Слово в неделю 2-ю по всех Святых

Глагола има: грядита по Мне, и сотворю вы ловца человеком. Она же абие оставльше мрежи, по нем идоста.

Мф.4:19–20

Добрый ловитель рыб , Спаситель наш, по брегу ходит и на мори уловляет, егда распростре мрежу словесе своего живаго; улови в ню словесныя, великия рыбы, Симона, Андрея, Иоанна, Иакова и прочих; но и рыбы ся изрядныя не от невежества и нуждею , но ведуще и видяще, от своего произволения в мрежу Христову внидоша. Христос бо Спаситель наш не тако ловит, якоже простии рыбарие: они происком, обманством; Христос на аве мрежу Свою распростирает, и сии токмо в ню впадают, иже хотят. Аще, рече, кто хощет по Мне ити, да возмет крест свой, и по Мне грядет¹. Аще хощеши внити в живот, соблюди заповеди². Волею, от своего произволения в мрежу Христову приходят рыбы. Хотящий идет за ним, яко и ныне уловленнии от Христа словесныя рыбы, Симон, Андрей и прочие. О преизряднаго рыбаря! о изрядныя рыбы! Не токмо же в след Христа идоша волею, но и поидоша абие, не отлагающе на утро, на после, но абие, Таковыя Христос Спаситель рыбы любит: сих же, которые шествие и последование свое за Христом отлагают на иное время, на старость, на смертный час, когда уже воссмердятся, ненавидит Душа Его. Скораго и неотложнаго последования за Собою Господь требует. Егда некоторый от последующих Иисусови рече: повели ми прежде ити и погребсти отца моего³: не похвали сего Иисус, но отвеща: гряди по Мне, и остави мертвых погребсти своя мертвецы⁴. Сицевых последователей и воинов требует Господь, какие имеяше сотник он, иже рече: глаголю сему, иди, и идет: и другому, прииди, и приидет⁵. Таковых обрете Спаситель на мори Галилейстем; рече токмо: грядита по Мне, и проч. она же абие по Нем идоста⁶; а с теми и вся, елика имеяху, оставиша, якоже глаголет Петр святый: се мы оставихом вся, и в след Тебе идохом⁷. Мало сие мнится быти, яко Апостоли оставиша мрежи своя; но зело велико есть. Аще бо и малыя суть мрежи; но к ним, и к рыбам ими взыскуемым, может быти великое сердца прилежание и пристрастие. Не подобает смотреть на оныя мрежи, но на вся, яже не оставляюще мреж, можаху имети; а наипаче оставиша с мрежами свою волю и мир весь, о нем же вся попечени с мрежами оставиша, единого Христа в сердце и в помышление приемше; вся сия оставиша Апостоли, егда мрежи оставиша. Но буди то мало, мрежи оставити. Сотворим и мы тако: зовет Христос, якоже прежде Апостолов, и нас всех к Себе; всем бо хощет спастися и глаголет: приидите ко Мне вси труждающиися. Аще кто не возмет креста своего, и в след Мене не идет, нестъ Мене достоин⁸ (а). И что возбраняет идти всякому за Христом? Не скиптры, не порфира, не царства и прочая, но худыя, тонкия, малыя, обветшалыя, раздранныя сети, которых не хощем оставити. А которыя то сети, увидим от Писания Божественнаго на прославление Спасителя нашего, всех к Себе зовущаго, нам же на пользу душевную.

Образ мира сего показуют нам Географы и Козмографы; но наилучший образ мира сего, от Бога написанный, есть море. В морской воде, аки в зерцале, наилучше мир сей увидети мощно; как много есть перемен на мори, толико в мире сем. Якоже на мори во время волнения возносятся и ниспадают, восходят до небес, и нисходят до бездн⁹, глаголет Псаломник: тако в мирском волнении не един Капернаум возвышается даже до небес, и даже до ада нисходит¹⁰. На мори иных несут благополучные ветры; иных бьют противныя волны, наносят на сирти, на иссопныя места, на харибды, на камение, и разбивают корабль; тако в мире плывут по морю корабли и полные товаров, плывут и порожнии, ничтоже имущии. В мори плавают рыбы великие и малыя, и большие живут меньшими; тож и в мори мира сего снедают словесные рыбы вместо хлеба. Суть на сем мори ловцы рыб, суть и ловцы человеков. Много на мори мира сего мреж и сетей, более, нежели б на мори Тивериадстем, якоже увидел премудрый Соломон, глаголя ко всякому: познавай, яко посредь сетей живеши в мире семь¹¹. Не рече близ сетей, но посреде. Аще и тишина есть на мори, не верят ей искуснейшие корабельники. Внезапу находит буря, противная погода, туча: тако и в мире сем. То страшно, яко на мори мира сего имут плавающии сети, но на себе самих; иных ловят, а прежде сами уловляеми бывают. Не мните, рыбы плавающии в мори мира сего, яко иный вас уловляет; сами от себе уловляеми бываете. Егда кто увязнет в сеть каковую, слагает то на Бога, иный слагает на диавола. Аще бо диавол и расставляет сети на нас, расставляет и ими ловить: но слушайте святаго Иакова, иже глаголет сице: Бог нестъ искуситель злым, не искушает же Той никогоже; кийждо же искушается, от своея похоти влеком и прельщаем. Таже похоть заченши, раждает грех; грех же содеян раждает смерть¹². Се первыя сети, похоть и страсти! О как много сетьми сими уловляются, егда их не оставляют, но распростирают на мори сего мира. По всем океане сем мрежи сия раскиданы, якоже увидел танновидец и наперсник Господень. Кинул оком на все страны мира сего, и что увидел кроме сего? Глаголет бо: всё, еже есть в мире, похоть плотская, и похоть очес и гордость житейская¹³. Се имате мрежи, имиже людие уловляеми бывают, и не хотят их оставити, дабы возмогли последовати Христу.

Похоть плотская есть мрежа, юже плавающии в мори житейстем распростирают в воды нечистыя, смрадныя, скверныя, смердящия, и уловляют не тако рыбы, яко жабы, свиния морския и псы, нечистоте и чреву работающие. С сицевыми сетьми ходящии, Христу последовати не могут. Прочь их от Себе отметает, глаголющи: все пси и любодеи¹⁴. Кто хощет послушати Господа, зовуща идти за Собою, подобает сети сия оставити умерщвлением плоти, якоже сотвори Павел святый, иже глаголет: умерщвляю тело мое, да не како иным проповедуя, сам неключим буду. Иже суть Христовы, плоть свою распяша со страстьми и похотъми. Плоть и кровь Богу угодити не могут: аще живем духом, духом и да ходим¹⁵. С похотию плотскою нечистою союзно есть всякое угодие плоти, яко-то на пример: чревобесие, пьянство, ленивство, уныние и прочая. Сеть есть воистину, держащая многих, и возбраняющая последовати Христу, чревоугодие, егда кто чреву работает, не может последовати Христу; сицевому бог чрево есть, а не Христос, поварня олтарь, священник повар, пары от брашен кадило, пение и пророчество отрыгание. Сему богу своему служат вси, иже посты святые не хранят, и не токмо не хранят, но и отметают, и хранящих оные ругают и смеются. Но ведайте, православнии Христиане, яко сии не последуют Христу, егда сетей сих не оставляют, и им не подобает последовати. Сеть есть и пьянство, егоже аще кто не оставит, не может последовати Христу. Пьяный и обычным путем не может шествовати, колеблется на все стороны, преклоняется, упадает; кольми паче путем заповедей Господних поступати за Христом не возможет. Трезвых последователей требует Спаситель. Пьяниц от последования своего и отъ наследия Царствия Божия отметает: ни пьяницы, рече, и прочии, Царствия Божия наследити не могут¹⁶. Сеть есть ленивство, уныние; и сего аще кто не оставит, не может последовати Христу: приидите, рече, ко Мне вси труждающиися и обремененнии, и Аз упокою вы¹⁷. А лежащих, о своем спасении нерадящих куда отсылаеши, Спасителю? кому велиши последовати? Мравию несмысленному: иди ко мравию, о лениве, и возревнуй видя пути его, и буди того мудрейший. Он бо, не сущу ему земледельцу, ни нудящаго имущи, ни под властию сущи, готовить себе в жатву пищу, и много же в лето творит уготовление. Доколе, о лениве, возлежиши, когда же от сна востанеши? Мало убо спиши, мало седиши, мало дремлеши, мало же объемлеши рукама своима перси; потом же найдет тебе аки зол спутник, убожество и нищета, аки благоходец теча¹⁸. Там же: Аз, рече, идущих за Мною, а не лежащих; текущих путь заповедей Господних, а не спящих требую. Царствие Божие нудится и нуждницы восхищают е? а не празднии¹⁹. Спите прочее и почивайте нерадящии о своем спасении²⁰; высыпайтеся, просыпающии не только утреню, но и обедню и вечерню. Но ведайте, яко не долго сего сна вашего будет; перервет его болезнь, в ню же и часка малаго и минуты задремати не возможете; перервет смерть, по которой вечнаго упокоения не обрящете. Сии бо токмо вечное упокоение обрящут, иже многотрудно Христу последуют; сих бо токмо на упокоение Христос зовет, глаголя: приидите ко Мне вси труждающиися и проч.²¹. Зде же спящим и о спасении своем нерадящим потомъ будет безсонница, юже соделает червь неусыпаемый и огнь неугасаемый. Сеть есть похоть плотская, еяже аще кто не оставит, не может последовати Христу.

Похоть очес есть мрежа, юже ловцы мира сего распростирают на сия воды, в которых обретаются бисеры, камение и маргариты и прочая сокровища. Нарицается же похоть очес, яко очи токмо одне питает, и ни к чему сия похоть, очеса уловляющая, угодна есть, токмо ко зрению. И сия сеть Христу последовати возбраняет, но имущих я удерживает, паче же отвлачит от Христа в глубину попечений житейских, а многих и в езеро огненное. С теми сетьми хотяше последовати Христу юноша оный, иже прииде ко Иисусу сам, и вопроси Его, глаголя: что благо сотворю, да имам живот вечный²²? Егда же рече ему Иисус: аще хощеши совершен быти, иди продажд имение твое, и даждь нищим; и имети имаши сокровище на небеси, и гряди во след Мене. Отъиде скорбя: бе бо имея стяжания многа²³. Отъиде, не последова Христу, яко не восхоте мрежи своея, похоти очес, сиесть, любоимения оставити. Сеть есть сребролюбие, с нею же Христу последовати не возможно. Ни от кого же толико пострада Павел, Посланник Христов, яко в сети похоти очес ходящих. Известна есть история, случившаяся в первом Македонском граде Филиппусах. Бысть некая рабыня, имущая дух пытлив, яже волхвованием творяше великую прибыль господам своим. Она, идущу Павлу на молитву, последова, и взываше на долзе идый, глаголющи: сии человецы раби Бога Вышняго суть, иже возвещают нам путь спасения. Стужив себе о сем Павел и не возлюби аще и истиннаго свидетельства от отца лжи-диавола, и изгна беса. Увидя то господие ея, яко изыде надежда прибыли, и поемше Павла влекоша к судиям, иже бивше его, всадиша в темницу тверду, в крепки узы²⁴. Видите, какия сети похоти очес, еже есть сребролюбия? К бесу влекут, не ко Христу. Можаше Павел чудесно изгнати беса, сетей же сих не можаше растерзати на людех сих. Подобно пострада в Ефесе от Димитрия сребросечца, творяща храмы сребряны Артемиде. Видящи бо, яко Павел от идолопоклонения влечет ко Христу, и яко сим умалится его художества корысть, молву сотвори на Павла, в которой едва не растерзан бе Павел, что держаше Димитрия при Артемиде²⁵. Сии сети, добре рече Павел: лихоимец, иже есть идолослужитель.

Гордыня житейская есть сеть, юже запускают плавателие в мирстем мори в воды облачныя, высокия, в воды облачныя властолюбия, любочестия, славолюбия и проч. И сия сети удерживают идти за Христом. Мнози вероваху во Христа, зовуща за собою идти, но сея мрежи, гордости житейския, славы мира сего, не хотяху оставити: от князь мнози вороваша в Него; но Фарисей ради не исповедоваху, да не из сонмищь изгнани будут: возлюбиша бо паче славу человеческую, неже славу Божию²⁶. Сею сетию удержаны бывши Фарисеи, не могоша идти за Христом, якоже Сам Христос о том обличи их, глаголя: како вы можете веровати, славу друг от друга приемлюще, и славы яже от единаго Бога не ищете²⁷?

К сей же мрежи гордыни житейския надлежит дружество житейское, зазоры житейские, боязнь осуждения житейского. Коль много бо людие ради дружества последование за Христом оставляют! коль многих добродетелей ради зазору лишаются! коль много добрых дел не соделывают! коль много злых исполняют за боязнь осуждения человеческаго? За дружество оставляется многажды церковь, литургия, вечерня и прочая; за дружество разоряется пост, молитва, обещание, воздержание, ради зазору и боязни осуждения человеческаго. И такими себе являют людие, каковы не суть: являют себе кроткими, умными, святыми, милостивыми, доброхотными, аще и не суть; ради зазора, за боязнь осуждения не глаголют истину, лукавнуют, похваляют, что похвалы недостойно; вся, и противная закону Божию, и церковному, и совести, и обычаю, творят за дружество, за зазор, за боязнь осуждения человеческаго.

Сих сетей не оставляющие, Христу последовати не могут. Аще кто и идет за Христом, якоже вси Христиане себе быти исповедуем; но не достигает, но сими привлекается в иныя тяжкия неудобьрастерзаемыя сети, яже суть худыя дела , якоже глаголет Псаломник: ужа грешник обязашася мне; в делех руку своею увязе грешник²⁸. Узами же греховными не ко Христу, но в сети смертныя привлекаются, якоже глаголетъ Иаков: кийждо же искушается, от своея похоти влеком и прельщаем; таже похоть заченши раждается грех; грех же содеян, раждает смерть²⁹. То сети внутренния, но ещё суть внешния сети.

Во-первых чувствия человеческая. О как многих сия отвлекают от Бога, от Христа! Сети чувствия отвлекоша от Бога прародителей наших: виде бо жена, яко добро древо в снедъ, и яко угодно очима видети и вземши от плода его, яде³⁰. Сети чувств весь мир завлекоша в потопление: видевше, рече, сынове Божии дщери человечи, яко добры суть, пояша себе в жены, от яже избраша³¹; и оттуду бысть потоп всемирный. Сетию чувств уловлен Давид: плавала рыбка в воде и мылася; кинув тамо зрения мрежу Давиде, уловлен бысть. Сею мрежею уловлен Сампсон, паде в крепкия сети, яко их, так сильный, растерзати не возможе. Сими сетьми уловися преславный воевода Олоферн, егда вверже их на прекрасную рыбицу Иудиф святую.

И сии сети, кто хощет последовати Христу, подобает оставити. Глаголет Псаломникъ: отврати очи мои, еже не видети суеты³². Правда ли, или ни, что сказуют о сиренах? Сказует то нам Спаситель, глаголя: Аще око твое десное соблазняет тя, изми е, и верзи от себе, и проч. и аще десная рука соблазняет тя усецы ю, и верзи от себе³³. О Спасителю мой! и кто Тебе восхощет последовати, аще сия чувственныя сети оставити повелеваешь, от нихже без тяжкия болезни отлучитися не возможно? Тяжко cие; а для телеснаго здравия и жития чего не творят человецы! Егда кто имать член телесный, хотя наичестнейший, хотя наинужнейший, заражен смертоносным вредом, не отсекает ли его ради жития временнаго? Мнози секут жилы, вырывают зубы, мнози дают себе урезывати нози, руце, сосца и очи, егда гангреною, ciecть антоновым огнем заражены суть тые уды; и не тяжко то: для чего? Я ко сим житие временное сохраняется; что, глаголю, сохраняется? на силу на малое время продолжается. А для живота вечнаго тяжко есть отсещи руку, избости око соблазняющее. Но сия не тако просто разумети подобает. Не принуждает Спаситель наш, чтобы кто топором руку соблазняющую отсекал себе, очи тернием избодал, но сицевое есть разумение: аще бы кому вещь была и так потребная, яко рука, и так нужная, яко око, аще вещь сия сеть есть отвлекающая от Бога, запинание и претыкание ногам; подобает ю от себе отдалити, оставити мрежи сия и сети. Тяжко ли и cиe? но потребно последующему за Христом. Царствие Божие нудится, и нуждницы восхищают е³⁴. Се не тяжко и не велико есть; тяжко ли отвратити от суеты очи, или смежити? Спящи то можно сие сотворити и почивающи.Реморы то малыя, удерживающия одушевленные корабли на мори сем, а не киты великие; меньше, нежели Апостолом бе мрежи своя оставити и последовати Христу; было бы токмо хотение послушати словес Христовых, Иже глаголет ко всякому вметающему мрежи своя в море мира сего: Грядита по Мне.

Грядите убо, рыбарие, абие, не отлагающе на иное время; грядите, оставльше мрежи своя, страсти и похоти; грядите, оставльше сети чувств, уловляющия вы, да не услышите в последний день от Господа словес сих: звах и не послушасте Мене; простирах словеса, и не внимасте, но отметасте Моя советы, и Моим обличениям не внимасте; тем же и Аз вашей погибели посмеются³⁵. Послушаим, якоже Симон и Андрей и прочие Апостоли. Но паче да услышим сей блаженный глас: Приидите благословении Отца Моего, наследуйте уготованное вам царствие от сложения мира³⁶. Аминь.