Акафист преподобному Феодосию Кавказскому
Кондак 1
Избра́нный угодниче Христов и преславный чудотворче, преподобне отче Феодосие, подвиги твоими ангелы удививый и человеки многия из глубины греховныя изведы́й, умоли прославльшаго тя Господа о нас, от бед и напастей нас свободи́, любовию зовущих ти: Радуйся, преподобне Феодосие, Кавказский чудотворче.
Икос 1
Ангелов Творец избра́ тя от чрева матере твоея́ и в рождестве твоем показа́ зна́мение будущаго и́ноческаго жития твоего, да будеши, богоблаже́нне Феодосие, молитвенником ко Господу и Пречистей Его Матери за весь мир. Мы же, грешнии, уповающе на скорую помощь твою, взываем ти си́це: Радуйся, от чрева матере Господом избра́нный; радуйся, во младенчестве к служению Богу преднарече́нный. Радуйся, в рождестве твоем зна́мение жития монашескаго яви́вый; радуйся, в юности строгость и́ноческаго жития показа́вый. Радуйся, Христа всем сердцем возлюбивый; радуйся, всего себе Господу преда́вый. Радуйся, народа российскаго молитвенное ограждение; радуйся, земли́ Кавказския священное украшение. Радуйся, преподобне Феодосие, Кавказский чудотворче.
Кондак 2
Видя Господь благо́е сердца твоего изволе́ние, яко из младенчества имел еси к Нему любовь ве́лию и немо́лчно прославлял еси имя Господне, угото́ва ти ангельское житие во Святе́й Горе Афо́нстей иде́же во смирении и послуша́нии научался еси Единаго Бога любити и Того ра́ди вся земная презирати, вопиюще Ему: Аллилуиа.
Икос 2
Разум богопросве́щен име́я, преподобне отче Феодосие, на ра́евом ка́мени от младенчества молитися Богу навыкл еси, веру крепкую, надежду несумне́нную, любовь истинную к Нему стяжа́л еси и стопы́ своя ко Святе́й Горе Афо́нстей направил еси, темже ублажаем тя си́це: Радуйся, из младе́нчества молитву ко Господу твори́вый; радуйся, вы́ну любовию пла́менною к Нему горе́вый. Радуйся, на Святе́й Горе Афо́нстей во о́трочестве чин ангельский прия́вый; радуйся, тамо многая послуша́ния понесы́й. Радуйся, усердный к Богу и Ма́тери Божией молитвенниче; радуйся, покаяния проповедниче. Радуйся, скорбя́щим скорое утешение и вразумление; радуйся, при́сное и нело́жное их успокоение. Радуйся, преподобне Феодосие, Кавказский чудотворче.
Кондак 3
Силу, данную ти свыше, прия́л еси, преподобне отче Феодосие, изгоняти всякую силу вражию. И того ра́ди с кротостию и смирением уврачева́л еси одержи́мую бе́сом жену́ знатную, да сие́ чудо видяще, вси лю́дие прославиша Бога, вопиюще Ему: Аллилуиа.
Икос 3
Иму́ще тя, изрядный угодниче Христов Феодосие, вои́теля проти́ву силы бесо́вския, теплаго молитвенника и предста́теля пред Го́сподем о нас, недостойных, любовию твое́ю побеждаеми, со умилением зовем ти: Радуйся, многия да́ры духовныя от Господа получивый; радуйся, темиже козни диа́вольския победивый. Радуйся, жену, бесом одержи́мую, во о́трочестве твоем исцели́вый; радуйся, плотски́я похоти умертви́вый. Радуйся, силу чудес Божиих яви́вый; радуйся, во́ине Христов добропобедный. Радуйся, предста́телю о нас к Богу и Богородице непостыдный; радуйся, Небеснаго Царя избра́нниче предивный. Радуйся, преподобне Феодосие, Кавказский чудотворче.
Кондак 4
Бурю гнева неправеднаго от братии претерпел еси, блаженне Феодосие, имиже в нечисто́ты вве́ржен был еси, Пречистою же Богородицею чудесно извлече́н. Сего ра́ди, зря́ще таковое о тебе Матере Божией благоволе́ние, вопием Всевышнему Богу: Аллилуиа.
Икос 4
Слышавше о бывшем на тебе чудеснем излия́нии милости Пресвяты́я Девы Марии и Архистрати́га Божия Михаила, мы, грешнии, прославляем дивнаго во святых Своих Господа и Его Пречистую Матерь со Архангелом и вопием ти: Радуйся, Царицею Небесною от смерти спасе́нный; радуйся, Архистрати́гом Божиим Михаилом от посрамле́ния изба́вленный Радуйся, тесный путь спасения возлюбивый; радуйся, яре́м Господень на вы́ю свою возложи́вый. Радуйся, от братии в монастыре всяческая поноше́ния претерпевый; радуйся, незло́бие младенческое име́вый. Радуйся, ра́бе Господень благи́й и верный; радуйся, скорый помощниче всем скорбя́щим и обремене́нным. Радуйся, преподобне Феодосие, Кавказский чудотворче.
Кондак 5
Божественный огнь благодатный видевше на Гробе Господнем, в Великую Субботу чудесно возгораемый, и сим огне́м освяще́нный, многая лета послужил еси, преподобне отче Феодосие, во Святе́й Земли́, вы́ну взывая Богу: Аллилуиа.
Икос 5
Видя тя оча́ми веры чада твоя, преподобне отче Феодосие, со благогове́нием у Гроба Господня служа́ща и со дерзновением Ему мольбы о стране Российстей принося́ща, удивлением объя́ты, благодарно вопием ти: Радуйся, во Святе́й Земли́ благодатно пожи́вый; радуйся, по стопа́м Спасителевым ходи́вый. Радуйся, огне́м благодатным освятивыйся; радуйся, любовию к Богу воспламенивыйся. Радуйся, пред Гробом Господним служителю усердный; радуйся, молитвенниче к Богу и Богородице о нас неусыпный. Радуйся, веру Христову миру явля́яй; радуйся, везде Христа прославля́яй. Радуйся, преподобне Феодосие, Кавказский чудотворче.
Кондак 6
Проповедник смирения и покаяния был еси, отче, образом жития твоего незло́бие и всепроще́ние показу́я, якоже светило многосветлое, тму неведе́ния и уныния от приходя́щих к тебе отгонял еси и всех увещева́л плоть ду́хови покоря́ти и чистым сердцем пети Богу: Аллилуиа.
Икос 6
Прие́мый от Господа благодать разумения о Пресвяте́й Троице на Афо́нстей Горе, во Иерусалиме и Царьгра́де, в земли́ Российстей православныя веры проповедник яви́лся еси. Мы же, верующе православно во Святую Троицу, с любовию вопием ти: Радуйся, веры православныя проповедниче; радуйся, предивный Божий избранниче. Радуйся, усердно призывающим тя помощниче, радуйся, добрый стада своего наставниче. Радуйся, людей земли́ Российския усердный заступниче; радуйся, к Богу и Богородице непрестанный о них молитвенниче. Радуйся, Царствия Небеснаго наследниче; радуйся, веры Христовыя дерзновенный исповедниче. Радуйся, преподобне Феодосие, Кавказский чудотворче.
Кондак 7
Хотя Человеколюбец Господь яви́ти в тебе, преподобне, Свое неизрече́нное к людем милосердие, показа́ тя яко воистину светило богосветлое: скорым твоим хода́тайством чудеса многая и преславная совершаются. Ты же, ста́рче, и при жизни достиг посеще́ния небесных служителей, благодарно прославляя Всевышняго Бога: Аллилуиа.
Икос 7
Новаго видяще тя избранника Божия, издале́ча притека́ху к тебе ве́рнии в ско́рбех и болезнех, егда источник в пустыне ископа́л еси, ста́рче Феодосие, и благодать на воду сию́ у Пресвяты́я Троицы испросил еси исцеляти телесныя и душевныя неду́ги. Сего ра́ди взываем ти: Радуйся, ста́рче, ра́бе Господень; радуйся, верный источниче благодатный. Радуйся, духовною пищею алчущия питаяй; радуйся, святою водою из источника твоего верным жажду утоляяй. Радуйся, при жизни посеще́ния Царицы Небесныя сподо́бивыйся, радуйся, святыми небожители не оста́вленный. Радуйся, яко благословением и советами людем верующим помогаяй; радуйся, всех с верою к тебе притекающих на путь спасения наставляяй. Радуйся, преподобне Феодосие, Кавказский чудотворче.
Кондак 8
Странное и преславное чудо дарова́ ти Господь, преподобне отче Феодосие, дар молитвенный, живых заступающий и от ада спасающий. Мы же Господу нашему, дарова́вшему нам, на Кавказе живущим, таковаго молитвенника и хода́тая о нас, вопием: Аллилуиа.
Икос 8
Всего себе Христу от чрева матерняго преда́л еси, блаженне Феодосие, умиле́нным сердцем и сокруше́нною душе́ю Тому вы́ну предстоя́ и духовная чада научая хранити смирение и самоукоре́ние, дар умиления стяжа́ти. Сия́ ведяще, восхваляем тя си́це: Радуйся, Безкровныя Жертвы достойный совершителю, радуйся, олтаря́ Господня благоговейный служителю. Радуйся, дарова́ний духовных светильниче, радуйся, новыя обители и́ноческия начальниче. Радуйся, заточение Христа ра́ди претерпевый; радуйся, изгнание ближним предсказа́вый. Радуйся, любящим и чтущим тя, хода́таю спасения; радуйся, приводя́й грешников ко исправлению. Радуйся, преподобне Феодосие, Кавказский чудотворче.
Кондак 9
Вси лю́дие удивля́хуся тебе, ста́рче Феодосие, яко призыванием Господа и молитвенным твоим хода́тайством бе́сы изгоняются и одержи́мии исцеляются. Та́ко и мы, к моще́м твоим прибегая, умиле́нно возглашаем Богу: Аллилуиа.
Икос 9
Разум человеческий не может изрещи́ обилие благодати духовныя, е́юже ты, отче Феодосие, преиспо́лнен, ю́же и мы получаем, в молитве к тебе прибегающе. Сего ра́ди сицево́е пение прино́сим тебе: Радуйся, молитвами своими тму напастей от нас отгоняяй; радуйся, на путь отреше́ния от мира нас наставляяй. Радуйся, страдании душу обогативый; радуйся, утешение чадом духовным яви́вый. Радуйся, Господом укрепле́нный; радуйся, Духом Святым просвеще́нный. Радуйся, среди горских народов пожи́вый; радуйся, с иноверными в мире жити учивый. Радуйся, преподобне Феодосие, Кавказский чудотворче.
Кондак 10
Богоборная гонения на Церковь Православную видя, ты, отче Феодосие, верных ра́ди подвиг юродства прия́л еси, да яви́ши людем Премудрости Божия ве́лия да́ры, вопиюще Ему: Аллилуиа.
Икос 10
Стена еси и твердое прибежище к заступлению твоему прибегающим, чудотворче Феодосие. Темже в беда́х, ско́рбех, обстоя́ниих и лишениих мнозих пребывающе, радуяся твоему о нас заступлению, благодарно вопием ти: Радуйся, в юродстве силу Божию людем православным яви́вый; радуйся, грядущая, яко настоящая, прови́девый. Радуйся, прегрешений сокровенных обличи́телю прозорли́вый; радуйся, жителем града Минводы скорби в притчах предсказа́вый. Радуйся, детей малых от огненнаго запале́ния чудесно изба́вивый; радуйся, призывающим тя скорый помощниче. Радуйся, любви и смирению свою па́ству науча́яй; радуйся, от по́мысла греховнаго падших духом отвраща́яй. Радуйся, преподобне Феодосие, Кавказский чудотворче.
Кондак 11
Пение всеумиле́нное Пресвяте́й Троице принесл еси, егда душу свою Спасителю Мира в ру́це преда́л еси и со лики ангел в небесныя селения вселился еси, воспевая Богу: Аллилуиа.
Икос 11
Видевше лю́дие, угодниче Божий Феодосие, мирную кончину твою и чудеса на гробе твоем твори́мая, возрадовашася. Темже в уповании всесильнаго предста́тельства твоего у Престола Пресвяты́я Троицы уве́ришася, с любовию взывают ти: Радуйся, в обители небесныя вселивыйся; радуйся, яко кончину твою колокольный звон чудесно возвести. Радуйся, яко гроб твой ангели сопровожда́ша; радуйся, яко на могиле твоей столп огненный лю́дие видеша. Радуйся, притекающих ко гробу твоему крепкое заступление. Радуйся, Та́ин Божиих вечный зрителю; радуйся, от бед и горя скорый изба́вителю. Радуйся, преподобне Феодосие, Кавказский чудотворче.
Кондак 12
Благодать Божию прия́л еси, преславне Феодосие, яко в житии твоем светильник был еси притекающим к тебе с верою, и по смерти своей возсия́л еси светом чудес твоих. Лю́дие дивля́шеся славе твоей, взывают Богу со умилением: Аллилуиа.
Икос 12
Пою́щу Богу, дивну во святых Своих, восхваляем тя, преподобне отче Феодосие, был бо еси образ жития юным, правилом веры муже́м, учитель старцев, нам же всем молитвенник и предста́тель. Сего ра́ди вопием ти: Радуйся, долголетием от Бога одаре́нный; радуйся, по смерти чад своих не оста́вивый. Радуйся, обилие чудес верным яви́вый; радуйся, всем с верою приходя́щим к моще́м твоим помогаяй. Радуйся, на стезю́ спасения всех наставляяй; радуйся, Церковь Святую от неверия и расколов сохраняяй. Радуйся, в обстоя́ниих и напастех верный о нас молитвенниче; радуйся, пастырей земли́ Кавказския покровителю и скорый помощниче. Радуйся, преподобне Феодосие, Кавказский чудотворче.
Кондак 13
О, пречудный угодниче Божий и чудотворче, преподобне отче Феодосие! Воистину дар Божий еси нам, и́же во и́ночестве, и во священстве, и во юродстве Триипоста́снаго Бога прославил еси. Приими́ ма́лое сие́ моление наше и умоли Господа Бога, да помилует нас твоими мольбами, на путь покаяния всех наставит, вопиющих Ему: Аллилуиа.
Этот кондак читается трижды, затем 1-й икос «Ангелов Творец» и 1-й кондак «Избранный угодниче…».
Молитва
О святый угодниче Божий, преподобне отче Феодосие! От юности Христа возлюбивый и Единому Ему последовавый, удалился еси в удел Матери Божией, на Святую Гору Афо́нскую, и оттуда ко Гробу Господню притекл еси. Там во священничестем чине много лет пребыва́я, совершал еси усердная моления за землю Российскую, за Церковь Православную и за народ русский. Егда же постигло бе Русь Святую лихолетие безбожия, оставил еси ты Афо́н и Иерусалим и вернулся еси во Отечество свое, разделяя скорби народа своего и Це́ркве нашея Святы́я, яко монах и священнослужитель, даже до темни́чнаго заточения. Вера твоя, кротость, смирение и терпение умиля́ху огрубевшая сердца́ в заточении с тобою пребывавших. В годы брани ты, отче, помогал еси народу православному одолети врага и супоста́та, и многих от уныния, горя и отчаяния самовольне живот свой скончати желавших, спасл еси. Помощию твое́ю укрепля́хуся ве́рнии в уповании своем, яко Господь не остави Отечество наше, Матерь Божия сохранит удел Свой, и гнев Божий Ея молитвами на милость претвори́тся. Многотрудный твой подвиг Христа ра́ди юродства удиви, отче, не то́кмо нас, земных, но и небожителей, явля́вшихся тебе. Сие́ твори́т молитва праведника, верою крепкою поспе́шествуемая. Ве́си ну́жды и печали наша, преподобне отче Феодосие, ве́си и желание наше со Христом быти. Прошед тесный и тернистый путь земнаго бытия, ты нес яре́м тяжкий от братий своих, от неверных и соплеме́нников. Воспомяни́ нас, старче Божий, у Престола Господня, ибо ты обещал помогати всем, кто обратится к тебе. Память твоя, отче, на земли́ Кавказстей не оскудева́ет и поныне с верою и упова́нием притекают православнии лю́дие к моще́м твоим, прося́ заступления и помощи. Просим же тя, преподобне отче Феодосие: помози нам в трудный час жизни, в минуты скорбе́й и страданий, умоли Начальника мира Господа, да умягчи́т Он злая и огрубевшая сердца человеческая и умири́т народы Кавказа. Да разори́т нечести́выя советы раскольников и еретико́в, возстающих на Святую Церковь Русскую. Твоими молитвами, свя́тче Божий, да прости́т нам Господь всякая прегрешения, да мину́ют нас стре́лы вражия и козни диа́вольския. Испроси у Творца и Промысли́теля жизни нашея Господа время на покаяние, от па́губы избавление, боля́щим здравие, па́дшим возстановление, скорбя́щим утешение, чадом во страсе Божием воспитание, отходя́щим к вечности благо́е уготовле́ние, отшедшим упокоение и Небеснаго Царствия наследование. Буди, отче Феодосие, покрови́телем и помо́щником всем верным земли́ Кавказския. Да укрепи́тся и умно́жится на ней и во всей Руси Великой святое Православие. Мы же, святыми твоими молитвами укрепля́еми, прославим Живоначальную Троицу и твое освяще́нное Богом имя, ныне и при́сно и во веки веков. Аминь.