ки незна́ющыя Тебе́, и на ца́рствия, я́же и́мене Твоего́ не призва́ша, я́ко поядо́ша Иа́кова, и ме́сто его́ опустоши́ша. Не помяни́ на́ших беззако́ний пе́рвых: ско́ро да предваря́т ны́ щедро́ты Твоя́ Го́споди, я́ко обнища́хом зело́. Помози́ на́м Бо́же Спаси́телю на́ш, сла́вы ра́ди и́мене Твоего́, Го́споди, изба́ви ны́, и очи́сти грехи́ на́шя, и́мене ра́ди Твоего́. да не когда́ реку́т язы́цы, где́ е́сть Бо́г и́х? И да уве́стся во язы́цех пред очи́ма на́шима отмще́ние кро́ве ра́б Твои́х пролиты́я. Да вни́дет пред Тя́ воздыха́ние окова́нных, по вели́чию мы́шцы Твоея́, снабди́ сы́ны умерщвле́нных. Возда́ждь сосе́дом на́шим седмери́цею в не́дро и́х поноше́ние и́х, и́мже поноси́ша Тя́ Го́споди. Мы́ же лю́дие Твои́, и о́вцы па́жити Твоея́, испове́мыся Тебе́ Бо́же во ве́к, в ро́д и ро́д возвести́м хвалу́ Твою́.
Сла́ва, и ны́не: Аллилу́иа, три́жды.
Диа́кон: Го́споду помо́лимся.
Ли́к: Го́споди поми́луй.
Иере́й чте́т моли́тву сию́:
Бо́же бого́м и Го́споди господе́м, Тво́рче и Созда́телю всея́ ви́димыя и неви́димыя тва́ри, И́же рабу́ Твоему́ Моисе́ю повеле́л еси́, по о́бразу пока́занному ему́ на горе́, киво́т от древе́с негнию́щих соста́вити, и зла́том чи́стым обложи́ти, в не́мже ста́мну злату́ю, небе́сную в себе́ иму́щую ма́нну, и скрижа́ли заве́та пе́рстом Твои́м Боже́ственным напи́санныя, во свиде́тельство бу́дущему ро́ду сохрани́ти, я́же вся́ о́браз бы́вше ны́нешним, воплоще́нием Сы́на Твоего́ Го́спода на́шего Иису́са Христа́ испо́лнишася, егда́ Те́ло его́, де́йством Свята́го Ду́ха от Пречи́стыя Де́вы зача́тое и одушевле́нное, исполне́нием Божества́ всего́ испо́лнил еси́. Тебе́ смире́нно мо́лим Вседержи́телю Бо́же, О́тче Го́спода на́шего Иису́са Христа́, из Него́же вся́кое оте́чество на небеси́ и на земли́ имену́ется, я́ко да се́й киво́т (или́ киво́ты), или́ сосу́д (или́ сосу́ды), к хране́нию моще́й святы́х Твои́х сооруже́нный (или́ сооруже́нныя), моли́твами и предста́тельством те́хже святы́х Твои́х, небе́сным Твои́м благослове́нием благослови́ши, и освяти́ши, во е́же все́х в не́м (или́ в ни́х) мо́щи святы́я храня́щым и сия́ че́стно чту́щих, и святы́х (и́хже бу́дут мо́щи) призыва́ющих, моли́твами и предста́тельством и́х, от все́х сопроти́вных обстоя́ний належа́щих свободи́ши, и от преходя́щих ну́жд и бе́д изба́виши, вся́ же враго́в ви́димых и неви́димых наве́тования, наше́ствия и нападе́ния от ни́х си́лою Твое́ю отжене́ши, и бу́деши и́м стена́ тверда́ от лица́ вра́жия. И сохрани́ и́х невреди́мых от все́х чарова́ний, обая́ний же и злохи́трий злы́х и лука́вых челове́к, гра́д же и оби́тель, село́ и страну́, в ни́хже мо́щи святы́х Твои́х в сосу́де се́м (или́ в сосу́дех си́х) че́стно храни́мы бу́дут, изба́ви, соблюди́ и невре́дны сохрани́ от поврежде́ния мо́лнии, злорастворе́ний возду́хов, от гра́да, губи́тельства, тру́са, пото́па, огня́, меча́, наше́ствия иноплеме́нник, и междоусо́бныя бра́ни, и вся́кия смертоно́сныя ра́ны, от звере́й же злы́х, и гадо́в ядови́тых, и по́лзающих разли́чных черве́й, и от вся́каго зла́го обстоя́ния. И бу́ди и́м по́мощь, защище́ние и покро́в, избавля́я и́х от вся́каго зла́, да́руя же и́м в благослове́нии Твое́м благорастворе́ния возду́хов, умноже́ния плодо́в земны́х, времена́ ми́рна и вся́кое оби́лие, моли́твами Пречи́стыя Твоея́ Ма́тере и все́х святы́х Твои́х, в ни́хже хвали́мь и сла́вимь еси́ со Единоро́дным Твои́м Сы́ном, и Пресвяты́м, и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
Иере́й чте́т та́йно моли́тву сию́:
Влады́ко Бо́же О́тче Вседержи́телю, И́же при Моисе́и уго́днице Твое́м ропта́ние лю́дем утоля́я, свяще́нство же Ааро́ново благоуго́дное Тебе́ бы́ти утвержда́я, же́зл его́ сухи́й прозя́бнути, и цве́т плодоно́сный произвести́ сотвори́л еси́, и се́й в киво́те заве́та в зна́мение Твоея́ си́лы и чудотворе́ния вложи́ти повеле́л еси́, И́же и на́м образова́ние бы́сть Христа́ Твоего́, Его́же на кре́стном же́ртвеннице сме́ртию изсуше́ние, и тридне́вным воскресе́нием процвете́ние, це́ркви же сме́ртию Его́ прозябе́ние, и но́щию и дне́м плодоно́сное процвете́ние си́м прообрази́л еси́. Тебе́ всеми́лостиваго Строи́теля и Промы́сленника челове́ческаго ро́да приле́жно мо́лим, при́зри на сосу́ды сия́, к хране́нию моще́й святы́х уго́дников Твои́х сооруже́нныя и благода́тию Твое́ю всеосвяща́ющею, в окропле́нии воды́ сея́ свяще́нныя благослови́ и освяти́, и иде́же а́ще сия́ отнесе́ни и храни́ми бу́дут, моли́твами и предста́тельствы святы́х Твои́х, и́хже мо́щи в ни́х сокры́ются, отту́ду вся́кое сопроти́вное обстоя́ние отжени́, вся́ же поле́зная и блага́я та́мо умно́жи и сохрани́, я́ко да ве́рнии лю́дие Твои́, бога́тыя ми́лости и щедро́ты и благодея́ния Твоя́ в ма́лой ча́сти моще́й святы́х Твои́х, я́коже в це́лом и́х те́ле получи́вше, благодаре́ние Тебе́ до́лжное воздаю́т, и жития́ и́х подража́тельми бы́ти потща́тися хода́тайством и́х, и с ни́ми и насле́дники Ца́рствия Твоего́ бы́ти да сподо́бятся.
И возглаша́ет: Благода́тию и щедро́тами и человеколю́бием Единоро́днаго Сы́на Твоего́, с Ни́мже благослове́н еси́, с Пресвяты́м и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й же кропи́т водо́ю свяще́нною сосу́ды, глаго́ля:
Освяща́ются сосу́ды сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.
А́ще же та́мо су́ть мо́щи святы́х влага́ет я́ в ня́, глаго́ля:
Хвали́те Бо́га во святы́х Его́, хвали́те Его́ во утверже́нии си́лы Его́. Я́ко восхва́лятся преподо́бнии во сла́ве, и возра́дуются на ло́жах свои́х.
И чте́т тропа́рь и конда́к святы́х, и́хже су́ть мо́щи, и сотвори́в отпу́ст, с воспомина́нием святы́х, и́хже су́ть мо́щи, раздае́т я́ те́м, и́же к освяще́нию принесо́ша.
Глава́ 52. Чи́н благослове́ния и освяще́ния иконоста́са
Подоба́ет у́бо ве́дати, я́ко поста́влену су́щу иконоста́су в це́ркви, а́ще уже́ от епи́скопа освяще́нной соверше́нно, или́ от его́ наме́стника благослове́нной, а́бие протоиере́ем, или́ его́ изволе́нием от иере́а ме́стнаго освяща́ется. А́ще же в неосвяще́нной, или́ неблагослове́нной, пе́рвее це́рковь освяща́ется, или́ благословля́ется, пото́м же ико́ны, а́бие по миропома́зании сте́н пре́жде кажде́ния. Святи́тель ста́в пред Ца́рскими враты́, ре́кшу диа́кону: Го́споду помо́лимся, чте́т вся́ ни́же пи́санная, и посе́м твори́т отпу́ст обы́чный. А́ще же в освяще́нной уже́, или́ благослове́нной це́ркви, новопоста́влены су́ть ико́ны, си́це благословя́ются: Иере́й в епитрахи́ль и фело́нь оде́янный, а́ще не и́мать свяще́нной воды́, твори́т пе́рвее ма́лое освяще́ние а́вгустово, пото́м же пред ца́рскими враты́ ста́в, начина́ет обы́чно:
Благослове́н Бо́г на́ш всегда́, ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12. три́жды.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псало́м 131:
Помяни́ Го́споди Дави́да, и всю́ кро́тость его́: я́ко кля́тся Го́сподеви, обеща́ся Бо́гу Иа́ковлю: а́ще вни́ду в селе́ние до́му моего́, или́ взы́ду на о́др посте́ли моея́, а́ще да́м со́н очи́ма мои́ма, и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се́ слы́шахом я́ во Евфра́фе, обрето́хом я́ в поля́х дубра́вы. Вни́дем в селе́ния Его́, поклони́мся на ме́сто, иде́же стоя́сте но́зе Его́. Воскресни́ Го́споди в поко́й Тво́й, Ты́ и киво́т святы́ни Твоея́. Свяще́нницы Твои́ облеку́тся пра́вдою, и преподо́бнии Твои́ возра́дуются. Дави́да ра́ди раба́ Твоего́, не отврати́ лице́ пома́заннаго Твоего́. Кля́тся Госпо́дь Дави́ду и́стиною, и не отве́ржется ея́: от плода́ чре́ва твоего́ посажду́ на престо́ле твое́м. А́ще сохраня́т сы́нове твои́ заве́т Мо́й, и свиде́ния Моя́ сия́, и́мже научу́ я́, и сы́нове и́х до ве́ка ся́дут на престо́ле твое́м. Я́ко избра́ Госпо́дь Сио́на, изво́ли и́ в жили́ще себе́. Се́й поко́й Мо́й во ве́к ве́ка, зде́ вселю́ся, я́ко изво́лих и́. Лови́тву его́ благословля́яй благословлю́, ни́щыя его́ насыщу́ хле́бы. Свяще́нники его́ облеку́ во спасе́ние, и преподо́бнии его́ ра́достию возра́дуются. Та́мо возвращу́ ро́г Дави́дови, угото́вах свети́льник пома́занному Моему́. Враги́ его́ облеку́ студо́м, на не́мже процвете́т святы́ня Моя́.
Сла́ва, и ны́не: Аллилу́иа, три́жды.
Ре́кшу же диа́кону: Го́споду помо́лимся, и кли́ру: Го́споди поми́луй.
Иере́й чте́т моли́тву сию́:
Го́споди Бо́же на́ш, Бо́же бого́в и Го́споди господе́й, Бо́же Савао́ф, Тво́рче и Созда́телю всея́ ви́димыя и неви́димыя тва́ри, О́тче Го́спода на́шего Иису́са Христа́, люде́й Твои́х Изра́иля, ве́дый удо́бь преложе́нное от Тебе́ и́стиннаго Бо́га к чу́ждым ло́жным бого́м се́рдце, от идолослуже́ния изъима́я те́х, в позна́нии же и служе́нии Тебе́ еди́наго и́стиннаго Бо́га всегда́ неотсту́пно име́ти хотя́, о́бразы и подо́бия Тебе́ и́стинному Бо́гу проти́вныя себе́ сотвори́ти, во е́же я́ко Го́споду те́м кла́нятися и служи́ти, преще́нием запрети́л еси́, подо́бия же па́ки и о́бразы, и́миже не чужды́х ло́жных и не су́щих бого́в, но Тебе́ еди́наго и́стиннаго Бо́га Пресвято́е и Великоле́пое и́мя сла́вится, (не удовля́я лю́ди своя́ писа́нием то́чию заве́та и зако́на), уго́дником Твои́м Моисе́ом пе́рвее по о́бразу пока́занному ему́ на горе́, киво́т заве́та от дре́ва негнию́щаго обложе́н зла́том, в не́мже скрижа́ли заве́та, ста́мна злата́ и Ааро́нов же́зл пото́м возложены́ бы́ша, и над ни́м Херуви́ма два́, и на опо́нах де́лом шве́нным Херуви́мов мно́жество устро́ити, два́ же Херуви́ма у угло́в очисти́лища, пото́м же и в Соломо́новом созда́нном Тебе́ хра́ме, Херуви́ма два́ от кипари́снаго дре́ва, зла́том объя́та поста́вити повеле́л еси́. И я́ко Твое́ с людьми́ пребыва́ние, и сла́вы Твоея́ вели́чества зна́мения, и па́мять Твои́х превели́ких и пресла́вных чуде́с и благодея́ний в себе́ иму́щыя и собо́ю явля́ющыя, (а́ще и дела́ ру́к челове́ческих бя́ху) стра́хом и тре́петом, оба́че и боголе́пным поклоне́нием, кажде́нием же и пред те́ми моле́нием чти́ти сия́ повеле́л еси́, о́ную же че́сть, я́коже Себе́ Самому́ отда́нную, ми́лостивно прия́л еси́, безче́стие же си́м сотво́рших, и достодо́лжно сия́ не поче́тших разли́чно я́коже о́зу о́наго му́чил и погуби́л еси́, разли́чие же и ра́знство че́сти богоприя́тных, от богоме́рзких о́бразов, при Или́и свяще́ннице и судии́ Изра́ильском в сокруше́нии Даго́на и́дола, и в уязвле́нии иноплеме́ник я́сно показа́л еси́. Во исполне́нии же време́н посла́л еси́ Единоро́днаго Сы́на Твоего́ Го́спода на́шего Иису́са Христа́, ражда́емаго от жены́ Присноде́вы Мари́и, И́же зра́к раба́ прии́м, и в подо́бии челове́честем бы́в, подо́бие Своего́ Пречи́стаго о́браза, к Своему́ Боже́ственному лицу́ убру́с приложи́в, изъобрази́, и А́вгарю Еде́сскому кня́зю посла́, и те́м от неду́га того́ исцели́, и все́м к нему́ приходя́щым, и ве́рою кла́няющымся, неисче́тная исцеле́ния и мно́гая благодея́ния чудоде́йствуяй подава́ше. И мы́ у́бо, о всеблаги́й и ще́дрый Влады́ко, сия́ о́бразы возлю́бленнаго Сы́на Твоего́, в воспомина́ние спаси́тельнаго воплоще́ния, и все́х пресла́вных Его́ чуде́с, страсте́й же и распя́тия и сме́рти, и пресла́внаго воскресе́ния, и на небеса́ вознесе́ния, и все́х Его́ благодея́ний, я́же на земли́, я́ко челове́к яви́вся, челове́ческому ро́ду показа́, о ни́хже на́м Боже́ственная Ева́нгелиа я́сно повеству́ют, та́кожде Пречи́стой Его́ Ма́тери, я́ко честне́йшей и всея́ тва́ри вы́шшей, и у тебе́ прия́тнейшей Моли́твенницы и Предста́тельницы на́шей, а́нгелов же и проро́ков, и апо́столов богогла́сных, му́чеников и святи́телей, и преподо́бных, и все́х святы́х, я́ко Твои́х уго́дников, рабо́в же ве́рных и при́сных друго́в, и Твои́х и́стинных су́щих о́бразов не боготворя́ще, но ве́дуще, я́ко по́честь о́браза на первообра́зное восхо́дит, в свято́м Твое́м се́м хра́ме пред Твои́м вели́чеством че́стно предложи́хом, и припа́дающе приле́жно мо́лим: при́зри ми́лостивно на ны́ и на о́бразы сия́, и явле́ния ра́ди во пло́ти возлю́бленнаго Сы́на Твоего́, и всего́ Его́ спаси́тельнаго плотска́го Боже́ственнаго смотре́ния, в Его́же воспомина́ние и сла́ву, и моли́твами Пречи́стыя и Преблагослове́нныя Его́ Ма́тере, святы́х небе́сных си́л безпло́тных, честна́го Проро́ка Предте́чи и Крести́теля Иоа́нна, богогла́сных проро́к, духоно́сных апо́стол, добропобе́дных му́ченик, святи́телей же, и преподо́бных и пра́ведных, и все́х святы́х Твои́х, в и́хже че́сть и па́мять сия́ устро́ихом, посли́ на ня́ Твое́ небе́сное благослове́ние и благода́ть Пресвята́го Ду́ха, и благослови́ и освяти́ я́, и пода́ждь и́м си́лу целе́бную, и все́х диа́вольских ко́зней прогони́тельну, и испо́лни я́ благослове́ния, си́лы же и кре́пости, ея́же бога́тно влия́л еси́ на о́ный святы́й Нерукотворе́нный о́браз, прикоснове́нием Пресвята́го и Пречи́стаго Боже́ственнаго лица́ Единоро́днаго Сы́на Твоего́, во е́же си́лам и чудесе́м и те́ми де́йствоватися, во утвержде́ние правосла́вныя ве́ры и спасе́ние люде́й Твои́х. Все́х же Тебе́ и Единоро́дному Твоему́ Сы́ну, и Пресвято́му и Животворя́щему Твоему́ Ду́ху, пред си́ми о́бразами кла́няющихся, и приле́жно ве́рою моля́щихся, и ми́лость обрести́ прося́щих, святы́х же, я́ко Твои́х ве́рных рабо́в и прии́скренних друго́в, в и́хже и́мя и пода́нную студе́ныя воды́ ча́шу прия́ти, и мздо́ю проро́чею или́ пра́ведничею или́ учени́чею возда́ти ми́лостивно обеща́л еси́, в мольбу́ к Тебе́ в беда́х и ну́ждах и ско́рбех, и во все́х свои́х тре́бованиях на вся́ ико́ны и́х взира́юще, ве́рою призыва́ющих, мольбы́ и моле́ния и приле́жная проше́ния услы́шаны бы́ти, и ми́лость Твоего́ человеколю́бия привлещи́ сотвори́, оставле́ние же грехо́в пода́ждь, и благода́ть получи́ти сподо́би.
Ты́ бо еси́ освяще́ние на́ше, и Тебе́ сла́ву возсыла́ем, со Единоро́дным Твои́м Сы́ном, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
Иере́й же, главу́ прекло́нь, та́йно чте́т моли́тву сию́:
Го́споди Бо́же на́ш, пи́санныя о́бразы святы́х Твои́х не отмета́яй, но па́че любе́зно прие́мляй, во е́же ели́жды очи́ма теле́сныма взира́юще на ня́, толи́жды у́мныма очи́ма дела́ и житие́ и́х Тебе́ благоуго́дное воспомина́ти и размышля́ти, я́коже и в писа́ниих чту́ще бу́дем. Сия́ у́бо ико́ны, приле́жно мо́лимся, я́же в че́сть и сла́ву, и в воспомина́ние спаси́тельнаго воплоще́ния, чуде́с же и благодея́ний Единоро́днаго Сы́на Твоего́, Я́же на́м Боже́ственное Ева́нгелие веща́ет, да не то́чию чту́ще, но и на изъображе́нныя взира́юще в у́м прие́млем, и в па́мять благода́рно отно́сим, та́кожде и Пречи́стыя Де́вы Богоро́дицы, небе́сных си́л безпло́тных, свята́го Иоа́нна Предте́чи и Крести́теля, святы́х апо́стол, проро́к, му́ченик, и все́х святы́х Твои́х сооруди́хом, ми́лостивно небе́сным Твои́м благослове́нием, в окропле́нии воды́ сея́ свяще́нныя благослови́ и освяти́, и все́х ве́рно пред ни́ми, Тебе́ Бо́га Отца́, и Единоро́днаго Сы́на, и Пресвята́го и Животворя́щаго Твоего́ Ду́ха, Пречи́стую же Богоро́дицу, и все́х святы́х Твои́х, и́хже изъображе́ния в си́х ико́нах су́ть, досто́йно чту́ще, Твое́ Боже́ственное милосе́рдие, о́ных же, я́ко Твои́х при́сных рабо́в и друго́в, моли́твы за себе́ к Тебе́ Бо́гу и Го́споду, предста́тельства же и по́мощи прося́ще призыва́ти бу́дут, Твои́м благосе́рдием, святы́х же Твои́х моли́твами ско́ро получи́ти сотвори́, оставле́ние же грехо́в да́руй, и насле́дники Ца́рствия Твоего́, я́ко Бла́г, бы́ти сподо́би.
И возглаша́ет: Ты́ бо еси́ Бо́г ми́лости, и щедро́т, и человеколю́бия, и Тебе́ сла́ву возсыла́ем, со Единоро́дным Твои́м Сы́ном, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
Святи́тель же или́ иере́й кропи́т свяще́нною водо́ю ве́сь иконоста́с, от ни́зу да́же до верха́, глаго́ля:
Освяща́ются ико́ны сия́ окропле́нием воды́ сея́ свяще́нныя, в че́сть и сла́ву вели́каго Бо́га и Спа́са на́шего Иису́са Христа́, и в па́мять святы́х Его́, во и́мя Отца́, и Сы́на, и Свята́го Ду́ха, ами́нь. Три́жды.
А́бие же ли́к пое́т или́ чте́т тропари́ сия́, гла́с 2:
Пречи́стому Твоему́ о́бразу покланя́емся, Благи́й, прося́ще проще́ния прегреше́ний на́ших, Христе́ Бо́же, во́лею бо благоволи́л еси́ пло́тию взы́ти на кре́ст, да изба́виши, я́же созда́л еси́, от рабо́ты вра́жия. Те́м благода́рственно вопие́м Ти́: ра́дости испо́лнил еси́ вся́ Спа́се на́ш, прише́дый спасти́ ми́р.
Сла́ва, гла́с 2:
Апо́столи, проро́цы, святи́телие, преподо́бнии, пра́веднии и вси́ святи́и, до́бре по́двиг сконча́вшии и ве́ру соблю́дшии, дерзнове́ние иму́ще ко Спа́су, о на́с Того́ я́ко блага́го моли́те, спасти́ ве́рно ва́с призыва́ющих, и ико́ны ва́шя, я́ко друго́в Бо́жиих, благоче́стно чту́щих.
И ны́не, гла́с 1:
Любо́вию, Чи́стая Де́во, Твою́ святу́ю ико́ну почита́ющым, и Бо́жию Тя́ и́стинную Ма́терь согла́сно возвеща́ющым, и ве́рно покланя́ющым Ти́ ся́ храни́тельница яви́ся, и держа́вная Предста́тельница вся́кое зло́ от си́х удаля́ющи, я́ко вся́ могу́щая.
А́бие же посе́м твори́т обы́чный отпу́ст.
Глава́ 53. Чи́н благослове́ния кампа́на, си́есть ко́локола или́ зво́на
Пове́сивши зво́н при це́ркви, я́коже бы мощи́ и све́рху и извну́трь окропле́нну бы́ти, пре́жде да́же не поста́вити его́ на колоко́льне, си́м благослове́нием благослови́ти его́ подоба́ет. А́ще святи́тель сие́ де́йствует, оде́ян во вся́ святи́тельския оде́жды, или́ то́чию в ма́нтию, в епитрахи́ль, омофо́р и ми́тру, (а́ще же свяще́нник, в епитрахи́ль и фело́нь) исхо́дит из це́ркве, и прихо́дит к зво́ну, та́мо у́бо предугото́ванной су́щей воде́ свяще́нной и кропи́льнице, на че́стно покрове́нном столе́, и начина́ет обы́чно:
Благослове́н Бо́г на́ш всегда́, ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12. три́жды.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 148:
Хвали́те Го́спода с небе́с, хвали́те Его́ в вы́шних. Хвали́те Его́ вси́ а́нгели Его́, хвали́те Его́ вся́ си́лы Его́. Хвали́те Его́ со́лнце и луна́, хвали́те Его́ вся́ зве́зды и све́т. Хвали́те Его́ небеса́ небе́с, и вода́, я́же превы́ше небе́с. Да восхва́лят и́мя Госпо́дне: я́ко То́й рече́, и бы́ша, То́й повеле́, и созда́шася. Поста́ви я́ в ве́к и в ве́к ве́ка, повеле́ние положи́, и не ми́мо и́дет. Хвали́те Го́спода от земли́ зми́еве, и вся́ бе́здны: о́гнь, гра́д, сне́г, го́лоть, ду́х бу́рен, творя́щая сло́во Его́, го́ры и вси́ хо́лми, древа́ плодоно́сна и вси́ ке́дри, зве́рие и вси́ ско́ти, га́ди, и пти́цы перна́ты. Ца́рие зе́мстии и вси́ лю́дие, кня́зи и вси́ судии́ зе́мстии, ю́ноши и де́вы, ста́рцы с ю́нотами, да восхва́лят и́мя Госпо́дне, я́ко вознесе́ся и́мя Того́ еди́наго, испове́дание Его́ на земли́ и на небеси́. И вознесе́т ро́г люде́й Свои́х, пе́снь все́м преподо́бным Его́, сыново́м Изра́илевым, лю́дем приближа́ющымся Ему́.
Та́же псало́м 149.
Воспо́йте Го́сподеви пе́снь но́ву, хвале́ние Его́ в це́ркви преподо́бных. Да возвесели́тся Изра́иль о Сотво́ршем Его́, и сы́нове Сио́ни возра́дуются о царе́ свое́м. Да восхва́лят и́мя Его́ в ли́це, в тимпа́не и псалти́ри да пою́т Ему́. Я́ко благоволи́т Госпо́дь в лю́дех Свои́х, и вознесе́т кро́ткия во спасе́ние. Восхва́лятся преподо́бнии во сла́ве, и возра́дуются на ло́жах свои́х. Возноше́ния Бо́жия в горта́ни и́х, и мечи́ обою́ду остры́ в рука́х и́х: сотвори́ти отмще́ние во язы́цех, обличе́ния в лю́дех. Связа́ти цари́ и́х пу́ты, и сла́вныя и́х ручны́ми око́вы желе́зными, сотвори́ти в ни́х су́д напи́сан. Сла́ва сия́ бу́дет все́м преподо́бным Его́.
Та́же псало́м 150.
Хвали́те Бо́га во святы́х Его́, хвали́те Его́ во утверже́нии си́лы Его́. Хвали́те Его́ на си́лах Его́, хвали́те Его́ по мно́жеству вели́чествия Его́. Хвали́те Его́ во гла́се тру́бнем, хвали́те Его́ во псалти́ри и гу́слех. Хвали́те Его́ в тимпа́не и ли́це, хвали́те Его́ во стру́нах и орга́не. Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.
Сла́ва, и ны́не: Аллилу́иа, три́жды.
Диа́кон же глаго́лет ектению́ сию́:
Ми́ром Го́споду помо́лимся:
Ли́к: Го́споди, поми́луй.
О свы́шнем ми́ре и спасе́нии ду́ш на́ших Го́споду помо́лимся.
Ли́к: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й и соедине́нии все́х, Го́споду помо́лимся.
Ли́к: Го́споди, поми́луй.
О святе́м хра́ме се́м, и с ве́рою, благогове́нием, и стра́хом Бо́жиим входя́щих в о́нь, Го́споду помо́лимся.
Ли́к: Го́споди, поми́луй.
О Вели́ком Господи́не и отце́ на́шем, Святе́йшем Патриа́рхе Кири́лле, и о господи́не на́шем преосвяще́ннейшем митрополи́те (или́ архиепи́скопе, или́ епи́скопе) и́мярек, честне́м пресви́терстве, во Христе́ диа́констве и о все́м при́чте и лю́дех, Го́споду помо́лимся.
Ли́к: Го́споди, поми́луй.
О Богохрани́мей стране́ на́шей, власте́х и во́инстве ея́ Го́споду помо́лимся.
Ли́к: Го́споди, поми́луй.
О гра́де се́м (а́ще в монастыре́: О святе́й оби́тели се́й), вся́ком гра́де, стране́ и ве́рою живу́щих в ни́х, Го́споду помо́лимся.
Ли́к: Го́споди, поми́луй.
О благорастворе́нии возду́хов, о изъоби́лии плодо́в земны́х, и вре́менех ми́рных, Го́споду помо́лимся.
Ли́к: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных, и о спасе́нии и́х, Го́споду помо́лимся.
Ли́к: Го́споди, поми́луй.
О е́же благослови́ти кампа́н се́й, в сла́ву свята́го и́мене Своего́, небе́сным Свои́м благослове́нием, Го́споду помо́лимся.
Ли́к: Го́споди, поми́луй.
О е́же пода́ти ему́ благода́ть, я́ко да вси́ слы́шащии звене́ние его́ или́ во дни́ или́ в нощи́, возбудя́тся к славосло́вию и́мене свята́го Твоего́, Го́споду помо́лимся.
Ли́к: Го́споди, поми́луй.
О е́же гла́сом звене́ния его́ утоли́тися и ути́шитися и преста́ти все́м ве́тром зе́льным, бу́рям же, громо́м и мо́лниям, и все́м вре́дным безве́дриям, и злорастворе́нным возду́хом, Го́споду помо́лимся.
Ли́к: Го́споди, поми́луй.
О е́же отгна́ти всю́ си́лу, кова́рства же и наве́ты неви́димых враго́в, от все́х ве́рных Свои́х, гла́с зву́ка его́ слы́шащих, и к де́ланию за́поведей Свои́х возбуди́ти я́, Го́споду помо́лимся.
Ли́к: Го́споди, поми́луй.
Заступи́, спаси́, поми́луй и сохрани́ на́с Бо́же, Твое́ю благода́тию.
Ли́к: Го́споди, поми́луй.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу, и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и ве́сь живо́т на́ш Христу́ Бо́гу предади́м.
Ли́к: Ами́нь.
Возглаше́ние: Я́ко подоба́ет Тебе́ вся́кая сла́ва че́сть и поклоне́ние, Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Ли́к: Ами́нь.
По си́х чту́т псало́м 28:
Принеси́те Го́сподеви, сы́нове Бо́жии, принеси́те Го́сподеви сы́ны о́вни, принеси́те Го́сподеви сла́ву и че́сть. Принеси́те Го́сподеви сла́ву и́мени Его́, поклони́теся Го́сподеви во дворе́ святе́м Его́. Гла́с Госпо́день на вода́х, Бо́г сла́вы возгреме́, Госпо́дь на вода́х мно́гих. Гла́с Госпо́день в кре́пости, гла́с Госпо́день в великоле́пии. Гла́с Го́спода сокруша́ющаго ке́дры, и стры́ет Госпо́дь ке́дры лива́нския: и истни́т я́ я́ко тельца́ лива́нска, и возлю́бленный я́ко сы́н единоро́жь. Гла́с Го́спода пресеца́ющаго пла́мень огня́. Гла́с Го́спода стряса́ющаго пусты́ню, и стрясе́т Госпо́дь пусты́ню Кадди́йскую. Гла́с Госпо́день сверша́ющий еле́ни, и откры́ет дубра́вы, и в хра́ме Его́ вся́кий глаго́лет сла́ву. Госпо́дь пото́п населя́ет, и ся́дет Госпо́дь Ца́рь в ве́к. Госпо́дь кре́пость лю́дем Свои́м да́ст, Госпо́дь благослови́т лю́ди Своя́ ми́ром.
По сконча́нии же псалма́, ре́кшу диа́кону: Го́споду помо́лимся,
И кли́ру: Го́споди поми́луй.
Иере́й же чте́т моли́тву сию́:
Го́споди Бо́же на́ш, хотя́й от все́х ве́рных Твои́х всегда́ сла́вимь и покланя́емь бы́ти, в Ве́тсем Заве́те рабу́ Своему́ законополо́жнику Моисе́ю тру́бы сре́бряны сотвори́ти, и сыно́м Ааро́новым жреце́м в ня́, внегда́ жре́ти и́м Тебе́, воструби́ти повеле́л еси́, я́ко да услы́шавше лю́дие Твои́ гла́с тру́бный, гото́ви е́же поклони́тися Тебе́ бу́дут, и ко е́же же́ртвы приноси́ти Тебе́ соберу́тся, и в бра́нех тру́б си́х гла́сом оглаше́ни, к побежде́нию враго́в кре́пко вооружа́тся. И ны́не, Влады́ко Пресвяты́й, смире́нно мо́лим Тя́, при́зри ми́лостивно на приле́жное моле́ние на́с недосто́йных рабо́в Твои́х, и кампа́н се́й, к слу́жбе це́ркве Твоея́ святы́я, в сла́ву же Великоле́паго и Всесвята́го и́мене Твоего́ сооруже́нный, небе́сным святы́м Твои́м благослове́нием и благода́тию всеосвяща́ющаго Твоего́ Ду́ха благослови́ и освяти́, и вле́й во́нь си́лу благода́ти Твоея́, я́ко да услы́шавше ве́рнии раби́ Твои́ гла́с зву́ка его́, в благоче́стии и ве́ре укрепя́тся, и му́жественно все́м диа́вольским наве́том сопротивоста́нут, и моли́твами и всегда́шним славосло́вием Тебе́ и́стиннаго Бо́га сия́ победя́т, к це́ркви же на моли́тву и славосло́вие свята́го и́мене Твоего́, во дни́ и в нощи́ спе́шно, я́ко ведо́ми да веду́тся, да утоля́тся же и утиша́тся, и преста́нут и напа́дающыя бу́ри ве́тренныя, гра́ды же и ви́хри и гро́мы стра́шнии и мо́лния, и злорастворе́ннии и вре́днии возду́хи гла́сом его́. Ты́ бо Го́споди Бо́же на́ш, не то́чию у́мными и одушевле́нными созда́ниями Твои́ми, в сла́ву Твою́ и в спасе́ние и по́льзу ве́рных Твои́х, но и безду́шными, я́коже Моисе́овым жезло́м, и ме́дяною змие́ю в пусты́ни, вся́ я́же хо́щеши пресла́вная твори́ши и чудоде́йствуеши, вся́ бо Тебе́ возмо́жна су́ть, не возмо́жно же ничто́же, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
Иере́й: Ми́р все́м.
Ли́к: И ду́хови твоему́.
Диа́кон: Главы́ ва́шя Го́сподеви приклони́те.
Ли́к: Тебе́ Го́споди.
И все́м предстоя́щым главы́ прикло́ньшым, чте́т иере́й та́йно моли́тву сию́:
Влады́ко Бо́же О́тче Вседержи́телю, и́же тру́бным гла́сом седмию́ жре́ц иду́щих пред киво́том свиде́ния, Иерихо́нским тве́рдым стена́м па́сти и разруши́тися сотвори́л еси́, и вся́ во гра́де су́щыя в ру́це люде́й твои́х пре́дал еси́, Ты́ и ны́не кампа́н се́й небе́сным Твои́м благослове́нием испо́лни, я́ко да гла́с звене́ния его́ услы́шавше, проти́вныя возду́шныя си́лы дале́че от огра́д ве́рных Твои́х отсту́пят, и вся́ раздеже́нныя и́х о́гненныя, я́же на на́с, стре́лы уга́снут, треска́ния же мо́лний, нападе́ние гра́да, и вся́ вре́дныя возду́хов злорастворе́ния, всеси́льною и кре́пкою десни́цею прогони́ма и уде́ржанна да утоля́тся, ути́хнут и отсту́пят, вся́ бо Ты́ в сла́ву Твою́, к по́льзе и спасе́нию на́шему чрез посре́дства де́йствуеши.
И возглаша́ет: Твое́ бо е́сть, е́же ми́ловати и спаса́ти ны́, Бо́же на́ш, и Тебе́ сла́ву возсыла́ем, Безнача́льному отцу́, со Единоро́дным Твои́м Сы́ном, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
И взе́м иере́й свяще́нную во́ду, кропи́т кампа́н от четы́рех стра́н его́ све́рху, о́крест иды́й, глаго́ля:
Благословля́ется и освяща́ется кампа́н се́й окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. (Три́жды.)
Та́кожде и внутри́ его́ кропя́ на четы́ре страны́, то́жде глаго́лет. Посе́м, взе́м кади́льницу, кади́т кампа́н от четы́рех стра́н, извне́ и вну́трь его́.
Сия́ же ему́ соверша́ющу, кли́рицы чту́т псало́м 69:
Бо́же, в по́мощь мою́ вонми́, Го́споди, помощи́ ми́ потщи́ся. Да постыдя́тся и посра́мятся и́щущии ду́шу мою́, да возвратя́тся вспя́ть и постыдя́тся хотя́щии ми́ зла́я. Да возвратя́тся а́бие стыдя́щеся глаго́лющии ми́: бла́гоже, бла́гоже. Да возра́дуются и возвеселя́тся о Тебе́, вси́ и́щущии Тебе́ Бо́же, и да глаго́лют вы́ну, да возвели́чится Госпо́дь лю́бящии спасе́ние Твое́: а́з же ни́щ е́смь и убо́г, Бо́же, помози́ ми́: Помо́щник мо́й и Изба́витель мо́й еси́ Ты́, Го́споди не закосни́.
Си́м же соверши́вшымся, диа́кон возглаша́ет: Прему́дрость.
Чте́ц глаго́лет: Чи́сл чте́ние.
Диа́кон: Во́нмем.
Чте́ц же чте́т паремию́ сию́ от четве́ртых кни́г Моисе́овых, глава́ 10:
Рече́ Госпо́дь к Моисе́ю, глаго́ля: сотвори́ себе́ две́ трубы́ сре́бряны: ко́ваны сотвори́ши я́, и бу́дут тебе́ на созва́ние со́нма, и возставля́ти полки́. И да востру́биши и́ми, и да собере́тся к тебе́ ве́сь со́нм, пред две́ри ски́нии свиде́ния. А́ще же еди́ною трубо́ю востру́бят, да прии́дут к тебе́ вси́ кня́зи и тысященача́льники Изра́ильтестии: и воструби́те в зна́мение и воздви́гнутся полцы́, ополча́ющиися на восто́ки: и воструби́те в зна́мение второ́е, и воздви́гнутся полцы́, ополча́ющиися от ю́га: и воструби́те в зна́мение тре́тие, и да воздви́гнутся полцы́, ополча́ющиися от мо́ря: и воструби́те в зна́мение четве́ртое, и воздви́гнутся полцы́, ополча́ющиися от се́вера: зна́мением да востру́бят в воздви́жение и́х. И егда́ собере́те со́нм, воструби́те не в зна́мение. И сы́нове Ааро́ни жрецы́ да востру́бят труба́ми: и да бу́дет ва́м зако́нно ве́чно в ро́ды ва́шя. А́ще же изы́дете на бра́нь в земли́ ва́шей к супоста́том сопроти́вящымся ва́м, и воструби́те и назна́менуйте труба́ми, и воспомяне́тся пред Го́сподем, и изба́витеся от вра́г ва́ших. И во дне́х весе́лия ва́шего, и в пра́здницех ва́ших, и в новоме́сячиих ва́ших, воструби́те труба́ми на всесожже́ния, и на же́ртвы спасе́ний ва́ших, и бу́дет ва́м воспомина́ние пред Бо́гом ва́шим: А́з Госпо́дь Бо́г ва́ш.
Посе́м пою́т, или́ чту́т стихи́ры сия́, гла́с 2:
Земли́ и про́чым стихи́ям, гне́ва ра́ди Твоего́, гре́х ра́ди на́ших дви́жимаго на ны́, смуща́ющымся и обурева́емым, гла́с зна́мения сего́, я́коже Моисе́овых сре́бряных тру́б услы́шав, Го́споди, благоутро́бным Свои́м о́ком при́зри на ны́, и не я́ростию Твое́ю обличи́ на́с, но умилосе́рдився пощади́, вся́каго стра́шнаго преще́ния Твоего́ избавля́я, я́ко Еди́н милосе́рд.
Гла́с 1:
Основа́ния всея́ земли́ воздвиза́яй, Бо́же, и сотряса́яй еди́н морско́е ло́же, я́ко Созда́тель вся́ческих, изба́ви на́с пра́веднаго Твоего́ преще́ния, гла́сом зна́мения сего́ отгоня́я зе́льныя бу́ри и ве́тры, гро́мы же и мо́лния, и бо́дрых на́с и тщали́вых всегда́ к Твоему́ славосло́вию сотвори́, и ко исполне́нию святы́х Твои́х за́поведей, я́ко Человеколю́бец.
Сла́ва, и ны́не, гла́с 4:
Вся́ческая еди́ною в нача́ле Собо́ю непосре́дственне созда́вый Го́споди, ны́не же вся́ посре́дственне де́йствуяй гла́сом зво́на сего́ освяще́ннаго, вся́кое уны́ние с лени́вством от серде́ц ве́рных Твои́х отжени́, стра́х же Тво́й в ни́х с благоче́стием вкорени́ и спе́шных на моли́тву, ско́рых же ко вся́кому благо́му де́лу Твое́ю си́лою сотвори́, избавля́я на́с от все́х наве́тов вра́жиих, и невре́дных от злорастворе́нных возду́хов заве́трения соблюда́я, моли́твами Богоро́дицы и все́х святы́х Твои́х, я́ко Еди́н милосе́рд.
По сконча́нии же си́х, святи́тель, или́ нача́льствуяй, ре́кшу диа́кону: Прему́дрость:
И ли́ку: Честне́йшую Херуви́м: Сла́ва, и ны́не: Го́споди поми́луй, три́жды, Благослови́, твори́т обы́чный дневны́й отпу́ст.
Глава́ 54. Чи́н благослове́ния и освяще́ния ме́ста, иде́же погребатися бу́дут телеса́ сконча́вшихся христиа́н, си́есть гробия, кла́дбища
Подоба́ет иере́ю повеле́ти на ме́сте се́м воздви́гнути кре́ст от дре́ва, посреде́ гробия, пред ни́м поста́вити столе́ц, соверши́ти освяще́ние во́ды, и по се́м нача́тии освяще́ние гробия си́це:
Благослове́н Бо́г на́ш всегда́, ны́не и при́сно, и во ве́ки веко́в. Ами́нь.
Сла́ва Тебе́, Бо́же на́ш, сла́ва Тебе́.
Царю́ Небе́сный: Трисвято́е: О́тче на́ш
Я́ко Твое́ е́сть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Го́споди поми́луй, 12. три́жды.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псало́м 50.
Поми́луй мя́, Бóже, по вели́цей ми́лости Твоéй, и по мнóжеству щедрóт Твои́х очи́сти беззакóние моé. Наипáче омы́й мя́ от беззакóния моегó, и от грехá моегó очи́сти мя́; я́ко беззакóние моé а́з знáю, и гре́х мо́й прéдо мно́ю е́сть вы́ну. Тебé еди́ному согреши́х и лукáвое пред Тобóю сотвори́х; я́ко да оправди́шися во словесéх Твои́х, и победи́ши внегдá суди́ти Ти́. Се́ бо в беззакóниих зачáт е́смь, и во гресéх роди́ мя́ мáти моя́. Се́ бо и́стину возлюби́л еси́; безвéстная и тáйная прему́дрости Твоея́ яви́л ми́ еси́. Окропи́ши мя́ иссóпом, и очи́щуся; омы́еши мя́, и пáче снéга убелю́ся. Слу́ху моему́ дáси рáдость и весéлие; возрáдуются кóсти смирéнныя. Отврати́ лицé Твоé от гре́х мои́х и вся́ беззакóния моя́ очи́сти. Сéрдце чи́сто сози́жди во мне́, Бóже, и ду́х пра́в обнови́ во утрóбе моéй. Не отвéржи менé от лицá Твоегó и Ду́ха Твоегó Святáго не отыми́ от менé. Воздáждь ми́ рáдость спасéния Твоегó и Ду́хом Влады́чним утверди́ мя́. Научу́ беззакóнныя путéм Твои́м, и нечести́вии к Тебé обратя́тся. Избáви мя́ от кровéй, Бóже, Бóже спасéния моегó; возрáдуется язы́к мо́й прáвде Твоéй. Гóсподи, устнé мои́ отвéрзеши, и устá моя́ возвестя́т хвалу́ Твою́. Я́ко áще бы восхотéл еси́ жéртвы, да́л бы́х у́бо: всесожжéния не благоволи́ши́. Жéртва Бóгу ду́х сокрушéн; сéрдце сокрушéнно и смирéнно Бо́г не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Тво́й тельцы́.
Посе́м иере́й глаго́лет вели́кую ектению́:
Ми́ром Го́споду помо́лимся.
Ли́к: Го́споди, поми́луй.
О свы́шнем ми́ре и спасе́нии ду́ш на́ших Го́споду помо́лимся.
Ли́к: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й, и соедине́нии все́х, Го́споду помо́лимся.
Ли́к: Го́споди, поми́луй.
О Вели́ком Господи́не и отце́ на́шем, Святе́йшем Патриа́рхе Кири́лле, и о господи́не на́шем преосвяще́ннейшем митрополи́те (или́ архиепи́скопе, или́ епи́скопе) и́мярек, честне́м пресви́терстве, во Христе́ диа́констве и о все́м при́чте и лю́дех, Го́споду помо́лимся.
Го́споду помо́лимся.
Ли́к: Го́споди, поми́луй.
О Богохрани́мей стране́ на́шей, власте́х и во́инстве ея́ Го́споду помо́лимся.
Ли́к: Го́споди, поми́луй.
О гра́де се́м, (а́ще в монастыре́, о святе́й оби́тели се́й), вся́ком гра́де, стране́ и ве́рою живу́щих в ни́х, Го́споду помо́лимся.
Ли́к: Го́споди, поми́луй.
О благорастворе́нии возду́хов, о изоби́лии плодо́в земны́х, и временах ми́рных, Го́споду помо́лимся.
Ли́к: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных, и о спасе́нии и́х, Го́споду помо́лимся.
Ли́к: Го́споди, поми́луй.
О е́же сему́ гробию Твое́ю Благода́тию от все́х сопроти́вных духо́в ко́зней и многообра́зных и́х обдержаний свободи́тися, Го́споду помо́лимся.
Ли́к: Го́споди, поми́луй.
О е́же сему́ гробию Твои́м Боже́ственным посо́бием благополу́чное м соверше́нное очище́ние восприя́ти, Го́споду помо́лимся.
Ли́к: Го́споди, поми́луй.
О е́же сему́ гробию Твои́м Небе́сным благослованием преимени́тое освяще́ние дарова́ти, Го́споду помо́лимся.
Ли́к: Го́споди, поми́луй.
О изба́витися на́м от вся́кия ско́рби, гне́ва и ну́жды, Го́споду помо́лимся.
Ли́к: Го́споди, поми́луй.
Заступи́, спаси́, поми́луй и сохрани́ на́с, Бо́же, Твое́ю благода́тию.
Ли́к: Го́споди, поми́луй.
Пресвяту́ю, Пречи́стую Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми се́бе и дру́г дру́га, и ве́сь живо́т на́ш Христу́ Бо́гу предади́м.
Ли́к: Тебе́ Го́споди.
Возглаше́ние: Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ли́к: Ами́нь.
Сконча́вшейся ектении, кропя́ свяще́нною водо́ю кре́ст и все́ ме́сто, отделенное ра́ди гро́ба, глаго́лет:
Окропи́ши мя́ иссóпом, и очи́щуся; омы́еши мя́, и пáче снéга убелю́ся.
По соверше́нии окропле́ния, пое́м тропа́рь, гла́с 5:
Тебе́ умоля́ем Благоуве́тливаго Бо́га поко́й в ло́нех Авраа́млих рабы́ Твоя́, Христе́, и и́же к Тебе́ преставляемыя, све́та ве́чнующаго сподо́би, си́х согреше́ния презира́я я́ко бла́г.
Конда́к, гла́с 3:
Егда́ сло́вом Твои́м предста́нем безме́здному Твоему́ суди́щу Го́споди, не посрами́ в Тя́ ве́ровавших, Спа́се на́ш: вси́ бо согреши́хом, но Тебе́ не отступи́хом. Те́мже мо́лим Тя́, в селе́ниих пра́ведных Твои́х, Христе́, и́хже прия́л еси́, упоко́й: еди́н бо еси́ безгре́шен.
Души́ представля́емых от привременнных к Тебе́, Спа́се, и зде́ погребаемых упоко́й, я́ко безсме́ртен и всеси́лен, и еди́н Человеколю́бец, прости́, я́ко ще́др, соде́янная и́ми, и поми́луй, ми́лостиве, дела́ ру́к Твои́х, моли́твами Богоро́дицы, еди́не Человеколю́бче.
Иере́й: Го́споду помо́лимся, и чте́т моли́тву сию́:
Бо́же всемогу́щий, храни́телю ду́ш, защи́тителю спасе́ния, увенчателю ве́рующих, при́зри ми́лостивно, мо́лимтися, на на́ше смире́ннаго служе́ния недосто́инство, е́же сие́ к на́шему упокое́нию гробие очи́стити, благослови́ти, и освятитити, да челове́ческая телеса́ зде́, по сего́ жития́ исхо́ду спочиваемая, в вели́кий де́нь Стра́шнаго Суда́ Твоего́, вку́пе с ве́рными душа́ми, живота́ ве́чнаго весе́лия сподо́бятся. Я́ко Ты́ еси́ Воскресе́ние, Живо́т и поко́й усо́пшим рабо́м Твои́м, Христе́ Бо́же на́ш, и Тебе́ сла́ву возсыла́ем, и Безнача́льному Твоему́ отцу́, и Пресвято́му Ду́ху, ны́не, и при́сно, и во ве́ки веко́в, ами́нь.
Во́нмем. Ми́р все́м. Прему́дрость.
Проки́мен, гла́с 6:
Изводя́й окованные му́жеством, та́кожде прогне́вающыя живу́щих во гробе́х.
Сти́х: Бо́г в ме́сте святе́м свое́м, Бо́г вселя́ет единомы́сленныя.
Дея́ний святы́х апо́стол чте́ние.
Глава́ 13, сти́х 25–37. 33 зач.
Во дни́ о́ны, я́коже скончава́ше Иоа́нн тече́ние, глаго́лаше: кого́ мя́ непщу́ете бы́ти, не́смь а́з, но се́ гряде́т по мне́, Ему́же не́смь досто́ин разреши́ти реме́нь сапогу́ Его́. Му́жие, бра́тие, сы́нове ро́да Авраа́мля, и и́же в ва́с, боя́щиися Бо́га, ва́м сло́во спасе́ния Сего́ посла́ся. Живу́щии бо во Иерусали́ме и кня́зи и́х сего́ не разуме́вше, и гла́сы проро́ческия, по вся́ суббо́ты что́мыя, осуди́вше (Его́), испо́лниша. И ни еди́ныя вины́ сме́ртныя обре́тше, проси́ша у Пила́та уби́ти Его́. Я́коже сконча́ша вся́, я́же о Не́м пи́сана, сне́мше с дре́ва, положи́ша во гро́бе. Бо́г же воскреси́ Его́ от ме́ртвых. И́же яви́ся на дни́ мно́ги совозше́дшим с Ни́м от Галиле́и во Иерусали́м, и́же ны́не су́ть свиде́телие Его́ к лю́дем. И мы́ ва́м благовеству́ем обетова́ние, бы́вшее ко отце́м, я́ко сие́ Бо́г испо́лнил е́сть на́м, ча́дом и́х, воздви́г Иису́са. Я́коже и во псалме́ второ́м пи́сано е́сть: Сы́н Мо́й еси́ Ты́, А́з дне́сь роди́х Тя́. А я́коже воскреси́ Его́ от ме́ртвых, не ктому́ хотя́ща возврати́тися во истле́ние, си́це рече́: я́ко да́м ва́м преподо́бная Дави́дова ве́рная. Те́мже и в друго́м глаго́лет: не да́си Преподо́бному Твоему́ ви́дети истле́ния. Дави́д бо у́бо своему́ ро́ду послужи́в, Бо́жиим сове́том у́спе, и приложи́ся ко отце́м свои́м, и ви́де истле́ние. А Его́же Бо́г воздви́же, не ви́де истле́ния.
Аллилу́иа, гла́с 1.
От Иоа́нна Свята́го Ева́нгелия чте́ние.
Глава́ 19. Сти́х 38–42. 62 зач.
Во вре́мя о́но моли́ Пила́та Ио́сиф, и́же от Аримафе́а, сы́й учени́к Иису́сов, потае́н же стра́ха ра́ди иуде́йска, да во́змет те́ло Иису́сово, и повеле́ Пила́т. Прии́де же и взя́т те́ло Иису́сово. Прии́де же и Никоди́м, прише́дый ко Иису́сови но́щию пре́жде, нося́ смеше́ние смν́рнено и ало́йно, я́ко литр сто́. Прия́ста же те́ло Иису́сово и обви́ста е́ ри́зами со арома́ты, я́коже обы́чай е́сть иуде́ом погреба́ти. Бе́ же на ме́сте, иде́же распя́тся, ве́рт, и в ве́рте гро́б но́в, в не́мже николи́же никто́же положе́н бе́. Ту́ у́бо пятка́ ра́ди иуде́йска, я́ко бли́з бя́ше гро́б, положи́ста Иису́са.
Посе́м: Го́споду помо́лимся.
Та́же глаго́лет моли́тву сию́:
Бо́же всего́ ми́ра Созда́телю, ро́да челове́ческаго Искупи́телю, и вся́ких ви́димых и неви́димых тва́рей соверше́нный Упра́вителю, моле́бным Тя́ гла́сом и чи́стым се́рдцем умоля́ем, е́же сие́ гробие, в не́м же рабо́в и рабынь Твои́х бу́дут телеса́ по проше́ствии скоротечном сего́ кратковременнаго жития́ почива́ти, очи́стити, благослови́ти и освяти́ти. И и́м же премно́гое Твое́ милосе́рдие, все́х прегреше́ний оставле́ние дарова́ти восхо́щет: те́х преставляемых телесе́м и на се́м ме́сте погребаемых, и трубы́ пе́рваго Твоего́ арха́нгела ожида́ющим, весе́лие ве́чное возда́ти изво́ли. Щедро́тами Го́спода на́шего Иису́са Христа́, единоро́днаго сы́на Твоего́, с ни́мже и Пресвяты́м Ду́хом, благослове́н еси́ во ве́ки веко́в, ами́нь.
Ми́р все́м.
Ли́к: И ду́хови твоему́.
Го́споду помо́лимся.
Бо́же его́ же ми́лостию души́ ве́рных упокоева́ются, усе́рдно, Го́споди, мо́лимтися, а́нгела Твоего́ Свята́го, храни́теля сего́ гро́ба, низпосли́, и и́же зде́ телеса́ погреба́ются, души́ и́х от все́х согреше́ний сою́зов разреши́ти благоизво́ли: е́же в Тебе́ всегда́ со все́ми святы́ми безконе́чно ра́доватися. Бо́же Всемогу́щий, О́тче Преве́чный Го́спода Святе́йший, все́х ме́ст еси́ освяще́ние и в лу́чшее претворителю, от него́ же и и́мже с Небе́с на зе́млю вся́кое благослове́ние исхо́дит, сие́ ме́сто очи́стити, благослови́ти и освяти́ти благоизво́ли, да сие́ гробие сла́дким успе́нием и упокое́нием отходя́щим телесе́м и зде́ погребе́нным бу́дет, и наслажде́ния Твоего́ приснобытною сла́достию да испо́лнится. Ны́не же во вы́шнем Иерусали́ме раби́ Твои́ усопшие ра́дующеся и веселя́щееся да пребу́дут. Донелже в вели́кий де́нь Суда́ от гробо́в телеса́ србственная восприи́мут, и та́кожде приходя́щаго Го́спода на Суди́щи с плодо́м до́брых де́л усрети возмо́гут. Я́ко Ты́ еси́ Воскресе́ние, живо́т и поко́й усо́пшим рабо́м Твои́м, и Тебе́ сла́ву возсыла́ем, Отцу́ и Сыну́ и Свято́му Ду́ху, ны́не и при́сно, и во ве́ки веко́в, ами́нь.
Посе́м ектения о упокое́нии усо́пших и отпу́ст:
Воскресы́й из ме́ртвых, Христо́с, и́стинный Бо́г на́ш, моли́твами Пречи́стыя Своея́ Ма́тере, си́лою Честна́го и Животворя́щаго Креста́, святы́х сла́вных и всехва́льных Апо́стол, и все́х святы́х, поми́лует и спасе́т на́с, я́ко Бла́г и Человеколю́бец. Ами́нь.
Глава́ 55. Слу́жба о в темни́цах и в заточе́нии су́щих мно́гих, или́ о еди́ном
На проскоми́дии:
Го́споди, Иису́се Христе́ Бо́же на́ш, свята́го апо́стола Петра́ от у́з и темни́цы без вся́каго вре́да свободи́вый, прими, смире́нно мо́лим Ти́ ся́: же́ртву сию́ ми́лостивно во оставле́нии грехо́в рабо́в Твои́х, (или́ раба́ Твоего́) и́мярек в темни́цу всажде́нных (или́ всажденнаго), и моли́твами того́, я́ко Человеколю́бец, всеси́льною Твое́ю десни́цею от вся́каго зла́го обстоя́ния изба́ви и на свобо́ду изведи́.
В нача́ле Боже́ственныя литурги́и:
По О пла́вающих:
Приложи́ сия́:
О е́же прости́ти рабо́м Свои́м (или́: рабу́ Твоему́) и́мярек вся́ согреше́ния и́х (или́: его́) и ми́лостиву и благоуве́тливу бы́ти и́м (или́: ему́), Го́споду помо́лимся.
О е́же вско́ре услы́шати гла́с моле́ния на́шего, и от у́з и темни́цы ми́лостивно свободи́ти и́х (или́: его́), Го́споду помо́лимся.
О е́же по мно́гим щедро́там и ми́лости Свое́й от вся́каго зла́го обстоя́ния, изба́вити и освободити рабы́ Своя́ Го́споду помо́лимся.
О е́же сотвори́ти ми́лость с рабы́ Свои́ми (или́: с рабо́м Свои́м), и от все́х бе́д и ну́жды и от узи́лища, я́коже дре́вле Ио́сифа во Еги́пте иногда́, си́лою Свое́ю ско́ро свободи́ти и́х, Го́споду помо́лимся.
По вхо́де тропа́рь гла́с 2.
Манасси́ю от у́з и го́рькаго заточе́ния моли́тв ра́ди свободи́вый, Всеще́дрый Бо́же, и рабы́ Твоя́ (или́: раба́ Твоего́), на́ми ны́не моля́щыяся (или́: моля́щагося) от у́з и заточе́ния свободи́, и от вся́каго зла́го обстоя́ния изба́ви, я́ко Еди́н Человеколю́бец.
Конда́к, гла́с 5.
Я́ко милосе́рдия Исто́чник и бла́гости Пучи́на, Христе́ Бо́же, не пре́зри в ско́рбях и беда́х Тебе́ ве́рою призыва́ющих, но я́ко Ще́др поми́луй, и от у́з ско́ро свободи́, да пое́м Ти́: аллилуия.
Проки́мен, гла́с 7:
Изведи́ из темни́цы ду́шу мою́, испове́датися и́мени Твоему́.
Вонми́ моли́тве мое́й, я́ко смири́хся зело́.
Дея́ний святы́х апо́стол чте́ние.
Глава́ 12, сти́х 1–11. 29 зач.
Во дни́ о́ны же вре́я возложи́ И́род ца́рь ру́це озло́бити не́кия и́же от це́ркве. Уби́ же Иа́кова, бра́та Иоа́ннова, мече́м. И ви́дев, я́ко го́де е́сть Иуде́ем, приложи́ я́ти и Петра́, (бя́ху же дни́е опресно́чнии). Его́же и е́мь всади́ в темни́цу, преда́в четы́рем четвери́цам во́инов стрещи́ его́, хотя́ по Па́сце извести́ его́ к лю́дем. И у́бо Петра́ стрежа́ху в темни́це: моли́тва же бе́ приле́жна быва́емая от це́ркве к Бо́гу о не́м. Егда́ же хотя́ше его́ извести́ И́род, в нощи́ то́й бе́ Пе́тр спя́ между́ двема́ во́инома, свя́зан желе́знома у́жема двема́, стра́жие же пред две́рьми стрежа́ху темни́цы. И се́ А́нгел Госпо́день предста́, и све́т возсия́ в хра́мине: толкну́в же в ре́бра Петра́, воздви́же его́, глаго́ля: воста́ни вско́ре. И спадо́ша ему́ у́жя желе́зная сруку́. Рече́ же А́нгел к нему́: препоя́шися и вступи́ в плесни́цы твоя́. Сотвори́ же та́ко. И глаго́ла ему́: облецы́ся в ри́зу твою́ и после́дствуй ми́. И изше́д всле́д его́ идя́ше и не ве́дяше, я́ко и́стина е́сть бы́вшее от А́нгела, мня́ше же виде́ние зре́ти. Проше́дша же пе́рвую стра́жу и втору́ю, приидо́ста ко врато́м желе́зным, вводя́щим во гра́д, я́же о себе́ отверзо́шася и́ма, и изше́дше преидо́ша сто́гну еди́ну, и а́бие отступи́ А́нгел от него́. И Пе́тр бы́в в себе́, рече́: ны́не ве́м вои́стинну, я́ко посла́ Бо́г А́нгела Своего́ и изъя́т мя́ из руки́ И́родовы и от всего́ ча́яния люде́й иуде́йских.
Аллилу́иа, гла́с 4.
Из глубины́ воззва́х к Тебе́, Го́споди, Го́споди, услы́ши гла́с мо́й.
Сти́х: Да бу́дут у́ши Твои́ вне́млюще гла́су моле́ния моего́.
От Иоа́нна Свята́го Ева́нгелия чте́ние.
Глава́ 8. Сти́х 31–36. 31 зач.
Реч́е Госпо́дь к ве́ровавшим к Нему́ иуде́ом: а́ще вы́ пребу́дете во словеси́ Мое́м, вои́стинну ученицы́ Мои́ бу́дете, И уразуме́ете и́стину, и и́стина свободи́т вы́. Отвеща́ша и ре́ша Ему́: се́мя Авраа́мле есмы́ и никому́же рабо́тахом николи́же, ка́ко Ты́ глаго́леши, я́ко свобо́дни бу́дете? Отвеща́ и́м Иису́с: ами́нь, ами́нь глаго́лю ва́м, я́ко вся́к творя́й гре́х ра́б е́сть греха́. Ра́б же не пребыва́ет в дому́ во ве́к, сы́н пребыва́ет во ве́к. А́ще у́бо Сы́н вы́ свободи́т, вои́стинну свобо́дни бу́дете. Ве́м, я́ко се́мя Авраа́мле есте́, но и́щете Мене́ уби́ти, я́ко сло́во Мое́ не вмеща́ется в вы́. А́з, е́же ви́дех у Отца́ Моего́, глаго́лю, и вы́ у́бо, е́же ви́десте у отца́ ва́шего, творите́. Отвеща́ша и ре́ша Ему́: оте́ц на́ш Авраа́м е́сть. Глаго́ла и́м Иису́с: а́ще ча́да Авраа́мля бы́сте бы́ли, дела́ Авраа́мля бы́сте твори́ли. Ны́не же и́щете Мене́ уби́ти, Челове́ка, и́же и́стину ва́м глаго́лах, ю́же слы́шах от Бо́га, сего́ Авраа́м не́сть сотвори́л. Вы́ творите́ дела́ отца́ ва́шего. Ре́ша же Ему́: мы́ от любодея́ния не́смы рожде́ни, еди́наго Отца́ и́мамы, Бо́га. Рече́ же и́м Иису́с: а́ще Бо́г Оте́ц ва́ш бы бы́л, люби́ли бы́сте у́бо Мене́, А́з бо от Бо́га изыдо́х и приидо́х.
По Рце́м вси́:
На свое́м ме́сте приложи́:
Петра́ от у́з и темни́цы изведы́й и невре́дна Це́ркви Твое́й предста́вивый, Христе́, и рабо́в Твои́х (или́: раба́ Твоего́), на́ми Тебе́ ны́не моля́щихся (или́: молящегося), я́ко Милосе́рд поми́луй и от у́з свободи́, мо́лимтися, Всеми́лостивый Спа́се, услы́ши и поми́луй.
Ио́сифа в темни́це иногда́ в Еги́пте заключе́ннаго пресла́вно свободи́вый и ны́не на́ми Тебе́ призыва́ющыя (или́: призыва́ющаго) от у́з и го́рькия беды́ изба́ви, мо́лимся Тебе́, Изба́вителю ми́лостивый, услы́ши и ско́ро поми́луй.
Прича́стен:
Да вни́дет пред Тя́ воздыха́ние окова́нных, по вели́чию мы́шцы Твоея́ снабди́ сы́ны умерщвле́нных.
Глава́ 56. Чи́н благослове́ния ко́лива.
Си́есть кутии́, или́ варе́ныя пшени́цы, с ме́дом смешанныя и разли́чными сла́дкими овощьми́ укра́шенныя, в че́сть и па́мять Госпо́дских пра́здников, или́ святы́х Бо́жиих, во це́рковь приноси́мыя.
Принесе́ну бышу ко́ливу во це́рковь, а́ще на вече́рни, по Ны́не отпуща́еши: Трисвято́е. По О́тче на́ш: тропа́рь. Сла́ва и, ны́не: Богоро́дичен по гла́су тропаря́ свтаго. А́ще же на литурги́и, по заамво́нной моли́тве пое́тся тропа́рь и конда́к свята́го.
Диа́кон, покади́в, глаго́лет:
Го́споду помо́лимся.
Ли́к: Го́споди, поми́луй.
Свяще́нник, ста́в над ко́ливом, глаго́лет моли́тву сию́:
Вся́ соверши́вый сло́вом Твои́м, Го́споди, и повеле́вый земли́ многоразли́чныя прозяба́ти плоды́ в наслажде́ние и пи́щу на́шу, И́же се́менми три́ о́троки и Дании́ла, су́щия в Вавило́не, сластнопита́нных светльшия показа́вый, Са́м, Всеблаги́й Царю́, и се́мена сия́ с разли́чными плоды́ благослови́ и от ни́х вкушающия освяти́, я́ко во сла́ву Твою́ и в че́сть свята́го и́мярек сия́ предложи́шася от Твои́х рабо́в, и в па́мять во благочести́вой ве́ре сконча́вшихся. Пода́ждь же, Бла́же, благоукрасившим сия́ и па́мять соверша́ющим, вся́, я́же ко спасе́нию проше́ния, и ве́чных Твои́х бла́г наслажде́ние, моли́твами Пречи́стыя Влады́чицы на́шея Богоро́дицы и Присноде́вы Мари́и, и свята́го и́мярек, его́же и па́мять соверша́ем, и все́х святы́х Твои́х. Я́ко Ты́ еси́ благословля́яй и освяща́яй вся́ческая, Бо́же на́ш, и Тебе́ сла́ву возсыла́ем, Безнача́льному Отцу́, со Единоро́дным Твои́м Сыно́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Ли́к: Ами́нь.
И а́ще на вече́рни, диа́кон: Прему́дрость.
Ли́к: Благослови́.
Свяще́нник: Сы́й благослове́н:
и про́чая до отпу́ста.
А́ще же на литурги́и, пое́т ли́к: Бу́ди и́мя Госпо́дне: три́жды. И псало́м: Благословлю́ Го́спода на вся́кое вре́мя:
Разда́в же анти́дор, свяще́нник твори́т обы́чный отпу́ст литурги́и.
Глава́ 57. Чи́н благослове́ния фимиа́ма, си́есть кади́ла
Взе́м иерéй епитрахи́лий на себé, начинáет начина́ет обы́чно: и чте́т Царю́ Небе́сный: Трисвято́е: О́тче на́ш: Го́споди поми́луй, 12.
Сла́ва Отцу́, и Сыну́ и Свято́му Ду́ху, ны́не, и при́сно, и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псало́м 65.
Воскли́кните Го́сподеви, вся́ земля́, по́йте же и́мени Его́, дади́те сла́ву хвале́ Его́. Рцы́те Бо́гу: ко́ль стра́шна дела́ Твоя́? Во мно́жестве си́лы Твоея́ со́лжут Тебе́ врази́ Твои́. Вся́ земля́ да покло́нится Тебе́ и пое́т Тебе́, да пое́т же и́мени Твоему́, Вы́шний. Прииди́те и ви́дите дела́ Бо́жия, ко́ль стра́шен в сове́тех па́че сыно́в челове́ческих. Обраща́яй мо́ре в су́шу, в реце́ про́йдут нога́ми, та́мо возвесели́мся о Не́м, Влады́чествующем си́лою Свое́ю ве́ком. О́чи Его́ на язы́ки призира́ете, преогорчева́ющии да не возно́сятся в себе́. Благослови́те, язы́цы, Бо́га на́шего и услы́шан сотвори́те гла́с хвалы́ Его́,поло́жшаго ду́шу мою́ в живо́т и не да́вшаго во смяте́ние но́г мои́х. Я́ко искуси́л ны́ еси́, Бо́же, разже́гл ны́ еси́, я́коже разжиза́ется сребро́. Вве́л ны́ еси́ в се́ть, положи́л еси́ ско́рби на хребте́ на́шем. Возве́л еси́ челове́ки на главы́ на́ша, проидо́хом сквозе́ о́гнь и во́ду, и изве́л еси́ ны́ в поко́й. Вни́ду в до́м Тво́й со всесожже́нием, возда́м Тебе́ моли́твы моя́, я́же изреко́сте устне́ мои́, и глаго́лаша уста́ моя́ в ско́рби мое́й, всесожже́ния ту́чна вознесу́ Тебе́ с кади́лом, и овны́, вознесу́ Тебе́ волы́ с козлы́. Прииди́те, услы́шите, и пове́м ва́м, вси́ боя́щиися Бо́га, ели́ка сотвори́ души́ мое́й. К Нему́ усты́ мои́ми воззва́х и вознесо́х под язы́ком мои́м. Непра́вду а́ще узре́х в се́рдце мое́м, да не услы́шит мене́ Госпо́дь. Сего́ ра́ди услы́ша мя́ Бо́г, вня́т гла́су моле́ния моего́. Благослове́н Бо́г, и́же не отста́ви моли́тву мою́ и ми́лость Свою́ от Мене́.
Посе́м ре́к, Гóсподу помóлимся: и Гóсподи поми́луй. Чте́т моли́тву сию́:
Влады́ко, Го́споди Иису́се Христе́ Бо́же на́ш, Исто́чниче освяще́ния и благослове́ния Пода́телю, услы́ши моли́тву мене́ гре́шнаго, и низпосли́ благослове́ние Твое́ свято́е Небе́сное на фимиа́м се́й, и благослови́ и освяти́ его́, и вле́й на́нь бога́тое Твое́ дарова́ние. И да́руй ему́ си́лу в е́же бы́ти ему́ все́м ве́рою храня́щим его́, и кадя́щимся и́м соблюде́ние, и изба́ву от все́х вра́жиих прило́гов, и в отгна́ние вся́каго мечта́ния от де́йства диа́воля находя́щаго, дневна́го же и нощна́го: На благослове́ние же душа́м и те́лом ве́рных лю́дей Твои́х, домово́м же и место́м, и в сла́ву Пресвята́го Великоле́пного же и всепокланя́емаго И́мени Твоего́, Ему́же подоба́ет вся́кая сла́ва, держа́ва, че́сть и поклоне́ние, с Отце́м и Святы́м Ду́хом, ны́не и при́сно и во ве́ки веко́в.
Кли́р: Ами́нь.
Иере́й же кропи́т свяще́нною водо́ю, глаго́ля:
Благословля̀ется и освяща́ется фимиа́м се́й окропле́нием воды́ сея́ свяще́нныя во И́мя Отца́, и Сы́на и Свята́го Ду́ха, ами́нь.
И твори́т отпу́ст дневны́й.