Акафист преподобному Даниилу Столпнику

Празднование 11 декабря/24 декабря

Кондак 1

Избра́нный угодниче Христов, преподобне сто́лпниче и преславный чудотворче, возсия́вый ми́рови, яко звезда многосветлая, подвиги и чудесы́ своими, восхваляем тя любовию, отче Данииле. Ты же, яко име́яй дерзновение ко Господу, молитвами твоими от бед и скорбных обстоя́ний свободи́ нас, да благодарственно со умилением зовем тебе: Радуйся, преподобне отче Данииле, теплый о мире к Богу молитвенниче.

Икос 1

Ангельскому житию от юности твоея́ поревновав, преподобне, восприя́л еси труды и подвиги и́ночества, в нихже до кончины самыя пребыв, Богу угодил еси и славы небесныя сподо́бился еси. Сего ра́ди похвальная воспису́ем тебе, вопиюще таковая: Радуйся, Данииле, молитвами матере твоея́ испро́шенный; радуйся, непло́дою рожде́нный. Радуйся, пророческим именем нарече́нный; радуйся, родители твоими на служение Богу обрече́нный. Радуйся, от юности чистоту жития возлюби́вый; радуйся, в о́трочестве духу плоть свою покоривый. Радуйся, преподобне отче Данииле, теплый о мире к Богу молитвенниче.

Кондак 2

Видевше тебе отроча́ мла́до, в обитель иноков пришедшаго, старцы и братия отрица́хуся пострижения сподо́бити, глаго́люще, яко младость юности не может трудов и́ночества понести. Ты же, отвещав, рече́: «Мне е́же жити Христос и е́же умре́ти приобретение». Сего ра́ди вопием о тебе Богу: Аллилуиа.

Икос 2

Разумея Божие в изволе́нии твоем звание работати Го́сподеви и слыша к тому моление отца твоего и матере твоея́, да пред очесы́ их постриже́н бу́деши, преподобнии отцы ангельскаго образа сподо́биша тебе, Данииле. Мы же, славяще таковое постоянство твое, взываем тебе таковая: Радуйся, Богом избра́нный; радуйся, Господом призва́нный. Радуйся, храм Святому Духу предугото́ванный. Радуйся, олтарь на священное служение Господу освященный. Радуйся, плоть свою со страстьми́ от юности распина́вый; радуйся, ве́лия подвиги благочестия в и́ночестве показа́вый. Радуйся, преподобне отче Данииле, теплый о мире к Богу молитвенниче.

Кондак 3

Силою Вышняго осеня́емый, растя́щ и крепля́яся духом, блаженне Данииле, и преизящнаго жития начаток уготовля́я, воспевал еси устами и Духом Богу: Аллилуиа.

Икос 3

Име́я зе́льное желание поклонитися святым местам, шел еси, блаженне Данииле, от Месопотамии в святы́й град Иерусалим и иныя гра́ды и ве́си Святы́я Земли́ и тамо поклонися Христу Богу нашему. Таковую ревность прославляюще, приносим тебе звания сицева́я: Радуйся, Данииле, яко всем сердцем Бога возлюбил еси; радуйся, яко от силы в силу восходил еси. Радуйся, оста́вивый дольняя; радуйся, взыска́вый горняя. Радуйся, яко светильник Духа Божия показался еси не угасающий; радуйся, яко дар Божий яви́л еси в себе возгревающий. Радуйся, преподобне отче Данииле, теплый о мире к Богу молитвенниче.

Кондак 4

Бурю страсте́й, одержа́щих мир, жезлом воздержа́ния, отче Данииле, в себе укротив, на гору безстрастия вседушно устремился еси, да Богу и ангелом чистотою ума безмятежно беседуеши, вопия́: Аллилуиа.

Икос 4

Слышав, яко есть в Антиохи́и на столпе́ подвиза́ющийся блаженный Симеон Дивногорец, возбудился еси, отче, к подражанию подвигом того. Таже созда́в столп, взыде на него и нача́ жити Богу между небесе́м и земле́ю, сея́ устраняяся, к тому приближаяся. Сих ра́ди бываемых, зовем к тебе таковая: Радуйся, преподобне Данииле, в пламени благочестия неохлади́мый; радуйся, в труде́х и подвизех неутомимый. Радуйся, путе́м к небеси́ столп избра́вый; радуйся, на столпе́, яко на кресте, плоть свою со страстьми́ распя́вый. Радуйся, житием святаго Дивногорца плене́нный; радуйся, ревностию к подвигом сто́лпничества распале́нный. Радуйся, преподобне отче Данииле, теплый о мире к Богу молитвенниче.

Кондак 5

Звезда многосветлая, блаженне, на столпе́ яви́лся миру, тму прелести отгнал еси. Темже молим тя: И ныне облиста́й в сердцах наших незаходя́щий свет ра́зума, да вопием о тебе Богу: Аллилуиа.

Икос 5

Видевше лю́дие, преподобне, на столпе́ возвышена тебе и сиянием чудес всех озаряющаго с верою притекающих, сердцем и усты́ любовию взыва́ху к тебе си́це: Радуйся, отче, на столпе́ себе утверди́вый; радуйся, всякой жестокости жития сто́лпнаго себе покоривый. Радуйся, в лете зной солнечный претерпевый; радуйся, в зиме мраз лютый презре́вый. Радуйся, яко дожде́м и ве́трами пребыл еси обуреваемый; радуйся, яко и демоны был еси искушаемый. Радуйся, преподобне отче Данииле, теплый о мире к Богу молитвенниче.

Кондак 6

Проповедует мир весь тебе, преподобне Данииле, демонов прогонителя, болезней исцелителя и иных многих чудес, совершителя. Мы же, Бога о тебе прославляюще, вопием Ему: Аллилуиа.

Икос 6

Возсия́л еси ми́рови светом пречудных твоих подвигов, преподобне Данииле. И, на столпе́ возвышен быв, из гонителя твоего соделал еси благодетеля, и́же столп согради́ тебе вторы́й и славу имене и подвигов твоих преумно́жи, – во спасение с верою приходя́щих к тебе и помощи твоей прося́щих. Сего ра́ди вопием тебе сицева́я: Радуйся, брани возставших проти́ву тебе победителю; радуйся, злых помыслов искоренителю. Радуйся, добрых пожеланий насади́телю; радуйся, тайных козней обличителю. Радуйся, бесо́в прогонителю; радуйся, боля́щих исцелителю. Радуйся, преподобне отче Данииле, теплый о мире к Богу молитвенниче.

Кондак 7

Хотя муж некий премудр и слове́сен о пода́нии дщери его здравия и спасения рукою и молитвами твоими, преподобне, благодарственная принести, написа́ на столпе́ твоем стихи сицевы́я: «Зде стоит муж, стихиями неуязвимый; пищу имы́й безсмертную, а не земную, егоже жилище столпы́ двоезра́чны, славящий Сына Матере Heискусобрачны». Мы же славим Бога, прославляющаго святы́я Своя, и хвалебную песнь пое́м Ему: Аллилуия.

Икос 7

Новый И́ов яви́лся еси миру, досточудне Данииле, множеством обдержи́мь быв скорбе́й и искушений; но Давидову кротость, Иаковле беззлобие и целомудрие Иосифово, паче же терпение И́овле стяжа́в, вся победил еси. Сего ра́ди вопием тебе сицева́я: Радуйся, преподобне Данииле, сосуде благодати избра́нный; радуйся, чудотворче изрядный. Радуйся, милости Божией стяжа́телю; радуйся, к Богу ближний предста́телю. Радуйся, лучезарный светильниче; радуйся, Богом венча́нный подвижниче. Радуйся, преподобне отче Данииле, теплый о мире к Богу молитвенниче.

Кондак 8

Странными чудесы́ прославляяся, преподобне отче Данииле, утвердил еси веру и упование в людех, яко много может молитва праведнаго. Мы же, веруя, яко аще по Бозе упование на тя возложи́м, та́кожде прии́мем молитвами твоими проси́мое, пое́м Богу о тебе: Аллилуиа.

Икос 8

Во вся оружия Божия облеки́йся, преподобне отче Данииле, возмогл еси стати проти́ву всем кознем диа́вольским, на столпе́ третием, и превысочайшем, благодарственне тебе созда́ннем, подвиза́лся еси. И нас, преподобне, грехи обуреваемых, предста́тельствы твоими свободи́, да зовем тебе си́це: Радуйся, хода́таю всем спасения; радуйся, приводя́й грешных ко исправлению. Радуйся, скорбя́щим пода́яй утешение; радуйся, злых приводя́й к постыжде́нию. Радуйся, духо́в искусителей прогонителю; радуйся, покаяния насади́телю. Радуйся, преподобне отче Данииле, теплый о мире к Богу молитвенниче.

Кондак 9

Всякия скорби, болезни, искушения, на столпе́ подвиза́яся, преподобне отче Данииле, претерпел еси. И всем сим, бываемым тебе, помощию Божиею, победитель яви́лся еси. Сего ра́ди вопием о тебе Богу: Аллилуиа.

Икос 9

Вити́и многовеща́ннии не довлеют изглаго́лати подвиги твоя и промышле́ние о тебе Божие, преподобне отче Данииле, яко к различным чудесе́м и пророческаго дара не лишися и благодати священства сподо́бися. Мы же, любовию побеждаеми, дерза́ем смиренномудренно звати тебе таковая: Радуйся, верный ра́бе Владыки Всеблагаго; радуйся, храме Духа Всесвятаго. Радуйся, священниче, Богом избра́нный; радуйся, благодати цвет благоуханный. Радуйся, молитвы фимиам благовонный; радуйся, орга́н псалмопения сладкостройный. Радуйся, преподобне отче Данииле, теплый о мире к Богу молитвенниче.

Кондак 10

Спасти хотя вся ближния и дальния столпа́ твоего, блаженне Данииле, Господь смотрением Своим привождаше к тебе многия люди, молитвы, благословения, освящения и наставления прося́щия у тебе. И сих зря́ще лю́дие, седящии во тьме заблуждения, к свету истины обращахуся. Мы же, славяще Спаса всех, пришедшаго в мир грешных спасти, пое́м о тебе Богу: Аллилуиа.

Икос 10

Стена еси всем, преподобне отче Данииле, с верою и упованием к заступлению твоему прибегающим. Темже и нам, в ско́рбех, болезнех и искушениих с наде́янием к тебе приходя́щим, помощь твою и заступление милосердне яви́, да любовию вопием тебе таковая: Радуйся, пристанище обуреваемым; радуйся, заступление озлобляемых. Радуйся, печальным утешение; радуйся, немощны́м укрепление. Радуйся, унывающим ободре́ние; радуйся, молений скорое исполнение. Радуйся, преподобне отче Данииле, теплый о мире к Богу молитвенниче.

Кондак 11

Пение всеумиле́нное и благодарственное Господу Богу приносим, яко и́мамы тебе, преподобне отче Данииле, молебника о нас грешных и святыми молитвами твоими спасаемся. Сего ра́ди, пред святою иконою твое́ю усердно припа́дающе и покровителем нашим тебе почитающе, всеблагоговейно вопием о тебе Богу: Аллилуиа.

Икос 11

Светозарную свещу́ благодати Божественныя зрим тебе, преподобне отче Данииле, просвещаемии благовестием о преславнем житии твоем. Твоими бо молитвами от неду́г своих мнози свобождахуся. К сим же во устах твоих обре́теся благодать Божия, спасительная человеком, яко от словес твоих умили́тися послу́шающим тебе и житие свое исправляти. Сего ра́ди зовем тебе таковая: Радуйся, преподобне отче Данииле, веры утверждение; радуйся, Це́ркве Христовы украшение. Радуйся, разума духовнаго сокровище; радуйся, спасения изрядный наставниче. Радуйся, звездо́, на тверди церковней блистающая; радуйся, цевни́це Божественная, словесы́ и де́лы всех утешающая. Радуйся, преподобне отче Данииле, теплый о мире к Богу молитвенниче.

Кондак 12

Благодать Божественную, милующую нас, в тебе, преподобне отче Данииле, зря́ще, яко и немы́й от рождения проглаго́лати возмо́же, и хромый от рождения исцели́ся, радуемся и хвалим Бога и тебе, скораго молитвенника и помощника, вопиюще к Богу: Аллилуиа.

Икос 12

Пою́ще подвиги твоя, преподобне отче Данииле, ублажаем равноангельное житие твое, почитаем скончание жительства твоего, на неже снидо́шася не то́кмо священноначальницы и клир Це́ркве земны́я, но и Це́ркве первородных, на небесе́х написа́нных. Ты же, радуяся, преда́л еси чистую и святую душу твою в ру́це Божия. Бог же просла́ви тебе по успении твоем чудесы́ многими. Приими́ убо, всеблаже́нне отче Данииле, и от нас приноси́мая тебе ублаже́ния сицева́я: Радуйся, обитателю Це́ркве торжествующих; радуйся, с ангелами ликовству́ющий. Радуйся, радости вечныя преисполня́емый; радуйся, с пророки величаемый. Радуйся, с апостолами прославляемый; радуйся, со святители благословляемый. Радуйся, с мученики венчаемый; радуйся, с преподобными ублажаемый. Радуйся, преподобне отче Данииле, теплый о мире к Богу молитвенниче.

Кондак 13

О пречудный и преславный угодниче Божий, преподобне и богоносне отче Данииле, телом на земли́ почивающий, душе́ю на небеси́ обитающий, духом же от при́сных тебе не отлучающийся, приими́ моления наша. При́зри милостиво с высоты небесныя славы твоея́ на нас, в умилении молебно предстоя́щих пред святою твое́ю иконою, и умоли Владыку Спаса всех спастися душа́м нашим и в сем и в будущем ве́це сердцем и усты́ пети Богу: Аллилуиа.

Этот кондак читается трижды, затем 1-й икос «Ангельскому житию...» и 1-й кондак «Избранный угодниче...».

Молитва

О преподобне и богоносне отче наш Данииле, ублажаем ве́лия подвиги жития твоего, – скорби лютыя, болезни, искушения, имже победоносец предивный показался еси. Величаем дарова́ния благодати Господни, тобою многоча́стне и многообра́зне явле́нныя боля́щим и скорбя́щим, грешным и заблуждшим во спасение их. Поминаем тебе наставника премудраго, и́же глагола людем словеса́ учительная от Слова Господня, ду́ши умиля́ющая и умы и сердца́ к Богу обращающая. Молимся тебе: Не забу́ди, о, преблаженне отче, веры нашея к тебе и надежды упования нашего на тебе, пред святою иконою твое́ю при́сно предстоя́щих и тепле моля́щихся. Сподо́би нас, у́мно взирающих

на скончание жительства твоего, подражати вере и любви твоей. Поминай нас, недостойных, во святых твоих и благоприятных молитвах к Богу, яко священник Божий, предстоя́ Престолу Вседержи́телеву. Молим тя, великий молебниче и чудотворче святы́й, бу́ди нам всегда уте́шитель, целитель, помощник и заступник, и покровитель, и наставник верен. Не премолчи́, вопия́ за ны ко Господу, да с терпением течем на предлежа́щий подвиг спасения душ наших, взирающе на тебе, святы́й учителю наш, и благоче́стно и праведно, в единении духа, в единомыслии веры и любве́ поживе́м в нынешнем ве́це; в будущем же да сподо́бимся славити благодать и человеколюбие Единаго в Троице славимаго Бога, Отца и Сына и Святаго Духа во веки веков. Аминь.