Богословие Павла Белокриницкого, или первая глава «Устава» Белокриницкого монастыря

При «Истории Белокриницкой иерархии», изданной в 1874 году, в числе приложений, был напечатан «Устав Белокрыницкого староверского монастыря», составленный известным учредителем ныне существующей у раскольников иерархии иноком Павлом, и утвержденный австрийским правительством в качестве документа, на основании которого дозволено им существование и Белокриницкого монастыря и учрежденной в монастыре раскольнической архиерейской кафедры, прародительницы всех ныне существующих раскольнических архиерейских кафедр и за границей и в России.

Печатая потом в 1885–1886 г. в «Братском Слове», а также и отдельною книгою, новое, сокращенное изложение названного сочинения, под заглавием «История Белокриницкого священства», мы не нашли нужным перепечатывать сделанные к нему приложения, в том числе и «Устав Белокрыницкого монастыря», дабы без крайней надобности не увеличивать объем книги и тем облегчить ее приобретение для большинства читателей.

Между тем приходится слышать от многих сожаление, что не приложен к новому изданию «Истории» по крайней мере «Устав Белокрыницкого монастыря», как документ, имеющий особенную важность и для истории Белокриницкой иерархии, которая на нем имеет свое основание, и для полемики с расколом, ибо в первой главе Устава излагается вероучение, или богословие инока Павла, учредителя иерархии, содержащее в себе еретические мнения, которые не излишне указывать раскольникам на беседах с ними.

Признавая справедливость особенно этого последнего замечания, мы решились теперь напечатать именно первую главу Белокриницкого Устава, или так называемое Богословие инока Павла, напечатать и при «Братском Слове» и отдельною книжкою, которая может служить приложением к недавно изданной «Истории Белокриницкого священства».

При настоящем издании первой главы Устава мы вновь проверили ее по подлиннику, как известно, находящемуся ныне в Хлудовской библиотеке.

Погрешительные мнения Павла Белокриницкого, внесенные им в первую главу Устава, были в свое время обличены, как еретические, самими старообрядцами, первоначально бывшим епископом Коломенским Пафнутием и его приближенными – Пафнутием Казанским, доныне архиерействующим у раскольников, начетчиком Семеном Семеновым и автором Окружного Послания Иларионом Егоровым, а потом и целым собором раскольнических властей, находившихся в Москве, который сделал об них постановление 17 августа 1863 года. Об этих еретических мнениях Павла, каково особенно мнение о предвечном существовании особого «состава», именуемого «вецы», о подвременном рождении, Сына Божия и подвременном исхождении Святого Духа, и о проч., желающий может прочесть в «Истории Белокриницкого священства» (стр. 112–114) и пространнее в «Истории Белокриницкой иерархии» (стр. 170–184), также в книжке «Присоединение раскольнических епископов» (стр. 31–51) и в предисловии к «Восьми вопросам».

Бог есть¹ существо неповинно, яко ни от когоже² , ни сам от себе; да не будет отнюдь кому возмнети, яко прежде не бе, или не совершен бе: ибо тогда последовало бы от нужди глаголати: или создан, иди сам себе приведе в божественное существо. Но³ Бог есть един, не создан, искони совершен, безначален, превечен и безконечен, якоже сам Моисею глаголаша⁴ : «Аз есмь сый!» Еже есть

Существом⁵ , (просто рещи бытием) присносущен, всемогущ, всесилен, и вина всяческим⁶ : яко «вся тем быша, и без него ничноже бысть, еже бысть; и⁷ «разве бо его ни дело, ни слово совершается». И ничтоже от него невозможно, даже до толика: якоже человеку несть труда, еже на вся умом восхотети, тако и Богу, егда что точию восхощет, вся та делом сотворити; глаголет бо пророк:⁸ «Бог наш на небеси и на земли, вся елика восхоте сотвори». Сие приемля святой Григорий Богослов глаголет:⁹ «Первее убо помысли ангельские силы небесные, и помышление дело бысть, Словом исполняемо, и Духом совершаемо. Итако составишася светлости втории, слуги первой светлости, сиречь умнии духове, или огнь невеществен и безтелесен, или некое же естество ино, ближайше к реченным», ихже естества вид и устав только един Творец весть. Чему с покорением наипаче всех согласует святой Иоанн Дамаскин:¹⁰ «Лепо бо, рече, бе прежде умная существа сотворити, и потом чувственное, и посем от обоего (существа) человека». Вся же сия содетельствова Бог единородным и соприсносущным Сыном Словом своим, и утверди силою всесвятого своего Духа, по глаголющему пророку:¹¹ «Словом Господним небеса утвердишася, и Духом уст его вся сила их»; еже ecть:¹² «Отцу убо умыслившу, Сыну же содетельствовавшу и Духу совершившу».

Чувственное же творение его в начале бысть чином выше естественных: ибо егда восхоте Бог, шар неба и земли¹³ , аки некую храмину сотворити, и сотворил из ничего. Первее же¹⁴ «простре (выше обычно покров зданию) небо яко кожу», еже именует писание¹⁵ «небо небес»¹⁶ , суще беззвездное, безчисленною добротою от божественных лучей сияющо. А земля, и воды, и прочие вещи всего здания тогда были не ино что, как вещество смешенное и погруженное во ужасной тьме и мрачном хаосе. И¹⁷ Дух Божий носился над сим влажным и неустроенным веществом.¹⁸ He о Святом же Дусе зде писание глаголет: ибо не считается с тварию несозданное; но дух той бяше, по глаголу святого Андрея Цаградского, яже прежде всего от Бога сотворен бысть, существо вечного состава, еже есть вецы, безвестна прохода¹⁹ (о существе века, яко присносущен, егоже сотворил Бог прежде мирского составления, поясняет Соборник на 8 стих 2 слова на пасху святого Григория Богослова).²⁰ Потом сотворил Бог свет.²¹ Свет же не ино что, разве огнь. И отделив его от тьмы, соделал первое разделение дня и нощи, и сие составило Первый день, в которой началось творение.

Обаче за сотворение света, да не возмним первобытную тьму быти искони присносущну, да не тем от нужди последует и Бога глаголати тьмою изначала бывша. Но убо достоит разумевати²² , яко Бог, сый свет истинный, искони совершен и непременен есть; точию до сотворения дел своих бе в молчании, имея единосущное во уме Слово Сына своего, егоже, по глаголу блаженного Андрея Цареградского, в первом изречении: «да будут вецы»²³ , нетленно родил, сиречь во исхождении Соприсносущным Духом своим Святым от сердца отрыгнул, якоже свидетельствует пророком:²⁴ «из чрева прежде денницы родих тя». Итако от разумной твари познася, яко есть, в триех составех, един Бог превечный,²⁵ свет истинный, иже просвещаяй и освящаяй всякого человека, грядущего в мир. Обаче свет, еже глаголется Бог, не есть самое естество Бога, но точию присносущная его слава, свидетельствующу пророку:²⁶ «одеяйся светом яко ризою». А идеже пророк глаголет: «и положи тьму закров свой», (Пс.17:13)²⁷ за непостижение естества его тако изрече; свидетельствует бо Евангелие, да и видимое самое действо показует, что²⁸ тьма не может обладати светом, сиречь темнотою своею свет покрывати: а посему разумевается, яко первобытная тьма не есть искони некое существо, ниже потом сотворенное какое-либо вещество, но не ино же что, разве: или от тени первоначально простертого небеси быти случися, или (аще высшее небо, по вышереченному, естеством и кроме солнца светло)²⁹ егда вода бяше всюду по земли и мгла над водами стояше, которая, составив облаки, облаки же посетивше сотвориша тьму, понеже и писание обыче вещати: небо помрачися облаки. В согласность сего свидетельствуют святых отец ясные рассуждения³⁰ , яко тьма не существо некое, но случай; егда света лишение, тогда тьмы пришествие.

А как выше помянулось творение Божие в первой день, так присовокупляются к тому и прочие дни седмицы, в следующем описании:

Во второй день³¹ сотворил Бог твердь, аки здание постави, якоже Исаия пророк глаголет:³² «поставивый небо, яко камару, и простер е, яко скинию обитати». По толкованию Иоанна Ексарха и прочих святых отец: сия твердь³³ , сиречь второе видимое небо, сверху водами покровено есть. «Покрываяй (бо рече Пророк) водами превыспренняя своя.³⁴ Обычай же есть Божественному писанию еще и воздух, иже зрим горе, небо нарицати.

В Третий день³⁵ повеле Бог во внутреннем тверди вмещении, аки в храмине, приличному быти устроению, еже есть:³⁶ пределы морям, и явитися суши (земли), и украситися ей древесами и травами, и приноситися плодом.³⁷ В преисподнии же места сгустившаяся собрася мгла, и сотвориша тамо всегда непросветимую тьму.

В четвертый день³⁸ повеле Бог, да будут светила на тверди небесней, (аки светильники для освещения храмины)³⁹ и бысть солице, луна и звезды⁴⁰ , дабы они правильным своим течением показывали точнейшее обращение часов, изменение времен и течение лет⁴¹ . He от иногоже естества сотворил их Бог, но от того же в первый день сотворенного света, как сказует святой Иоанн Дамаскин:⁴² «светильником бо первотворный свет вложи, не яко не имый иного света, но да не будет празден той свет».

Пишется убо⁴³ , яко в четвертый день и сатана за гордыню из первые славы и светлости своея отпаде, и бысть самопроизвольная злоба и помраченная тьма.

В пятый день⁴⁴ повеле Бог быти рыбам морским, и птицам пернатым и всем животным, яже от воды.

В шестой день⁴⁵ повеле Бог быти другим животным: скотом, зверем, и прочим, яже от земли.

На концы же всего создания⁴⁶ сотвори Бог человека (мужа и жену сотвори их) посреди мертвенного и бессмертного естества, еже есть: не яко прочих животных⁴⁷ , в нихже кровь вместо души есть⁴⁸ . Но человеку тело сотворил Бог от персти земные, а душу вдохнул ему от божественного своего вдохновения,⁴⁹ не еже от своего существа, ниже от какого состава, но от своея содетельные силы, умну и бессмертну⁵⁰ , ей же действию во удех плоти служит кровь человеческая, аки колесница, на ней же душа носима бывает⁵¹ . И толика сотвори Бог человека суща всего блага, яко быти ему по образу его и по подобию: по образу – не начертанием телесным, но яко царя твари самовластным саном почтил и рассудительною силою одарил, a по подобию добродетелью снабдил, еже есть: естественным законом (совестью). Сверх же того, к соблюдению такового блаженства, заповедию его оградил, того ради: да твердо знает и присно помнит создателя своего, и согласно святой воли ег⁵² соблюдает данную заповедь ему и пребудет наследником царствию его, еже есть: соединится Богу и обезсмертится; аще ли же преступит ю, приближится тлению, и будет страстен вместо бесстрастного, сиречь зол вместо благого, и смертен вместо бессмертного.⁵³ Понеже зло не существо кое есть, но лишение добродетели, якоже и тьма света есть отшествие. В первобытном бо творении Божием ни что же бяже зло, но вся добра зело, якоже пишет: вид Бог вся творения своя, яко добро. И потом: в седмой день⁵⁴ почи Бог от всех дел своих, яже сотвори, и благослови день той святити.

Естеством же⁵⁵ Бог сый преестествен, неисследим и неприступен даже до толика: якоже невозможно есть огня тяжесть извесити, невозможнейше же есть естество Божие исследовати, и ниже к тому, в немже Сый обитает, кому приступити, яко и вся силы небесные в ня желают приникнути, но говеют зело неприступному свету: понеже⁵⁶ живет (сказующу Апостолу Павлу) во свете непреступнем. Аще ли свет неприступен, множае паче живяй в нем Бог. Обаче добре вемы, яко есть Бог; а что естеством есть Бог, невемы.⁵⁷ Аще и глагола Христос самаряныни, яко «Дух есть Бог», но и кланятися ему достоит, рече, духом; и паки: источник воды живы; еще же и душа наша многажды дух именует, как и Апостол Павел рече:⁵⁸ «сам бо Дух свидетельствует духови нашему»; и паки тойже Апостол, согласно Моисею, глаголет:⁵⁹ «Бог наш огнь поядаяй есть. Пачеже и сам Дух Святой в крещении Христовом явися голубом, а в пятьдесятницу на Апостолах во огненных языцех.⁶⁰ Сия ли вся Бог нам будет? ни дух точию, но и огнь, и вода, и прочее безместнейша? Да не будет! (To бо не б о естестве Божием значении, но о действиях его образовании). Егда убо воображенное естество ангельское, аще и тьмами кто любомудрствует, что оно есть, якоже выше речеся, обрести не может⁶¹ , и что глаголем о естестве ангельском! но ниже самые души нашея, аще и воображено также естество имать, отнюдь разумети не может, что убо сия есть: воздух ли, или дух, или ветр? сия убо вся телесна суть, она же безтелесна, но паче умна; то едали уму естество обрящем, которой мысленно в мгновении ока пролетает каменные стены и вся твердейшие преграды, и выше небес взимается, абие и преисподней бездне касается, а от души не отлучается! Зане⁶² души ум, того же существа часть пречистейшая есть. Аще убо ангелов и своея души естества обрести отнюдь не можем: кольми паче естество невоображенное всех владыки и содетеля нашего ниже помыслом до того коснутися можем!

Лицем, сый невидим, якоже Моисею глаголаше:⁶³ «Аз сам предыду пред тобою и упокою тя, лице же мое не явитътися, не может бо человек лице мое видети и жив быти». И не только человеком в существе Бога видети невозможно, но ниже всем небесным силам, якоже церковь поет: «Бога человеком не удобь видети, наньже не смеют чини ангельстии зрети». Сидит бо на херувимах и видит бездны! Обаче, сам сый прост и несложен и невоображен есть, невидим и неосязаем, ниже описуем. Якоже бо невозможно показати гласу образ: невозможнейшее же есть кому видети в существе Бога. Глаголет бо Евангелист:⁶⁴ «Бога никтоже виде нигде же». Елико же о нем плотски речеся, образно глаголется: Лице убо Божие разумеваем, еже вся имеющи пред собою. Очи – видение всех дел и неутаение сердец человеческих и помышлений. Ушеса – вся слышание, и молитв приимание. Уста – повеления, обетования, прещения и учения. Мышца – всемогущая его сила. Руце – непостижное деяние его. Нозе же – скорое исхождение на помощь требующим, и врагом на отмщение. Аще же и виде⁶⁵ Исаия Пророк на престоле превысоце Бога и Даниил⁶⁶ ветхого деньми, и прочии инако; но не существом, а также образно точию, елико возможно естеству вмещати величество славы его, якоже и Апостолом в преображении своем на Фаворе⁶⁷ .

Присутствованием везде-сый. Аще и глаголет Бог усты Исаия Пророка:⁶⁸ «Небо престол мой, земля же подножие ног моих»; обаче местом не определяем. Егда убо мы сами определением места не можем сказать о своей души: ибо аще скажем, яко душа простирается по всем членам, соединившись с дебельством плоти; но несть тако: множицею рукам и ногам отсеченным бывшим, а она цела и неврежденна пребывает; аще ли скажем: не во всем телесе, но в части некоей собрана пребывает, сиречь в сердцы, имже человек животное дыхание имеет, или во главе, идеже ум яко царь во владычественном пребывает (одеян в сан самовластия, имея под собою впреди мысли, созади память, а одесную и ошуюю рассуждение и совесть); но ниже сие мощно рещи: ибо тогда нужда прочим членам тела мертвым быти, бездушное бо всяко мертво есть. Но убо добре вемы, яко душа есть в телеси нашем; какоже есть? отнюдь не вемы. Кольми же паче создателя своего Бога, яко всюду есть, вемы; какоже есть? не вемы. Свидетедьствующу бо Давиду:⁶⁹ «На всяком месте владычество его». Чему тойже и удивляяся, со ужасом взывает:⁷⁰ «Камо пойду от Духа твоего, и от лица твоего камо бежу! аще взыду на небо, ты тамо еси, еще сниду во ад, тамо еси, аще возму криле мои рано, и вселюся в последних моря, и тамо бо рука твоя наставит мя, и удержит мя десница твоя». И паки хвалословно возгласи:⁷¹ «Кто Бог велий яко Бог наш, ты еси Бог творяй чудеса!»

Величеством⁷² непостижим, яко ни един помысл постигнути возможет: взыдем убо умныма очима выше небес, и ангелы прейдем, возможно ли постигнути выше оных превыспреннюю высоту, идеже бы ум мог стати и утвердитися? невозможно! Елико убо невозможно постигнути непостижимую ту высоту, равно глубину и широту: невозможнейше же есть постигнути величество Божества.

Провидением⁷³ всепредведущ, свидетельствующу Давиду⁷⁴ , яко всех испытует сердца и утробы;⁷⁵ не утаится бо кость наша от него, зане он ю сотворил есть в тайне, и несоделанная наша видят очи его, и в книзе его вся написана суть, и⁷⁶ пядию измерены он положил есть дни наша, и весь состав наш нивочтоже пред ним, и даже все время жития сего (по сказанию в предисловии на 2 Петрово послание), яко ничтоже есть пред Господом, за еже и⁷⁷ един день, яко тысяща лет, и тысяща лет, яко един день.

Премудрыми судьбами неиспытан, якоже глаголет пророк:⁷⁸ «Судьбы твоя бездна многа». И паки, тойже рече: «По всей земли судьбы его» к ним же, аки оконцем приникнув, Апостол Павел, иже и когда восхищенный до третьего небесе, и некую часть того истязав, вид яко пучину безмерну и непостижиму, абие отскочив и со ужасом возопив:⁷⁹ «О глубина богатства премудрости и разума Божия! яко не испытаны судьбы его, и не исследованы путие его. Кто бо разуме ум Господень, или кто советник ему бысть, или кто прежде даст ему, и воздастся ему? яко из того, и тем, и в нем всяческая.

Спасительным промыслом беспределен, до толика⁸⁰ яко и малейшие птички, иже две ценятся единым ассарием, и ни едина от них падет на земли без Отца небесного.⁸¹ A у человеков и власы главные вси изочтени суть, и ни един от них погибнет, сиречь, без ведома его, якоже усты Исаия пророка рече:⁸² «еда ли забудет жена отроча свое, еже не помиловати исчадия чрева своего! аще и забудет то жена, но аз не забуду тебе, глаголет Господь».

Щедротами и милосердием бесчислен. Якоже бо невозможно мерилом измерити воду всего моря: невозможнейши же есть исчислити изливаемые на нас Божия милосердия щедроты. Ибо присно на всякую тварь, на благие вкупе и на злые⁸³ , обтечением солнца осиявает и греет, осеняет распростертым небом, украшенным огненными зарями, сребровидною луною и звездами, иже толикими веки не стареет, но, аки вчера соделано, присно юнеет, да тем всепречудным и великим творением истинного Творца и Бога познавати всех научает. К сим же дождит на землю небесною росою, да сеющие семена и в недрех ее умирающие паки оживляет, и сторицею возращает, и тем всякую плоть на земли питает, и самую же ту землю древесами, травами и цветами украшает, и еще же предивне! своевременно уставленными стихиями вся умерщвляет, и паки вся та оживляет, да тем⁸⁴ общее всех умерших воскресение, присно напоминает, вкупе и уверяет. До толика же, рещи, есть благоутробен, елико жена, имущая во чреве бремя, желает разрешения и хощет чада себе родити: вящьше же Бог желает на всех щедрые своя милости излияти, и хощет всем спастися, и царствия его наследниками быти. Обаче жене толико сильное желание бывает случайно: в Бозе же есть естественно и присно. Якоже водное естество, стоящее на горе, присно долу тещи возможности ищет, или якоже чувственное солнце, только бы могло обрести где скважиною вход, и в самые гнусные и нечистотами преисполненные узилищные места проницает и, вшед в ня, лучи своя не оскверняет, но паче тамо освещает и нечистоту иссушает: такожде и Бог (свидетельствующу святому писанию)⁸⁵ хотением не хощет смерти грешнику,⁸⁶ но всем человеком спастися, и в разум истины приити. И паки Спаситель рече:⁸⁷ «Несть воля пред отцом вашим небесным, да погибнет един от малых сих». И что еще преболее!⁸⁸ Глаголет писание: Яко Бог Сына своего единородного непощаде, за ны предал есть его, сиречь, до распятия и смерти, да род человеческий избавит от смерти, еже есть, вечные муки уготованной дьяволу и ангелом его.

Правосудием же нелицемерен, сиречь:⁸⁹ многомилостив есть, обаче и праведен, равными мерами возмездие воздает, да елико долготерпит, толико согрешающих и казнит, свидетельствующу пророку Давиду:⁹⁰ «гнев в ярости его, и живот в воли его». И Апостол Павел глаголет:⁹¹ «страшно есть еже впасти в руце Бога жива»; томуже согласно и Апостол Петр пишет:⁹² «аще бо Бог ангелов согресших не пощаде, но пленицами мрака связав, предает на суд мучими блюсти, и первого мира не пощаде, но осмаго Ноя, правде проповедника, сохрани, потом миру нечествовавших ради навед; и грады содомские и гоморские сжег, разорением осуди, образ хотящим нечествовати положив; и праведника Лота, обидима от беззаконных и живущих в нечистоте житейстей, избави; весть бо Господь благочестивые от напасти избавляти, неправедники же в день судныи мучими блюсти». Кольми паче будущий всеобщий праведный его суд грешным зело, грозен и страшен, яко воньже день, утаенной от человек и от ангел, предположи живым и мертвым судити, страшный день той наричится!

Сверх же сего, собранного от священных писаний, многоименного Божиего действия⁹³ , и множайшая есть имена Божия, якоже свидетельствует великий Катихизис, различного ради смотрения, писанием предана суть, иже есть: Любовь, Правда, Премудрость, Благостыня, Вседержитель, Святой, Всеиметель, Всесильность, Величество, Присносущьство, Превечность, Милосердие, и сим подобная, которые не естество суть, ни же образ, но действо и великая сила Божия, искони от неприступного естества происходящая. Естество же от существа разделяется точию в разглагольствии: егда вопрошается о бытии Бога, тогда глаголется существо; а егда вопрошается о качестве его, тогда глаголется естество; понеже глаголет святой Иоанн Дамаскин:⁹⁴ «существо убо, рекше просто, бытие; естествоже, существо видотворпвшееся».

Впрочем, егда убо речет кто: аще Господь Бог наш неведом есть, то како убо и глаголати имамы о нем? Ведомо буди таковому, яко мы, егда убо о Бозе глаголем, не о сем глаголем, еже испытовати и истязати, каков есть качеством в своем естестве, или каков количеством в своем величестве; но о сем от святых писаний поучаемся, яко ни словом изречен, ниже умом домыслим есть. И тако удивляемся величествию его и похваляем дела премудрости его, да восследуем ему благими делы своими, и привлечем к себе благодать его.⁹⁵ «Суетни убо вси человецы естественне, в нихже обретается неведение о Бозе». Сего ради таковым убо вход в блаженный покой гласом пророческим от Господа возбраняется:⁹⁶ «Тии же (рече) непознаша путей моих, яко кляхся во гневе моем, аще внидут в покой мой».

Темже блаженна есть душа та, иже единому Богу угодити желает, и иной любви на земли не ищет, и прелести земные хвалити не хощет,⁹⁷ «но о сем да хвалится хваляйся (по писанному), во еже разумети и знати Господа».

1. Вопрос: Егда преблагий Бог, в первобытном творении своем (якоже выше во статье Богопознания речеся) вся зело добра сотворил есть, и человека душею и телом всего блага создал, и добродетель ему в естество даровал: то почто человецы не вси суть благи и добродетельны? но овые благие, овые же злые? и откуда сие противное бывает?

Ответ: Бог злу не творец:⁹⁸ научаемся же от Евангельской притчи о добром семени, и как выше во статье Богопознания явствует, яко творение его есть благо, но самовластное человеков произволение соделывает овых благими, овых же злыми. Понеже сие человеческое самовластие (сила, или власть душевная) уподобися следующему примеру:⁹⁹ «якоже воевода владеет подданными ему вои, ихже всегда зрит, и во всякое промышление распоряжает, рассуждает и уставляет: тако и самовластие наше, всеми частьми, и удесы, и составы и чувствы человеческими владеет, и содержит, и наставляет, и обращает, и не имать ни едино от уд наших, еже бы где затворити его, течет, идеже хощет, вселяется, идеже желает, а идеже желает, туде и удеса и чувства наша обращает, якоже: ушеса, да слушают полезная или непотребная, и уста, да хвалят Бога, или ино что нелепое, такоже руце, и нозе, и прочее. Сицево есть самовластие наше: бесстрашно, ничимже одержимо, и уклонительно на добро и зло. Сим самовластием Адам заповедь Божию преступи».

Хотя Апостол Павел притчею о скудельных сосудех и показует¹⁰⁰ , яко Бог сотворил оваго человека в честь, оваго же не в честь; но сие значение показует только на настоящую временную жизнь, что Бог сотворил человеков оваго в честь, царем, оваго же не в честь, нищим; и се есть, един вид только или форма, к вечному их соделанию и употреблению; ибо нынешнее сложение человек абие имать паки в персть рассыпатися, рече бо пророк:¹⁰¹ «состав мой яко нивочтоже пред тобою». А к вечному существованию человеков, аки сосудов в честь или в бесчестие, еже есть в царство или в муку, содеовает коегождо от человек свое произволение, якоже глаголет святой Иоанн Дамаскин:¹⁰² «аще и един Бог всяческим народодетель, но не той честные устрояет, или бесчестные, но свойственное коегождо произволение». Например: так как один искусный скудельник, из добре ему приготовленного брения, соделает сосуд доброй и полезной, а неискусный из тогоже самого состава соделает сосуд неудобен, и даже погублению достойной: тако и самовластному произволению человека, аки некоему делателю, вручен есть от Бога состав человеческого естества, как то: чувства душевные, ум, мысли, память, рассуждение и совесть, телесные же, зрение, осязание, обоняние, вкус и слух и все прочие удесы. А потому коегождо свойственное произволение имеет власть устрояти человека благим или злым, по глаголу тогоже Дамаскина:¹⁰³ «или по естеству в добродетели пребывати, Богу к той зовущу (поелику добродетель убо человеку от Бога дадеся в естество, потому и глаголется: Бог есть всякого блага начало и вина), или отыти добродетели, еже есть в злобе быти, диаволу к той зовущу»; ибо¹⁰⁴ «всякая злость от него изобретена есть, и скверные помыслы, и подущати человека на зло может, принудити же не может; в нашем изволении прияти его предлог, и отринути; диаволи бо не имут власти, аще не будет от Бога попущено им, якоже явлено¹⁰⁵ во Иове, и¹⁰⁶ во Евангелии о свиниях». Свидетельствует бо святой Ияков Апостол:¹⁰⁷ «никтоже искушаем да глаголет, яко от Бога искушаем есмь. Бог бо несть искуситель злым, не искушает жe той никогоже; когождо же искушаем от своея похоти влеком и прельщаем». Потому и¹⁰⁸ «злоба глаголется ничтоже ино есть, разве отшествие благого, якоже и тма света отшествие есть. Пребывающе убо в сущем по естеству в добродетели есмы; уклоняющеся яже от добродетели, в злобе бываем; покаяние же есть возвращение от злобы в добродетель, и примирение с Богом». Глаголет бо Господь:¹⁰⁹ «ревнуй убо и покайся, се стою при дверех, и толку, аще кто услышит глас мой, и отверзет двери, вниду к нему, и вечеряю с ним и той со мною».

2. Вопрос: Егда убо всемогущий Бог (как выше во статье о Богопознании сказано), искони вся предведущь, ибо и¹¹⁰ несоделанная наша видят очи его, точно знал, что человек дарованным ему самовластием может заблудить, то есть презреть заповедь Создателя своего, и из благого в злого претворится, и тем наследия царствия его лишится: то вскую убо человек таковым самовластием и награжден? не лучше ль бы ему такового дарования власти не дати?

Ответ: He достойно бы было таковому, по образу Божию созданному творению, яко царю твари, сообразну быти немысленному скоту, еже бы от естества точию водитися, а не разумом от самовластия своего управлятися. Аще бы человек не имел самовластия, не был бы за преступления подвержен вечному мучению, но и добродетельный не мог бы наследником быти царствию небесному.

А еже глаголати брению о зиждителе сице: вскую Бог человеку толико великий самовластный сан даровал, чрез который он добрые породы испал? посему последует рещи (оставив человека в скотском естестве): вскую Бог и Ангельские силы сотворил, зане и от тех чина отпаде сатана с вои своими. И аще бы тако не быша на небеси ангелов, а на земли человеков, умных и словесных, то от кого бы прославлялось славное и великолепное имя Божие? убо ли от немысленной, или бездушной твари? Да не будет!

Например: речет ли кто трудолюбивому земледельцу: вскую ты сееши пшеницу твою, понеже между оной трава с плевелы прозябает и возрастает, и многажды ю одолевает и заглушает? Обаче благоразумный и трудолюбивый земледелец не зрит на сие от части случающееся, и ради могущих прозябати плевел не оставляет обычное свое трудолюбие. Тако и Бог (доводствующу святому Иоанну Златоусту от божественных писаний)¹¹¹ не зряше токмо Адама в породе (в раю) кормима, и за преступление изгонима, и еже от него¹¹² прозябнути имущие грешницы яко трава и проникнути, вси делающие беззаконие¹¹³ . Но паче зряше в нем Павла, благочестие проповедующего и в рай восхищаема, Петра, ему же ключа небесная вверяема, и вся в первом человеке зряше, то есть вся угодити ему имущие: пророки, апостолы, тысящи тысящ мучеников, многочисленные лица святителей и исповедников, великие соборы преподобных, постников и праведников: в корени бо бяху плодове.¹¹⁴ Сия вся Бог предведяше, прежде даже Адаму создатися.

Создал же Бог человека и даровал ему таковое самовластие не на худшее, но на лучшее и на превосходнейшее, яко быти ему царю твари; и при том не без подпоры его оставил, но к тому еще рассудительною силою и обличительною совестью наградил, и надо всем тем всемогущую свою помощь, егда только с верою воспросит, абие присно подавати обещал¹¹⁵ . Понеже самовластие само о себе, кроме помощи Божией, не может устрояти коего добра; но и помощь Божия, аще и испрошаема будет к содействию чего-либо не угодного ему, отнюдь не бывает, якоже глаголет святой Апостол Ияков:¹¹⁶ «аще просите, и не приемлете, зане зле просите». Ибо помощь Божия самовластию нашему всегда способствует точию на дела благая, а не на злая: обаче и на благая дела тогда неукоснительно способствует, егда воля человеческая будет толико сопряжена с волею Божиею, елико душа с плотью. Якоже бо тело без души не может движения имети: тако и человек без помощи Божией ничтоже благо может сотворити. Понеже Спаситель наш Исус Христос во Евангелии глаголет:¹¹⁷ «без мене не можете творити ничесоже». Но даже и сам о себе свидетельствует глаголя:¹¹⁸ «не могу аз о себе творити ничесоже».¹¹⁹ «Яко снидох с небесе, не да творю волю мою, но волю пославшего мя Отца». Сия рек, не якобы творити чего не мог, но собою дая нам образ сего душеспасительного средства. Темже Апостол Павел пишет: «искушайте, что есть воля Божия, благая и угодная и совершенная.¹²⁰ «Ибо ничтоже тако пользует человека, якоже отсецати свою волю, и согласовати с волею Божиею: воистину успевает кто от сея вещи, отнюдь паче всякие добродетели». Занеже сам Спаситель, первее всего молитися научи, в молитве Отче наш:¹²¹ «да будет воля твоя».

Темже вси святии уодницы Божии, к содействию своего спасения, во-первых ничего иного толико в сем в цене желали и у Господа не просиди, елико волю Божию познати и согласно оной житие свое добре управити. Якоже пророк Давид моляся ко Господу взывает:¹²² «научи мя творити волю твою, яко ты еси Бог мой». Сице и святой Петр Дамаскин: «Господи! не остави мя творити, или глаголати, ниже помыслити что, яже ты не хощеши».

Минуя же многих святых, единого еще вспомянем, суща наитончайшего знания душеспасительной вины, иже моляся ко Господу сице:¹²³ «Господи! аще не погубиши мя со беззаконьми моими, слава безмерному милосердию твоему! Аще же мя погубиши за беззакония моя, слава праведному суду твоему! И якоже хощеши устрой о мне вещь: готов бо есть прияти от руки твоея святые вся: аще добро, аще зло, аще царство, аще муку». Сея молитвы смысл окрыт ясно во Апологии в следующей повести:

¹²⁴ «Некий бо нищий, исполнь струпов, прошак, между прочим, к мудрому учителю на повторенное приветствие: «хощу, да будет тебе то, еже ты сам себе хощеши», а отвеща сице: «несть мне ино что хотети, или не хотети, точию тоежде, еже Бог хощет или не хощет». Глагола учитель: «еда ли туюжде бы имел еси мысль, аще бы тя Бог во ад послати изводил». Абие старец: «мене ли Он послет во ад? Ho веждь, яко имам два рамена дивной крепости Его (глубочайшее смирение и нелицемерную любовь), и тем аз емлюсь Его крепце, объятием неразлучным, да яко идеже либо бых послан, туде и Его повлек бы с собою: и воистину, изволительнее мне было бы вне небеси быти с Богом, (Пс.138:8), нежели в самом небесе без Него».

3. Вопрос: Егда благоутробный Бог (как выше во статье Богопознания явствует) хотением не хощет смерти грешника и ни един кто бы от человек погибнул, но воля его и хотение присно, еже всем человеком спастися: то почто не вси спасаются, но овые спасаются, овые же погибают, что даже и в самых Апостолех быти случися? Убо ли Бог, при толиком всемогуществе своем, не возможет всех спасти, яко сам присно хощет и желает?

Ответ: Еда родитель не желает всякого блага чадам? Еда ли не хощет быти им наследниками имения своего? Аще ли же хощет, да никтоже паче, токмо чада его, наследники будут достояния его: то еда ли не в силах, или не имеет власти, законным наследникам своим оное определить, и в том их утвердить, якоже сам того присно хощет и желает? Но егда случается, что и который из числа детей его уклонится от повиновения его и распутное поведет житие: то качеством беззаконных деяний своих исходатайствует себе (и нехотящу родителю) вместо благословения клятву, и вместо наследственного награждения совершенное оного отчуждение, и еще жестокое наказание.

Таким образом и премилосердый Бог правосудно творит, как свидетельствует Евангелием:¹²⁵ «аще убо вы, лукави суще, умеете даяния блага даяти чадом вашим: кольми паче Отец ваш небесный даст блага просящим у него».¹²⁶ Но когдаже нецыи от человек уклоняются от заповедей Божиих и развращенным житием пребывают нечувственно в беззакониях своих: тогда исходатайствуют себе от правосудия Божия (и не хотящу ему) достойное мздовоздаяние, сиречь не токмо за нераскаянность свою царствия небесного отчуждятся,¹²⁷ но еще восприимут в геене огненной вечное мучение.

Обаче многоблагоутробный Бог более склонен к милованию, нежели к наказанию,¹²⁸ якоже притчею во Евангелии о блудном сыне крайнее благоутробие свое к согрешающим показует; и всепремудрым промыслом своим о всех промышляет. Мнози же суть образы спасительного его промысла, яко ни словом изрещи, ниже умом постигнути кто может, о чем точию отчасти святой Иоанн Дамаскин поясняет в книге своей глаголемой Небеса, частию же в житии святого Максима Исповедника и в Соборник явствует, что промысл Божий есть хотение Его, и еще паче к сущему благому Его прирадение.

а) Промысл убо Божий в действии над благими имеет два вида: 1 по благоволению, 2 по попущению. По благоволению убо, елико непротивоглагольна суть благая. По попущению же попущает многажды и праведного подпасти напастем, да в нем таящуюся добрдетель покажет иным,¹²⁹ якоже во Иове. Иногда же попущает поносно и что содеятися, да деянием, мнящимся безместным, великое нечто и чудное исправит:¹³⁰ якоже крестом спасение человеком. По иному образу попущает преподобного страдати зле, да не из правые совести испадет и из данные ему силы же и благодати в кичение впадет,¹³¹ якоже Апостола Павла. Оставляется некто на время ко исправлению иного, да еже на оного смотрящие кажутся,¹³² якоже в Лазаре и богатом: естественно бо зряще страждущих, абие и сами в чувство приходим и удобь исправляемся. Оставляется же некто на время не ради свойственных или родительских грехов, но во иного славу,¹³³ якоже и от рождения слепой в славу Сына Божия. Паки попущается страдати кто и ради ревности иного, да славе страждущего возвеличившейся, безленостна страсть иным будет надеждою будущей славы и вожделением вечных благ, якоже бысть в мученицах. Попущаетжеся кто и в срамное впасти деяние некогда во исправление иные горшие страсти,¹³⁴ якоже есть некто возносяйся в добродетелех и исправлениях своих, попущает того в блуд впасти,¹³⁵ яко да падением в чувство свойственные немощи вшед, смирится, и пришед исповедается Господеви. И вси впрочем сетовнии приключении, аще со благодарением приемлем, ко спасению наводятся и всяко пользы бывают ходатаи.

б) Лукавых же оставляет Бог по предзнанию своему праведно, и сие оставление имеет два вида: 1) строительное и наказательное. 2) конечно отчаятельное. Строительное убо и наказательное оставление бывает ко исправлению и спасению таким же образом, якоже и выше речеся. Конечно же отчаятельное оставление: егда убо Богу, вся во спасение сотворшу, бесчувствен и неврачебен человек, пачеже не исцелен за свое небрежение пребывает, тогда уже¹³⁶ отъемлются судьбы Божии от лица его, и предается в конечную погибель, якоже Иуда, сосуд совершен к злу, и самопроизволен в погибель, егоже сам Христос Спаситель не возможе пользовати. Тем, по праведному суду Божию, и прийде ему ряд службы сея, итти в место свое. И се премудро: да не в тунех негде зле погибнет, но да исполнит писание, и меру злобы своея подымет. Да пощадит нас Бог и измет сицевого оставления! Достоверно бо от святых писаний имамы засвидетельствование,¹³⁷ яко не возможно праве мудрствующему и благочестно живущему погибнути».¹³⁸ «Аще и приключися жене Лотовой, и¹³⁹ Ананию и Сапфире ужасное событие, но негли за непсправленное сердце их по Бозе; обаче суд оным остается во глубине неиспытанных судеб Божиих.¹⁴⁰ Нечто убо подобно судив и Апостол Павел, предати некоего согрешша сатане во измождение плоти, да дух его спасется в день Господа нашего Исуса Христа.

в) Изволение убо к действию в нас есть; а скончание производяющим добрых в Божием поспешении, праведно по предуведению своему промышляющем. Обаче сущая в нас, не промысла есть Божия, но нашего самовластия, суть два вида: 1) произволение, 2) действие. Произволение убо присно в нас есть: во еже куда поити, или не поити, лгати, или не лгати, и прочее. Деяние также в нас есть, но не всяко и не присно. Многажды бо иное, по некоему образу Божиего промысла, и возбраняется, как-то: богатыми быти, или царствовати, и прочее. Темже святой Златоуст, предупредительно ко Господу моляся, глаголет: «Господи, аще хощу, аще не хощу, спаси мя, понеже бо аз яко кал любовещный греховную скверну желаю, но Ты, яко благ и всесилен, можеши ми возбранити».

4. Вопрос: Аще убо святое писание глаголет, яко Спаситель наш Исус Христос есть¹⁴¹ «свет истинный, иже просвещает всякого человека грядущего в мир», то почто множайшие племена и язы́цы, в числе коих есть добродетельные, без просвещения Евангельской истины остаются, и вечному¹⁴² осужедению, по слову Христову, подвергаются?¹⁴³ Занеже, кроме истинные веры, невозможно спастися и угодити Богу.

Ответ: Воистину тако глаголет святое писание, яко¹⁴⁴ Христос есть свет истинный, иже просвещает и освящает всякого человека, грядущего в мир. Достоит же убо притом вразумлятися и удостоверятися, вышереченным во статье о Богопознании примером от чувственного солнца. Яко оно, не только на всякого человека, но и на всякую тварь возсиявает, и в самые гнусные и нечистотами преисполненные места проницает, просвещает и нечистоту изсушает: так и праведное солнце, свет истинный, Христос, даже и в самые внутренние человеков душевные храмины проницает, и коегождо умнии очи просвещает, разве точию кто сам от Heгo уклоняется, или нечим, якоже бывает и чувственному солнцу, двери входа ему преграждает. Обаче сие праведное и невечернее солнце и от затворенных дверей вспять не возвращается, но присно, днем и нощию, при дверех душевные храмины неотступно стоит, и благоуветливо толцет, якоже сам Господь свидетельствует о себе¹⁴⁵ : «се стою при дверех и толку, аще кто услышит глас мой, и отверзет двери, вниду к нему, и вечеряю с ним, и той со мною».

Подобает же разумевати и о языцех, иже лишени суть Евангельского просвещения, яко и которые из них, хотя и добродетельны и к злу непокусивы, но негли и нерадиви суть: тем и пребывают в мере своей яко ничтоже.¹⁴⁶ О нихже пророк Ездра ничтоже быти рече, аки плюновение.¹⁴⁷ Сам же Спаситель таковых мертвыми именова. И аще бы сим коснулось слышати истину слова Божия, но нерадением их презираема бы была: то не горшие ли бы подъяли муки? Якоже к подобным во Евангелии речеся:¹⁴⁸ «отраднее будет земли Содомстей и Гоморстей в день судный, неже граду тому». И паки:¹⁴⁹ «Тиру и Сидону отраднее будет в день судный, неже вам». И паки:¹⁵⁰ «аще не бых (глаголет Христос) пришел и гдаголал им, греха не быша имели». Всяк убо¹⁵¹ «раб ведый волю Господина своего, и не уготовав, ни сотворив по воли его, биен будет много. Неведевый же, сотворив же достойная ранам, биен будет мало». А потому, вероятно, всепредведящий и всещедрый Бог не приводит благовестия слухам оных, щадя их от праведного осуждения, повинных быти горшим мукам. Других же оставляет без Евангельского просвещения токмо до времени, яко не убо прииде им время к познанию, яковоже бысть и в Генесаретстей стране, что жители,¹⁵² егда стадо свиное в мори утопе, тогда истину Христовой проповеди не прияша;¹⁵³ но по неколиком времени уразумеша и вероваша.

5. Вопрос: Егда всемогущий и правосудный Бог а) пред веки коегождо от человек деяния, словеса и помышления предведал, и предуставил, как сказует Апостол Павел¹⁵⁴ «ихже бо предуведе, тех и предустави»; и аще б) егоже хощет Бог спасает, а егоже хощет погубляет, как тойже Апостол глаголет:¹⁵⁵ «егоже хощет (Бог) милует, a егоже хощет ожесточает»; еще же в) сущим во чреве матернем¹⁵⁶ «не рождшимся, ни сотворшим что благо или зло» от Бога речеся: «яко больший поработает меньшему, Иакова возлюбих, Исава же возненавидех»; и г) аще вся таковая Бог пред веки ведает и сам предуставляет: то почто овым царство, а овым муку обещает? где правосудие Его?

Ответ: Глубоко слово се и прикровено! Но святой Иоанн Златоуст глаголет,¹⁵⁷ «яко верных ради кормителям церковным подобает испытовати глубину божественных писаний разумения». Тем убо –

а) Воистину правосуднейший Бог, по всеведящему прозрению своему, пред веки коегождо от человек деяния, словеса и помышления проуведе (как выше во статье о Богопознании явствует)¹⁵⁸ , не вся же предуставил: не бо хощет Бог злобе бывати, ниже нудит творити добродетель, но вся нам суть на произволении, добрая дела и злая. По предзнанию же оных предопределяет Бог благополучии или казни, приключающиеся нам по благости его и правде. Понеже как мы не имамы власти над мучащею ны болезнию, ниже над здравием, но точию над винами теми, яже или болезнь приносят, или здравие сохраняют, и якоже болезни виною есть невоздержание, воздержание же доброго здравия виновно есть: так и получение(ю) царствия небесного виною есть сохранение заповедей Божиих, преступление же тех виновно есть геене огненной. Потому убо и Апостол Павел о Божием предуставлении не о всех соборне человецех глаголет,¹⁵⁹ но точию о тех избранных, ихже достойных предуведе сообразным быти образу Сына своею, как в толковании Апостола пишет: «Яко ихже проразуме Бог, сих и пронарече; разреши движущееся взыскание, рекше: проуведе Бог¹⁶⁰ непреложение Фараоново, и ожесточи сердце его, яко да поженет Израиля, и потоплен!¹⁶¹ Проуведе же правое Иеремиино, и пронарече его еще во утробе матерни, и освяти в пророка.¹⁶² Проуведе нечестие Содомлян, и сотвори их сосуды бесчестия в пожжение.¹⁶³ Проуведе покаяние Павлово, и пронарече его сосуда избранного.

б) Да не будет неправда у Бога за слово:¹⁶⁴ егоже хощет Бог милует, а егоже хощет ожесточит! Внемли на сие слово толкованию Апостола:¹⁶⁵ «Яко во Израили аще и общий грех бысть, за еже вси тельцу покланяхуся: обаче не вси казними быша, но другие милости получиша (негли не во всех равно к тому начинанию произволение бяше). Того ради и рече Бог к Моисею: помилую, егоже аще помилую, и ущедрю, егоже аще ущедрю. Ибо не твое есть ведати, о Моисею, яже суть достойни моея благости; мне сия остави». И паки там же глаголет святой Анастасий Синайский сице: «Мне мнится, мнюже и Богу, яко ни самый сатана дерзнет рещи, яко егоже хощет Бог спасает, а егоже хощет погубляет; и аще бы было сие тако, то яве, ни спасаемой достоин есть мзды, ниже паки погибаяй достоин есть муце, но ниже самые бесове в геену внити имут. Обаче, тии сами о себе исповедаша, яко в погибель идут, взывающе ко Христу: остави, что нам и тебе Исусе Сыне Божий, пришел еси семо прежде времени мучити нас (Матф. глава 3, зач. 28, ст. 29). Се время знаменовавше будущие их погибели в геене. А потому никтоже убо в нас да глаголет, яко егоже хощет ожесточает, занеже неправедна творит Бога. Еже бо жесточит, разумей жестоку быти попущает, а не сотворяет».¹⁶⁶ «Сие убо попущение Божие, яко действо и творение его, глаголати обычно божественному писанию». А для того¹⁶⁷ и в прочих подобных речениях потребно есть убо, иже Божественная писания разумети хотящим, первее со многим опаством вину, и время, и ум глаголющего испытати: не рассуждаяй бо сия во многа заблуждения впадает.

в) Кую же вину содержит слово:¹⁶⁸ иже еще во утробе матерни, не убо рождшимся, ниже сотворшим что благо или зло, един бысть Богом возлюблен, а другой возненавиден? дает разумети из выше писанного 2 ответа. Якоже бо о проуведении, яже из Адама, тако и зде Бог убо зряше во утробе Ревекки, не токмо Исава, сластолюбца суща хотящего быти, но с ним паче Иакова, возлюбленного своего Израиля, и в нем дванадесять патриархов, и колено Иудово, и корень Иессеов, и цвет от него, еже быти имяше Христос.

Темже и мы да не испытуем у Творца вины, елико нам не подобает, ниже да глаголем: чесо ради сии венчани, овии же осуждени, но да оставляем неодержимой тайне избрания Божия: понеже он един, испытуяй сердца, весть кого блазе венчати, или наказати. Аще и являются многим акибы неправедна, но за незнание тако мнится и непостижное Божиего промысла. Достоит же о сем научитися от чувственного солнца. Якоже око, мерную восприемши солнечную лучу, просвещается и веселится; аще ли же воззрит в самый круг солнца, не токмо не приемлет свет, но и иже имать погубляет: тако и смертное естество, желающе постигнути чрез волю Божию, не только не приемлет что, но и еже имать, и то погубляет.

г) Правосудие же Божие воистину есть нелицемерно, свидетельствующу Моисею:¹⁶⁹ «Бог, истинна дела его и вси путие его суд; Бог верен, и несть неправды в нем; праведен и преподобен Господь». Темже¹⁷⁰ «егда огнем Господним судитися будет вся земля»,¹⁷¹ тогда воздаст комуждо по деянием его, еже есть: верным убо и добродетельным, разлученным тогда от грешник, аки овцам от козлищ, и одесную его предстоящим, речет пресладким гласом:¹⁷² «приидите благословеннии Отца моего, наследуйте уготованное вам царствие от сложения мира», всем же зло сотворшим, грешникам и язычникам, ошуюю стоящим, речет праведный судия:¹⁷³ «идите от мене проклятии во огнь вечный уготованный дияволу и ангелом его;¹⁷⁴ и идут сии в муку вечную, праведницы же в живот вечный». А что глаголет Апостол Павел:¹⁷⁵ «коегождо дело яково есть огнь искусит, и егоже дело, аще пребудет, егоже назда, мзду приимет, а егоже дело сгорит, отщетися, сам же спасется, такожде, якоже огнем», то в Толковом Апостоле поясняется, что¹⁷⁶ добродетели злату и сребру, злодейство же и грехи дровам и сену Апостол уподоби, сия сгорят, а она чистейше явятся, за нихже назидатель мзду, царствие небесное, приимет; а отщетившейся, рече, спасется, сиречь не умрет, но тем же огнем, в нем же дело его сгоре, вечно мучен будет. Понеже огнь человека от муки не спасет, но точию коегождо искусит. Апостол бо явленным гласом рече:¹⁷⁷ «коегождо дело, яково есть, огнь искусит», да тем добродетельный человек аки злато чисто и серебро возблистает, грешный же обнажится и срамнейший, аки главня опаленная, пред всеми явится. Сему последнему суд сам Спаситель притчею сице яви:¹⁷⁸ «исполнися брак возлежащих; вшед же царь видети возлежащих, виде ту человека, не оболчена во одеяние брачное, и глагола ему: друже, како вниде семо, неимый одеяния брачна? Он же умолче. Тогда рече царь слугам: связавше ему руце и нозе, возмете его, и вверзите во тму кромешную, ту будет плачь и скрежет зубом». Каково же может быть таковому спасение? Уже бо несть¹⁷⁹ по смерти грешником покаяния:¹⁸⁰ в чем тя, рече, застану, в том ти и сужду;¹⁸¹ ниже по страшном суде – будущих мук свобождения: многая бо писания достоверно свидетельствуют, яко оные суть вечны и неизменны.

Обаче¹⁸² умершим грешным во избавление от вечных мук воистину есть помощь, но не огненное искушение,¹⁸³ а творимое от верных поминовение, наипаче же во святой литургии бескровное жертвоприношение, прежде даже не постигнет страшный день праведного Божия осуждения. Зане¹⁸⁴ до последнего дня судного еще никтоже восприемлет себе достойное воздаяние, ни праведнии венцов, ниже грешнии мук, донеле же вси во второе пришествие Христово ¹⁸⁵ мертвии с телесами востанут нетленни, а оставшиеся живые в бессмертие изменятся, тогда уже совершенно кождо по деянию своему, яже с телом содела, и воздаяние примет.¹⁸⁶ А что слышим во Евангелии, яко егда некто богатый умре, и абие во огне мучим обретеся, то не настоящему времени причитается, но Христос о будущей вечности притчею показа. Такожде и праведных церковь в песнех ублажает, яко восприяша венцы небесные, но еще суще не восприяша, а за достоверное упование, яко в руку уже держати им сия. Якоже бо например зде, преступники царских законов сидят в темных заключениях, и, сведая кождо свое преступление, с великою печалью и мучением совести ожидают себе конечного осуждения и казни; ближнейшии же царевы друзи и все вернейшии поручений его исполнители, егда будут на обед к царю званы, тогда с великой радостью ко двору его собираются, и до часа обедного веселяся ожидают пирования: тако суть и души умерших человек (по извещению святым Ангелом преподобному Макарию Египетскому)¹⁸⁷ ныне и даже до дне судного грешнии седят заключени в преисподних адовых темницах, чувствием мучатся и сокрушаются, ожидая в день страшного Божия суда грозного к ним ответа, и по достоянию дел вечного мучения, якоже пишется во Апокалипсисе:¹⁸⁸ «часть им в езере горящем огнем и жупелом, еже есть вторая cмepть», праведнии же души, в райском упокоении водворяяся, присно радуются и веселятся¹⁸⁹ , ожидают дóндеже соберутся и последнии святии клевреты их¹⁹⁰ , в наполнение десятого чина отпадших ангел, да вси они вкупе сподобятся услышать сладкого Божия приветствия¹⁹¹ , зовущего в царствие небесное, и тамо неизреченного восприятия¹⁹² «ихже око не виде, и ухо не слыша, и на сердце человеку не взыдоша, яже уготова Бог любящим его».

Что же касается до неверных, а добродетельных язычников, то таковии, по глаголу блаженного Андрея Цареградского¹⁹³ , отведены будут на место не мучительно, но десного предстояния и царствия Божия несть им мощно получити. Отлучение же десных, сиречь, отпадение славы Божия горше огненные муки вменяет святой Иоанн Златоуст¹⁹⁴ . «Вем (рече), яко мнози геены точию боятся; аз же отпадение славы Божия велми горшу муку вменяю геенские муки». Разумети о сем достоит по примеру зде временного жития. Елико убозии и удаленные жители, не видевшие славы царской и незнающие тех удовольствий, боятся только телесных наказаний и казней, толико более страшатся удостоенные всем удовольствиям оным единого лишения и от лица царева отчуждения: таково будет расстояние и в будущей вечной жизни правоверным христианом от язык неверных.

Верные же, а ленивые, такожде царствия небесного отчуждятся, геенского же мучения свободятся. Глаголет бо святой Григорий Богослов:¹⁹⁵ «ни еже убо не мука се царство, ни еже не царство се мука, ленивым довольно есть, еже муки убежати». Обаче за леность зело болезнено есть, по вышереченному глаголу святого Златоуста, еже неизреченные славы Божия вечно лишену быти.

Есть же¹⁹⁶ и кроме добрых дел, точию чистым покаянием и теплою верою райская обитания получити, по свидетельству святых писаний. Глаголет бо пророк Аввакум:¹⁹⁷ «праведник от веры жив будет»; и Апостол Павел пишет:¹⁹⁸ «без веры невозможно угодити Богу»; и паки:¹⁹⁹ «не делающему, верующему же во оправдающего нечестива, причитается вера его в правду».²⁰⁰ Святой Григорий Амиритский толкует: «яко противу сему отвещает диявол, клевеща на иже веры ради спасающихся, и глаголет: сея ради вины, яко велика вера их, почто спасаеши их туне? И Господь глаголет: предана мя слышат, и связана, и заплевана, на крест распята, и копием прободена, не смущаются сердцем, ни соблажняются умом, но веруют Бога быти от Бога, и исповедуют мя Царя и Создателя, и Творца своего и Господа без лукавства». Яков же бе разбойник, иже на кресте возопи, глаголя:²⁰¹ «помяни мя Господи егда приидеши во царствии си»! Несть ли достойно таковому рещи: «аминь глаголю тебе, днесь со мною будеши в раи»?

Первое же Божие на землю сошествие бысть не того ради смиренно, акибы Бог со славою не мог явитися, и до ада снити, и его разрушити и седящих во тьме и сени смертней на свет извести, но да соблюдет свое правосудие от врага не оклеветаемо и да покажет собою первее образ блаженного смирения, имже всяк вознесется, и да излиет притом на всех бесчисленное милосердие свое, и изъявит крайнюю любовь к роду человеческому вольным страданием своим, наипаче же неправедно наведенным на него осуждением праведно избавит падшее естество человеческое от работы вражия, и поносною смертию, яко сый безгрешен, грехом первозданного на весь род наведеную смерть умертвит:²⁰² «яко же бо (глаголет Апостол) о Адаме вси умирают, тако и о Христе вси оживут».

Предумыслив же сие сотворити Бог сицевым неизреченным промыслом и преглубокою в нем едином от века бывшу сокровенною тайною, елико убо премирных, и елико на земли утаився, и преминув естества уставы, от пречистые девы Марии бессеменно воплотися, и несказанно, во двою естеству, во едином составе, из нея родися. Потом преестественными чудотворениями, Божеством действуемыми, уверил достойных служению его в он веровати, и²⁰³ теми спасительное свое Евангелие провозвестил всей твари; a безгрешным тела обложением и человеческою немощию (якоже бысть²⁰⁴ ) в пустыни постяся и во искушение предадеся, наипаче же пред²⁰⁵ вольным своим страданием, егда со слезами моляся ко Отцу своему небесному, да мимо идет от него чаша смерти его, и ко учеником рече: «прискорбна есть душа моя до смерти» прехитрил диявола: яко же он прежде обольсти коварством Адама, тако и сей второй Адам немощью плоти прехитрил диявола! Видя бо диявол, яко Исус боится смерти, возусти жидов, да абие неправедно убиют его, мня окаянный, тма сый помраченный, присносущный свет истинный с прочими во тме ада затворити, да ктому не гонит его и да не разрушает в сем мир царство его. Егда же поглоти сего, абие ощути, аки удицу льщения, сиречь неодержимое Божество, неизреченно плотию человечества прикровенное, и расседеся адская несытая его утроба. И не только сего неодержимого не удержа, но и яже прежде им , изблева, якоже свидетельствует Соборник:²⁰⁶ «Отец бо (небесный) осуди диявола, яко неправедно наведша смерть Сыну Его: смерть бо убо греха запрещение, Христос же безгрешен пребысть. Темже сице осудив Отец мучителя, изят нас и к себе возвед: ибо Сыну его ходатайствовавшу, и путь нам угладившу и указавшу, и в честь се Отцу устроившуа.

Темже и мы, душевно чувствуя толикое неизреченное Божие к нам благодетельство, благодарственны пребудем, содержа нижеследующие божественные догматы христианского благочестия, от святых Апостол и святых отец преданные и соборно утвержденные, в неизменном исповедании и блюстительном исполнении, ныне и присно и вовеки веков.

Догмат веры Христианского исповедания, старо-греческого закона, блюстительно содержим, по сущему изложению в следующем:

1) Во единого Бога веруем по символу веры сице:²⁰⁷ «Верую во единого Бога Отца, вседержителя, творца небу и земли, видимым же всем и невидимым. И во единого Господа Исуса Христа, Сына Божия, единородного, иже от Отца рожденного, прежде всех век», и прочее.²⁰⁸ «И в Духа Святого Господа истинного и животворящего, иже от Отца исходящего, иже со Отцем и Сыном спокланяема и сславима, глаголавшего пророки. И во едину святую соборную и апостольскую церковь. Исповедую едино крещение во оставление грехов. Чаю воскресения мертвых и жизни будущего века, аминь».

Купно²⁰⁹ исповедуем и равно веруем: во Святую Троицу, нераздельную и несказанную, равносильную, и равнобожную, и неописанную, равносоветную, и равноразумную, равносущную и собезначальную, единоначальную и трисоставную, еже есть: во Отца Бога нерожденного, в Сына Бога от Отца рожденного, и в Духа Святого, иже от Отца исходящего. He бо един от единого разделишася когда: бяше бо Отец присно с Сыном, и Сын бяше присно с Отцем и Духом вкупе. Сице покланяемся и славим Святую Троицу во Единице и Единицу в Троице, нераздельное в триех составах едино Божество.

К ясному же понятию сего может примером видимое солнце служить: его же бо огненный и светолучный круг уподобляется во образ праведного солнца, безначального и бесконечного Бога Отца, лучи же его, простирающиеся от небес и просвещающие весь мир, во образ истинного света, Бога Сына, а теплота его, согревающая землю, во образ Бога Духа Святого, совершающего всяческая. Обаче не триобразно, но²¹⁰ един образ, едина воля, и едино действие, в триех точию лицах:²¹¹ якоже и в созданном по образу Божию человеке ум, слово и дух жизни.

Такожде и таинство Божиего воплощения исповедуем: иже от Бога Бог Слово (аки луча света из круга солнечного), не отступль Божества своего, в Приснодеву Марию вселися, наитием же Святого Духа усырися и воплотися, и тако неизреченно из нея родися, невидимый и неосязаемый, яко под завесою плоти, в мир явися, от души словесные и плоти человеческие состояй, совершен Бог и совершен человек, во двою естеству а во едином составе несмесно убо, якоже ячмень смешавшись со пшеницей; нераздельно же, якоже вино совокупившись с водою²¹² . И так вольные страсти только плотию терпяше, а Божеством, аки огнь в разженном железе, или яко солнечная луча на секущем древе, бесстрастен пребываше: две бо воли и два действия Исус Христосъ имеяше,²¹³ равен сый Отцу по божеству, мний Отца по человечеству. Аще Бог и человек, обаче не два, но якоже душа словесная и плоть един есть человек: тако Бог един есть Христос.

Честный же и животворящий крест Христов почитаем, лобызаем и поклоняемся ему с верою, яко сущей божественной и непобедимой силе.

2) Пресвятую²¹⁴ Богородицу и Приснодеву Марию исповедаем, и с верою славим, яко воистину святейшую херувим и серафим, и превысшую небес сущу и высшу всех тварей, яко рождшую плотию единого от Троицы Христа Бога нашего, иже нас ради к нам сшедшего и вочеловечшеся нашего ради спасения. Которую мы не только в настоящем ныне ее блаженстве²¹⁵ (согласно святым богословцем) исповедуем быти чистую и пренепорочную, но веруем, яко она прежде рожества бе Девою, и в рожестве Дева, и по рожестве такожде пребывает Девою, и даже до толика, якоже всемогущий Бог словом своим, словом чистым, созда вещественное небо чисто²¹⁶ и естеством не испытанно, тако и на земли предъуготова Бог на вселение единородному Сыну своему Слову одушевленное небо чисто и ни коеяже скверны причастно, еже есть: сию преблагословенную владычицу нашу Богородицу и Приснодеву Марию²¹⁷ , от семене чистого и еще прежде зачатия ее предочищенного и освященного. Тем убо только сия едина, от родов предызбранная и от пророк пронареченная, содетеля всего мира мати, не только отнюдь²¹⁸ первородные скверны бысть непричастна, но даже вся яко небо чиста и добра зело пребысть. О ней же сам Дух святой в Песнех-песней свидетельствует сими словесы:²¹⁹ «вся добра еси ближняя моя, и порока несть в тебе», и паки со удивлением: «кто сия проникающая, аки утро, добра яко луна, избранна яко солнце».

3) Такоже и святых почивших угодников Божиих, как-то: святого Иоанна Крестителя, и яже прежде его пророков, и яже по нем прехвальных Апостолов и добропобедных мучеников и прочих всех святых почитаем, и с верою призываем их, яко ближайших другов Божиих, да тех ради к Богу молений избавляемся долгов греховных и спасаемся вси, по глаголу пророка:²²⁰ «волю боящихся его сотворит, и молитву их услышит». Понеже близ престола Божия предстоят и²²¹ дерзновение имут молитися о нас, занеже сам Господь наш Исус Христос в Евангелии рече:²²² «хощу да идеже есмь аз, и тии будут со мною, да видят славу мою».

4)²²³ Еще же честные тех угодников Божиих мощи, нетлением от Бога прославленные, почитаем, и поклоняемся им и лобызаем: многие бо телеса святых миро источают, и многи страсти и болезни у человек исцеляют.

5) Святые иконы²²⁴ , как-то: Спасителя нашего Исуса Христа, пречистые его Матери пресвятые Богородицы, небесных сил бесплотных и прочих всех святых, почитаем, покланяемся и целуем. Обаче почитаем святые иконы, не яко Бога жива, но взирающе на образ, представляем себе во уме святость изображенных, и теми, равно как и от повестей книг церковных, подражательную любовь в сердцах наших возобновляем. Сие почитание святых икон есть весма нужно и душеспасительно: ибо аще мнози человецы образы искренних своих, и чада родителей своих, плотские ради любви, написуют и в домах своих на незабвенную память содержают: то кольми паче мы, православные христиане суще, должни есмы выше реченные святые иконы, и кроме молитвенных храмов, каждый по себе в домах непременно и присно имети, почитати и покланяющеся им, лобызати, чувствами же к тем самым первообразным восходити, и во всем упование на них возлагати, да сподобимся и в будущем веце с ними вечно в царствии небесном пребывати.

Догматы святые древлевосточные соборные апостольские церкви, иже у нас в неизменном исполнении соблюдаются, суть следующие:

1) Седмь изящных святых таин церковных:

Первая святая тайна, Крещение, – едино точию в три погружения творимое, с приглашением Божественного триипостасного имени, у нас всеобдержно действуется и приемлется, по заповеди самого Христа Спасителя, рекшего к своим Апостолам:²²⁵ «шедше убо научите вся языки, крестяще их во имя Отца и Сына и Святого Духа». При первом убо в воду погружении глаголет священник: во имя Отца, аминь; при втором: и Сына, аминь; и при третьем: и Святого Духа, аминь. Зане первенствующая святая восточная церковь сей истинный образ крещения прияла от святых, Апостол²²⁶ , который образ, с отрицанием сатаны и всех дел его, и прочее к тому благолепное возследование, святой и богомудрый Дионисий Ареопагит, современник апостольский²²⁷ , сам святое крещение от святого Апостола Павла уже в совершенном возрасте принявший, писанием чинно изложил и первенствующей Христовой церкви в руководство предоставил.

He иначе же и сам Христос Спаситель, погружаяся во Иордане, крестился: понеже святии Апостоли, как от него прияша, тако и прочих научиша²²⁸ . Да и по свидетельству Святого Златоуста, вси людие, приходящии тогда креститися от Иоанна, стояху по выю в воде Иордана: следовательно и Христу погрузитися довлело во глубпны Иордана, якоже и вселенская церковь поет во 2 каноне Богоявления его сице:²²⁹ «Безначальне, водами спогребшутися Cлoвe». Темже святой Апостол Павел к римляном пишет:²³⁰ «Или не разумеете, яко елицы во Христа Исуса крестихомся, в смерть его крестихомся, спогребохомся убо ему крещением в смерть, да яко воста Христос от мертвых славою Отчею, тако и мы во обновлении жизни ходити начнем. Аще бо сообразни быхом подобию смерти его, то и воскресения будем причастницы». Последовательно сему и святой премудрый Максим Грек во своей книге пищет сице:²³¹ «яко в божественном крещении треми в воду погружении тридневное Спаса Христа погребение и воскресение гадает и церковное предание», и прочее.

Кроме же сего единого трепогружательного Крещения никакие инообразные крещения у нас под строгим запрещением отнюдь не приемлются:²³² яко дерзати смеющих святое крещение инако действовати, или приимати, церковныя правила из священного сана извержением осуждают.

Вторая святая тайна: Миропомазание, которое у нас непременно при самом крещении исполняется, зане сам Христос Спаситель рече:²³³ «аще кто не родится водою и Духом, не может внити в царствие Божие». Действуется же то по уставу древле-греко-российской церкви с нижеследующими приглашениями: егда бо иерей помазует новокрещенного, глаголет:²³⁴

На челе: «Печать дара Святого Духа, аминь. Да избудет студа, егоже первее преступив человек всюду ношаше».

На лице: «Печать дара Святого Духа, аминь. Да откровенным лицем славу Господню зрит».

На очию: «Печать дара Святого Духа, аминь. Да зрит очима свет Святые Троицы, первые доброты образ».

На ушию: «Печать дара Святого Духа, аминь. Да приимет ушима слышание таинства духовного, святого Евангелия Христова, якоже рече Господь: имеяй уши слышати да слышит: да не приложится ему злое слышание».

По ноздрям: „Печать дара Святого Духа, аминь. Да обоневает Божественных таин, яко да и той будет в миро Христова благоухания и в добровоньство спасаемых, и да не обоневает прочее смрадные первыя льсти».

По устом: «Печать дара Святого Духа, аминь. Да первого вкуса вторым заградит, сиречь: телом и кровию Христовою».

На персех: «Печать дара Святого Духа, аминь. Да оболкся во броня правды, противу художеству вражию станет, яко победитель непобедим».

На руках: «Печать дара Святого Духа, аминь. Да будут готовы на простертие во благотворение, и на отгребание всякого зла».

A по псалме 33, «возлагает иерей на крестившегося крест с гайтаном, якоже истиннии христиане имут обычай, еже носити на себе знамение спасительных Христовых страстей, иже есть честного креста образ, на прогнание всякие неприязненные детели, себе же на сохранение души и телу».

Третия святая тайна: Причащение тела и крови Христовой, иже у нас непременно обое каждому православному христианину подается, во оставление грехов и в жизнь вечную. Сам бо Христос Спаситель наш всем повеле плоть его ясти, и кровь его пити, – a именно на тайней вечери своей²³⁵ , «прием хлеб и благословив преломи, и даяше учеником, и рече: приимите ядите, сие есть тело мое; и приим чашу, и хвалу воздав, даде им, глаголя: пийте от нея вси, сия бо есть кровь моя нового завета, яже за вы и за многие изливаемая во оставление грехов». Да не уничижим кто повеления сего, рече прочее Исус:²³⁶ «Аминь, аминь глаголю вам: аще не снесте плоти Сына человеческого, и не пиете крови его, живота не имате в себе». Страшно изречение Христовых словес! И яко истинна суть словеса его, сам заключает:²³⁷ «Небо и земля прейдет, словеса же моя не прейдут».

Четвертая святая тайна: Исповедание грехов.

Пятая святая тайна: Священство.

Шестая святая тайна: честный Брак.

Седьмая святая тайна: Елеосвящение.

2) При том²³⁸ блюстительно сохраняется у нас древней церкви благолепный чин Божественной литургии, устроенной Василием Великим, и Иоанном Златоустом и святым Григорием папою римским, так, чтобы на святой проскомидии непременно иметь²³⁹ седмь просфир, именуемых великие, квасных, из чистой пшеничной муки испеченных:

1 просфира, за Господьский хлеб, еже есть святой агнец.

2 в честь Пресвятые Богородицы.

3 в честь Святого Иоанна Крестителя и всех святых.

4 за верховного святителя и всего освященного чина.

5 за самодержавного государя царя.

6 за всех живых православных христиан.

7 за упокой всех православных христиан.

И как сии седмь особые, так равно и прочие, по желанию усердствующих христиан на проскомидии в жертву Богу приносимые, просфиры имеют равным видом сверху печать, круглым обведением²⁴⁰ , образующую, по толкованию святого Симеона Селунского, безначальное и бесконечное Божие Слово воплощенное (сиречь, хлеб – плоть, а печать – Божество); посреде же сея печати трисоставный крест Христов, со изображением к нему надлежащих литер, а вокруг креста евангельских словес:²⁴¹ «Се агнец Божий вземляй грехи мира». Последнии убо просфиры, по вынятии иереем из них частиц в Божественную жертву, абие принесшим в благословение подаются целостию: ибо на сей случай пекарь церковных просфир запасные приготовляет просфиры.

Все же таковые просфиры приуготовляются непременно из квасного теста потому: ибо Спаситель наш Исус Христос, егда по исполнении времени восхоте ветхого завета сеновно действуемое чиноположение конечно в самую истину благодатию своего привести, сиречь новый бдагодатный завет уставити, повелел уготовати тайную свою вечерю прежде праздника пасхи и²⁴² прежде нежели изметаем бысть квас в 4 день опресночного приготовления, то есть: 13 числа луны по еврейскому счислению²⁴³ , прилучившегося тогда быти в четверток: иде же к тому²⁴⁴ не стояще, якоже обычай бе ясти ветхозаконную пасху,²⁴⁵ но седяще со ученики новую пасху яде: «и рече к ним: желанием вожделех сию пасху ясти с вами прежде даже не прииму мук»; ядоша же²⁴⁶ не oпpеcнoки²⁴⁷ но хлеб, сиречь квасный, под видом коего хлеба и вина уставил Христос новый завет о своей плоти и крови, по свидетельству всех Евангелистов и Апостола Павла, рекших: «ядущим же им, прием Исус хлеб и благословив преломи», и прочее.

Хотя святии евангелисты и пишут²⁴⁸ , яко уготоваша Христу ясти пасху во дни опресночные, но в таком разуме глаголют они только о днях опресночного приготовления²⁴⁹ , ибо законом повелено было прежде четырех дней праздника, то есть в 10 день Марта месяца, запасать агнца и соблюдать до 14 числа вечера, а не о самом праздничном, или о канонном для праздника, воньже квас изметается.

Аще бы оная вечеря была в самый день праздника, то невозможно бы Христу в таковый день посылать учеников путь шествовать и приготовление творить, смерти бо повинни были творящии то.²⁵⁰ Более же явствует от Евангелия: егда ведоша Исуса от Каиафы в претор, бе утро, а пасха еще не бе, как и Пилат рече: «кого хощете отпущу вам на пасху»? Аще ли бы в канонный день праздника вечеря Христова была, то не бы святии Евангелисты написали²⁵¹ , яко Христос уже в пяток, в канон праздника пасхи, еще из утра²⁵² , о часе третьем, на Голгофу приведен, о шестом часе распят, о девятом часе на кресте умре. Егда же иудеи прося Пилата рекоша:²⁵³ «да не останут на кресте телеса в субботу, бе бо велик день тоя субботы», то явно от сего есть, что самый великий праздник пасхи прилучился тогда в день субботный.

И если же бы та вечеря была в свое время, и все по обычаю еврейскому на ней уготовано: то стояще, а не седяще яли бы пасху, и не рек бы Христос о ней отлично, яко желанием вожделех сию ясти пасху: ибо ветхо-законную прежде ежегодно ядяше, но никогда такова желания изъяви, якоже о сей. Предварительно же соверши Христос новую сию пасху для того, дабы вместо ветхозаконного агнца²⁵⁴ (коего закон повелеваше в вечер 14 числа луны заклавши агнец, с тем починати и опресноки ясти, на седмь дней праздника пасхи) сам себя приуготовил на вольное заколение за спасение всего мира, в начало и устав новые христианские жертвы. Якоже и сотвори ибo в тот самый день, воньже у евреев к вечеру прилучившегося тогда пятка закалашеся агнец и начинашеся праздник пасхи, Христос на кресте нас ради плотию смерть вкуси и погребен бысть, в суботный же день во гробе почиваше, а в третий день недельный из мертвых воскресе. Итак совершися сия новая спасительная пасха, еже есть новому Израилю преведение от смерти к жизни, и отъ земли на небо²⁵⁵ . А что Апостол Павел, к коринфом пиша, повелевает очистити ветхий квас и праздновать в безквасиих чистоты и истины, а не в квасе злобы и лукавства: се не о употреблении хлебном, но о жительстве чистом и благочестивом поучает.²⁵⁶ А сущий квас сам Христос Спаситель в притчах своих царствию небесному уподобляет, яко живот образует, а не мертвость.

3) Все наше древлецерковное исполнение содержится и печатлеется непременно крестом Христовым тричастным, егоже с верою исповедуем, яко истинный есть образ животворящего креста, на немже Христос Спаситель плотию распятся. Тричастный убо именуется, яко из трех древ: кипариса, певга и кедра, в тридневную смерь Господа Исуса Христа соделан бысть, как свидетельствую святии восточнии учители:²⁵⁷ Герман патриарх Цареградский,²⁵⁸ и Иоанн Дамаскин: о немже и проречение Исаии пророка в самой истине исполнися (иже во главе 60, стих 13). По разуму же древлевосточной церкви, в кресте Христовом первое древо бе праве устроено; другое преки, к немуже длани Христовы двема гвоздьми пригвождены; а третие в подножие, к немуже нозе Христовы такожде двема гвоздьми пригвождены быша, во исполнение пророческого гласа, во псалме 98, стих 5. Темже и церковь святая поет в день воздвижения честного креста Христова:²⁵⁹ «Ты ми покров державен еси тричастный кресте Христов». Святой же Иоанн Дамаскин ублажает сице:²⁶⁰ «О треблаженное древо, на немже распятся Христос Царь и Господь». Также и святой Феодор Студийский в слове на поклонение честного креста глаголет:²⁶¹ «Днесь тричастный крест поклоняем есть, и четвероконечная вселенная празднует радостно».²⁶² Равно же и трисоставным почитается, зане Пресвятые троицы носит трисоставный образ. Еще же именуется сей в церковном писании²⁶³ и четверочастным: за положение вверху главы Христа Спасителя дщицы, с титлом Его, Пилатом написаным; дщица же сия бе из древа масличного, яко провозвестница Спасителя и спасения всего мира,²⁶⁴ юже предобразовала при потопе голубица, принесшая к праведному Ною в ковчег во устах своих масличной сучец.

Сей трисоставной крест Христов, как в древлегреческой церкви, равно и у нас, яко самосовершитель, присно во всех священнодействиях употребляется, и паче всех священных вещей предпочитается, тем и наверх самой главы церкви Христовой поставляется: понеже осенением благословлять его, кроме Бога, отнюдь никто не может, но сам той Божественный крест вся осеняет и вся освящает. Двучастного же креста знамение, еже из двух частей составленного, имеет от тричастного велие различие: тако, яко образ от истины, или паче от образа сень. Понеже двучастный крест, есть сеновного завета начертание:²⁶⁵ якоже древле Моисей крестообразно руце распростре,²⁶⁶ и на мори жезлом образ креста начерта, тогда бо и силы деяшася от него, якоже деяшася и во священнодействиях оного завета; ныне же, от Христова новоблагодатного закона, вся та упразднися.²⁶⁷ «Прейде (бо) сень законная, благодати пришедши». Обаче якоже сень в лице солнца неотлучна есть от сущего: тако и двучастный от тричастного креста не отлучен есть, но только сей двучастный крест у нас приемлется в употребление насвященных одеждах, егоже священник первее осеняет и потом целует.

Хотя же кресты, которые всякий христианин от крещения своего присно на персех своих носит, и имеют вид двучастного креста, обаче на них спереди непременно изображается начертание истинного трисоставного креста.

И все вообще кресты, сущие в церквах и в домах, трисоставного изображения, древянные и метальные, равно у нас приемлются и почитаются, кроме только на главах церквей наших отнюдь не поставляются метальные, но присно древянные, видом трисоставные; прочности же ради сии обиваются жестью, овые же украшения ради и позлащаются.²⁶⁸ Вина есть сего, что Пресвятая Владычица наша Богородица, дивным явлением и ужасным чудотворением в Тихвине, не соизволила на главе храма своего кресту железну быти, но древяну, якоже в каноне ее 4 гласа, в тропарях 5 песни, явствует, которой есть в праздничной Минеи.

4) Как²⁶⁹ священники на благословление, так равно и все православные христиане древле-греко-российской церкви на крестное ограждение, слагают персты десныя руки непремнно сицевым образом:

а) Три убо персты, первый палец со двема последнима, вкупе, во образ равночисленные неразделимые Троицы. Яко и древлие трие отроцы, образовали Троицу²⁷⁰ , сущие внучата царя Иосии, дети Ехониевы, имоверно были больший, средний и меньший, о нихже святая церковь во 8 песни 8 гласа поет:²⁷¹ «благословите дети, Троицы равночисленнии». Лишше же сего никтоже от нас дерзает к неописуемому триипостасному Божеству Святые Троицы, не только равноперстием бренной руки, но ниже из всей долу имеющейся описуемой твари яве равен образ показати: поскольку таковое безместное умствование святии отцы, Богомудрые учители, Григорий Богослов во 2 слове на святую пасху, Максим Грек в слове о Святом Дусе, и Иоанн Дамаскин в 1 его книге, главе 9, зельно обличают и конечне отражают. б) Два же перста, указательный право, а великосредний мало приклонен, совокупно простерты, образующие таинство воплощения Бога Слова во двою естеству, Божества и человечества, во едином же составе; преклонение же персту толкуется: преклонь небеса сниде на землю, нашего ради спасения. Итако слагая персты, изображаем в них по преданию древлевосточной церкви обоя божественные таинства: Святые Троицы и воплощения Бога Слова²⁷² . Ибо всероссийский Стоглавный собор и последующие тому первосвятители, изряднее же московские, до лет Никона бывшие, патриархи таковое древнее церковное предание, ежебы двуперстным сложением как священником благословляти, так равно и всем христианом знаменатися, единогласно подтвердили и точного исполнения ради даже и в книгах церковных (у нас и доныне подлинником сущих) в роды печати предали.

Сие же вышереченное церковное предание имело основание свое на всеобдержном, древле-греческими благочестивыми учительми утвержденном, узаконении, из числа коих святый премудрый Максим Грек, Афонские горы, обители Ватопедские, свидетельствованный в премудрости и благочестии тогдашними восточными патриархами, бывый в России для наилучшего исправления церковных книг²⁷³ , засвидетельствовал в своем 40 слове, ясно и достоеверно, о древнем вышеозначенном сложении перстов. В точности сему согласует писание и блаженного Феодорита Кирского.²⁷⁴ A святой Мелетий патриарх Антиохийский, будучи на соборе, восстав, показа людям три персты, и не бысть знамения; потом два совокупль и един пригнув, благослови люди, и бысть знамение страшно: изыде бо от него огнь яже молния. Хотя же в житии его и не объясняется, киими он персты благословил люди, обаче разумно явствует, что сей святой Мелетий двуперстным, а не триперстным, или иным каким сложением люди благословил; понеже самая естественность указует, яко в триперстном сложении не един к двум пригибается, но два к единому; да и доднесь нигде не слышится, чтоб кто к греческой религии тремя перстами, вкупе сложенными, благословлял; тем более, что тремя первыми точию персты оба таинства: Святые Троицы и воплощения Бога Слова, изобразити невместимо, смешати же неправедно, за опасность следующего: а) да не подражание некое будет ереси Евтихиевой и Диоскоровой, которыя бежаста Несториева разделения, два сына глаголящего, во ино зло впадоста, ибо двема естествома, Божеству и человечеству, в совокуплении смеситися и во едино естество сотворитися зле проповедаша; б) ежели бы мы тремя сложенными персты, образующими только едино таинство Святые Троицы, крестное знамение на себе изображали, то опасность предстояла бы к сходству ереси Севировой и прочих подобных, которые на кресте Божество страдавше зле мудрствоваху.

А потому, в благословении святого Мелетия сложение перст, елико не показует быти треперстно, толико и не литеросложно. Если же литеросложное благословение, склоняемое перстами на литеры греческие и славянские, и точно одно имя Ис Хс изобразовало бы; но таковое благословение в сложении перст исповедание Святые Троицы устранило бы, а наипаче благословению Христа Спасителя отнюдь не сообразно было бы: зане литеросложное благословение не может действоваться во вселенском употреблении, идеже литеры других язык не согласуют с сложением перстов. Христова же благословения вид воистину был образ вселенскому содержанию. Святой убо Лука Евангелист, во Евангелии благовествует²⁷⁵ , что Христос Спаситель, при вознесении на небо, Апостолов своими пречистыми руками благословил; и хотя сей святой Евангелист прочее тамо не упоминает, како персты рук своих Христос слагал, обаче сей Евангелист, будучи изуграф²⁷⁶ , благословящую десницу у Христа Спасителя, на первой им написанной Богородичной иконе, двуперстным сложением ясно изобразил. Таковой образ Христова благословения приняли первее святии Апостоли, а от сих другоприимательне древлегречеческие и прочие первосвятители. Итак были по оному святым Лукою написанному образу и множайшии в древлегреческой церкви иконы точно изобразуемы.²⁷⁷ А потом промыслом Божиим, не точию с первейших тех икон копии, но даже и самые подлинные апостольского художества иконы в Россию собраны и великими чудесами от Бога прославлены, где и до днесь, как известно, целы сохраняются.

5) Вышеозначенным сложением двух перст десницы во образ таинства Христова воплощения, а трех прочих перст Святую Троицу равночисленно образующих, наблюдается у нас всеопасно истовое на себе знамение честного креста, сиречь согласно истинному догмату веры, яко Христово только человечество на кресте страдало, а Божество от плоти не разлучно, но бесстрастно присутствовало.

Сим же²⁷⁸ крестным знаменованием, по сказанию святого премудрого Максима Грека, учит нас святая церковь вкупе и все благоверия христианского таинства сице исповедовати²⁷⁹ , во-первых: полагая сложенные персты на челе, исповедуем: «в начале бе Слово, и Слово бе у Бога, и Бог бе Слово» и яко от Бога Отца родися, яко и наше слово от ума происходит. А яко по божественному слову, глаголющему: приклони небеса и сниде, тако и мы рукою, со главы снося, полагаем на чрево, исповедуем с небесе на землю к нам Божие снитие и воплощение, то-есть во чреве Приснодевы Марии безсеменное вселение, девятомесячное в ней обитание, рождение, страдание и воскресение. Потом вознося полагаем на правое плечо, исповедуем Христово по воскресении на небеса вознесение, и седение его одесную Бога Отца. Потом, перенося, полагая на левое плечо, исповедуем быти второе Христово страшное на землю пришествие судити живым и мертвым, и воздати комуждо по делом его, праведным царствие и жизнь вечную, а грешникам муку вечную: от сея же последней и молимся помиловати нас; при том и таинство образуем: поклонением первое Адамово падение, а восклонением – о Христовем воскресении паки наше возстание. Сицевым бо чином крестное знаменование истово совершающих ангели Божии свыше зрят и веселятся, понеже сила сего велика есть, как повествуется во многих страданиях святых мученик:²⁸⁰ егда нечестивые мучители не могше их от Христа различными муками отлучати, повелеша им языки отрезати, и потом вопрошаху, еще ли веруют и проповедуют Христа, они же, не могуще языком уже глаголати, но полагаху на себе знамение честнаго креста, и тем исповедаху таинство веры и прославляху Бога в душах и телесах своих. Того ради святой Максим Грек поучает сице:²⁸¹ «Всяк верный да не нерадит, и не полагает сего ни во что, и еже бы без боязни, но со страхом, и с правою верою, и с чистою совестью, полагати креста знамение на лице своем, якоже божественная писания указуют. Есть же и во отеческих книгах писано о сем: иже аще кто не по подобию лице свое знаменает, сиречь не истово крестит, гордости ради или лености, и махает семо и овамо, и тому маханию беси радуются».

6) И священники наши, в благословении человека, знамение креста непременно тем же двуперстным сложением по древнему обычаю полагают истово, сице: егда кто из православных поклонится священнику и просит от него благословения, и священник первее да положит на главу его вышереченным сложением благословящую свою десницу, глаголя: «благословение Господа Бога и Спаса нашего Исуса Христа на рабе Божии» (имя рек), и сносит десницу на чрево, потом на оба рама, глаголет: «всегда, и ныне, и присно и во веки веков», а приемлющий благословение на сие отвещает: аминь, и целует десницу, положившую на него великое Божие благословение: и, ликуяся по обычаю, священник речет: «Христос посреде нас», а он отвещает: «есть и будет».

7) Четыре в году соборные посты, составляющие всего до двадцати одной седмицы, соблюдаются у нас ненарушимо, в которые всяк наш православный христианин благоговеет постом, и молитвою и коленопреклонением к Богу; притом же во весь год, иноки понедельник, и вкупе иноки и мирские среды и пятки, кроме некоторых разрешенных дней, постят, так равно как и в великий пост, не вкушая отнюдь не только мяса; (егоже иноком во веки ясти запрещено), но и млека, сыра и яиц²⁸² . Даже и больным не подается сих скоромных ястий, хотя бы они и до смерти желали, а только, немощи ради, на елей и рыбу разрешается.²⁸³ Аще же бы кто, не только соборные посты, но даже среды и пятки, кроме разрешенных, тверду сущу в нем разуму, не постил, таковой, по правилом святых Апостол и святых отец, аще будет от священных, да извержется, аще ли мирянин, от собора верных да отлучится.

8) Совокупно рещи, сохраняется у нас неизменно то самое веры догматствование и все церковное чиноположение и богослужение, еже, прежде нежели западная церковь от восточной разделилася, вселенскими соборы утвержденное, святым же и равноапостольным князем Владимиром киевским, в 6496 году, от грек во всей целости принятое, и которое существовало в России всеобдержно и неизменно даже до перемен церковных книг бывшим московским патриархом Никоном 7163 года. А дабы вышереченные догматы веры и церковное чиноположение и богослужение точно содержалося, святая вселенская церковь утверждает в следующих запрещениях сице:²⁸⁴ «аще убо дерзнет кто инако веровати, или развращати что либо от сущих в церкви, держимых по первым обычаем святых отец и благочестивых царей, аще святители суть да извержени будут и прокляти, аще ли же иноцы и простии люди, тою же клятвою осуждени будут». И паки, святой Леонтий папа римский в поучении своем глаголет:²⁸⁵ «смеющих инако мудрствовати, или по мерзских еретик церковная предания презирати, новая же некая разумевати, или отложити некое от чина церковного, Евангелие, или знамение креста, или прочее что, аще епископи суть, или клирицы, изметати повелеваем, аще ли же иноцы, или бельцы, от причащения да отлучатся: святой собор сия предал есть». Наипаче же²⁸⁶ святой Иоанн Златоуст во апостольских беседах пишет сице: «егда Павла реку, Христа паки глаголю, той бо бяше движа егову душу». Павел бо «не рече: аще противная возвестят, или превратят все, но: аще и мало нечто благовествуют, паче еже благовестихом, аще и мало что подвигнут, анафема да будут».²⁸⁷ Страшнейшим же словом заключают восточнии вселенские патриархи к Феофилу царю греческому, в соборном многосложном свитке, сице: «проклят разоряяй уставы отеческие и непременные уставы церковные, яже положиша отцы твои».

От сицевых богодухновенных писаний, на какой они конец толико оберегательно к нам возглашают, достоит внимати и вразумлятися, якоже, например, елико к сохранению убо целости винограда необходимо нужно есть бдительно храниша ограда, толико наипаче и несравненно нужно есть к ненарушимому соблюдению целости закона Божия точно хранить добре утвержденная святых отец церковная предания. Ибо аще бы сия церковных догмат ограда от начала опасно всюду всеми блюдома была, то не бы едино стадо единого пастыря Исуса Христа на многие секты разделялося. Тем убо мы да пребудем в ненарушимом соблюдении древних церковных преданий, присно молящеся к сему доброму пастырю²⁸⁸ , иже на взыскание заблуждений и волкохищной овцы от небес даже до ада сшедшему, и, обретше, на рамо свое восприемшему и радостно в дом к Отцу своему принесшему, да не только нас униженных не оставит от истинного его пути заблудити,²⁸⁹ но да и иных всех, яже не суть от двора его, спасительным своим промыслом соберет и во едину божественную правосдавные его веры ограду приведет, и тако да будет, по Божественному его слову²⁹⁰ , «едино стадо, и един пастырь».